ပြည်တွင်းကုန်သွယ်မှုသတင်း

   မြေပဲမှာ စားသုံး ဆီကြိတ်ခွဲခြင်းလုပ်ငန်းများနှင့် စားသောက်ကုန်တို့တွင် အသုံးပြုခြင်း တို့ကြောင့် ပြည်တွင်းစျေးကွက်နှင့်ပြည်ပသို့ တင်ပို့သည့်သီးနှံဖြစ်ပြီး အရောင်းသွက်လျက်ရှိ ကြောင်းသိရပါသည်။ မန္တလေးတိုင်းဒေသကြီးအတွင်း ဆီထွက်သီးနှံမြေပဲအား မိုးနှင့် ဆောင်း ရာသီများတွင် စိုက်ပျိုးပြီး၊ ၂၀၂၄-၂၀၂၅ ခုနှစ်မြေပဲစိုက်ပျိုးမှု ၆၃၈၆၂၆ ဧက၊ရိတ်သိမ်းမှု ၆၃၇၄၄၇ ဧက၊ အထွက် နှုန်း ၄၆.၇၇ တင်း၊ အထွက်စုစုပေါင်း ၂၉၈၁၅၉၉၆ တင်းဖြစ်ကြောင်း သိရပါသည်။ မန္တလေးပွဲစား၊ ကုန်သည်စက်ပိုင်များမဟာကထိန်တော်အသင်းတွင် ၂၀၂၅ခုနှစ်ဇူလိုင်လတတိယ ပတ်အတွင်းဖြစ်ပေါ်လျက်ရှိသည့်ပေါက်စျေးများမှာ မြေပဲတစ်ပိဿာလျှင်  S1 လုံးဆံ ၉၃၀၀ ကျပ် နှင့် ၉၄၀၀ ကျပ်၊ S1 ဆီဆံ ၈၅၀၀ကျပ်နှင့် ၈၆၀၀ကျပ်၊ S1 ရွေးဆံ ၈၇၀၀ ကျပ်နှင့် ၈၉၀၀ကျပ်၊ အနီလုံးဆံ ၉၁၀၀ ကျပ်နှင့် ၉၂၀၀ကျပ်၊အနီဆီဆံ ၈၅၀၀ ကျပ်နှင့် ၈၆၀၀ကျပ်၊ Mတွဲလုံးဆံ ၉၁၀၀ ကျပ်နှင့် ၉၃၀၀ကျပ်၊ M တွဲ ဆီဆံ ၈၅၀၀ ကျပ်နှင့်၈၉၅၀ ကျပ်တို့ဖြစ်ကြောင်း သိရပါသည်။ ယခင် နှစ်ကာလတူ တစ်ပိဿာစျေးမှာS1 လုံးဆံ ၈၀၀၀ကျပ်နှင့် ၈၂၀၀ ကျပ်၊ S1 ဆီဆံ ၇၃၅၀ ကျပ်နှင့် ၇၈၀၀ကျပ်၊ S1ရွေးဆံ ၇၈၅၀ကျပ်နှင့် ၇၉၀၀ကျပ်၊ Mတွဲလုံးဆံ ၇၃၀၀ ကျပ်နှင့် ၇၄၀၀ကျပ်၊M တွဲ ဆီဆံ ၇၂၀၀ကျပ်၊ အနီလုံးဆံ(ရှည်) ၇၂၀၀ကျပ်နှင့် ၇၅၀၀ကျပ်၊ အနီလုံးဆံ (ဝိုင်း) ၇၆၀၀ ကျပ်နှင့် ၇၇၀၀ ကျပ်တို့ဖြစ်ပေါ်ခဲ့ပြီး၊ ကာလတူနှိုင်းယှဉ်ပါက စျေးပိုမိုရရှိကြောင်း သိရပါသည်။

DOCA(မန္တလေး)

            စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်သည် လယ်ယာစိုက်ပျိုးရေး လုပ်ငန်းများကို အဓိကလုပ်ကိုင်သော ဒေသတစ်ခုဖြစ်ပြီး သီးနှံမျိုးစုံ စိုက်ပျိုးလျက်ရှိရာ ကုလားပဲသီးနှံကို မှော်တော်ကျေးရွာ၊ မြေထူးကျေးရွာနှင့် အခြားသောကျေးရွာများတွင် စိုက်ပျိုးကြောင်း၊ ဆောင်းကုလားပဲ(၆၉၁၉)ဧက စိုက်ပျိုးရိတ်သိမ်းနိုင်ခဲ့ကြောင်း ကြေးတိုင်နှင့် မြေစာရင်းဦးစီးဌာန၏ စာရင်းများအရ သိရသည်။

