ပြည်တွင်းကုန်သွယ်မှုသတင်း

    စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်သည် လယ်ယာစိုက်ပျိုးရေး လုပ်ငန်းများကို အဓိကလုပ်ကိုင်သော ဒေသတစ်ခုဖြစ်ပြီး သီးနှံမျိုးစုံ စိုက်ပျိုးလျက်ရှိရာ ကုလားပဲ သီးနှံကို မှော်တော်ကျေးရွာ၊ မြေထူးကျေးရွာနှင့် အခြားသောကျေးရွာများတွင် စိုက်ပျိုးကြောင်း၊ ဆောင်းကုလားပဲ(၆၉၁၉)ဧက စိုက်ပျိုးရိတ်သိမ်းနိုင်ခဲ့ကြောင်း ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရသည်။

    ၂၀၂၅ ခုနှစ်၊ ဇူလိုင်လ စတုတ္ထပတ်အတွင်း ကန့်ဘလူမြို့နယ်၌ ကုလားပဲထိုင်ဝမ်(၁)တင်း လျှင် (၇၃၅၀၀)ကျပ်၊ ကုလားပဲ(929)(၁)တင်းလျှင်(၇၇၀၀၀)ကျပ်၊ ကုလားပဲ(V2)(၁)တင်းလျှင် (၈၀၅၀၀)ကျပ်နှင့် ကုလားပဲ(V7)(၁)တင်းလျှင် (၈၁၅၀၀)ကျပ်ဖြင့် အရောင်းအဝယ်ဖြစ်လျက်ရှိ ကြောင်း၊ ယခင်အပတ်ဈေးနှုန်းများနှင့် နှိုင်းယှဉ်ပါက ယခုအပတ်အတွင်း ကုလားပဲထိုင်ဝမ်(၁)တင်း လျှင်(၃၅၀၀)ကျပ်၊ (929)(၁)တင်းလျှင် (၄၀၀၀)ကျပ်၊ (V2)(၁)တင်းလျှင် (၂၅၀၀)ကျပ်နှင့် (V7)(၁) တင်းလျှင် (၃၅၀၀)ကျပ် ကျဆင်းသွားကြောင်း၊ ကန့်ဘလူမြို့နယ်မှထွက်ရှိသည့် ကုလားပဲများကို မန္တလေးမြို့ရှိ ပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း ဒေသတွင်းပွဲရုံ လုပ်ငန်းရှင်များထံမှ သိရှိရသည်။

DOCA(စစ်ကိုင်း)

    မျှစ်ပေါင်း ပြုလုပ်မည်ဆိုပါက မျှစ်စိမ်းများကို အရင်းဖယ်၍ အခေါင်းထွင်းကာ အရင်ပြုတ်ပစ်ရပြီးနောက် ဆား၊ ဆန်မှုန့်၊ ကြက်သွန်နီ၊ ကြက်သွန်ဖြူ၊ ဂျင်း၊ ပုဇွန်ခြောက်နှင့် ငါးပိ၊ ငရုတ်ကြမ်းမှုန့်များများကို သင့်တင့်ရုံမျှထည့်ပြီး ပေါင်းကြရပါသည်။ မျှစ်ပေါင်းများ ရောင်းချရာတွင်လည်း မျှစ်ဖူးပေါင်းနှင့် မျှစ်စိတ်ပေါင်းဟူ၍ ( ၂ ) မျိုးခွဲခြားကာ ရောင်းချလျက် ရှိပါသည်။

    မျှစ်ပေါင်းသည် ဇူလိုင်လမှ စတင်၍ အောက်တိုဘာလအထိ ရာသီစာ အစားအစာ တစ်မျိုးဖြစ်ပြီး၊ ဒေသထွက်အစားအစာအဖြစ် အမြတ်တနိုး ဝယ်ယူစားသောက်လျက်ရှိကြပြီး မျှစ်ဖူးပေါင်း ( ၁ ) ဖူးလျင် ( ၁၀၀၀ ) ကျပ်နှင့် မျှစ်စိတ်ပေါင်း ( ၁ ) ထုပ်လျင် ( ၁၀၀၀ ) ကျပ် ပေါက်ဈေးနှုန်းများဖြင့် ရောင်းချကာ မျှစ်ထွက်ပေါ်ချိန်ဖြစ်၍ ဒေသခံရောင်းချသူများ အနေဖြင့် ပုံမှန် ဝင်ငွေရရှိသော ရာသီစာ တစ်ခုဖြစ်ပါကြောင်း ဈေးကွက်အတွင်းမှ သိရှိရပါသည်။

DOCA(စစ်ကိုင်း)

ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ မှော်ဇာကျေးရွာ၊ ဦးသိန်းဝင်း၏ ဥယျာဉ်ခြံနှင့် အိမ်ခြံဝန်းထဲတွင် ကီလိုမာလကာ သီးများကို မိသားစု တစ်ပိုင်တစ်နိုင်သော် လည်းကောင်း၊ စီးပွားဖြစ်သော်လည်းကောင်း၊စိုက်ပျိုးကြပါသည်။ ပျိုးပင်များကို ကိုယ်တိုင် ပျိုး၊ ကိုယ်တိုင် ကိုင်းကူး၍ စိုက်ပျိုးပြီး (၃-၄)လအကြာတွင် အသီးများခူးစွတ်၍ ရောင်းချနိုင်ကြောင်း သိရပါသည်။ ဈေးနှုန်းများ အနေဖြင့် အကြီးတစ်လုံးလျှင် (၇၀၀)ကျပ်၊ အသေးတစ်လုံးလျှင် (၅၀၀) ကျပ်ဖြစ်ပြီး အကြီး အသေး ပေါ်မူတည်ပြီး ရောင်းချရကြောင်းသိရပါသည်။ ဈေးကွက်အနေဖြင့် ပြည် မြို့ပေါ်ဈေးများ၊ အသီးဆိုင် များနှင့် ကျောင်းဈေးများတွင် ရောင်းချကြကြောင်းသိရပါသည်။

