ပဲကြာဆံဖြင့်ချက်ပြုတ်ခြင်းဖြစ်သည့် ကြာဆံဟင်းကို အစဉ်တစိုက် နှစ်သက်စွာစားသုံးလေ့ရှိရာမှ ယခုအခါ ပဲကြာဆံသုတ်၊ ယိုးဒယားစတိုင်ပဲကြာဆံထောင်းဟူ၍ ထပ်မံစားသုံးသည့်အလေ့အထ တိုးလာသည်ကိုတွေ့ရပါသည်။ မြန်မာနိုင်ငံတွင် ဆန်ကြာဆံကို ဒေသအများစုတွင် ထုတ်လုပ်ကြသော်လည်း ပဲကြာဆံကို မုံရွာမြို့နယ်မှ အဓိကထုတ်လုပ်ပါသည်။ မုံရွာစက်မှုဇုံနှင့် မုံရွာနယ်တွင် ကြာဆံစက် (၃၄)စက်ရှိပြီး အခြားဒေသများကို တင်ပို့ရောင်းချသည့် ဒေသထွက်ကုန်တစ်ခုဖြစ်ပါသည်။ ယခင်က (၅၀)ကျပ်သားနှင့်အထက်သာထုပ်ပိုးရောင်းချကြသော်လည်း ယခုအခါစူပါမားကက်များတွင် ထိုင်းနှင့် တရုတ်နိုင်ငံမှ ကြာဆံများ ဈေးကွက်နေရာယူလာသဖြင့် အထုပ်သေးများစနစ်တကျထုပ်ပိုး၍ လည်းကောင်း၊ အရည်အသွေးမီအောင် ဂရုပြု၍လည်းကောင်း ထုတ်လုပ်လျက်ရှိကြသည်။ ပဲကြာဆံကို ပိုမိုစိတ်ဝင်စား လာကြသောစားသုံးသူများသည် ကြာဆံထုတ်လုပ်မှုအပေါ် ဂရုပြုမိလာကြပြီး မုံရွာနယ် ထွက်ကြာဆံသည် ယခင်ထက် အရောင်ကြည်လာကြောင်း၊ ကျစ်လစ်လာကြောင်း တွေ့ရသည်။ ကြာဆံစက်ရုံများတွင် ကော်မှုန့်များသုံးသည်ဟုသိရပြီး စားသုံးရန်မသင့်သည့် ကော်မှုန့်များ သုံးစွဲခြင်း ဖြစ်ပါက စားသုံးသူ ဘေးအန္တရာယ်ရှိနိုင်သဖြင့် စားသုံးသူရေးရာဦးစီးဌာနသည် စားသုံးသူကို အကာ အကွယ်ပေးသည်ဟုသိရ၍ သတင်းပေးတိုင်ကြားလိုကြောင်း ပြောကြားလာသူရှိခဲ့ပါသည်။ စားသုံးသူနစ်နာ ဆုံးရှုံးသဖြင့် တိုင်ကြားမှုမဟုတ်သော်လည်း ဘေးအန္တရာယ်ကင်းရှင်းသော ကုန်စည်ကို ဖော်ဆောင် ဖြည့်ဆည်းနိုင်စေရန် စားသုံးသူရေးရာဦးစီးဌာန စစ်ကိုင်းတိုင်းဒေသကြီးဦးစီးမှူးရုံးအနေဖြင့် ကြာဆံစက်ပိုင်များ၊ ကုန်သည်/စက်မှုအသင်းမှ ပို့ကုန်သွင်းကုန်ဆောင်ရွက်နေသည့် ကုန်သည်ကြီးများ၊ အခြားစားသုံးသူများနှင့် အစားအသောက်နှင့် ဆေးဝါးကွပ်ကဲရေးဦးစီးဌာနမှ သိရှိဖြေကြားနိုင်သူများကို မေးမြန်းဆွေးနွေးလေ့လာခဲ့ပါသည်။
