ပြည်တွင်းကုန်သွယ်မှုသတင်း

       ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာနကွပ်ကဲမှုအောက်ရှိ ဘုရင့်နောင် ကုန်စည်ဒိုင်သို့  နေ့စဉ်မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန်အခြေအနေများအား  အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေအား နေ့စဉ်စုံစမ်းလျက်ရှိပါသည်။ စက်တင်ဘာလ (၂၄) ရက်နေ့မှ စက်တင်ဘာလ (၃၀) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီဝင်ရောက်ရာဒေသများဖြစ်သည့် ဆိပ်ဖြူ၊ မြင်းခြံ၊ မြင်းခြံ (ကံဆင့်၊ မုံရွာ၊ တောင်သာဒေသတို့မှ ကြက်သွန်နီ (၇၀၂၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့်ပြန်လည်စီးထွက်မှုရှိကြောင်းသိရှိရပါသည်။ ထို့ကြောင့် ကြက်သွန်နီလက်ကျန်မှာ (၂၈၀၈၀၀) ပိဿာကျန်ရှိကြောင်း ကုန်စည်ဒိုင်သတင်းအရသိရှိရသည်။ ဆိပ်ဖြူကြက်သွန်နီ (အသစ်) အချောတစ်ပိဿာလျှင် ကျပ်၁၄၀၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၄၀၀၊ ရှယ်မှာ ကျပ်၂၆၀၀၊  မုံရွာ ကြက်သွန်နီ(အသစ်) အချောတစ်ပိဿာလျှင် ကျပ်၁၃၀၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၄၀၀၊ ရှယ်မှာ ကျပ်၂၆၀၀၊ မြင်းခြံကြက်သွန်နီ (အသစ်) အချောတစ်ပိဿာလျှင် ကျပ်၁၅၅၀၊ အသန့်မှာ တစ်ပိဿာလျှင် ကျပ်၂၀၀၀၊ အကြီးမှာ ကျပ်၂၄၀၀၊ ရှယ်မှာ ကျပ်၂၆၀၀၊ မြင်းခြံ(ကံဆင့်) ကြက်သွန်နီ (အသစ်) အချောတစ်ပိဿာလျှင် ကျပ်၁၇၀၀၊ အသန့်မှာ တစ်ပိဿာလျှင် ကျပ်၂၂၀၀၊ အကြီးမှာ ကျပ်၂၆၀၀၊ ရှယ်မှာ ကျပ်၂၈၀၀၊ တောင်သာကြက်သွန်နီ(အသစ်) အချောတစ်ပိဿာလျှင် ကျပ်၁၂၀၀၊ အသန့်မှာ တစ်ပိဿာလျှင် ကျပ်၁၅၀၀၊ အကြီးမှာ ကျပ်၁၇၀၀၊ ရှယ်မှာ ကျပ်၂၂၀၀ ဈေးတို့အသီးသီးရှိကြောင်း စုံစမ်းသိရှိရပါသည်။

DOCA(ရန်ကုန်)

        ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတကုန်စည်ဒိုင်တွင် ၂၀၂၄ခုနှစ်၊ စက်တင်ဘာလ (တတိယပတ်)တွင် မတ်ပဲဈေးနှုန်းမှာ တဖြည်းဖြည်းမြင့်တက်လာ၍ ဈေးကောင်းရရှိလာပြီး အရောင်းအဝယ်ဖြစ်လျက်ရှိကာ ကုန်စည်ဒိုင်တွင်သာမက အပြင်ပွဲရုံများတွင်လည်း အရောင်းအဝယ်ဖြစ်နေကြောင်းသိရသည်။

