ပြည်တွင်းကုန်သွယ်မှုသတင်း

   ပဲခူးတိုင်းဒေသကြီး၊သာယာဝတီခရိုင်၊ လက်ပံတန်းမြို့စည်ပင်သာယာဈေးတွင်ရှိသောဂျင်း  ဈေးနှုန်းများမှာ ဇူလိုင်လပထမပတ်တွင် ဂျင်း ၁၀ကျပ်သားလျှင် ၈၀၀/ကျပ်ရှိခဲ့ပြီး ယခုဇူလိုင်လ တတိယပတ်တွင်လည်း ၈၀၀/ကျပ်ရှိနေပါသည်။ ဂျင်းဈေးနှုန်းများ အတက်အကျ မရှိ ယခင်လဈေးနှုန်းအတိုင်း ဈေးငြိမ်နေပါသည်။ ကြက်သွန်ဖြူဈေးနှုန်းများအနေဖြင့် ဇူလိုင်လပထမပတ်တွင် ကြက်သွန်ဖြူ (ကြူကုတ်) ၁၀ ကျပ်သားလျှင် ၁၅၀၀/ကျပ်၊ ယခု ဇူလိုင်လ တတိယပတ်တွင် ကြက်သွန်ဖြူ (ကြူကုတ်) ၁၀ ကျပ်သားလျှင် ၁၅၀၀ကျပ် ဈေးနှုန်းဖြင့်ရောင်းချလျက်ရှိပါသည်။

   ကြက်သွန်ဖြူ(ရှမ်းစ) ဈေးနှုန်းအနေဖြင့်  ဇူလိုင်လပထမပတ်တွင် ၁၀ ကျပ်သားလျှင် ၁၀၀၀ ကျပ်ပေါက်ဈေးရှိနေပြီး ယခုဇူလိုင်လတတိယပတ်တွင်လည်း ဈေးနှုန်းအပြောင်းအလဲမရှိ၊ ဈေးငြိမ် နေပါသည်။ ကြက်သွန်ဖြူ (ဥတစ်လုံး) ဈေးကွက်မှာတစ်ဆယ်ကျပ်သားလျှင် ၂၅၀၀ ကျပ်  ဈေးနှုန်း တို့ဖြင့် ရောင်းချလျှက်ရှိရာ ဂျင်း၊ကြက်သွန်ဖြူ၊ဈေးကွက်တို့မှာ ဈေးအေးနေပြီးပုံမှန် ရောင်းဝယ် လျှက်ရှိပါသည်။

DOCA(ပဲခူး)

  တောင်ငူခရိုင်၊ အုတ်တွင်းမြို့နယ်၊ဝါးတီးကျေးရွာအုပ်စု၊ညောင်ပင်ရွာမှ ကျေးလက်နေ ပြည်သူများသည် စိုက်ပျိုးရေးလုပ်ငန်းကို အဓိကထားလုပ်ကိုင်ကြသည်။ ရာသီအလိုက်သီးနှံများ စိုက်ပျိုးလျက်ရှိရာ ပြောင်းဖူးသည် ဒေသတွင်းအများဆုံး စားသုံးကြပြီး ဈေးကွက်ဝင်၍ အာဟာရဓါတ်  ကြွယ်ဝ သော သီးနှံတစ်မျိုးဖြစ်သည်။

    ပြောင်းဖူးတွင် အဖြူမျိုး (ဖန်စီဗစ်) နှင့် အဝါမျိုး (King) ဟူ၍ နှစ်မျိုးရှိပြီး အချိန်မရွေးစိုက်၍ ရသည်ဆိုသော်လည်း မိုးရာသီစိုက်ပျိုးရခြင်းသည် ရေးသွင်းရန်မလိုသည့်အတွက် ကုန်ကျစရိတ်သက်သာ စေပါသည်။

