VinSpeed အမြန်ရထားလမ်းရင်းနှီးမြှုပ်နှံမှုနှင့် ဖွံ့ဖြိုးတိုးတက်မှု JSC သည် အမေရိကန် ဒေါ်လာ ၆၁.၃၅ ဘီလီယံခန့်မှန်းကုန်ကျမည့် ဗီယက်နမ်နိုင်ငံ တောင်ပိုင်း-မြောက်ပိုင်း ပြေးဆွဲ မည့် အမြန်ရထားလမ်းတွင် ရင်းနှီးမြှုပ်နှံမည်ဟု မေလ ၁၄ ရက်နေ့က ကြေညာခဲ့ပါသည်။ ၂၀၃၀ ခုနှစ်တွင် ပြီးမြောက်ရန် ရည်မှန်းထားသည့် ထိုစီမံကိန်းကို ဗီယက်နမ်၏ခေတ်မီရထားလမ်း လုပ်ငန်းအတွက် အခြေခံအုတ်မြစ်ထူထောင်ရန်နှင့် ဒေသတွင်းစီးပွားရေးဖွံ့ဖြိုးတိုးတက်မှု လှုံ့ဆော်ရန် ရည်ရွယ်ကြောင်း သိရပါသည်။ ရင်းနှီးမြှုပ်နှံမှုမူဘောင်၏တစ်စိတ်တစ်ပိုင်းအဖြစ် VinSpeed သည် စုစုပေါင်းမတည်ရင်းနှီးငွေ၏ ၂၀ ရာခိုင်နှုန်းဖြစ်သော အမေရိကန်ဒေါ်လာ ၁၂.၂၇ ဘီလီယံကို စိုက်ထုတ်သုံးစွဲမည်ဖြစ်ပြီး ကျန် ၈၀ ရာခိုင်နှုန်းကို နိုင်ငံတော်ဘက်ဂျက်မှ ချေးငှားသုံးစွဲမည်ဟု သိရပါသည်။ ကုမ္ပဏီသည် အတိုးနှုန်းသုညနှင့် ၃၅ နှစ်အတွင်း ပေးချေရန် အဆိုပြုသွားမည်ဟု သိရပါသည်။ ၎င်းတို့သည် ၂၀၂၅ ခုနှစ် ဒီဇင်ဘာလတွင် တည်ဆောင်မှုစတင် မည်ဖြစ်ပြီး ၂၀၃၀ ခုနှစ် ဒီဇင်ဘာလတွင် စတင်လည်ပတ်ရန် ရည်မှန်းထားကြောင်းသိရပါသည်။ ကုမ္ပဏီသည် ယခုအခါ တရုတ်၊ ဂျာမနီနှင့် ဂျပန်တို့ထံမှ ထိပ်တန်းမိတ်ဖက်များနှင့် နည်းပညာလွှဲပြောင်းရေးနှင့် မီးရထားစက်ခေါင်းနှင့် အတွဲများ၊ အချက်ပြစနစ်များ ပြည်တွင်း ထုတ်လုပ်ရာတွင် လွယ်ကူချောမွေ့စေရန်အတွက် ပြောဆိုဆွေးနွေးမှုများလုပ်ဆောင်နေကြောင်း သိရပါသည်။ ထို့ပြင် VinSpeed သည် ဝင်ငွေရရှိမှုကိုပံ့ပိုးပေးနိုင်ရန်အတွက် မိတ်ဖက်များ ဖြစ်သည့် Vingroup နှင့် VinHomes တို့နှင့်ပူးပေါင်း၍ အဓိကရထားဘူတာများအနီးတွင် ကျယ်ပြန့်သောမြို့ပြအိမ်ရာများတည်ထောင်သွားမည်ဟု သိရပါသည်။
DOCA (ရန်ကုန်)