          စက်တင်ဘာလ(ဒုတိယပတ်) ကုန်စည်ဒိုင်တွင် အရောင်းအဝယ်ဖြစ်ခဲ့သော မတ်ပဲဈေးနှုန်းမှာ တစ်တင်းလျှင် ကျပ် (၁၂၈၅၀၀)၊ (တတိယပတ်)တွင် ကျပ် (၁၃၁၅၀၀) ဖြစ်နေပြီး (ဒုတိယပတ်)နှင့်နှိုင်းယှဉ်ပါက တစ်တင်းလျှင် (၃၀၀၀) ကျပ်ခန့်ဈေးနှုန်းမြှင့်တက်နေပြီး အရောင်းအဝယ်သွက်လျက်ရှိကြောင်း၊ တင်ပို့မှုအနေဖြင့် ရန်ကုန်နှင့် ပဲခူးတိုင်းဒေသကြီးသို့ တင်ပို့နေရကြောင်း ကုန်သည်များထံမှသိရှိရပါသည်။

DOCA(ဧရာဝတီ)

        ရှမ်းပြည်နယ်(တောင်ပိုင်း)၊တောင်ကြီးမြို့အတွင်းရှိ အရှေ့မြို့ပတ်လမ်း၊ ရေအေးကွင်းရပ်၊ အမှတ် (၅)ဈေးအနီးမှ ရာသီစာသီးနှံဖြစ်သော တည်သီးကို ဒေသထွက်ရာသီစာသီးနှံအဖြစ်ရောင်းချသူ ပြည်သူထံမှ လတ်တလော မိုးရွာသွန်းမှုနှင့်မိုးကြီးမှုအခြေအနေများကြောင့် အသီးများကို ထပ်မံခူးဆွတ်နိုင်ခြင်းမရှိသေးသော်လည်း ဈေးကွက်အတွင်းရောင်းချရန် သင့်လျော်သောအခြေအနေရှိသည့် အသီးများမှာ စားသုံးသူပြည်သူများ ဝယ်ယူမှုတိုးမြင့်လျက်ရှိကြောင်းသိရှိရပါသည်။

        တည်သီးကို တောင်ကြီးမြို့နှင့် ဟိုပုံးမြို့၊ ကလောမြို့များအနီးတွင် စိုက်ပျိုးဖြစ်ထွန်းပြီး တချို့ အလေ့ကျပေါက်သော အပင်များလည်းရှိသည်။ တည်သီးမျိုးကွဲများစွာရှိသည့်အနက် မြန်မာနိုင်ငံတွင် တွေ့ရသော အမျိုးအစားမှာ ‘ဒိုင်အော့စပိရော့လိုတပ်’ (Diospyros Iotus) မျိုးဖြစ်ပြီး အီတလီနိုင်ငံနှင့် အရှေ့တိုင်းနိုင်ငံများတွင် စိုက်ပျိုးဖြစ်ထွန်းသောမျိုးများဖြစ်သည်။ လတ်တလော ဈေးကွက်အတွင်းရောင်းချရန် သင့်လျော်သော အခြေအနေရှိသည့် အသီးများမှာ စားသုံးသူပြည်သူများ ဝယ်ယူမှုတိုးမြင့်လျက်ရှိကြောင်းသိရှိရပါသည်။

        တည်သီးကို တောင်ကြီးမြို့နှင့် ဟိုပုံးမြို့၊ ကလောမြို့အနီး စိုက်ပျိုးဖြစ်ထွန်းပြီး အချို့အလေ့ကျပေါက်သော အပင်များလည်းရှိသည်။ တည်သီးကို ရာသီပေါ် ဒေသထွက်သီးနှံအဖြစ် စားသုံးကြသည့်အပြင် ကျန်းမာရေးဓာတ်စာအဖြစ်လည်း မှီဝဲကြသည်။ ယခုလတ်တလောဈေးကွက်၌ ရာသီစာသီးနှံ တည်သီးများကို အကြီး(၁)လုံးလျှင် (၃၀၀)ကျပ်၊ (၁၀)လုံးလျှင် (၃၀၀၀) ကျပ်၊ တည်သီးအသေး(၁)လုံးလျှင် (၂၅၀)ကျပ်၊ (၁၀)လုံးလျှင် (၂၅၀၀) ကျပ်အထိ ဈေးကွက်အတွင်း ရောင်းချလျက်ရှိကြောင်း စုံစမ်းသိရှိရပါသည်။

