စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် နိုင်ငံတော်၏ အမျိုးသား အကျိုးစီးပွား တိုးတက်မြင့်မားရေးအတွက် ထိရောက်သည့် ကုန်သွယ်ရေးမူဝါဒများ ချမှတ်ဆောင်ရွက်ပေးခြင်းနှင့် ဈေးကွက်စီးပွားရေးစနစ်နှင့်အညီ ပုဂ္ဂလိကအခန်းကဏ္ဍ ဖွံ့ဖြိုး တိုးတက်အောင် အားပေးမြှင့်တင်ဆောင်ရွက်ပေးလျက်ရှိပါသည်။ မြန်မာနိုင်ငံ၏ စီးပွားရေးဂေဟစနစ် ဖွံ့ဖြိုးတိုးတက်စေရန် ခေတ်မီ ကောင်းမွန်သည့် မူပိုင်ခွင့်စနစ်တစ်ရပ်ကိုလည်း ဆောင်ရွက်ပေးလျက်ရှိပါသည်။မျက်မှောက်ကာလနှင့်လိုက်လျောညီထွေဖြစ်သည့် ဒစ်ဂျစ်တယ် ကုန်သွယ်မှု ( Digital Trade) ကို အကောင်အထည်ဖော် ဆောင်ရွက် လျက်ရှိပါ သည်။
စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ “ဖွံ့ဖြိုးကုန်သွယ် နိုင်ငံကြွယ်” ဆောင်ပုဒ်နှင့်အညီ နိုင်ငံတကာ ကုန်သွယ်မှုလုပ်ငန်းများကို ယနေ့အထိ ခေတ်အဆက်ဆက် တိုးတက်အောင်မြင် အောင် ဆောင်ရွက်လျက်ရှိပါသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် ကုန်သွယ်ရေးဝန်ကြီးဌာန ခေတ်အချိန်ကပင် နိုင်ငံတော်၏ ရည်မှန်းချက်များ၊ စီးပွားရေးမူဝါဒ၊ မျှော်မှန်းချက်၊ ရည်မှန်းချက်တာဝန်များအပြင် ဝန်ကြီးဌာနမှကျင့်သုံးလျက်ရှိသော ကုန်သွယ်ရေးမူဝါဒ(၅)ရပ်၊ ၎င်းဦးစီးဌာန၏ဥပဒေများ၊ စားသုံးသူရေးရာဦးစီးဌာန၏ မူဝါဒများ၊ မြန်မာနိုင်ငံ ကုန်စည်အမှတ်အသားများ အက်ဥပဒေ၊ အရေး ကြီးကုန်စည်နှင့်ဝန်ဆောင်မှုဥပဒေ၊ ပို့ကုန်၊ သွင်းကုန်ဥပဒေ၊ ယှဉ်ပြိုင်မှု ဥပဒေ၊ စားသုံးသူကာကွယ်ရေးဥပဒေ၊ မြန်မာအထူးစီးပွားရေးဇုန်ဥပဒေများစသည်တို့ကို ကျင့်သုံးလျက်ရှိပါသည်။
နိုင်ငံခြားသားကုမ္ပဏီ၊ မြန်မာနိုင်ငံသားနှင့် နိုင်ငံခြားပေါင်းစည်းဆောင်ရွက်သည့် ကုမ္ပဏီများအား ပြည်တွင်းတွင် လက်လီ၊ လက်ကားရောင်းချခွင့်ပြုခြင်း၊ စီးပွားရေးနှင့် သက်ဆိုင်သောဌာန/ အဖွဲ့အစည်းများ၊ နိုင်ငံပိုင်ဘဏ်များ၊ ပုဂ္ဂလိကဘဏ်များ၊ ဘဏ်ရုံးခွဲများနှင့် အခြားစီးပွားရေး လုပ်ငန်းအသီးသီးတို့တွင် စီးပွားရေးလုပ်ငန်းများ လွယ်ကူစွာ ဆောင်ရွက်နိုင်ရန်၊ တိုးတက်မှုများ ရရှိနိုင်စေရန်အတွက် ပုဂ္ဂလိက ကဏ္ဍဖွံ့ဖြိုးတိုးတက်ရေးကော်မတီ၏ လမ်းညွှန်မှုနှင့်အညီ ဆောင်ရွက်လျက်ရှိပါသည်။ မြန်မာအထူးစီးပွားရေးဇုန်နှင့် ပတ်သက်၍ ကျောက်ဖြူ၊ ထားဝယ်၊ သီလဝါ ဟူ၍ ဇုန်(၃)ဇုန် တာဝန်ထား ဆောင်ရွက်လျက်ရှိပြီး ထို့အပြင် တောင်သူလယ်သမားများ နည်းပညာအပြည့်အဝရရှိစေရေး၊ သွင်းအားစုနှင့် ထုတ်လုပ်မှုလုပ်ငန်း ဆိုင်ရာများလွယ်ကူလျင်မြန်စွာ ပံ့ပိုး ပေးနိုင်ရေးနှင့် လယ်ယာထုတ်ကုန်များ ရောင်းချရာတွင် သင့်တင့်မျှတသော ဈေးကွက်နှင့် ဈေးနှုန်းရရှိရေးတို့ကို အကောင်အထည် ဖော်ဆောင်ရွက်နိုင်ရန် လယ်ယာထုတ်ကုန် စီမံခန့်ခွဲရေးအဖွဲ့၊ ဆန်စပါး ဝယ်ယူရေး