ဂျာမနီနိုင်ငံမှ GEO Group သည် ဗီယက်နမ်နိုင်ငံ Binh Dinh ပြည်နယ်တွင် ပြည့်ဖြိုးမြဲ စွမ်းအင်လုပ်သားထုလေ့ကျင့်ရေးနှင့် ဖွံ့ဖြိုးတိုးတက်ရေးစင်တာတည်ထောင်ရန်အတွက် အမေရိကန်ဒေါ်လာ သန်း ၅၀ ရင်းနှီးမြှုပ်နှံမည်ဟု ကြေညာခဲ့ပါသည်။ ထိုကြေညာချက်ကို ပြည်နယ်ပြည်သူ့ကော်မတီဥက္ကဌ Pham Anh Tuan၊ GEO Group ဥက္ကဌ Franz Josef Claes နှင့် O-DOOR ဗီယက်နမ်ထံမှ တာဝန်ရှိသူများကြား ဇွန်လ ၁၈ ရက်နေ့ကကျင်းပခဲ့သည့် အလုပ်ရုံ ဆွေးနွေးပွဲအတွင်း ပြုလုပ်ခဲ့ခြင်းဖြစ်ကြောင်း သိရပါသည်။ Phu My ခရိုင်ရှိ ၂၀ ဟတ်တာ ကျယ်ဝန်းသော ကမ်းရိုးတန်းတွင်တည်ဆောက်မည့် စင်တာကို လေ၊ ဆိုလာနှင့် အစိမ်းရောင် ဟိုက်ဒရိုဂျင်နည်းပညာများလေ့ကျင့်ရေးအတွက် ဒေသတွင်းအချက်အချာဖြစ်လာရန် ရည်ရွယ် ကြောင်း သိရပါသည်။ ၎င်းကို GEO နှင့် O-DOOR ဗီယက်နမ်ကြားပူးတွဲတည်ထောင်မည်ဖြစ်ပြီး နိုင်ငံတကာစံနှုန်းများနှင့်ကိုက်ညီရန်နှင့် Global Wind Organization အသိအမှတ်ပြုလက်မှတ်ရ နည်းပညာရှင် နှစ်စဉ် ထောင်ပေါင်းများစွာလေ့ကျင့်ပေးနိုင်ရန် မျှော်မှန်းထားကြောင်း သိရပါ သည်။ ဂျာမနီနိုင်ငံရှိလေစွမ်းအင်ဖွံ့ဖြိုးတိုးတက်မှုရှေ့ဆောင် GEO သည် အဆင့်မြင့် တာဘိုင်နှင့် ဟိုက်ဒရိုဂျင်ထုတ်လုပ်မှုနည်းပညာများကို ဗီယက်နမ်သို့ လွှဲပြောင်းရန် စီစဉ်ထားကြောင်း သိရပါ သည်။ GEO သည်လတ်တလောတွင် နိုင်ငံပေါင်း ၁၂ နိုင်ငံ၌ လေ့ကျင့်ရေးစင်တာ ၂၂ ခု လည်ပတ် လျှက်ရှိသော်လည်း ထိုစင်တာများသည် Binh Dinh တွင် စီစဉ်ထားသည့်စင်တာကဲ့သို့ ခေတ်မီဒီဇိုင်းများ ပါဝင် ခြင်းမရှိကြောင်း သိရပါသည်။ လေ့ကျင့်ရေးဝန်ဆောင်မှုများအပြင် စီမံကိန်းတွင် ဟိုက်ဒရိုဂျင်နှင့် ဆက်စပ်သည့် လုပ်ငန်းစဉ်များမှဆင်းသက်လာသည့် အစိတ်အပိုင်းများထုတ်လုပ်ရန်အတွက် ကုန်ထုတ်လုပ်သည့်စက်ရုံပါဝင်မည်ဖြစ်ပြီး သုတေသနနှင့် နည်းပညာလွှဲပြောင်းမှုပါ လုပ်နိုင်စွမ်း ရှိကြောင်း သိရပါသည်။ Tuan က ထိုစင်တာကနဦးဆောင်ရွက်မှုသည် Binh Dinh ပြည်နယ်အား သန့်စင်သောစွမ်းအင်နှင့် အစိမ်းရောင်လုပ်သားထုဖွံ့ဖြိုးတိုးတက်ရေးတွင် ဦးဆောင်သူဖြစ်လာရန် ဗျူဟာကျသောဆောင်ရွက်မှုဟု အမွှမ်းတင်ပြောကြားခဲ့ပါသည်။ စီမံကိန်းအတွက် ဥပဒေ လုပ်ငန်းစဉ်များမှာ အတော်အသင့်ပြီးမြောက်နေပြီဖြစ်ပြီး ရင်းနှီးမြှုပ်နှံမှုအသိအမှတ်ပြုလက်မှတ် ကို ဂျူလိုင်လ ၇ ရက်နေ့နောက်ပိုင်းရရှိရန်မျှော်မှန်းရကြောင်း သိရပါသည်။
Vietnam Plus
DOCA (ရန်ကုန်)