ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင် တိုက်ရိုက်မျိုးစေ့ချကိရိယာ (Seeder) အသုံးပြုခြင်းကြောင့် ရရှိလာသည့်အကျိုးကျေးဇူးများ အသိပညာပေးဟောပြောပွဲကို ဇန်နဝါရီလ(၂၂)ရက်နေ့၊ နံနက်(၁၀:၀၀)နာရီအချိန်တွင် ကွင်းအမှတ်(၂၉၃)၊ လာပကိန်းကွင်း၊ ဦးပိုင် အမှတ်(၁၁/၁) ဦးမိုးစီ၏ လယ် (၅)ဧကတွင် ကျင်းပခဲ့ကြောင်း သိရပါသည်။
အဆိုပါ အသိပညာပေးဟောပြောပွဲတွင် မြို့နယ်စီမံအုပ်ချုပ်ရေးအဖွဲ့ခေတ္တဥက္ကဌ ဗိုလ်မှူးထွန်းဇော်မင်းမှ အဖွင့်အမှာစကားပြောကြားခဲ့ရာတွင် နိုင်ငံတော်၏လယ်ယာဖွံ့ဖြိုးရေး တိုးတက်ရေးအတွက် ဆောင်းသီးနှံသီးထပ်၊ သီးညှပ်စိုက်ပျိုးဖြစ်ထွန်းအောင်မြင် စေရေးအဓိကထား လုပ်ဆောင်ကြရန် Seeder တိုက်ရိုက်မျိုးစေ့ချကိရိယာအသုံးပြုခြင်းကြောင့် ရရှိလာသည့် အကျိုးကျေးဇူးများကို ပြောကြားခဲ့ပြီး စိုက်ပျိုးရေးဦးစီးဌာနမှ မြို့နယ်ဦးစီးမှူး ဦးသက်နိုင်နှင့် စက်မှုလယ်ယာဦးစီးဌာနမှ မြို့နယ်ဦးစီးမှူးတို့က Seeder တိုက်ရိုက်မျိုးစေ့ချကိရိယာ၏ ထူးခြားချက်၊ အားသာချက်၊ စွမ်းဆောင်ချက်၊ ကုန်ကျစရိတ်သက်သာပြီး အချိန်မီစိုက်ပျိုး ရိတ်သိမ်းနိုင်ကြောင်း အထွက်နှုန်း ကောင်းမွန်းခြင်းတို့ကြောင့် ဝင်ငွေတိုးတက်စေခြင်းစသည့် အကျိုးကျေးဇူးများအား အသေးစိတ် ရှင်းလင်းကာ အသိပညာပေးဟောပြောခဲ့ကြောင်း သိရပါသည်။
အဆိုပါ Seeder တိုက်ရိုက်မျိုးစေ့ချ ကိရိယာဖြင့် နွေစပါးစိုက်ပျိုးခြင်း အကျိုးကျေးဇူးများ အသိပညာပေးဟောပြောပွဲသို့ မြို့နယ်စီမံအုပ်ချုပ်ရေးအဖွဲ့ခေတ္တဥက္ကဌ ဗိုလ်မှူးထွန်းဇော်မင်းနှင့် အဖွဲ့ဝင်များ၊ မြို့နယ်ဌာနဆိုင်ရာများမှ တာဝန်ရှိသူများ၊ ရပ်ကွက်ကျေးရွာများမှ အုပ်ချုပ်ရေးမှူးနှင့် တောင်သူများ တက်ရောက်ခဲ့ကြောင်း သိရပါသည်။
DOCA(ရန်ကုန်)