    လက်ရှိချိုးယူရရှိသောပြောင်းဖူးများသည် ဧပြီလမှစိုက်ပျိုးထားသောသီးနှံများဖြစ်ပြီး ပြောင်းဖူး မျိုးထုပ်(၁)ထုပ်လျှင် ၅၀၀၀၀ကျပ်ဖြင့် ဝယ်ယူခဲ့ရပြီး တစ်ဧကလျှင် မျိုးထုပ်(၆)ထုပ်အထိ စိုက်ပျိုးနိုင် ပါသည်။ ဖြစ်ထွန်းလာသောသီးနှံများကို အကြီးတစ်ဖူးလျှင် ၄၀၀ ကျပ်၊ အလတ် တစ်ဖူးလျှင် ၂၅၀ မှ ၃၀၀ အထိ ရောင်းချရပြီး မိုးနှောင်းပိုင်းတွင်စိုက်ပျိုးသော ပြောင်းဖူးများသည် စိုက်ပျိုးသူနည်းပါးသဖြင့် ဈေးကောင်းပိုရပါသည်။

     တစ်ဧကကုန်ကျစရိတ်အနေဖြင့် မိုးရာသီတွင် ၇၀၀၀၀၀ ကျပ်မှ ၈၀၀၀၀၀ ကျပ်အထိ ကုန်ကျပြီး ဆောင်းရာသီတွင် ၁၀၀၀၀၀၀ ကျပ် မှ ၁၁၀၀၀၀၀ကျပ် အထိ ကုန်ကျနိုင်ပါသည်ဟု ခန့်မှန်း သိရှိရသည်။ ဆောင်းရာသီတွင် စိုက်ပျိုးရသောပြောင်းသီးနှံသည် ရေသွင်းရသည့်အတွက် ကုန်ကျစရိတ် ပိုသော်လည်း အနှံထွက်ချိန်တွင် မိုးရွာသွန်းမှုမရှိသဖြင့် အပျက်အစီးနည်းပါးခြင်း၊ စိုက်ပျိုးသူနည်းပါးခြင်း တို့ကြောင့်  အထွက်နှုန်းကောင်းပြီးဈေးကောင်းရသည်ဟု ပြောင်းစိုက်ပျိုးသည့် ကျေးလက်နေတောင်သူ တစ်ဦးထံမှသိရှိရသည်။

DOCA(ပဲခူး)

