ပြည်တွင်းကုန်သွယ်မှုသတင်း

   ကလေးဝမြို့နယ်တွင် ဆီထွက်သီးနှံများအနေဖြင့် ဒေသတွင်းထွက်ရှိသည့် မြေပဲနှင့် နေကြာတို့သာ ကြိတ်ခွဲနေရပြီး မြေပဲဆံနှင့် နေကြာဆံများ အရောင်းအဝယ်ဖြစ်ထွန်းကြပြီး မြေပဲဆံ ( ၁၆ ) ပြည် တစ်တင်းလျင် ( ၁၆၀၀၀၀ - ၁၈၀၀၀၀ ) ကျပ်၊ နေကြာဆံ ( ၁၆ ) ပြည်တစ်တင်းလျင် ( ၄၈၀၀၀ မှ ၅၀၀၀၀ ) ကျပ် ခန့်ရှိပြီး ဆီထွက်သီးနှံများ အနေဖြင့် အရောင်းအဝယ်အေးနေကြောင်း သိရှိရပါသည်။

      စားသုံးဆီဈေးကွက်အနေဖြင့် ​မြေပဲဆီ ( ၁၀ ) ပိဿာဝင် တစ်ပုံးလျှင် ( ၂၁၀၀၀၀ ) ကျပ်၊ နေကြာဆီ ( ၁၀ ) ပိဿာဝင် တစ်ပုံးလျှင် ( ၁၉၀၀၀၀ ) ကျပ်ဖြင့် ရောင်းချနေပြီး ဈေးကွက်အနေဖြင့် ဒေသတွင်းသာ ရောင်းချလျက်ရှိပါကြောင်း ဆီကုန်သည်တစ်ဦး၏ ပြောပြချက် အရ သိရှိရပါသည်။

DOCA(စစ်ကိုင်း)

  ပဲခူးတိုင်းဒေသကြီး၊ ပြည်ခရိုင်အတွင်းရှိ မြို့သစ်ဈေးနှင့် ပြည်မြို့ပေါ်ရှိ ဈေးများတွင် ပုတီးကုန်းဒေသမှထွက်ရှိသော မုန်လာဥဖြူများကို နေ့စဉ် မီးရထားဖြင့် သယ်ယူပြီး ရောင်းဝယ် ကြကြောင်း မြို့သစ်ဈေးသယ်များထံမှ သိရှိရပါသည်။

  မုန်လာဥဖြူကို အမျိုးမျိုးလုပ်စားကြသည်။ တို့စရာအနေနဲ့ရော၊ ပြုတ်ပြီး ငါးပိရည်ဖြင့် စားတာ ရှိသလို အစိမ်းလိုက်အခွံခွါရေဆေးပြီး စားတာလည်းရှိကြပါသည်။ သုပ်စားတာ၊ အချဉ်ထည့်တာ၊ နေလှန်းအခြောက်ခံထားပြီး စားတာလည်းရှိပါတယ်။ အသားတစ်ခုခုနှင့်ရောပြီး ဟင်းချိုအဖြစ် ချက်ပြုတ်စားသောက်ကြသလို အတုံးသေးသေးလေးတွေလှီးပြီး ကြော်စားလို့လည်း ရပါတယ်။

ပြည်မြို့၊ မြို့သစ်ဈေးတွင် ရောင်းချနေသော မုန်လာဥဖြူများမှာ အသေးစည်းနှင့်အကြီးစည်း ဟူ၍ (၂)မျိုးရောင်းချကြပါသည်။ အလုံးအသေးတစ်စည်းလျှင် (၁၀)ပင်တစ်တွဲရှိပြီး အလုံးကြီး တစ်စည်းလျှင် (၅)ပင်တစ်တွဲရှိပါသည်။ အသေးစည်းတစ်စည်းလျှင် (၈၀၀)ကျပ်ဖြင့် ရောင်းချပြီး အကြီးတစ်စည်းလျှင် (၁၀၀၀)ကျပ်ဖြင့်ရောင်းချကြောင်း သိရပါသည်။

DOCA(ပဲခူး)

  တောင်ငူမြို့သို့ ရှမ်းပြည်နယ်မှ သစ်သီးဝလံ နှင့် ပန်းများတင်ပို့ရောင်းချနေမှုတွင် ပန်း များမှာ ဒေသထွက် ပန်းများထက် အပွင့်လှသောကြောင့် ဈေးကွက် အတွင်း ရောင်းအားကောင်းလျှက်ရှိရာ ရှမ်းပြည်ဘက်မှ လာသော ဂန္ဓမာပန်းမှာ အပွင့် (၁၀) ပွင့် ပါ တစ်စီးကို ၅၀၀၀ ကျပ် မှ ၆၀၀၀ ကျပ် ထိ ဈေးရပြီး၊ ဒေသထွက် ဂန္ဓမာပန်းမှာ အပွင့် သေးပြီး အပွင့် ၂၅ ပွင့် ၃၀ပွင့်လိုက်ပါပြီး အစုလိုက် ပန်းပွင့်သဖြင့် မိသားစု ဂန္ဓမာပန်းဟုခေါ်ပြီး ၁ စီး ကို ၄၀၀၀ ကျပ် မှ ၅၀၀၀ ကျပ်ထိသာဈေးရှိပါသည်။  

