ပြည်တွင်းကုန်သွယ်မှုသတင်း

   ပြည်ကုန်စည်ဒိုင်တွင်မတ်ပဲ၊ ပဲစဉ်းငုံ၊ ကုလားပဲ၊ ပဲကြီး၊ ဘိုကိတ်၊ စားတော်ပဲ၊ ပဲကျွန်း စသည့်ပဲမျိုးစုံအရောင်းအဝယ်ဖြစ်နေကြောင်းသိရပါသည်။ ပြည်ကုန်စည်ဒိုင်တွင် မတ်ပဲတစ်တင်းကို (၉၅၅၀၀-၉၆၀၀၀)ကျပ်ဖြင့်တစ်ရက်ကို အိတ်(၂၀၀)ခန့်ရန်ကုန်အဝယ်ရှိနေပါသည်။ ပဲစဉ်းငုံနီ တစ်တင်း ကို (၈၇၀၀၀)ကျပ်ဖြင့် ရန်ကုန်အဝယ်တစ်ရက်ကိုအိတ် (၂၅၀)ခန့်အဝယ်ရှိနေပါသည်။ ဇူလိုင် တတိယပတ်တွင် ကုလားပဲ(HL)တစ်တင်းကို (၉၀၀၀၀)ကျပ်၊ မြကြေးမှုံ တစ်တင်းကို (၉၄၅၀၀-၉၅၀၀၀)ကျပ်ဖြင့် မြို့တွင်းပဲခွဲစက်သမားများ အဝယ်တစ်ရက်ကိုအိတ် (၂၅၀)ခန့်ရှိပါ သည်။ ပဲကြီး (ရွှေကျွန်း) တစ်တင်းကို (၁၀၂၀၀၀)ကျပ်၊ ပဲကြီး (ကုန်းပဲ) တစ်တင်းကို (၉၂၀၀၀) ကျပ်ဖြင့် မြို့တွင်း ပဲကြော်သမားများ အဝယ်ရှိနေပြီး တစ်ရက်ကို အိတ်(၃၀၀)ခန့်အဝယ်ရှိပါသည်။ ဘိုကိတ် ပဲတစ်တင်း ကို (၇၀၀၀၀)ကျပ်ဖြင့်မြို့တွင်းအဝယ်တစ်ရက်ကို အိတ်(၂၀၀)ခန့် အဝယ်ရှိပါသည်။ စားတော်ပဲ (‌ရွှေကျွန်း)တစ်တင်းကို (၁၇၅၀၀၀) ကျပ် ဖြင့်မြို့တွင်း အဝယ် တစ်ရက်ကို အိတ်(၅၀)ခန့်အဝယ်ရှိပါသည်။ ပြည်ကုန်စည်ဒိုင်တွင် ပဲအရောင်းအဝယ်မှာ သွက် လျက်ရှိကြောင်းသိရပါသည်။

DOCA(ပဲခူး)

  ပြည်ခရိုင်၊ ပြည်မြို့တွင်ပဲကြီးနှင့်စားတော်ပဲ(ကျွန်း) သီးနှံများ မြို့တွင်း အ‌ရောင်း အဝယ်ဖြစ်လျက် ရှိနေသည်။ ယခင်နှစ်က ဇူလိုင်တတိယပတ်တွင်ပဲကြီး (ရွှေကျွန်း) တစ်တင်းကို (၉၀၀၀၀)ကျပ်၊ ကုန်းပဲ တစ်တင်းကို (၈၅၀၀၀)ကျပ်ဖြင့်အရောင်းအဝယ်ဖြစ်ပြီးယခုနှစ် ဇူလိုင် ဒုတိယပတ်တွင်းပဲကြီး (ရွှေကျွန်း) တစ်တင်းကို (၁၀၂၀၀၀)ကျပ်၊ ပဲကြီး (ကုန်းပဲ) တစ်တင်းကို (၉၅၀၀၀)ကျပ်ဖြင့် မြို့တွင်း အဝယ်တစ်ရက်ကို အိတ်(၃၀၀)ခန့်အဝယ်ရှိပါသည်။ ယခုနှစ် ဈေးကပိုမိုကောင်းမွန်နေကြောင်း သိရှိရပါသည်။
   ယခုနှစ် ဇူလိုင်တတိယပတ်တွင် စားတော်ပဲ(ကျွန်း)တစ်တင်းကို (၁၇၅၀၀၀)ကျပ်ဖြင့် မြို့တွင်းအဝယ် တစ်ရက်ကို အိတ် (၅၀)ခန့်ရှိပါသည်။ ယခင်နှစ်က စားတော်ပဲ(ကျွန်း)တစ်တင်းကို (၁၁၀၀၀၀)ကျပ်ဖြင့် မြို့တွင်းအဝယ်တစ်ရက်ကိုအိတ် (၅၀)ခန့်ရှိပါသည်။ ယခုနှစ်စားတော်ပဲဈေးက ပိုမိုကောင်းနေခဲ့ပြီး တောင်သူများအနေဖြင့် ပိုမိုရရှိခဲ့ပါသည်။