ရှမ်းပြည်နယ် (တောင်ပိုင်း) အောင်ပန်းဒေသတွင် ယခုတစ်ပတ် ပြောင်းသီးနှံမှာ တစ်ပိဿာလျှင် (၁၅၃၀-၁၅၃၅) ကျပ်ဖြင့်ဈေးရှိနေပြီး တောင်သူလက်ကျန်နှင့် ဒေသတွင်းလက် ကျန်လျော့ကျမှုကြောင့် စီးဆင်းမှုမှာ နည်းပါးနေပါသည်။ကြက်သွန်ဖြူသီးနှံမှာ တစ်ပိဿာလျှင် ထူး ၁-၄၀၀၀ကျပ်၊ ထူး ၂-၅၀၀၀ကျပ်၊ ထူး ၃-၆၀၀၀ ကျပ်၊ ထူး ၄-၆၅၀၀ကျပ်၊ ထူး ၅-၇၅၀၀ကျပ်၊ ထူးလွန် ၈၅၀၀ကျပ်နှင့် ဥတစ်လုံးဆိုဒ်မှာ (၂၀၀၀၀-၂၅၀၀၀)ကျပ် အမြင့်ဈေးဖြင့်ငြိမ်နေပြီး ဈေးကွက် အဝင်နည်း၍ စီးဆင်းမှုမှာ လျော့နည်းနေပါသည်။
  အာလူးသီးနှံမှာ တစ်ပိဿာလျှင် မားကီး S2/S1-၅၀၀၀ကျပ်၊ မျက်နီ S2/S1-၄၅၀၀ကျပ်၊ OK-၄၀၀၀ကျပ်၊ A1-၃၅၀၀ကျပ်၊ ဆွဲသီး-၃၀၀၀ကျပ်နှင့် ဂေါ်လီဆိုဒ်မှာ ၂၈၀၀ကျပ် အသီးသီး ဈေး ရှိနေကြပြီး အာလူးအသစ်များ ဈေးကွက်အဝင်များ၍ စီးဆင်းမှုမှာကောင်းလာပါသည်။
  ချင်းသီးနှံမှာ တစ်ပိဿာလျှင် ချင်းဥမကြီး (၃၀၀၀)ကျပ်နှင့် ဥမလတ်မှာ (၂၀၀၀-၂၅၀၀)ကျပ် ဖြင့် ပြည်တွင်းဈေးကွက် အဝယ်ကောင်းသဖြင့် စီးဆင်းမှုမှာ များလာပါသည်။
  ကုန်စိမ်းသီးနှံများတွင် ဂေါ်ဖီ (၁၂၀၀-၁၅၀၀)ကျပ်၊ ပန်းမုံလာ (၁၈၀၀-၂၀၀၀)ကျပ်၊ မုန်ညှင်း  (၂၇၀၀-၃၀၀၀)ကျပ်၊ ဖရုံသီး (၁၀၀၀-၁၂၀၀)ကျပ်၊ ခရမ်းသီး (၂၅၀၀-၃၀၀၀)ကျပ်၊ ခရမ်းချဉ်သီး (၁၇၀၀-၂၈၀၀)ကျပ်၊ ငရုတ်ပွ (၅၅၀၀-၆၀၀၀)ကျပ်၊ မုန်လာဥနီ (၃၀၀၀-၃၅၀၀၀)ကျပ်နှင့် ဘိုစား (၃၀၀၀-၃၅၀၀)ကျပ်အသီးသီးဈေးရှိနေကြပြီး ဈေးကွက်အဝင်များလာ၍ စီးဆင်းမှုမှာ ယခင်အ ပတ်ထက် အနည်းငယ်များလာပါကြောင်း လေ့လာသိရှိရပါသည်။

DOCA(ရှမ်း)

   ရှမ်းပြည်နယ်(အရှေ့ပိုင်း)၊ ကျိုင်းတုံမြို့သည် ရေခံ၊ မြေခံကောင်းသည့်နှင့်အညီ စိုက်ပျိုးရေး လုပ်ငန်းများကို အဓိကစိုက်ပျိုးလျှက်ရှိရာ ၂၀၂၄-၂၀၂၅ ခုနှစ်၊ မိုးရာသီ ဧပြီလတွင်စ၍ ဒေသမျိုး ဖူးစားပြောင်းကို တစ်ပိုင်တစ်နိုင်စိုက်ပျိုးခဲ့ကြပါသည်။ ဒေသမျိုးဖူးစားပြောင်းသည် ဇူလိုင်လ ပထမ အပတ်တွင် စတင်ထွက်ရှိကြောင်း သိရှိရပါသည်။ စိုက်ပျိုးခဲ့ကြသည့် တောင်သူများအနေဖြင့် ယခုဆိုလျှင် မိသားစုအပိုဝင်ငွေများ ရရှိနေကြပါသည်။