        ၂၀၂၅ ခုနှစ်၊ ဇူလိုင်လ ဒုတိယပတ်အတွင်း ကန့်ဘလူမြို့နယ်၌ ကုလားပဲထိုင်ဝမ်(၁)တင်း လျှင် (၇၇၀၀၀)ကျပ်၊ ကုလားပဲ(929)(၁)တင်းလျှင်(၈၀၀၀၀)ကျပ်၊ ကုလားပဲ(V2)(၁)တင်းလျှင် (၈၃၀၀၀) ကျပ်နှင့် ကုလားပဲ(V7)(၁)တင်းလျှင် (၈၄၀၀၀)ကျပ်ဖြင့် အရောင်းအဝယ်ဖြစ်လျက် ရှိကြောင်း၊ ယခုအပတ်အတွင်း ကုလားပဲထိုင်ဝမ်(၁)တင်းလျှင်(၂၀၀၀)ကျပ်၊ (929)(၁)တင်းလျှင် (၁၅၀၀)ကျပ်၊ ကုလားပဲ(V2)(၁)တင်းလျှင် (၁၅၀၀)ကျပ်နှင့် ကုလားပဲ(V7)(၁)တင်းလျှင် (၁၅၀၀) ကျပ်မြင့်တက်လာကြောင်း၊ ကန့်ဘလူမြို့နယ်မှ ထွက်ရှိသည့် ကုလားပဲများကို မန္တလေးမြို့ရှိ ပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း ဒေသတွင်းပွဲရုံ လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

      မန္တလေးပဲမျိုးစုံစျေးကွက်သို့ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး နှင့် မကွေး တိုင်းဒေသကြီးတို့မှ ထွက်ရှိသည့်ပဲနီပြားများ ဝင်ရောက်လျက်ရှိပြီး၊ပဲနီပြားမှာ ပြည်တွင်း စားသုံး မှု များပြားကြောင်း သိရပါသည်။ မန္တလေးတိုင်းဒေသကြီးအတွင်း ၂၀၂၄-၂၀၂၅ ခုနှစ်တွင် ပဲနီပြား သီးနှံအပါအဝင်ပဲမျိုးစုံစိုက်ပျိုးမှု   (၁၀၁၉၄၇၇)ဧကဖြစ်ကြောင်း   သိရပါသည်။    မန္တလေးပွဲစား၊ ကုန်သည်၊ စက်ပိုင်များမဟာကထိန်တော်အသင်းတွင် ၂၀၂၅ ခုနှစ်ဇူလိုင်လတတိယ ပတ်အတွင်း ဖြစ်ပေါ်သည့်ပေါက်စျေးမှာ ပဲနီပြား(ကျွန်း) ၃တင်းဝင်တစ်အိတ်လျှင် ၄၃၀၀၀၀  ကျပ်၊ ၄၄၀၀၀၀ ကျပ်၊ တစ်ပိဿာစျေးမှာ ၇၇၈၃ ကျပ်နှင့် ၇၉၆၄ ကျပ်တို့ဖြစ်ကြောင်း သိရပါသည်။ယခင်နှစ် ကာလတူ စျေး  မှာ၃တင်းဝင်တစ်အိတ်လျှင် ပဲနီပြား(တံတားဦး) ၃၂၀၀၀၀ကျပ်၊ ပဲနီပြား(ကျွန်း) ၃၇၀၀၀၀ကျပ်နှင့် ၃၈၀၀၀၀ကျပ်၊တစ်ပိဿာစျေးမှာ    ပဲနီပြား(တံတားဦး) ၅၇၉၂ကျပ်၊ ပဲနီပြား (ကျွန်း)၆၆၉၇ ကျပ်နှင့်၆၈၇၈ကျပ်တို့ဖြစ်ကြောင်း သိရပါသည်။ ယခင်နှစ်နှင့်ယခုနှစ်စျေးနှိုင်းယှဉ် ပါက ပဲနီပြားမှာ စျေးပိုမိုရရှိကာ အရောင်းသွက်လျက်ရှိကြောင်း သိရှိရပါသည်။