DOCA(ပဲခူး)

  မြန်မာနိုင်ငံအနှံ့အပြားတွင် ကတွတ်ပင်များ ပေါက်ရောက်ပြီး ရေမြေ၊ ပေါက်ရောက်သည့် ဒေသ ကိုလိုက်၍ ကတွတ်သီးအရောင်မှာ အစိမ်းရောင်၊ ခရမ်းရောင်၊ အညိုရောင်၊ အဝါရောင်၊ နီညိုရောင်၊ အမည်းရောင်ဆိုပြီး မျိုးစုံရှိပါသည်။ အသီး၏ထူးခြားချက်က ပန်းပွင့်က အသီးထဲမှာရှိပါသည်။ ကတွတ်သီးအမှည့်ကို လတ်လတ်ဆတ်ဆတ် ဒီအတိုင်းစားသုံးကြပေမဲ့ ယိုထိုပြီးစားသုံးကြတာ များပါ သည်။ အချိုသီးနှင့် အချဉ်သီး (၂) မျိုးရှိပါသည်။ ကတွတ်သီးမှာ နှစ်ပတ်လည်သီးသော အသီးမျိုးဖြစ် သော်လည်း၊ ကဆုန်နှင့် နယုန်လများတွင် ပထအကြိမ်အသီးအများဆုံးသီးပြီး၊ ဝါဆို၊ ဝါခေါင်လများတွင် ဒုတိယအကြိမ် အများဆုံးသီးကြောင်း ကျန်လများတွင် အနည်းသာသီးပြီး အသီးအရည်အသွေးမှာလည်း မကောင်းကြောင်းသိရပါသည်။ ယခုဝါခေါင်လပထမပတ်တွင် ကတွတ်သီးပင်တစ်ပင်လျှင် ပျမ်းမျှ ပိဿာ (၄၀)ခန့်ခူးယူနိုင်ပြီး တစ်ပိဿာလျှင် ကျပ် (၄၀၀၀)ဖြင့် အဓိကအားဖြင့် ယိုလုပ်ငန်းလုပ်ကိုင်သူများထံသို့ ရောင်းချကြကြောင်း သိရှိရပါသည်။ ကတွတ်သီးများကို ပြည်မြို့ မြို့မစည်ပင်သာယာဈေးကြီးနှင့် အခြား ဈေးများတွင် စတင်ရောင်းချနေပြီး ပေါ်ဦးပေါ်ဖျား ကတွတ်သီးတစ်ပြည်ကို ကျပ် (၆၀၀၀) နှုန်းဖြင့် ရောင်းချကြောင်း သိရှိရပါသည်။ ပေါ်ဦးပေါ်ဖျား ဈေးကောင်းရနေတဲ့ ရာသီပေါ် ကတွတ်သီးကို စားသုံးသူများမှ ဈေးကောင်းပေး၍ ဝယ်ယူစားသုံးကြ၍ အရောင်းအဝယ်ဖြစ်ကြောင်း သိရှိရပါသည်။

DOCA(ပဲခူး)

တောင်ငူမြို့နယ်သို့ အခြားဒေသများ မှ ရာသီအလိုက် အသီးအနှံများကို အပါတ်စဉ် လစဉ် တင်ပို့ရောင်ချလျှက်ရှိရာ ရှမ်းပြည်ဘက်မှ အားလူးများ တင်ပို့ရာတွင် အားလူးကို အသေး ၊ အလတ်၊ အကြီးဟူ၍ အလုံးဆိုဒ်ခွဲပြီးရောင်းချလျှက်ရှိပါသည်။ အားလူး အသေး (၁) ပိဿာလျှင် ၃၅၀၀ ကျပ်၊ အလတ် (၁) ပိဿာ လျှင် ၄၅၀၀ ကျပ်၊ အကြီး (၁) ပိဿာ လျှင် ၅၅၀၀ ကျပ်ထိ ဈေးနှုန်း အသီးသီးရှိပြီး ကြက်သွန်ဖြူ မှာ အသေး (၁) ပိဿာ ၅၅၀၀ ကျပ်၊ အလတ် (၁) ပိဿာ ၆၅၀၀ ကျပ် ၊ အကြီး (၁) ပိဿာ ၈၀၀၀ ကျပ်ထိ ဈေးနှုန်း အသီးသီးရှိ၍ (၃) ပိဿာ နှင့် အထက် ဝယ်ယူပါက ဈေးနှုန်းအပြောင်း အလဲရှိပြီး ဂျင်းဈေးနှုန်းမှာ (၁) ပိဿာ ၄၅၀၀ ကျပ်မှ ၅၅၀၀ ကျပ်ထိ ဈေးရှိပြီး အိမ်တိုင်းအတွက် မရှိမဖြစ်လိုအပ်သော မီးဖိုချောင်သုံးပစ္စည်းများဖြစ်သည့်အတွက် အရောင်းအဝယ်သွက်ကြောင်း တောင်ငူမြို့ရှိ ပွဲရုံ များမှ သတင်းရရှိပါသည်။

DOCA(ပဲခူး)