ပြည်တွင်းကုန်သွယ်မှုသတင်း

        မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ကန့်ဘလူခရိုင်၏ အဓိကစိုက်ပျိုးသီးနှံ တစ်ခုဖြစ်သည့် အစေ့ထုတ်ပြောင်းများ ဈေးကွက်အတွင်း ဝင်ရောက်လျက်ရှိကြောင်းသိရသည်။

        အစေ့ထုတ်ပြောင်းကို မေလကုန်တွင်စတင်စိုက်ပျိုးပြီး စက်တင်ဘာလဆန်းမှစ၍ ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် C.P.808 နှင့် C.P.888 မျိုးများကို အများဆုံးစိုက်ပျိုးကြကြောင်း၊ နိုဝင်ဘာလ နောက်ဆုံးပတ်အတွင်း အစေ့ထုတ်ပြောင်း(၁)တင်းလျှင် ငွေကျပ်(၁၉၅၀၀)ဖြင့်ရောင်းဝယ်လျက်ရှိကြောင်း၊ ဈေးကွက်အနေဖြင့် ကန့်ဘလူမြို့နယ်မှထွက်ရှိသော အစေ့ထုတ်ပြောင်းများကို ရွှေဘိုမြို့၊ မန္တလေးမြို့များရှိပွဲရုံများသို့ တင်ပို့ရောင်းချကြောင်း၊ အစေ့ထုတ်ပြောင်းဈေးနှုန်းသည် ယခုပတ်အတွင်း (၁)တင်းလျှင် (၁၀၀၀)ကျပ်ကျဆင်းသွားကြောင်း သီးနှံရောင်းဝယ်ရေးလုပ်ငန်းရှင်များထံမှသိရပါသည်။

DOCA(စစ်ကိုင်း)

        မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ကန့်ဘလူမြို့နယ်အတွင်းရှိ ကျေးရွာများတွင် ဒေသတွင်းစားသုံးဆီဖူလုံစေရေးအတွက် ဆီထွက်သီးနှံဖြစ်သည့် နှမ်းသီးနှံများလည်းစိုက်ပျိုးကြကြောင်းသိရသည်။

         ယခုအခါ နှမ်းများ ဈေးကွက်အတွင်း ဝင်ရောက်လျက်ရှိပြီး ကန့်ဘလူခရိုင်၌ဖြစ်ပေါ်နေသော နှမ်းဈေးနှုန်းမှာ နိုဝင်ဘာလ နောက်ဆုံးပတ်အတွင်း နှမ်းနက်(စမုံ)တစ်တင်းလျှင် (၂၀၀၀၀၀)ကျပ်၊ နှမ်းဖြူ(ဂျပန်)တစ်တင်းလျှင် (၁၆၀၀၀၀)ကျပ်ဖြင့် ရောင်းဝယ်လျက်ရှိကြောင်း၊ ဈေးကွက်အနေဖြင့် ကန့်ဘလူခရိုင်မှ ထွက်ရှိသောနှမ်းများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်း၊ ယခုအပတ်တွင် အရောင်းအဝယ်ဖြစ်လျက်ရှိသော နှမ်းဈေးနှုန်းများသည် ယခင်အပတ်ဈေးနှုန်းများနှင့် နှိုင်းယှဉ်ပါက နှမ်းနက်(စမုံ)တစ်တင်းလျှင် (၁၀၀၀)ကျပ်ကျဆင်း၍ နှမ်းဖြူ(ဂျပန်)တစ်တင်းလျှင် (၂၀၀၀၀)ကျပ်ပြန်လည်မြင့်တက်လာကြောင်း သီးနှံရောင်းဝယ်ရေးလုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)

