ပြည်တွင်းကုန်သွယ်မှုသတင်း

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် စီးပွားရေးလုပ်ငန်းရှင်များနှင့် တွေ့ဆုံ၍ အခြေခံစားကုန်ဈေးနှုန်းများ၊ ဓါတ်မြေဩဇာနှင့် ပိုးသတ်ဆေးဈေးနှုန်းများအား အပတ်စဉ်တင်ပြလျက်ရှိကြောင်းသိရသည်။

             နိုဝင်ဘာလ၊ စတုတ္ထအပတ်တွင် ရွှေဘိုမြို့၌ ရောင်းချလျက်ရှိသော ဓါတ်မြေဩဇာနှင့် ပိုးသတ်ဆေးဈေးနှုန်းများမှာ အာမို၊ ကျွဲနက်တံဆိပ် (၁၅:၁၅:၁၅)ကွန်ပေါင်း ဓါတ်မြေဩဇာတစ်အိတ်လျှင် (၁၉၀၀၀ဝိ/-)ကျပ်၊ ဇာမဏီတံဆိပ်(၁၃:၅:၇) ကွန်ပေါင်းဓါတ်မြေဩဇာတစ်အိတ်လျင်(၉၅၀၀ဝိ/-)၊ အာမို၊ ပုလဲတံဆိပ် ကွန်ပေါင်းဓါတ်မြေဩဇာတစ်အိတ်လျှင်(၁၂၀၀၀ဝိ/-)၊ ပန်းဖူးတံဆိပ်ဓါတ်မြေဩဇာတစ်အိတ်လျင် (၁၇၀၀၀ဝိ/-)၊ ဒီမွန် 1.8တံဆိပ် ထိသေ/ စားသေ (အဆိပ်ငွေ့) 500cc တစ်ဗူးလျင်(၂၃၀၀ဝိ/-)ကျပ်၊ ဇိုင်ကလုံးတံဆိပ်ပင်လုံးပြန့်ပိုးသတ်ဆေး တစ်လီတာ တစ်ဗူးလျင်(၇၅၀၀ဝိ/-)ကျပ်ဖြင့် ရောင်းချလျက်ရှိပြီး MCတံဆိပ်(၁၅:၁၅:၁၅) ကွန်ပေါင်းဓါတ်မြေဩဇာနှင့် ငှက်ကြီးတောင်တံဆိပ် ထိသေ/ စားသေ(အဆိပ်ငွေ့)၊ ရှောင်လင်တံဆိပ် ထိသေ/ စားသေ(အဆိပ်ငွေ့) ပိုးသတ်ဆေးများမှာ ဈေးကွက်အတွင်း ပစ္စည်းပြတ်လျက်ရှိကြောင်း၊ အရောင်းအဝယ်ဖြစ်မှုမှာလည်း ပုံမှန်သာဖြစ်ကြောင်း  ဓါတ်မြေဩဇာနှင့် ပိုးသတ်ဆေးအရောင်းဆိုင်များမှ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)

             ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်တွင် ဆန်စပါးကို အဓိထားစိုက်ပျိုးကြပြီး ယာမြေများတွင် ပဲအမျိုးမျိုး၊ ဝါ၊ ငရုပ်၊ ကြက်သွန်၊ ဟင်းသီးဟင်းရွက်၊ သီးနှံများ စိုက်ပျိုးကြကြောင်းနှင့် ငရုပ်စိုက်တောင်သူများအနေဖြင့် စတင်စိုက်ပျိုးထွက်ရှိနေပြီး အထွက်နှုန်းနည်းသော်လည်း ဈေးကောင်းသဖြင့် အသီးအစိမ်းခူးဆွတ်ရောင်းချလျက်ရှိရာ  စိုက်ပျိုးရောင်းချသူများ အဆင်ပြေလျက်ရှိကြောင်း သိရသည်။  

               ညောင်တုန်းမြို့နယ်တွင် ငရုပ်သီးအစိမ်းခူးဆွတ်ရောင်းချသူများအနေဖြင့် မိုးထောင်၊ အောက်ဆွဲငရုပ်မျိုးများ အဓိကစိုက်ပျိုးကြပြီး ဈေးကွက်ရရှိရေး အချိန်ကာလအမျိုးမျိုး စိုက်ပျိုးကြကြောင်း၊ စိုက်ပျိုးရာတွင် အစိုစိုက် (ရေသွင်းစိုက်ပျိုးခြင်း)နှင့် အခြောက်စိုက် (မြေကျင်းဖော်၍ ရေလောင်းစိုက်ပျိုးခြင်း) ဟူ၍ အမျိုးမျိုးစိုက်ပျိုးကြကြောင်း ငရုပ်သီးနှံတစ်ဧက ပျိုးထောင်စိုက်ပျိုးမည်ဆိုပါက မျိုးထုပ် (၁၅) ထုပ်ခန့် ပျိုးထောင်စိုက်ပျိုးရကြောင်း ကုန်ကျစရိတ်အနေဖြင့် မြေပြင်သည်မှစ၍ အခင်းပျက်သိမ်းသည်အထိ သွင်းအားစုထည့်သွင်းအသုံးပြုသည့်အပေါ် မူတည်၍ ငွေကျပ်သိန်း (၂၅) မှ (၃၀) သိန်းထိ ကုန်ကျစရိတ်ရှိကြောင်း ငရုပ်စိုက်တောင်သူများထံမှ သိရသည်။