    နှင်းဆီပန်းမှာတော့ ရောင်စုံရှိပြီး ရှမ်းပြည်ဘက်မှ နှင်းဆီပန်းမှာ (၁၀) ပွင့် ပါ တစ်စီး ကို ၄၅၀၀ ကျပ်မှ ၅၀၀၀ကျပ်ထိဈေးရှိပြီး ဒေသထွက် နှင်းဆီပန်းမှာ (၁၀) ပွင့် ပါ တစ်စီး ကို ၂၅၀၀ကျပ် မှ ၃၀၀၀ ကျပ်သာ ဈေးပေါက်ကြောင်း ပန်းများ ရောင်းချသည့် ပန်းဒိုင်များထံမှ သတင်းရရှိပါသည်။

DOCA(ပဲခူး)

တောင်ငူခရိုင်၊တောင်ငူမြို့နယ်တွင် မိသားစုတစ်နိုင်တစ်ပိုင်လုပ်ငန်းဖြစ်သော စိန်ဟင်္သာအမှတ် တံဆိပ်ပါကရမက်မွှေးနံသာတိုင်နှင့် နနွင်းခြင်ဆေးတိုင်များ ပြုလုပ်ရောင်းချလျက်ရှိသည်။ မွှေးနံ့သာတိုင် နှင့်ခြင်ဆေးတိုင်များပြုလုပ်ရာတွင် ကုန်ကြမ်းအမှုန့်များကို ရန်ကုန်မြို့နှင့်မန္တလေးမြို့တို့မှ ဝယ်ယူရပါ သည်။

ပထမဦးစွာ ၁၀ လက်မခန့်ရှိသော ဝါးချောင်းလေးများကို အသင့်ပြုလုပ်ရပါသည်။ထို့နောက် ကုန်ကြမ်းမှ ကုန်ချောအဖြစ်ပြုလုပ်ရာတွင် ကရမက်အမှုန့်နှင့် နနွင်းအမှုန့်များကို ရေနှင့်ဖျော်၍ အသင့် လုပ်ပြီးသား ဝါးချောင်းများနှင့် လိမ့်ပေးရပါသည်။ ရလာသောမွှေးနံသာတိုင်နှင့် နနွင်းတိုင်များအား နေရောက်အောက်တွင် အခြောက်ခံရပါသည်။

ကရမက်မွှေးနံ့သာတိုင် ၁၅ တိုင်ပါ ၁ထုတ်လျှင် ၅၀၀ ကျပ်၊ ၃၀ တိုင်ပါ ၁ထုတ်လျှင်၁၀၀၀ ကျပ်နှင့် ၃၅တိုင်ပါ ၁ထုတ်လျှင် ၃၀၀၀ကျပ်ဖြင့် ရောင်းချပြီး နနွင်းခြင်ဆေးတိုင် ၃၀တိုင်ပါ ၁ထုတ်လျှင် ၃၀၀၀ကျပ် ဖြင့် ရောင်းချလျက်ရှိသည်။ ကရမက် ၁၀ ကျပ်သားလျှင် ၃၀၀၀ကျပ်၊ နံ့သာဖြူ ၁ကျပ်သား လျှင် ၄၅၀၀ ကျပ်ဖြင့် ရောင်းချလျက်ရှိသည်။ မွှေးနံ့သာတိုင်သည် ဗုဒ္ဓဘာသာဝင်တို့၏ ဘုရာမီးပူဇော်ရာ တွင် အသုံးပြုရသည့်အတွက် အရောင်းအဝယ်ကောင်းပြီး မိုးရာသီကာလခြင်များပိုမိုပေါက်ဖွားသဖြင့်  ခြင်ဆေးတိုင် မှာလည်း အရောင်းသွက်ကြောင်း စိန်ဟင်္သာအမှတ်တံဆိပ် အမွှေးတိုင်နှင့် ခြင်ဆေးတိုင် လုပ်ငန်းရှင် မမြင့်၏ပြောကြားချက်အရ သိရပါသည်။

DOCA(ပဲခူး)

 ပြောင်းပုတိုကို နာနတ်ပြောင်း (pineapple corn) လို့လည်းခေါ်ဆိုကြပြီး ရှမ်းမလေး ပြောင်းလို့လည်း ခေါ်ဝေါ်ကြပါသည်။ ပြောင်းပုတိုသည် ပုံမှန်မြင်နေကျပြောင်းဖူးများနှင့် ကွဲပြားပြီး နာနတ်သီးနှင့်ဆင်တူကာ အရသာမှာ ချိုမြိန်ပါသည်။ ပြောင်းဖူးတစ်ခုလုံးသည် အခြားပြောင်းဖူးများ ထက်သေးငယ်ကာ အစေ့များသည် ဝါညိုရောင်သန်းနေပါသည်။ ပြောင်းဖူးတိုတွင် အမျှင်ဓာတ်၊ ဗီတာမင် ဘီ၊ သံဓာတ်များစွာပါဝင်ပြီး နှစ်သက်သလို ပြုတ်စား၍သော်လည်ကောင်း၊ မီးကင်စား၍ သော်လည်းကောင်း စားသုံးနိုင်ပါသည်။

 တစ်နှစ်မှတစ်ခါလောက်သာ မြင်တွေ့ရသော ပြောင်းဖူးတိုများသည် ပြင်ဦးလွင်ဒေသမှထွက်ရှိပြီး တောင်ငူမြို့နယ်ရှိဈေးများသို့ ယခုမိုးရာသီအချိန်တွင် ဝင်ရောက်လာကြပြီး ပြောင်းဖူးတို၁၀ ဖူးလျှင် ၇၀၀၀ ကျပ်၊ အဖူး ၁၀၀ လျှင် ၆၀၀၀၀ ကျပ်ဖြင့် ရောင်းချလျက်ရှိကြောင်းလည်း သိရပါသည်။

DOCA(ပဲခူး)