DOCA(မန္တလေး)  

          ဟုမ္မလင်းဒေသထွက်ငါးရံ့ခြောက်များကို တစ်ပိဿာလျှင် အကောင်အရွယ်အစားပေါ်မူ တည်၍  ကျပ်၈၀၀၀၀မှ ကျပ်၁၆၀၀၀၀ထိရှိပြီး အသင့်စား၍ရသော မီးကင်ထားသည့် ငါးရံ့ခြောက် တစ်ဆယ်သား တစ်ဘူးလျှင် ၂၀၀၀၀ကျပ်ဖြင့် ရောင်းချလျက်ရှိကြောင်းသိရသည်။ ရန်ကုန်၊ မန္တလေးနှင့်မုံရွာမြို့များသို့ တင်ပို့ရောင်းချပြီး လက်ဆောင်ပေးရန် ဝယ်ယူမှုများလည်း ရှိကြောင်းသိရသည်။ ယခုအချိန်သည် မိုးရာသီဖြစ်ပြီး ငါးပေါသောကြောင့် ရောင်းအားအနေဖြင့် ပိုမိုများပြားလာကြောင်း သိရှိရပါသည်။

           ဟုမ္မလင်းမြို့သည် စစ်ကိုင်းတိုင်းဒေသကြီးအထက်ပိုင်း ချင်းတွင်းမြစ်ကမ်းနံဘေးတွင် မေးတင်သဖွယ်တည်ရှိနေသော မြစ်ချောင်းအင်းအိုင်များသည့် မြို့လေးဖြစ်သည်။ ငါးများလည်း ပေါများပြီး ငါးချဥ် နှင့် ငါးရံ့ခြောက်များလည်းထွက်သည်။ ဟုမ္မလင်းမြို့မှထွက်ရှိသည့် ငါးရံ့ ခြောက်သည်အငံပေါ့၍ ကျန်းမာရေးနှင့်ညီညွတ်ပြီး လူကြိုက်များသော‌ဒေသထွက်ကုန် တစ်ခုဖြစ်သည်။ ငါးရံ့အစိုများကို ဟုမ္မလင်းမြို့အနီးရှိမြင်သာကျေးရွာ၊ ရေလဲကျေးရွာနှင့် ညောင်ပင်သာ ရွာရှိအင်းဒိုင်များနှင့် ဆည်များမှဝယ်ယူကြောင်းသိရပြီး ငါးရံ့အစိုတစ်ပိဿာအား ခွဲခြမ်းပြီး နေလှန်းပါကငါးရံ့ခြောက် ၂၅ကျပ်သားမှ ၃၀ကျပ်သားခန့်ထွက်ရှိကြောင်း သိရှိရပါသည်။

DOCA(စစ်ကိုင်း)

           စစ်ကိုင်းတိုင်းဒေသကြီး၊ မုံရွာမြို့၊ မကျည်းပင်ဈေးအတွင်းတွင်  နာနတ်သီးများ ရောင်းချလျက်ရှိကြောင်း  သိရှိရပါသည်။ နာနတ်သီးသည် ဈေးနှုန်းသက်သာပြီး အာဟာရဓာတ်များစွာပါဝင်သည့် အသီးတစ်မျိုးဖြစ်ပါသည်။ နာနတ်သီးများမှာ အများအားဖြင့် အခွံနွှာ၍ အသင့်စားသုံးနိုင်သည့် အသီးဖြစ်သည့်အပြင် နာနတ်သီးဖျော်ရည်၊ နာနတ်သီးယို စသည့်ဖြင့် နှစ်သက်သည့်အတိုင်း စားသုံးကြပါသည်။

       ယခုဇူလိုင်လ ဒုတိယအပတ်အတွင်း ဖြစ်ပေါ်နေသော နာနတ်သီးဈေးနှုန်းမှာ နာနတ်သီး အသေး (၁)လုံး လျှင် (၁၈၀၀) ကျပ်နှင့် နာနတ်သီးအကြီး (၁)လုံးလျှင် (၂၅၀၀) ကျပ် အထိရောင်းချလျက်ကြောင်း နာနတ်သီးရောင်းချသူထံမှ သိရှိရပါသည်။

DOCA(စစ်ကိုင်း)