              ငရုပ်သီးနှံသည် ကာလရှည်သီးနှံဖြစ်ပြီး တောင်သူအများစုသည် အသီးတောင့်ရင့်မှည့်အောင်ထားကာ (၇) ရက်တစ်ကြိမ် ခူးဆွတ်အခြောက်လှန်းကာ ရောင်းချခြင်းများပြုလုပ်ကြသော်လည်း နေ့စဉ်ဝင်ရရှိလိုသူများအနေဖြင့် ငရုပ်သီးများကို မှည့်အောင်မထားရှိဘဲ ငရုပ်အသီးအတောင့်ရင့်သည်နှင့် တစ်ပြိုင်နက်တည်း အစိမ်းခူးဆွတ်ရောင်းချလျက်ရှိရာ ငရုပ်သီးအစိမ်းဈေးကောင်းမွန်းသောကြောင့် အသီးအစိမ်းခူးဆွတ်ရောင်းချသူများ အဆင်ပြေလျက်ရှိပြီး၊ ငရုတ်သီးခြောက်အနေဖြင့်လည်း အကျိုးအမြတ်ရရှိ၍ နှစ်စဉ်ငရုတ်ခြောက် ရန်ကုန်ဈေးကွက်သို့တင်ပို့ရောင်းချနေပြီး စီးပွားဖြစ်စိုက်ပျိုးနေသောလုပ်ငန်းတစ်ခုဖြစ်ပြီး ယခု ငရုတ်ခြောက်ပိဿာချိန် ၁၀လျှင် ၈၀၀၀၀ထိ ဈေးပေါက်နေပြီး ငရုတ်သီးစိမ်းဈေးအနေဖြင့် ၁ပိဿာ ၁၀၀၀၀ ကျပ်ထိ ဈေးကောင်းရနေကြောင်း သိရှိရပါသည်။

DOCA(ဧရာဝတီ)

           ယာကွန်ပင်စည်ဥ (Tuber Root) ကို စားသုံးနိုင်ရန်အတွက်စိုက်ပျိုးကြပြီး ယာကွန်ဥသည် ကြွပ်ဆတ်၍ အရည်ရွှမ်းပြီး ပန်းသီး၊ သစ်တော်သီးတို့ကဲ့သို့ ချိုမြိန်ပါသည်။ ယာကွန်ဥကို တူးဖော်ပြီးနောက် ခြောက်သွေ့၍အေးမြပြီး လေဝင်လေထွက်ကောင်း သောနေရာတွင်ထားပါက ကာလအတန်ကြာအထိ သိုလှောင်ထားနိုင်သည်။ နေရောင်တွင် နှစ်ပတ်ခန့်လှန်းပြီးစားပါက အချိုအရသာကို ပိုမိုရရှိစေကြောင်းသိရသည်။

          ယာကွန်ပင်သည် စိုက်ပျိုးရလွယ်ကူသည့်အပင်ဖြစ်သည်။ ယာကွန်ကို အရည်ရွှမ်းသောဥ၊ မြေအောက်သစ်တော်သီး၊ မြေအောက်ပန်းသီး၊ ယာကွန်အာလူး၊ ယာကွန်စတော်ဘယ်ရီဟု နိုင်ငံကိုလိုက်၍ ခေါ်ဆိုမှုအမျိုးမျိုးတွေ့ရပါသည်။ အချို့နိုင်ငံများတွင် ယာကွန်ဥကို Super Food ဟု ခေါ်ဆိုကြပါသည်။ ယာကွန်ပင်သည် အပေါ်ပိုင်း အပင်ခြောက်၍ အရွက်ကြွေကျချိန်တွင် မြေအောက်ရှိပင်စည်ဥကို တူးဖော်စားသုံးနိုင်သည်။ ယာကွန်ဥသည် ပျမ်းမျှအလေးချိန် ၃၀၀ ဂရမ်ခန့်ရှိပြီး ကြီးထွားသန်မာပါက ၂၀၀၀ ဂရမ်ခန့်အထိရှိသည်ကို တွေ့နိုင်သည်။  မြန်မာနိုင်ငံတွင် အဝါရောင်ယာကွန်ဥကို အများဆုံးတွေ့ရသည်။ မြေအောက်မြစ်ဖြစ်သော ယာကွန်ဥကို ချက်ပြုတ်၍သော်လည်းကောင်း၊ အစိမ်းသော်လည်းကောင်းစားသုံးနိုင်ကြောင်းသိရသည်။ ထို့အပြင် ယာကွန်ဥသည် အချိုဓာတ်ရသဖြင့် သကြားအစားထိုးအဖြစ် အစားအစာအမျိုးမျိုးတွင် ကျန်းမာရေးအစားအစာအဖြစ် ထည့်သွင်းကြကြောင်းသိရသည်။