DOCA(ရှမ်း)

       ရှမ်းပြည်နယ်(အရှေ့ပိုင်း)ဒေသတွင် ဂေါ်ဖီထုပ်သီးနှံကို ကျိုင်းတုံမြို့၊ လွယ်မွေအုပ်စုကျေးရွာများတွင် မိုးစပါးရိတ်သိမ်းပြီးချိန်၌ လစ်လပ်လျက်ရှိသော လယ်ယာမြေများပေါ်တွင် သီးထပ်သီး ညှပ်အဖြစ် ဆောင်းရာသီ၌သာ အများဆုံးစိုက်ပျိုးလေ့ရှိပါသည်။ ကျန်ရာသီများတွင် စိုက်ပျိုးထွက်ရှိမှုနည်းပါးပြီး ရှမ်းပြည်နယ်(တောင်ပိုင်း)၊ တောင်ကြီးဘက်မှဝင်ရောက်လာသော ဂေါ်ဖီထုပ်များလည်း  ဈေးကွက်အတွင်း အရောင်းအဝယ်ဖြစ်လျက်ရှိပါသည်။

      စက်တင်ဘာလအတွင်း ရှမ်းပြည်နယ်(တောင်ပိုင်း) အောင်ပန်းမှ ရှမ်းပြည်နယ် (အရှေ့ပိုင်း) ကျိုင်းတုံသို့ တစ်ပတ်လျှင် ဂေါ်ဖီထုပ် ကားနှစ်စီးခန့်ဝင်ရောက်လျက်ရှိပါသည်။ အောင်ပန်းမှလာသော ဂေါ်ဖီထုပ်များသည် ဈေးနှုန်းသက်သာသည့်အတွက် ဝယ်ယူစားသုံးမှုများပြီး  အရောင်းအဝယ်ဖြစ်ထွန်းလျက်ရှိပါသည်။ အောင်ပန်းမှလာသော ဂေါ်ဖီထုပ်ဈေးနှုန်းများမှာ ဂေါ်ဖီထုပ်ကြီးတစ်ထုပ်လျှင် (၂၀၀၀)ကျပ်၊ ဂေါ်ဖီထုပ်အသေးတစ်ထုပ်လျှင် (၁၀၀၀)ကျပ်ဖြင့်ရောင်းဝယ်လျက်ရှိပြီး ကျိုင်းတုံဒေသထွက် ဂေါ်ဖီထုပ်ကြီးတစ်ထုပ်လျှင် (၃၀၀၀)ကျပ်ခန့်၊ ဂေါ်ဖီထုပ်သေးတစ်ထုပ်ှင် (၂၀၀၀)ကျပ်ခန့်ဖြင့် ရောင်းဝယ်လျက်ရှိကြောင်းသိရှိရပါသည်။

DOCA(ရှမ်း)

     မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်သည် ချင်းတွင်းမြစ်နှင့် ဧရာဝတီမြစ်တို့ဆုံရာ မြို့နယ်တစ်ခုဖြစ်ပါသည်။ ရေစကြိုမြို့နယ်တွင် မိုးသီးနှံများဖြစ်သည့် မြေပဲ၊ နှမ်း၊ ပဲတီစိမ်း၊ ပဲစဉ်းငုံ၊ အစေ့ထုတ်ပြောင်းနှင့် ဝါသီးနှံများကို စိုက်ပျိုးကြပါသည်။ မိုးသီးနှံများထဲတွင် နိုင်ငံတော်မှ ပြည်တွင်းဖြစ် အဝတ်အထည်များ ထုတ်လုပ်နိုင်ရန်အတွက် အခြေခံလိုအပ်သည့် ချည်များ အများအပြားထွက်ရှိစေရေး ဝါသီးနှံများစိုက်ပျိုးမှုကို ပံ့ပိုးကူညီဆောင်ရွက်လျှက်ရှိပါသည်။ ရေစကြိုမြို့နယ်အနေဖြင့် ဝါသီးနှံကို (၃၁၃၄) ဧက စိုက်ပျိုးကြောင်းသိရှိရပါသည်။  မြေခဲတောင်၊ ကိုင်းမကျီး၊ ပခန်း၊ မြေဖြူ၊ ဂွေးချို၊ စည်သာ၊ ဆင်ချောင်းကျေးရွာများတွင် အဓိကစိုက်ပျိုးလျက်ရှိကြောင်း သိရသည်။

