စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဌာနခွဲတာဝန်ခံများ၊ မြို့နယ် တာဝန်ခံများသည် ခရိုင်အတွင်းရှိ စားသုံးသူပြည်သူများ စားသုံးသူကာကွယ်ရေးဆိုင်ရာ အသိပညာဗဟုသုတများရရှိစေရန် ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေးဟောပြောခြင်းများကို ဆောင်ရွက်လျက်ရှိရာ နိုဝင်ဘာလ ၁၆ ရက်နေ့ နံနက်ပိုင်းက တောင်ငူမြို့ အမှတ် ၁၈ ရပ်ကွက်ရှိ အိုးကုန်း အခြေခံပညာအလယ်တန်းကျောင်းခွဲတွင် ကျောင်းသားကျောင်းသူများအား စားသုံးသူကာကွယ်ရေးဆိုင်ရာများကို အသိပညာပေးဟောပြောခဲ့ပါသည်။
ဟောပြောပွဲတွင် တောင်ငူမြို့နယ်တာဝန်ခံ ဦးမြင့်သူက စားသုံးသူ၏ အခွင့်အရေးများနှင့် တာဝန်များကိုလည်းကောင်း၊ ခရိုင်ဦးစီးမှူးရုံးမှ ဌာနခွဲတာဝန်ခံ ဦးစောသန်းထိုက်ကျော်က စားသုံးသူနစ်နာဆုံးရှုံးမှု မရှိစေရေးအတွက် စစ်ဆေးရေးမှူးများက ဈေးကွက်အတွင်း ကွင်းဆင်း စစ်ဆေး ဆောင်ရွက်လျက်ရှိသည့် အခြေအနေများနှင့် ကုန်စည်များဝယ်ယူသုံးစွဲရာတွင် ကုန်စည်ပေါ် တွင်ဖော်ပြထားသော ကုန်အညွှန်း အမှတ်အသားများအား ဖတ်ရှုပြီး ကုန်အညွှန်းအမှတ်အသား ဖော်ပြချက်နှင့်အညီ လိုက်နာသုံးစွဲရန် လိုအပ်ပုံများကို ဟောပြောဆွေးနွေးပါသည်။
ဆက်လက်၍ ခရိုင်ဦးစီးမှူးရုံမှ ဌာနခွဲတာဝန်ခံ ဦးမင်းဇော်က ဈေးကွက်အတွင်း ရောင်းချလျက်ရှိသောကုန်စည်များနှင့်ပတ်သက်၍ ကျောင်းသားကျောင်းသူများ ရွေးချယ်ဝယ်ယူနိုင်ရန် ဆွေးနွေးခဲ့ကြောင်းနှင့် ဟောပြောပွဲသို့ ကျောင်းသားကျောင်းသူ ၂၇၀ ဦး တက်ရောက်ခဲ့ကြောင်း သိရှိရပါသည်။
DOCA(ပဲခူး)