           ယခုအခါတွင် ယာကွန်ဥသည် Social Media app များဖြစ်သည့် Facebook, Tiktok တို့တွင် ခေတ်စားလာသည့်အတွက် လူအများစိတ်ဝင်စားမှုရကာ အများအပြားဝယ်ယူစားသုံးကြသည့်အတွက် ဝယ်လိုအားမြှင့်တက်လာပြီး ရှမ်းပြည်ဒေသမှ မှာယူရောင်းချလျက်ရှိကာ ပုသိမ်မြို့ရှိ online market ပေါ်တွင် (၁) ပိဿာ (၆၅၀၀) ကျပ်နှင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့နယ်တွင် ရာသီပေါ်အစားအစာဖြစ်သည့် တောင်ပို့မှိုများအား ဟင်းအဖြစ်ကြော်စား၊ ချက်စားခြင်းနှင့် အချဉ်သိပ်၍ စားသောက်ကြပြီး ယခုနှစ်တွင် ပိုမိုဈေးကောင်းရရှိသည့်အတွက် မှိုရှာဖွေရောင်းချသည့် တောင်သူများ အပိုဝင်ငွေရရှိကာ အဆင်ပြေလျက်ရှိကြောင်း သိရသည်။

          အဆိုပါ တောင်ပို့မှိုများသည် နှစ်စဉ်မိုးရာသီကာလတွင် တောင်ယာခြံများနှင့် တောတွင်းရှိ တောင်ပို့များအနီးတွင် ပေါက်ရောက်လျက်ရှိသောကြောင့် မှိုရှာဖွေသည့် တောင်သူများအနေဖြင့် အဆိုပါနေရာများတွင် မှိုများရှာဖွေတူးယူရရှိကြောင်းသိရသည်။

          မှိုတစ်ကျင်းလျှင် အနည်းဆုံး ၅၀ ကျပ်သားမှ အများဆုံး ၅ ပိဿာခန့် တူးယူရရှိပြီး ယခင်နှစ် ပုသိမ်မြို့တွင်းတွင် တောင်ပို့မှို (ခေါ်) မှိုဖြူ တစ်ပိဿာလျှင် ငွေကျပ် ၂၀၀၀၀ ကျပ် ခန့်ရရှိပြီး ယခုနှစ် ပုသိမ်မြို့တွင်းတွင် တောင်ပို့မှို တစ်ပိဿာလျှင် ငွေကျပ် ၃၀၀၀၀ ကျပ်ခန့် ရရှိကာ ဈေးပိုမိုရရှိသဖြင့် မှိုရှာဖွေရောင်းချသည့်တောင်သူများ အပိုဝင်ငွေရရှိကာ အဆင်ပြေလျက်ရှိကြောင်း မှိုရှာဖွေရောင်းချသည့် တောင်သူတစ်ဦးထံမှ သိရှိရပါသည်။

DOCA(ဧရာဝတီ)

            စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့် ဆီထွက်သီးနှံများအပြင် ပဲမျိုးစုံကိုလည်း စိုက်ပျိုးကြောင်းသိရသည်။ ယခုအခါ မတ်ပဲသီးနှံများ ဈေးကွက်အတွင်း ဝင်ရောက်လျက်ရှိပြီး နိုဝင်ဘာလနောက်ဆုံးပတ်အတွင်း ဈေးနှုန်းများမှာ မတ်ပဲထွက်တိုးတစ်တင်း လျင် (၉၀၀၀၀)ကျပ်၊ မတ်ပဲ(ဂျပန်)တစ်တင်းလျင် (၈၇၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ကန့်ဘလူခရိုင်မှထွက်ရှိသော မတ်ပဲများကို ရွှေဘိုမြို့နှင့် မန္တလေးမြို့ရှိပွဲရုံများ၊ ကုန်စည်ဒိုင်များသို့ တင်ပို့ရောင်းချလျက်ရှိကြောင်းသိရသည်။

               မတ်ပဲသီးနှံများသည် ကန့်ဘလူမြို့နယ်အတွင်းရှိကျေးရွာများမှ အဓိကဝင်ရောက်လျက်ရှိပြီး နိုဝင်ဘာလတတိယပတ် ဈေးနှုန်းများနှင့်နှိုင်းယှဉ်ပါက ယခုပတ်အတွင်း မတ်ပဲထွက်တိုးတစ်တင်း လျင်(၃၀၀၀)ကျပ်၊ မတ်ပဲဂျပန်တစ်တင်းလျင်(၁၀၀၀)ကျပ် ကျဆင်းသွားကြောင်း သီးနှံရောင်းဝယ် ရေးလုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)