DOCA(ပဲခူး)

   ပဲခူးတိုင်းဒေသကြီး၊ ရွှေတောင်မြို့နယ်၊ မီးလောင်အုပ်စု၊ အင်္ဂလှိုင်ဂန်‌ ကျေးရွာရှိ တောင်သူ ဒေါ်စန်းလွင်ပိုင်ဆိုင်သော ခဝဲသီးစိုက်ခင်းသို့ (၂၂.၇.၂၀၂၅)ရက် နေ့နံနက် (၁၀)နာရီတွင် သွားရောက်ကွင်းဆင်းလေ့လာခဲ့ပါသည်။ စိုက်ပျိုးသောခဝဲသီးမျိုးမှာ မာဃမျိုးဖြစ်ပြီး ခဝဲသီး အစေ့ များကို စင်ပတ်ပတ်လည် တွင်ကျင်းများ တူးပြီး တန်ခူးလ ကုန်ခါနီးတွင် စတင် စိုက်ပျိုး ထားရှိပါသည်။ ဝါဆိုလတွင်အသီးများ စတင်ထွက်ပေါ်၍ ခူးဆွတ်ရောင်းချကြပါသည်။ တစ်ခါခူးလျှင် အတောင့်(၁၀၀)မှ(၁၅၀)ကြားခူးဆွတ်ရရှိပြီး တစ်ရက်ခြား တစ်ခါခူးဆွတ်ရပါသည်။ စိုက်ဧက တစ်ယောက်စိုက်ရှိသော ခဝဲသီးစိုက်ခင်းကို (၁)လခွဲကျော်ထိ ခူးဆွတ် ရောင်းချရပါသည်။ ရွှေတောင်ပွဲစားများမှ တစ်တောင့်လျှင် (၂၅၀)ကျပ်နှုန်းဖြင့် လာရောက်သိမ်းယူကြပြီး ရန်ကုန်မြို့သို့ တင်ပို့ရောင်းချကြပါသည်။ စုစုပေါင်းကုန်ကျစရိတ်မှာ (၂)သိန်းခွဲကျော်ဖြစ်ပြီး အကျိုးအမြတ်ရရှိမှုမှာ (၄)သိန်းကျော်(၅)သိန်းထိခန့်မှန်းရရှိနိုင်ကြောင်းသိရှိခဲ့ရပါသည်။
DOCA(ပဲခူး)

  ပြည်ငရုတ်သီးစိမ်းဈေးကွက်အတွင်းရောင်းချလျက်ရှိသော ငရုတ်သီးစိမ်းအမျိုးအစားများမှာ ပင်နံသီး၊ ကျောက်စိမ်းသီး၊ စပ်သီး စသည်တို့ဖြစ်ပြီး ပြည်ဒေသတဝိုက်မြို့များဖြစ်သောဇီးအုပ်၊ နတ္တလင်း၊ ပေါင်းတလည်၊ ဝက်ထီးကန်နှင့်သဲကုန်း၊ ပုတီးကုန်း၊ အင်းမ၊ ဝက်ပုတ်၊ ဆင်မြီးဆွဲ တို့အပါအဝင် ပေါက်ခေါင်းမြို့နယ်မှဝင်ရောက်မှုရှိနေသည်။ ကျောက်စိမ်းသီးနှင့် စပ်သီး တို့မှာ ရက်ခြားပိဿာချိန် (၂၀၀) ခန့်အဝင်ရှိ၍ များပြားကာ ပင်နံငရုတ်သီးမှာ ရက်ခြား ပိဿာ ချိန်(၅၀)ခန့်သာ အဝင်ရှိကြောင်း သိရပါသည်။ ပင်နံငရုတ်မှာ အဝင်နည်း၍ အချို့ရက်များတွင် ရန်ကုန်မြို့ဘက်မှ ပြန်လည်စီးဝင်မှုများ လည်းရှိနေပြီး ပင်နံငရုတ်ဈေးနှုန်းမှာ (၁)ပိဿာလျှင်ကျပ် (၂၂၀၀၀)နှုန်းထိရှိကာ ငရုတ်သီးထဲတွင် ဈေးအမြင့်ဆုံးဖြစ်လျက်ရှိနေသည်။ ကျောက်စိမ်းသီးမှာ တစ်ပိဿာလျှင်ကျပ်(၃၀၀၀)နှုန်းရှိကာ ဈေးချို သဖြင့် အသုံးများလျက်ရှိပြီး စပ်သီးငရုတ်သီးမှာ (၁)ပိဿာလျှင် ကျပ်(၆၀၀၀)နှုန်းရှိသည့်အတွက် အရောင်းအဝယ်မှာ ပင်နံငရုတ်နှင့်ယှဉ်လျှင် အရောင်းအဝယ်မှာပိုမိုဖြစ်လျက်ရှိကြောင်းသိရပါသည်။

