ကမ္ဘာ့ထိပ်တန်း ပီလောပီနံတင်ပို့မှု အများဆုံးနိုင်ငံအဖြစ်သို့ ထိုင်းရောက်ရှိ

    ထိုင်းနိုင်ငံသည် ၂၀၂၄ ခုနှစ်တွင် ကမ္ဘာ့ထိပ်တန်း ပီလောပီနံတင်ပို့ရောင်းချသည့် နိုင်ငံ အဖြစ်သို့ ရောက်ရှိခဲ့ပြီး ၂၀၂၅ ခုနှစ်တွင်လည်း ထိပ်ဆုံးနေရာကို ထိန်းသိမ်းထားနိုင်ရန် ရည်မှန်း ထားကြောင်း ထိုင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ကြေညာခဲ့သည်။

      အဆိုပါ ဝန်ကြီးဌာနရှိ နိုင်ငံခြားကုန်သွယ်ရေးဦးစီးဌာန၏ ညွှန်ကြားရေးမှူးချုပ် Arada Fuangtong က မကြာသေးမီက သတင်းထောက်များအား ပြောကြားရာတွင် ၂၀၂၅ ခုနှစ် ပထမ ၅ လအတွင်း ပီလောပီနံတန်ချိန် ၄.၀၆ သန်း တင်ပို့နိုင်ခဲ့ပြီး ယခင်နှစ် ကာလတူတင်ပို့မှုနှင့် နှိုင်းယှဉ် ပါက ၃၇.၁၆ ရာခိုင်နှုန်း တိုးတက်မှုရှိကြောင်း၊ ယခုနှစ် တစ်နှစ်ပတ်လုံး တင်ပို့မှုသည် တန်ချိန် ၇.၅ သန်းအထိ ရောက်ရှိလာနိုင်ပြီး နိုင်ငံတကာတွင် ထိပ်တန်းစီးပွားဖြစ် ပီလောပီနံ တင်ပို့သည့်နိုင်ငံ အဖြစ် ၂ နှစ်ဆက်တိုက် ရပ်တည်နိုင်မည်ဟု ခန့်မှန်းထားကြောင်း ထုတ်ဖော်ပြောကြားခဲ့သည်။

    ပီလောပီနံအတွက် မကြာသေးမီက စူးစမ်းလေ့လာတွေ့ရှိထားသည့် ဈေးကွက်သစ်များ နှင့် အလားအလာရှိသော ဝယ်လက်ဈေးကွက်များဆိုင်ရာ နောက်ဆုံးရသတင်းများကို ထိုင်းတင်ပို့သူ များထံ မျှဝေပေးနိုင်ရန် ၎င်း၏ဌာနမှ အကောင်အထည်ဖော်မည့် အစီအစဉ်သည် ဤရည်မှန်းချက် အောင်မြင်ရေးအတွက် အထောက်အကူပြုလိမ့်မည်ဟု Arada Fuangtongက ပြောကြားခဲ့သည်။

     တရုတ်နိုင်ငံ၏ ကြီးမားသောဈေးကွက်အပြင် ထိုင်းပီလောပီနံကို ဝယ်လိုအားများသည့် အခြားဝယ်လက်များမှာ မလေးရှား၊ ဂျပန်၊ တောင်ကိုရီးယားနှင့် အရှေ့အလယ်ပိုင်းဒေသတို့မှ ကုမ္ပဏီများ ဖြစ်ကြသည်။

    ထိုင်းပီလောပီနံတင်ပို့သူများအနေဖြင့် ၎င်းတို့၏ တင်ပို့မှုများကို အထူးသဖြင့် တိရစ္ဆာန် အစာလုပ်ငန်းများနှင့် ဆက်စပ်နေသည့် ကဏ္ဍများကဲ့သို့ နောက်ထပ် အလားအလာရှိသော ကဏ္ဍ အသစ်များသို့ ချဲ့ထွင်သင့်သည်ဟု Ms. Arada  က အကြံပြုထားသည်။

    ကမ္ဘာ့ဈေးကွက်တွင် ယခုနှစ် အစပိုင်း၌ ပီလောပီနံဈေးနှုန်းများသည် ၃၀ ရာခိုင်နှုန်းခန့် ကျဆင်းသွားခဲ့သော်လည်း နောက်ဆုံးရ ကိန်းဂဏန်းအချက်အလက်များအရ ကမ္ဘာတစ်ဝန်းမှ ဝယ်လိုအား များပြားလာမှုကြောင့် ထိုင်းတွင်စိုက်ပျိုးသော ပီလောပီနံ၏ ပြည်တွင်းဈေးနှုန်းသည် ပျမ်းမျှအားဖြင့် ၁ ကီလိုဂရမ်လျှင် ၂ ဘတ်အထိ နှစ်ဆတိုးမြင့်လာခဲ့သည်။

    ၂၀၂၅ ခုနှစ်၊ ဇူလိုင်လ ၂၉ ရက်မှ ၃၀ ရက်နေ့အထိ ဘန်ကောက်မြို့ရှိ ဈေးဝယ်စင်တာနှင့် စီးပွားရေးအထိမ်းအမှတ် အဆောက်အဦဖြစ်သည့် ICONSIAM တွင် ထိုင်း နိုင်ငံခြားကုန်သွယ်ရေး ဦးစီးဌာနက စီစဉ်ကျင်းပသည့် ၇ ကြိမ်မြောက် ကမ္ဘာ့ပီလောပီနံညီလာခံ၌ ပါဝင်ဆွေးနွေးကြမည့် ကမ္ဘာတစ်ဝန်းရှိ ဝယ်လက်များထံမှ အနည်းဆုံး ဘတ်ငွေသန်း ၃၀၀ တန်ဖိုးရှိသော အမှာစာ အသစ် များရရှိရန် မျှော်လင့်ထားကြောင်း သိရသည်။

Source: Thai PBS World, 30 Jul 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)