အသေးစား၊ အငယ်စားနှင့် အလတ်စား MSME လုပ်ငန်းရှင်များကို လိုအပ်သောငွေကြေးအရင်းအနှီး၊ နည်းပညာရရှိရေး၊ လူ့စွမ်းအားအရင်းအမြစ်ဖွံ့ဖြိုးတိုးတက်ရေး၊ ဈေးကွက်ရရှိရေး လိုအပ်သောအထောက်အပံ့များဆောင်ရွက်ပေးနိုင်ရန်၊ ပြည်တွင်းထုတ်ကုန်များနှင့် ပြည်ပသွင်းကုန်အစားထိုးထုတ်ကုန်များကို အားပေးမြှင့်တင်ရန်၊ ပို့ကုန်ကဏ္ဍမြှင့်တင်ရေးအတွက် ပြည်တွင်းထုတ်ကုန်များကို ပြည်ပသို့တင်ပို့ရောင်းချနိုင်ရေး ဆောင်ရွက်ရန် အထောက်အကူဖြစ်စေမည့် ကဏ္ဍတစ်ရပ်အဖြစ် ရန်ကုန်တိုင်းဒေသကြီးအတွင်း ပြပွဲများကျင်းပပေးလျက်ရှိရာ “၂၀၂၃ခုနှစ်၊ စက်မှုထုတ်ကုန်ပစ္စည်းများ တန်ဆောင်တိုင်ဈေးရောင်းပွဲတော်နှင့် ကုန်ထုတ်လုပ်မှုစက်ယန္တရားနည်းပညာပြပွဲ” ကို (၂၅-၁၁-၂၀၂၃)ရက်နေ့မှ (၂၇-၁၁-၂၀၂၃)ရက်နေ့အထိ ဒဂုံမြို့နယ်၊ ပြင်သူ့ရင်ပြင်တွင် ရန်ကုန်တိုင်းဒေသကြီးအစိုးရအဖွဲ့ကကြီးမှူး၍ စည်ကားသိုက်မြဲစွာကျင်းပပြုလုပ်ခဲ့ပါသည်။
အဆိုပါ ပွဲတော်တွင် ရန်ကုန်တိုင်းဒေသကြီးအတွင်းရှိ စက်မှုဇုန်များက လုပ်ငန်းရှင်များ၊ အသေးစား၊ အငယ်စား၊ အလတ်စား MSME လုပ်ငန်းရှင်များ၏ ထုတ်ကုန်အရောင်းပြခန်းများ၊ ဆန်၊ ဆီအရောင်းဆိုင်များ၊ အခြားတိုင်းဒေသကြီး/ပြည်နယ်များမှ လာရောက်ရောင်းချသော ထုတ်ကုန် ပစ္စည်းအရောင်းပြခန်းများအပါအဝင် ဆိုင်ခန်းပေါင်း ၄၄၅ခန်းကျော်ပြသရောင်းချမည်ဖြစ်ကြောင်းနှင့် နေ့စဉ် E-Sport Game ပြိုင်ပွဲများ၊ စတုဒီသာကျွေးမွေးခြင်းများ၊ ရုပ်ရှင်၊ သဘင်၊ ဂီတနှင့်ဟာသပညာရှင်များ၏ ဖျော်ဖြေတင်ဆက်မှုများ၊ မီးရှူးမီးပန်းပစ်ဖောက်မည့်အစီအစဉ်များဖြင့် ဖျော်ဖြေတင်ဆက်ခဲ့ကြောင်း သတင်းရရှိပါသည်။
DOCA(ရန်ကုန်)