ကိုယ်ပိုင်ထုတ်လုပ်မှုဖြင့် ပဲမျိုးစုံဖူလုံစေရေး မဟာဗျူဟာများ အိန္ဒိယမူဝါဒရေးရာအဖွဲ့ အဆိုပြု

      အိန္ဒိယနိုင်ငံတွင် အစိုးရ၏ မူဝါဒရေးရာ ဦးဆောင်အတိုင်ပင်ခံအဖွဲ့ဖြစ်သည့် NITI Aayog သည် ၂၀၃၀ ပြည့်နှစ်၌ ကိုယ်ပိုင်ထုတ်လုပ်မှုဖြင့် ပဲမျိုးစုံဖူလုံစေရေးနှင့် ၂၀၄၇ ခုနှစ်တွင် နိုင်ငံ၏ ပဲမျိုးစုံထုတ်လုပ်မှုကို နှစ်ဆအထိ မြင့်တက်လာစေရေးတို့အတွက် အစိုးရအနေဖြင့် ချမှတ်ကျင့်သုံး သင့်သော မဟာဗျူဟာများနှင့် ဆောင်ရွက်သင့်သော နည်းလမ်းများကို အစီရင်ခံစာ တင်သွင်းလျက် အဆိုပြုထားရှိသည်ဟု Economic Times သတင်းဌာနက ဖော်ပြပါသည်။

          အဆိုပါ အစီရင်ခံစာတွင် အိန္ဒိယ၏ ပဲမျိုးစုံ စိုက်ပျိုးထုတ်လုပ်မှုသည် ရှေ့လာမည့်နှစ်များ အတွင်း ပုံမှန်တိုးတက်လျက် ၂၀၂၂ ခုနှစ်၌ တန်ချိန် ၂၆.၀၆ သန်းရှိခဲ့ရာမှ ၂၀၃၀ ပြည့်နှစ်တွင် တန်ချိန် ၃၄.၄၅ သန်းသို့လည်းကောင်း၊ ၂၀၄၇ ခုနှစ်အရောက်၌ နှစ်ဆတိုးလျက် တန်ချိန် ၅၁.၅၇ သန်းအထိ လည်းကောင်း ထွက်ရှိနိုင်မည်ဟု မျှော်မှန်းထားကြောင်း၊ ထိုသို့ ခန့်မှန်းချက်များသည် သီးနှံတစ်မျိုးချင်းအလိုက်နှင့် သီးနှံအားလုံး စုစည်းပေါင်းခြုံ၍ ခန့်မှန်းမှု နှစ်မျိုးလုံးအပေါ် အခြေခံ ထားခြင်းဖြစ်ကြောင်း၊ သီးနှံတစ်ခုချင်းအလိုက် ခန့်မှန်းချက်များအရ ပဲမျိုးစုံထုတ်လုပ်မှုသည် ၂၀၃၀ ပြည့်နှစ်၌ တန်ချိန် ၃၂.၁ သန်းနှင့် ၂၀၄၇ ခုနှစ်တွင် တန်ချိန် ၅၀.၇ သန်း တွက်ချက်ရရှိသဖြင့် သီးနှံများစုပေါင်း၍ ခန့်မှန်းချက်နှင့် အနီးစပ်ဆုံး ကိုက်ညီမှုရှိကြောင်း ဖော်ပြထားသည်။

          ပဲမျိုးစုံကဏ္ဍတွင် ကိုယ်ပိုင်ထုတ်လုပ်နိုင်စွမ်းဖြင့် ဖူလုံမှုရရှိစေရေးအတွက် NITI Aayog သည် ထောက်ခံအကြံပြုချက်များစွာကို ၎င်း၏ အစီရင်ခံစာ၌ ဖော်ပြထားရာ ရည်မှန်းထားသည့် သီးနှံအစုအဖွဲ့အလိုက် သီးနှံမျိုးစုံဖြန့်ခွဲခြင်းနှင့် စိုက်ပျိုးမှုဧရိယာကို မြဲမြံစွာထိန်းသိမ်းခြင်း၊ စိုက်ပျိုး ထုတ်လုပ်သည့် နယ်မြေဂေဟစနစ်အလိုက် သင့်လျော်မည့် နည်းပညာရပ်များကို အသုံးချခြင်း၊ အရည်အသွေးကောင်းမွန်သည့် သီးနှံမျိုးစေ့များ ဖြန့်ဖြူးခြင်း၊ စိုက်ပျိုးထုတ်လုပ်ရန် အလားအလာ ကောင်းမွန်သော ခရိုင်ပေါင်း ၁၁၁ ခု၌ လုပ်ငန်းသုံး ပစ္စည်းကိရိယာများရရှိစေရေး နှင့်အတူ မြေကွက်တစ်ကွက် သီးနှံမျိုးစေ့တစ်မျိုး စိုက်ပျိုးသည့် ကျေးရွာအစုအဖွဲ့စနစ်ကို အလေးပေး လုပ်ဆောင်ခြင်း စသည်တို့ ပါဝင်လျက်ရှိသည်။

          ထို့အပြင် ရာသီဥတုနှင့် လိုက်လျောညီထွေရှိမည့် အစီအမံများကို ကြိုတင်ချမှတ်ခြင်း၊ ဘက်စုံစောင့်ကြည့်ကြပ်မတ်မှုနှင့် ဆုံးဖြတ်ချက်ချမှတ်ရန် အထောက်အကူပြုစနစ်တို့မှတစ်ဆင့် သတင်းအချက်အလက်ကို အခြေခံ၍ ပြုပြင်ပြောင်းလဲမှု လုပ်ဆောင်ခြင်းတို့သည် အတ္တမနိဗာတ (Aatmanirbharta) ခေါ် ကိုယ့်အားကိုယ်ကိုးသည့် လမ်းစဉ်အတွက် အရေးပါကြောင်း၊ အဆိုပါ နည်းလမ်းများကို စုစည်းဆောင်ရွက်ခြင်းသည် ခန့်မှန်းထားသည့်အတိုင်းဖြစ်မြောက်စေရေးကို အားကောင်းခိုင်မာစေမည်ဖြစ်ကြောင်း NITI Aayog အဖွဲ့က ပြောဆိုထားသည်။

