ကုန်သွယ်ရေးစာချုပ်အတွက်ဆွေးနွေးမှုများရှိနေသော်လည်း အမေရိကန်သို့ သတ္တုတွင်းထွက်ပစ္စည်းကုန်ကြမ်းတင်ပို့မည်မဟုတ်သည့် အင်ဒိုနီးရှား

  သတ္တုနှင့် ကျောက်မီးသွေးတူးဖော်ခြင်းအပေါ် ဥပဒေနံပါတ်၃/၂၀၂၀ အရ အင်ဒိုနီးရှားနိုင်ငံသည် အမေရိကန်သို့ သတ္တုတွင်းထွက်ပစ္စည်းကုန်ကြမ်း တင်ပို့မည်မဟုတ်ကြောင်း အင်ဒိုနီးရှားနိုင်ငံစွမ်းအင်နှင့် သယံဇာတအရင်းအမြစ်ဝန်ကြီးဌာနက အတည်ပြုပြောကြားခဲ့ပါသည်။ သတ္တုနှင့်ကျောက်မီးသွေးဦးစီးဌာန၏ ညွှန်ကြားရေးမှူးချုပ် Tri Winarno က ဥပဒေအရ အင်ဒိုနီးရှားသည် ဥပဒေအသက်ဝင်သည့် ၂၀၂၀ ခုနှစ်၏နောက် ၃ နှစ်အကြာတွင် သတ္တုတွင်းထွက်ပစ္စည်းကုန်ကြမ်းများ တင်ပို့မှုကိုရပ်တန့်ခဲ့ကြောင်း နှင့် ယခင်က COVID 19 ကြောင့် ဖြေလျှော့မှုများရှိခဲ့သော်လည်း အကယ်၍ ပြန်လည်ဖွင့်ပေးပါက ဥပဒေကိုပြောင်းလဲရ မည်ဖြစ်ကြောင်း ပြောကြားခဲ့ပါသည်။ ထိုရှင်းလင်းချက်သည် အိမ်ဖြူတော် website တွင် နှစ်နိုင်ငံကြားအပြန်အလှန်ကုန်သွယ်ရေးအပေါ်ညှိနှိုင်းဆွေးနွေးမှုအတွက် မူဘောင်သစ်နှင့် ပတ်သတ်၍ ထုတ်ပြန်ချက်တင်ထားခြင်းအပေါ် တုံ့ပြန်မှုတစ်ခုဖြစ်ကြောင်း သိရပါသည်။ အမေရိကန်အစိုးရ၏အဆိုအရ ထိုကုန်သွယ်ရေးမူဘောင်သည် အမေရိကန်စက်မှုနှင့် စိုက်ပျိုး မွေးမြူရေးထုတ်ကုန်များအပေါ် အင်ဒိုနီးရှားကချမှတ်ထားသည့် ကုန်သွယ်ရေးအတားအဆီးများ ၏ ၉၉ ရာခိုင်နှုန်းကို ဖျတ်သိမ်းခြင်းအားဖြင့် ကာလကြာရှည်အပြန်အလှန်ဆက်နွယ်မှု အားကောင်းရန် ရည်ရွယ်ကြောင်း သိရပါသည်။ အပြန်အလှန်အနေဖြင့် အမေရိကန်သည် အင်ဒိုနီးရှားထုတ်ကုန်များအပေါ်အကောက်ခွန်နှုန်းကို ၁၉ ရာခိုင်နှုန်းထိ လျှော့ချသွားမည်ဟု သိရပါသည်။ ထိုသဘောတူညီချက်တွင် အမှတ်တံဆပ်တပ်ခြင်း၊ အသိအမှတ်ပြုလက်မှတ် ထုတ်ပေး ခြင်းနှင့် မူပိုင်ခွင့်ကာကွယ်ခြင်းအစရှိသည့် အကောက်ခွန်အတားအဆီး မဟုတ်သည်များကို ဖြေရှင်းရန် ပူးတွဲအားထုတ်သွားမည်ဟု ဖော်ပြထားကြောင်း သိရပါသည်။ သို့သော်အိမ်ဖြူတော် ၏ ထုတ်ပြန်ချက်တွင် အင်ဒိုနီးရှားသည် အရေးပါသောတွင်းထွက် ပစ္စည်းများ အမေရိကန်သို့ တင်ပို့ခြင်းအပေါ်ကန့်သတ်ချက်များဖယ်ရှားပေးမည်ဟု ပါဝင်သော ကြောင့် ထိုအကြောင်းသည် ကုန်ကြမ်းပစ္စည်း သို့မဟုတ် ပြုပြင်ထုတ်လုပ်ထားသည့်ပစ္စည်း မည်သည်ကိုရည်ညွှန်းသည်နှင့် ပတ်သတ်၍ မေးခွန်းများမြင့်တက်လျှက်ရှိကြောင်း သိရပါသည်။ မူဘောင်တွင်ပါဝင်သည့် အခြားကတိကဝတ်များတွင် ထောက်ပံ့မှုကွင်းဆက် လုံခြုံမှုမြှင့်တင် ခြင်း၊ တတိယနိုင်ငံများတွင် မမျှတသောကုန်သွယ်ရေးအလေ့အထများဖြေရှင်းခြင်း၊ ပို့ကုန် သွင်းကုန်စည်းမျဉ်းများ အထူးသဖြင့် အမေရိကန်ဒစ်ဂျစ်တယ်၊ အစားအစာနှင့် စိုက်ပျိုး မွေးမြူရေးထုတ်ကုန်များအပေါ်ဖြေလျှော့ခြင်း နှင့် နယ်စပ်ဖြတ်ကျော်အချက်အလက် ဝေမျှခြင်း အတွက် တံခါးဖွင့်လှစ်ခြင်းတို့ပါဝင်ကြောင်း သိရပါသည်။ လုပ်သားနှင့် သဘာဝပတ်ဝန်းကျင် ဧရိယာတွင် အင်ဒိုနီးရှားသည် လုပ်သားထုအခွင့် အရေးများရရှိစေရေး၊ သဘာဝ ပတ်ဝန်းကျင် ဆိုင်ရာဥပဒေများအားကောင်းရေးနှင့် တရားမဝင် ငါးဖမ်းခြင်းတားဆီးရေး ကတိကဝတ် ပြုခဲ့ကြောင်း သိရပါသည်။ သဘောတူညီချက်တွင် အင်ဒိုနီးရှားနှင့် အမေရိကန်ကုမ္ပဏီများကြား လေယာဉ်၊ စိုက်ပျိုးမွေးမြူရေးထုတ်ကုန်များနှင့် စွမ်းအင်တို့ပါဝင်သည့် အမေရိကန်ဒေါ်လာ ၂၂ ဘီလီယံကျော်တန်စီးပွားရေးစာချုပ်များလည်း ပါဝင်ကြောင်း သိရပါသည်။ ကုန်သွယ်ရေး သဘောတူညီချက်အဆုံးသတ်ရန် ဆက်လက်ဆွေးနွေး မှုများကို လာမည့်ရက်သတ္တပတ်များတွင် ပြုလုပ်ရန်မျှော်မှန်းရကြောင်း သိရပါသည်။

DOCA(ရန်ကုန်)