ပဲကြာဆံထုတ်လုပ်ရာတွင် အဓိကကုန်ကြမ်းပဲအမျိုးအစားများမှာ ကုလားပဲ(၃၀)ရာခိုင်နှုန်း၊ ပဲစဉ်းငုံ(၃၀)ရာခိုင်နှုန်းနှင့် ပဲနီ၊ ပဲယင်းစသောပဲများကို ကျန်ရာခိုင်နှုန်းအချိုးအစားတွင် ထည့်သွင်း ထုတ်လုပ်ကြပါသည်။ ကြာဆံစက်ရုံမှထွက်ရှိသည့် ဘေးထွက်ပစ္စည်းပဲဖတ်များသည် မွေးမြူရေး လုပ်ငန်းများကို အထောက်အကူပြုလျက်ရှိပါသည်။ ကြာဆံစက်များ၏ ရေဆိုးစွန့်ပစ်မှုကြောင့် အနံ့ထွက်မှုကို ခေတ်မီရေဆိုးစွန့်ပစ်မှုစနစ်ပြောင်းလဲထားသဖြင့် အနံ့အသက်ပြဿနာ လျော့ပါးသွားခဲ့ပါသည်။ ယခင်က ပဲကြာဆံ၏အရောင်မှာ အနည်းငယ်ဝါသည့်ဘက်ရောက်နေခဲ့သည့်အတွက် အရောင်ချွတ်ဆေးသုံးရန်ပင် စဉ်းစားခဲ့ကြသည်။ လက်ရှိ မုံရွာကြာဆံစက်ရုံထုတ် ပဲကြာဆံ (၁)ပိဿာ ဈေးနှုန်းမှာ(၄၉၀၀)ကျပ်ခန့်ဖြစ်သည်။ တရုတ်နှင့် ထိုင်းမှ ကြာဆံများသည် အရောင်အလွန်ကြည် နေကာ အရောင်လှခြင်း၊ အပင်သေးခြင်း၊ ထုပ်ပိုးမှုကောင်းခြင်းတို့အပြင် ဈေးနှုန်းမှာလည်း ပြည်တွင်းကြာဆံ ဈေးနှုန်းထက် အနည်းငယ်သာများပြားသည့်အတွက် စားသုံးသူများ အကြိုက်တွေ့လာသည်။ ထို့ကြောင့် ပြည်တွင်းကြာဆံဈေးကွက်မပျောက်အောင် စက်ပိုင်များက နည်းပညာလေ့လာခဲ့ကြရာ တရုတ်နှင့် ထိုင်း ကြာဆံများသည် ကော်မှုန့်ထည့်သွင်း ထုတ်လုပ်ကြောင်း သိရှိလာရသည်။ ထို့ကြောင့် ခေတ်နှင့်အညီ နည်းပညာကိုအမီလိုက်ကာ ကော်မှုန့်ကို ပြည်ပမှတင်သွင်း၍ ထည့်သွင်းအသုံးပြုခြင်း ဖြစ်ကြောင်း၊ အချိုးအစားအနေဖြင့် (၁၀)ရာခိုင်နှုန်းခန့်သာ ထည့်သွင်းရခြင်းဖြစ်ကြောင်းသိရသည်။ အရောင်ချွတ်ဆေးသုံးစရာမလိုဘဲ အရောင်ကြည်ခြင်း၊ နန်းအဆွဲခံခြင်းတို့ကြောင့် ပြည်တွင်းဈေးကွက် ကျဆင်းမှုလျော့ပါးအောင် အထောက်အကူပြုကြောင်းသိရပါသည်။
အဆိုပါကော်မှုန့်သည် FDA ဌာနက စိစစ်ပြီး Food Grade သတ်မှတ်ခွင့်ပြုချက်နှင့် သွင်းကုန်လိုင်စင်ဖြင့် ပြည်ပမှ တရားဝင်တင်သွင်းလာသည့် စားသုံးရန်ထုတ်လုပ်ထားသော စက်မှုစားသောက်ကုန်သုံး အစားအသောက်အမျိုးအမည် ( Pea Starch) ပဲကော်မှုန့်ဖြစ်ပါသည်။ ဆန်မှုန့်၊ ဂျုံမှုန့်၊ ပဲမှုန့်အပြင် ကော်မှုန့်ဟူ၍ ခေါက်ဆွဲကြော်၊ အသားငါးအသီးအရွက်အနှစ်ကပ်ကြော်များတွင် အသုံးပြုသည့်အလေ့အထကိုတော့ သိနေကြပြီဖြစ်ပြီး ပဲကြာဆံတွင် ထည့်သွင်းအသုံးပြုသည်ကို မသိရှိကြသေးခြင်းပင်ဖြစ်ပါသည်။ ကော်မှုန့်ဆိုတာဘယ်ကရတာလဲ၊ ပလပ်စတစ်တွေလား၊ စားသုံးရန်မသင့် ဘေးအန္တရာယ်ရှိမှာလားဟု စိုးရိမ်စိတ်ဖြင့်လေ့လာကြည့်ရပါသည်။ ကော်မှုန့်ဟု အလွယ်မြန်မာမှုပြုခေါ်ကြသောအမှုန့်များသည် ပီလောပီနံ၊ ဝဥ၊ အာလူး၊ ပဲ၊ ပြောင်း၊ ကောက်ညှင်း၊ သာကူကဲ့သို့ စားသုံးသီးနှံများမှ ထုတ်လုပ်သည့် လူလုပ်ကစီဓာတ်ပေါင်းဟုသိရသည်။ သာကူကို ထပ်မံသိရသည်မှာ ဆီအုန်းပင်၊ အုန်းပင်နှင့်ဆင်တူသည့် ဆာဂူပင်ကရသည့် သာကူစေ့ဟု ဖော်ပြထားသည်ကိုတွေ့ရသည်။ ဆေးဝါးဆေးတောင့်အခွံများကိုလည်း အလားတူကော်မှုန့်ဖြင့်ပင် ထုတ်လုပ်ရခြင်းဖြစ်ပါသည်။ သံသယရှိပါက လေ့လာခြင်းသည် ကောင်းမွန်သော်လည်း အများပြည်သူ ကျန်းမာရေး အတွက်စေတနာဖြင့် သတိပေးသည်ဟုဆိုကာ အမှန်တကယ် သုတေသနပြု စမ်းသပ်ထားခြင်းမဟုတ်ဘဲ အရောင်ဆေးဆိုးတယ်၊ စားသောက်ရန်မဟုတ်သည့်ပစ္စည်းများကို သုံးတယ်ဆိုပြီး ပြည်တွင်းစားသောက်ကုန်များကို မစားရဲအောင်အထိ သတင်းဖြန့်ချိမှုများတွေ့ရှိရပါသည်။ ထိုအခါ ပြည်ပမှတင်သွင်းလာသည့် စားသောက်ကုန်များကိုသာ သံသယမရှိယုံကြည်လာပြီး ပိုမိုသုံးစွဲလာခြင်းဖြင့် ပြည်တွင်းကုန်ထုတ်လုပ်မှုကို လျော့ကျစေပါသည်။ စားသုံးသူများ လုံခြုံစိတ် ချရမှုရှိစေရေးအတွက် ဥပဒေများပြဌာန်း၍ သက်ဆိုင်ရာဌာနများက ဆောင်ရွက်လျက်ရှိပါသည်။ ထို့ကြောင့် အမျိုးသားအကျိုးစီးပွားအတွက် ပြည်တွင်းဖြစ်ကိုအားပေးပါဟု အကြံပြုလိုပါသည်။ ပြည်တွင်းဈေးကွက်တွင် ဈေးနှုန်းချိုသာစွာသုံးစွဲနိုင်မည့် အရည်အသွေးကောင်းမွန်သော စားသောက်ကုန်များ ပိုမိုထုတ်လုပ်သုံးစွဲနိုင်စေရေး အဘက်ဘက်က ဝိုင်းဝန်းပူးပေါင်းဆောင်ရွက်သွားကြရမည် ဖြစ်ပါကြောင်း တိုက်တွန်းအပ်ပါသည်။
စားသုံးသူရေးရာဦးစီးဌာန
စစ်ကိုင်းတိုင်းဒေသကြီး