          အဆိုပါ အစီရင်ခံစာတွင် နိုင်ငံတော်အဆင့်၌ ပဲမျိုးစုံ ရောင်းလိုအားနှင့် ဝယ်လိုအား ကွာဟ ချက်ဖြစ်ပေါ်နေမှုကို လေ့လာဆန်းစစ်ထားရှိပြီး စုစုပေါင်း ပြည်တွင်းထုတ်လုပ်မှု၊ ပြည်ပမှ တင် သွင်းမှု၊ ပြည်ပသို့တင်ပို့မှု၊ သိုလှောင်မှုလက်ကျန်များ ပြောင်းလဲမှု၊ မျိုးစေ့အဖြစ် သုံးစွဲမှု၊ မွေးမြူ ရေးအစာအဖြစ် အသုံးပြုမှုနှင့် အလေအလွင့်ဖြစ်ပေါ်မှု စသည့်အချက်များကို ထည့်သွင်းတွက် ချက်လျက် ခန့်မှန်းချက်များကို ဖော်ထုတ်ထားခြင်းဖြစ်သည်။

          လွန်ခဲ့သော ဆယ်စုနှစ်တစ်ခုကျော်ကာလအတွင်း အိန္ဒိယ၏ ပဲမျိုးစုံထုတ်လုပ်မှု စုစုပေါင်း တွင် မျိုး၊ မွေးမြူရေးအစာနှင့် အလေအလွင့် သုံးရပ်ပေါင်းသည် ပျမ်းမျှအားဖြင့် ၁၁.၂ ရာခိုင်နှုန်းခန့် ပါဝင်ကြောင်း၊ ၎င်းအချက်အပေါ် အခြေခံလျက် ပြည်တွင်း ပဲမျိုးစုံ ရောင်းလိုအားသည် ၂၀၃၀ ပြည့် နှစ်၌ တန်ချိန် ၃၀.၆ သန်းနှင့် ၂၀၄၇ ခုနှစ်တွင် တန်ချိန် ၄၅.၈ သန်းရှိမည်ဟု ခန့်မှန်းထားကြောင်း သိရှိရသည်။

          အိမ်ထောင်စုအဆင့်၌ စားသုံးမှုပြောင်းလဲလာသည့်ဖြစ်စဉ်အပေါ် အခြေပြုသည့် နည်းလမ်း အရမူ ရှေ့လာမည့်နှစ်များအတွင်း အိန္ဒိယ၏ ပဲမျိုးစုံကဏ္ဍတွင် ပိုလျှံမှုရှိလာပြီး ၂၀၃၀ ပြည့်နှစ်၌ တန်ချိန် ၃.၇၉ သန်းနှင့် ၂၀၄၇ ခုနှစ်တွင် တန်ချိန် ၁၆.၄၈ သန်း အသီးသီးရှိမည်ဟု NITI Aayog ၏ အစီရင်ခံစာ၌ ခန့်မှန်းဖော်ပြထားသည်။

          ပဲမျိုးစုံ ဝယ်လိုအား အပိုင်းတွင် အစိုးရက ထုတ်ပြန်ထားသည့် အာဟာရသင့်တင့်မျှတစွာ စားသောက်ရေး အကြံပြုချက်များ (ICMR-NIN recommendations) အတိုင်း ကျန်းမာရေးနှင့် အညီ ဂရုပြု စားသုံးရေးကို မြှင့်တင်ခြင်းက အရေးပါမှုရှိကြောင်း၊ ပဲမျိုးစုံ၏ အာဟာရတန်ဖိုးများကို သိမြင်နားလည်စေခြင်း၊ နေ့စဉ်စားသုံးမှုတွင် ပါဝင်လာအောင် တွန်းအားပေးခြင်းနှင့် စားသုံးသူများ ၏ နှစ်သက်လိုလားမှုများကို ကိုင်တွယ်ဖြေရှင်းခြင်းတို့တွင် ယင်းသို့လုပ်ဆောင်ရန် လိုအပ်လျက် ရှိကြောင်း NITI Aayog အဖွဲ့က ပြောဆိုထားသည်။

          ရောင်းလိုအားနှင့် ဝယ်လိုအား နှစ်ရပ်လုံးအပေါ် လွှမ်းခြုံမည့် နည်းလမ်းကို ကျင့်သုံးဆောင် ရွက်ခြင်းဖြင့် အိန္ဒိယနိုင်ငံ အနေဖြင့် ပဲမျိုးစုံကဏ္ဍ၌ ကွာဟမှုများဖြစ်ပေါ်နေခြင်းကို ပေါင်းကူးဆက် သွယ်ပေးနိုင်မည်ဖြစ်ပြီး အဓိက အရေးပါသည့် ပဲမျိုးစုံကဏ္ဍ၏ အနာဂတ်ကာလ ရေရှည်တည်တံ့ ခိုင်မာစေမှုနှင့်အတူ ကိုယ်ပိုင်ထုတ်လုပ်မှုဖြင့် ဖူလုံမှုရရှိအောင် လုပ်ဆောင်နိုင်မည်ဖြစ်ကြောင်း NITI Aayog ၏ အစီရင်ခံစာတွင် ဖော်ပြထားပါသည်။

Source: Economic Times, 5 Sept 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)