DOCA(ပဲခူး)

            ရွှေဖရုံသီးကို အချိုချက်ပြုတ်စားသောက်ကြသကဲ့သို့ မိမိနှစ်သက်ရာ အသားတစ်မျိုးမျိုးနှင့် ရောစပ်၍လည်းစားသုံးနိုင်သည်။ အရွက်၊ အပွင့်နှင့် အညွှန့်တို့ကို ကြော်၍သော်လည်းကောင်း၊ ဟင်းချို၊ အသုပ်သုပ်၍အဖြစ်သော်လည်းကောင်း၊ ရေနွေးဖျော၍ အတို့မြှုပ်အဖြစ်သော်လည်းကောင်း စားသုံးနိုင်သည်။ ရွှေဖရုံအစေ့ကို လှော်၍စားသုံးလေ့ရှိကြပြီး ဆားအနည်းငယ်ထည့်၍လှော်ပါက အရသာပို၍ကောင်းကြောင်းသိရသည်။       ရွှေဖရုံသီးတွင် ဗီတာမင်စီအလွန်ကြွယ်ဝသဖြင့် ကိုယ်ခံစွမ်းအားကိုမြှင့်တင်ပေးသည်။ မျက်စိမှုန်ခြင်းနှင့် ကြက်မျက်သင့်ရောဂါဝေဒနာရှင်များအတွက် ဗီတာမင်အေအပြည့်အဝပါရှိသော ရွှေဖရုံသီးကိုစားသုံးခြင်းဖြင့် သက်သာစေနိုင်သည်။ မျက်စိကြောင်၍ နာတာရှည်အိပ်မပျော်သူများသည် ရွှေဖရုံသီးဖျော်ရည်ကို ပျားရည်အနည်းငယ်ရောစပ်ကာ သောက်သုံးသင့်ပေသည်။ ရွှေဖရုံစေ့တွင် L- tryptophan ဓာတ်ပါရှိ၍ နှစ်ခြိုက်စွာအိပ်မောကျစေသည်။ ရွှေဖရုံသီးသည် အချိုဓာတ်ပါရှိသော်လည်း သွေးထဲရှိသကြားပမာဏကိုလျှော့ချပေးသည့်အတွက် ဆီးချိုရောဂါရှိသူများလည်းစားပေးသင့်သည်။ ရွှေဖရုံသီးတွင် ဓာတ်တိုးဆန့်ကျင်ပစ္စည်းအပြင် ရေဓာတ်အလုံအလောက်ပါရှိ၍ မျက်နှာအတွင်းသားအထိအေးမြစေပြီး ကျန်းမာလှပသောအသား အရေကိုရရှိစေပါသည်။

      ရွှေဖရုံသီးသည် တစ်နိုင်တစ်ပိုင်သော်လည်းကောင်း၊ စီးပွားဖြစ်သော်လည်းကောင်း စိုက်ပျိုးကြကြောင်းလည်းသိရသည်။ ရွှေဖရုံသီးဈေးနှုန်းမှာ (၁)သားလျှင်(၃၀၀)ကျပ် ထိရှိကြောင်း သိရှိရပါသည်။

DOCA (ဧရာဝတီ)