    ဝါသီးနှံများကို နှမ်း၊ မြေပဲ၊ ပဲတီစိမ်း သီးနှံခင်းများတွင် ကြားညှပ်စိုက်ပျိုးခြင်းနှင့် အများအား ဖြင့် သီးသန့်စိုက်ပျိုးကြပါသည်။ မျိုးများအနေဖြင့် ဒေသမျိုး၊ ငွေချည်-၉၊ ရွှေတောင်-၁၀၊ ချည်မျှင် ရှည်ဝါများကို ဩဂုတ်လတွင် စတင်စိုက်ပျိုးကြကြောင်း၊ မိမိအနေဖြင့် ယခင်နှစ်က (၅)ဧက စိုက်ပျိုး ခဲ့ကြောင်း၊ ယခုနှစ်တွင် (၇)ဧက စိုက်ပျိုးထားရှိကြောင်း၊ (၁)ဧက အနေဖြင့် မျိုးစေ့ (၇)ပိဿာခန့် ကုန်ကျပြီး ထွန်ယက်ခ၊ မျိုးစေ့၊ စိုက်စရိတ်၊ သွင်းအားစု၊ ခူးဆွတ်ရိတ်သိမ်းခြင်း တို့အတွက် စုစုပေါင်း ကုန်ကျစရိတ်မှာ (၆) သိန်းခန့် ကုန်ကျပြီး အထွက်နှုန်းအနေဖြင့် (၁) ဧကတွင် (၂၅၀ မှ၃၅၀) ပိဿာ ထွက်ရှိကြောင်း၊ (၁)ပိဿာလျှင် ကျပ်(၃၅၀၀)ခန့်ရောင်းရပြီး အကျိုးအမြတ်အနေဖြင့် ကျပ်(၅)သိန်း ခန့်ရရှိကြောင်း သိရသည်။ 

   ဝါသီးနှံသည် မိုးသီးနှံဖြစ်သည့်အတွက် မိုးတွင်းကာလမှာ စိုက်ပျိုးကြကာ မိုးကြိုက်သောသီးနှံဖြစ်ပြီး မိုးကောင်းသောနှစ်များတွင် ပိုမိုထွက်ရှိပါကြောင်း၊ သွင်းအားစုဖြစ်သည့် မြေဩဇာနှင့်ပိုးသတ်ဆေးများ စနစ်တကျသုံးစွဲမည်ဆိုလျှင် ပိုမိုထွက်ရှိနိုင်ပါကြောင်း၊ အခြားသီးနှံများကဲ့သို့ အလုပ်မရှုပ်ပဲ သက်သာသောကြောင့် တောင်သူများ ပိုမိုစိုက်ပျိုးကြကြောင်း၊ ယခုအချိန်တွင် ဝါသီးနှံများမှာ အပင်ဖြစ်ထွန်းအားကောင်းမွန်ပြီး အကိုင်းအခက်များ ဝေဆာကာ အသီးအပွင့်များ စတင်ပွင့်ဖူးလျက်ရှိပါကြောင်း၊ ရာသီဥတုအခြေအနေမှာလည်း ကောင်းမွန်လျက်ရှိသဖြင့်  ယခုနှစ်တွင် ကုန်ကျစရိတ်များပြားသလို အထွက်နှုန်းများကောင်းနိုင်ကြောင်း၊ တောင်သူများမျှော်လင့်နေသည့် အကျိုးအမြတ်ရရှိမည်ဖြစ်ကြောင်း  တောင်သူတစ်ဦး၏ ပြောပြချက်အရ သိရှိရပါသည်။

DOCA(မကွေး)