ကြီးကြပ်မှုလုပ်ငန်း အဖွဲ့၊ ဆန်စပါးဈေးကွက်နှင့် ဈေးနှုန်းဆိုင်ရာ သုံးသပ်အကြံပြုတင်ပြရေးလုပ်ငန်း ကော်မတီများ ဖွဲ့စည်းဆောင်ရွက်လျက်ရှိပါသည်။ တိုင်းဒေသကြီး/ ပြည်နယ်များတွင် အချိုးကျမျှတစွာ ဖွံ့ဖြိုးတိုးတက်ရေး မူဝါဒဖြင့် ကာလတို/ ကာလရှည် လုပ်ငန်းစီမံကိန်းများ၊ အမျိုးသား ဘက်စုံဖွံ့ဖြိုးတိုးတက်မှုစီမံကိန်း၊ ဒေသန္တရ ဘက်စုံဖွံ့ဖြိုးတိုးတက်မှု စီမံကိန်းများကို ရေးဆွဲ ဆောင်ရွက်လျက်ရှိပါသည်။
ပြည်တွင်းကုန်သွယ်ရေးဖွံ့ဖြိုးမှုအတွက် နိုင်ငံတော်၏ စီးပွားရေးမူဝါဒများ၊ မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း ( MSDP) လုပ်ငန်းစဉ်များနှင့်အညီ စနစ်တကျ ထိရောက်စွာ အကောင်အထည်ဖော်ဆောင်ရွက်နိုင်ရန်နှင့် ကုန်သွယ်မှု ကဏ္ဍစဉ်ဆက်မပြတ်ဖွံ့ဖြိုးတိုးတက်ရန် ဆောင်ရွက်လျက်ရှိပါသည်။ ပြည်တွင်း အခြေခံစားကုန်၊ ပြည်ပတင်ပို့သည့် ပဲမျိုးစုံ၊ နှမ်းနှင့် အစေ့ထုတ်ပြောင်းဈေးနှုန်း/ ဈေးကွက်များ၊ ကုန်စည်ဒိုင်များသို့ ကွင်းဆင်း၍ စာရင်းကောက်ယူစိစစ် ပြုစု၍ နိုင်ငံတော်အကြီးအကဲများထံ တင်ပြခြင်း၊ စစ်ရုံးများ၊ မိမိဌာနနှင့် လုပ်ငန်းဆက်စပ်မှုရှိသည့် ဝန်ကြီးဌာနများသို့ ပေးပို့ဆောင်ရွက်လျက်ရှိပါသည်။ ပြည်သူလူထု၏ လူမှုစီးပွားရေး ဘဝမြှင့်တင်နိုင်ရန် ကြိုးပမ်း ဆောင်ရွက်လျက်ရှိပြီး လက်ရှိအခြေအနေနှင့် ကိုက်ညီသည့်အခွင့်အလမ်းများ၊ နည်းလမ်းသစ်များကို ရှာဖွေဖော်ထုတ်နိုင်ရန်၊ လူမှုစီးပွားရေးကို အကျိုးပြုမည့် သတင်းအချက်အလက်နှင့် စီးပွားရေးအခြေအနေများကို Websiteများတွင် ဖော်ပြနိုင်ရန်၊ တစ်ရွာထုတ်ကုန် တစ်မျိုးထွက်ကုန်များကို လေ့လာပြုစု၍ ရှေ့အလားအလာ ကောင်းရှိနိုင်သော စီးပွားရေးဆိုင်ရာ အခြေအနေများ၊ အချက်အလက်များကို ပြည်သူများထံ သတင်းပေး ဆောင်ရွက်လျက်ရှိပြီး စားသုံးသူရေးရာဦးစီးဌာန၏ www.doca.gov.mm Website ကို ၂၀၁၈ ခုနှစ် မတ်လ ၁၅ ရက်နေ့တွင် စတင်လွှင့်တင်ခဲ့ပြီး ဌာန၏အကြောင်း၊ မြန်မာနိုင်ငံစားသုံးသူကာကွယ်ရေး ကော်မရှင်၊ စားသုံးသူများ၊ လုပ်ငန်းရှင်များ၊ ပြည်တွင်းကုန်သွယ်မှုဖွံ့ဖြိုးရေး၊ သတင်းနှင့်လှုပ်ရှားမှုများ၊ ကုန်ပစ္စည်း သတိပေးချက်များစသည့် ကဏ္ဍ(၇) ချက်အပြင် စားသုံးသူရေးရာဦးစီးဌာနသို့ တိုင်ကြားရန် (Complaint System) တို့ပါရှိသည်။
အချုပ်အားဖြင့် ကျွန်မတို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် မြန်မာနိုင်ငံရှိ စီးပွားရေးလုပ်ငန်းရှင်များ စီးပွားရေးလုပ်ငန်းများ လုပ်ကိုင်ရာတွင် အဆင်ပြေ ချောမွေ့စေရန်နှင့် ရေရှည်အောင်မြင်မှုများရရှိစေရန် ၊ စီးပွားရေး ဗဟုသုတရရှိစေရန် ရှေးရှုလျက် နိုင်ငံ့အကျိုးကို တစ်ထောင့်တစ်နေရာမှပါဝင် အကောင်အထည်ဖော်ဆောင်ရွက်လျက်ရှိပါကြောင်း တင်ပြလိုက်ရပါသည်။
DOCA(ရန်ကုန်)