   ဒေသမျိုးဖူးစားပြောင်းသည် ရေလုံလောက်စွာ ရရှိပါက နွေ၊ မိုး၊ ဆောင်း တစ်နှစ်ပတ်လုံး စိုက်ပျိုးနိုင်ပြီး ကုန်ကျစရိတ်အနေဖြင့် မြေပြုပြင်ခြင်း၊ ထယ်ထိုးခြင်း၊ မျိုး၊ သွင်းအားစု၊ ပိုးသတ် ဆေး၊ လုပ်သားခအပါအဝင် တစ်ဧကလျှင် စုစုပေါင်း (၁၉) သိန်းကျပ်ခန့် ကုန်ကျကြောင်း သိရှိရပါသည်။ ဒေသမျိုးဖူးစားပြောင်းကို စိုက်ပျိုးပြီးလျှင် ရက်ပေါင်း ၈၀-၉၀ အကြာတွင် အသီးများကို စတင်ခူးဆွတ်နိုင်ပြီး ဒေသဖူးစားပြောင်း တစ်ဧကလျှင် အဖူးပေါင်း (၉၀၀၀) ခန့် ထွက်ရှိကြောင်း သိရှိရပါသည်။ ဒေသဖူးစားပြောင်း ရောင်းချရသည့် ဈေးနှုန်းမှာ တစ်ဖူးလျှင် လက်ကားဈေး (၄၀၀) ကျပ်ဖြင့်လည်းကောင်း၊ လက်လီဈေးနှုန်း (၆၀၀) ကျပ်ဖြင့်လည်းကောင်း အရောင်းအဝယ်ရှိပြီး ဒေသပြောင်းဖူး အရေအတွက် (၉၀၀၀) ဖူးကို လက်ကားဈေးနှုန်း (၄၀၀) ကျပ် ဖြင့် ရောင်းလျှင် (၃၆) သိန်းခန့် ရရှိကာ တစ်ဧက၏ အထွေထွေကုန်ကျစရိတ် (၁၉) သိန်းနုတ်လျှင် အကျိုးအမြတ်အနေဖြင့် တစ်ဧကကို (၁၇) သိန်းရရှိကာ ဒေသဖူးစားပြောင်းစိုက် တောင်သူများ ဝင်ငွေရရှိပြီး အဆင်ပြေလျက်ရှိကြောင်း ဈေးကွက်သတင်းအရ သိရှိရပါသည်။

DOCA(ရှမ်း)

   စိုက်ပျိုးတောင်သူများ၏   အကျိုးစီးပွားကို     ရှေးရှု့၍ ၁၆.၇.၂၀၂၅ ရက်နေ့ ၁၀း၀၀ နာရီတွင် တောင်ကြီးမြို့ပေါ်ရှိ စိုက်ပျိုးရေးသွင်းအားစု အရောင်းဆိုင်များအား စျေးနှုန်း၊ စျေးကွက်နှင့် အရည်အသွေး မှန်ကန်စေရေးစိစစ် စစ်ဆေးမှုများ ဆောင်ရွက်ခဲ့ကြောင်း သိရပါသည်။

   တောင်ကြီးမြို့ပေါ်ရှိ စိုက်ပျိုးရေး သွင်းအားစု ရောင်းဆိုင်များအား တောင်ကြီးမြို့နယ် အထွေထွေအုပ် ချုပ်ရေးဦးစီးဌာန၊ မြို့နယ်စိုက်ပျိုးရေးဦးစီးဌာန၊ မြို့နယ်စည်ပင်သာယာရေးဦးစီးဌာနနှင့် စားသုံးသူရေးရာ    ဦးစီးဌာနစသည့် ပူးပေါင်းစစ်ဆေးရေးအဖွဲ့သည် စိုက်ပျိုးတောင်သူများ၏ အကျိုးစီးပွားကို ‌ရှေးရှု့၍ စျေးနှုန်း၊ စျေးကွက်မှန်ကန်မျှတစေရေး၊ ကုန်စည်အရည်အသွေးပြည့်မှီစေရေး ၊ ကုန်အညွှန်းအမှတ်အသားမှန်ကန် ပြည့်စုံစေရေးနှင့် တရားမဝင်ကုန်သွယ်မှုဖြစ်စဉ်များ ကင်းရှင်းစေရေးစသည့် အရောင်းအဝယ်ဆိုင်ရာ အသိပညာများ ထွန်းကားစေရန်အတွက် စိုက်ပျိုးရေးသွင်း အားစုအရောင်းဆိုင်များအား စည်းရုံးပညာ ပေးခြင်းနှင့် ပူးပေါင်းစစ်ဆေးမှုများ ဆောင်ရွက်ခဲ့ကြောင်း   ရေးသား တင်ပြအပ်ပါသည်။

DOCA(ရှမ်း)