စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည် မိတ်ဘက်ဌာနဆိုင်ရာများနှင့် ပူးပေါင်း၍ (၂၃.၆.၂၀၂၅)ရက်နေ့၊ နံနက်(၀၉:၀၀)အချိန်တွင် ဟင်္သာတမြို့ပေါ်ရပ်ကွက်နှင့် ပဒေသာဈေး အတွင်းရှိ စတိုးဆိုင်များ၊ ကုန်မျိုးစုံအရောင်းဆိုင်များတွင် ရောင်းချလျက်ရှိသော ဆစ်ဂနယ်သွားတိုက်ဆေး ထုတ်ကုန်များအား တုပရောင်းချမှုရှိ/ မရှိ ဈေးကွက်စောင့်ကြည့်စစ်ဆေးခြင်းကို ဆောင်ရွက်ခဲ့ပါသည်။
ထိုသို့ကွင်းဆင်းစစ်ဆေးခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ဆစ်ဂနယ်သွားတိုက်ဆေး ထုတ်ကုန်နှင့် တုပထုတ်လုပ် သော ကုန်စည်များရောင်းချမှုရှိ/ မရှိ စစ်ဆေးခဲ့ပြီး၊ ဆစ်ဂနယ် ထုတ်ကုန်အစစ်နှင့် အတုအပကွားခြားမှု ဖော်ပြချက်ဖြစ်သော အမှတ်တံဆိပ်အရောင်၊ သွားတိုက်ဆေးဘူး အောက်ဖက် အပိတ်နေရာ၊ ဘူးအပေါ် တွင် ရိုက်နှိပ်ထားသော လူမျက်နှာအရောင်၊ သွားတိုက်ဆေးအနှစ်အရောင်နှင့် ဂျပ်ဖာပုံစံတို့ကို အသေးစိတ် စစ်ဆေးခဲ့ပြီး၊ ဈေးကွက်အတွင်း အတုအပ ကုန်စည်များ ရောင်းချမှုမရှိကြောင်း စစ်ဆေးတွေ့ရှိ ရပါသည်။ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ကြော်ငြာထားသော ညွှန်ကြားချက် အမှတ်(၂/၂၀၁၉)နှင့်အညီမြန်မာဘာသာဖြင့်ပြည်စုံစွာဖော်ပြထားသောကုန်စည်များ၊ကုန်အညွှန်းအမှတ် အသားဖော်ပြခြင်းနှင့်စပ်လျဉ်း၍ မည်သည့် စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့)တစ်ခုထက် ပို၍တွဲလျက်ဖြစ်စေ၊ ရေးသားဖော်ပြထားသော ကုန်စည်များကိုသာ ရောင်းချရမည်ဖြစ်ကြောင်း အသိပညာပေးပြောကြားခဲ့ပြီး ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။
(DOCA ဧရာဝတီ)