ရုရှားသည် ဂျုံတင်ပို့ရန်အတွက် ဗီယက်နမ်၊ အင်ဒိုနီးရှား၊ ဖိလစ်ပိုင်၊ မလေးရှားနှင့် ဘင်္ဂလားဒေ့ရှ်ဈေးကွက်များသို့ ရည်ရွယ်ထားကြောင်း စိုက်ပျိုးရေးထုတ်ကုန်တင်ပို့မှုအေဂျင်စီ အကြီးအကဲ Ilya Ilyushin က ဇူလိုင်လ ၁၇ ရက်နေ့ကပြောကြားခဲ့ပါသည်။ ကမ္ဘာ့အကြီးမားဆုံး ဂျုံတင်ပို့သူဖြစ်သည့်ရုရှားသည် အစဉ်အလာဈေးကွက်များဖြစ်သည့် အီဂျစ်နှင့် တူရကီတို့က ပြည်တွင်းထုတ်လုပ်သူများကိုပံ့ပိုးရန် အခါအားလျော်စွာတင်သွင်းမှုပိတ်ပင်သည့်အတွက် စိုက်ပျိုးရေး ထုတ်ကုန်တင်ပို့မှုကွဲပြားရန် ဈေးကွက်များရှာဖွေလျှက်ရှိကြောင်း သိရပါသည်။ လွန်ခဲ့သည့်နှစ်တွင် ရုရှားသည် ဗီယက်နမ်သို့ဂျုံတင်ပို့မှုကို လေးဆအထိအရှိန်မြှင့်တင်ခဲ့ကြောင်း သိရပါသည်။ Ilyushin က ယခုအခါ ၎င်းတို့ရည်မှန်းချက်သည် အရှေ့တောင်အာရှဈေးကွက်သို့ ဝင်ရောက်ရန်ဖြစ်ကြောင်း၊ ဗီယက်နမ်နှင့် ဘင်္ဂလားဒေ့ရှ်သာမက မလေးရှားနှင့် ဖိလစ်ပိုင်တို့ပါ ပါဝင်ကြောင်းနှင့် ထိုနိုင်ငံများသည် ဝယ်လိုအားနှင့်ဂျုံတင်သွင်းမှုသိသာထင်ရှားသည့် နိုင်ငံကြီး များဖြစ်ကြောင်း ပြောကြားခဲ့ပါသည်။ လွန်ခဲ့သည့်ရာသီတွင် ဘင်္ဂလားဒေ့ရှ်သည် ရုရှားဂျုံ တတိယအကြီးမားဆုံးဝယ်ယူသူဖြစ်ကြောင်း သိရပါသည်။ အချို့ဒေသများတွင်အထွက်နှုန်း ကျဆင်းမှုများရှိနေသော်လည်း ရုရှားသည် ၂၀၂၅ ခုနှစ်တွင် ဂျုံတန်ချိန် ၁၃၅ သန်းရိတ်သိမ်းရန် မျှော်မှန်းထားပြီး တန်ချိန် ၄၅ သန်းတင်ပို့ရန်စီစဉ်ထားကြောင်း သိရပါသည်။ ရုရှား၏ဂျုံ ထုတ်လုပ်သူများနှင့် တင်ပို့သူများအသင်း၏ ဘုတ်အဖွဲ့ဝင်နှင့် Bio-ton agricultural holding ၏ CEO ဖြစ်သူ Eduard Zernin က ရုရှားသည် အရှေ့တောင်အာရှဈေးကွက်တွင် ဩစတေးလျ၊ အမေရိကန်နှင့် ကနေဒါတို့ထံမှ ပြင်းထန်သည့်ယှဉ်ပြိုင်မှုများနှင့်ရင်ဆိုင်ရနိုင်ကြောင်းနှင့် ၎င်းတို့အနေဖြင့် ထိုပြင်းထန်သည့်ယှဉ်ပြိုင်မှုများအတွက် ပြင်ဆင်ထားရန်လိုအပ်ကြောင်း ပြောကြားခဲ့ကြောင်း သိရှိရပါသည်။
Bangkok Post
DOCA (ရန်ကုန်)