       ပြည်ခရိုင်၊ ရွှေတောင်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများသည် (၂၁-၁၁-၂၀၂၄) ရက်နေ့တွင် ကျီးသဲကျေးရွာအုပ်စု၊ လိပ်ပုတ်ကုန်းကျေးရွာရှိ ပန်းဂေါ်ဖီစိုက်ပျိုးထားသော တောင်သူဦးမြင့်လွင်နှင့်သွားရောက်တွေ့ဆုံ၍ ဈေးနှုန်း၊ ဈေးကွက်အခြေအနေနှင့် ထွက်ရှိမှုတို့အားသိရှိနိုင်ပါရန် ဆွေးနွေးခဲ့ပါသည်။ အဆိုပါတောင်သူစိုက်ပျိုးသော ပန်းဂေါ်ဖီမျိုးမှာ ဘူးမန်း (၁၅၃)မျိုးဖြစ်ပြီး စိုက်ဧကမှာ (၀.၂၅)ဧကစိုက်ပျိုးထားရှိပြီး ယခင်နှစ်ကလည်း အလားတူစိုက်ပျိုးခဲ့ပါသည်။ ပန်းဂေါ်ဖီများအား ဩဂုတ်လလယ်ပိုင်းတွင် စတင်စိုက်ပျိုးခဲ့ပြီး နိုဝင်ဘာလလယ်ပိုင်းမှ စတင်၍ခူးဆွတ်ရပြီး အပွင့်ရေ (၃၆၀၀)ပွင့်အထိရပြီဖြစ်ပါသည်။ ပန်းဂေါ်ဖီစိုက်ဧက(၀.၂၅)ဧကတွင် ရောင်းတန်းဝင်ပန်းဂေါ်ဖီ (၃၀၀၀)ပွင့်ထွက်ရှိပါသည်။

          ကုန်ကျစရိတ်အနေဖြင့် ယခင်နှစ်က (၀. ၂၅)ဧကတွင် (၂)သိန်းကျပ်ခန့်ကုန်ကျခဲ့ပြီး ရောင်းဈေးအနေဖြင့် ခြံဈေး တစ်ပွင့်လျှင် (၇၀၀)ကျပ်ဖြင့်ရောင်းချခဲ့ရ၍ အကျိုးအမြတ်အနေဖြင့် (၀.၂၅)ဧကတွင် (၄)သိန်းကျပ်ရရှိခဲ့ပါသည်။ ယခုနှစ်တွင် ကုန်ကျစရိတ်အနေဖြင့် (၀.၂၅)ဧကတွင် (၆)သိန်းကျပ်ခန့်ကုန်ကျခဲ့ပြီး ရောင်းဈေးအနေဖြင့် ခြံဈေး တစ်ပွင့်လျှင် (၁၀၀၀)ကျပ်ရောင်းချရ၍ အကျိုးအမြတ် အနေဖြင့်  (၄)သိန်းကျပ်အကျိုးအမြတ်ရရှိနေပါသည်။ ပန်းဂေါ်မှာ ကျီးသဲအုပ်စုတွင် စိုက်ဧက(၆)ဧကရှိပြီး တောင်သူ(၁၅)ဦးခန့်ရှိပါသည်။ ထိုမှထွက်ရှိလာသော ပန်းဂေါ်ဖီများအား နယ်မြို့များအပြင် ရန်ကုန်မြို့သို့လည်း ကားများဖြင့် တင်ပို့ရောင်းချကြောင်းသိရပါသည်။

          ထိုသို့ အကျိုးအမြတ်အင်မတန်များနေရခြင်းမှာ ပန်းဂေါ်ဖီအနေဖြင့် ပေါ်ဦးပေါ်ဖျားဖြစ်၍ ဈေးကောင်းနေခြင်းဖြစ်ပါသည်။ ပန်းဂေါ်ဖီလှိုင်လှိုင်ပေါ်လျှင် ဈေးကျမည်ဟုခန့်မှန်းရပါသည်။ ယခု အချိန်တွင် အောက်ခြေဈေးကွက်အတွင်း ပန်းဂေါ်ဖီတစ်ပွင့်လျှင် (၁၅၀၀-၁၆၀၀)ကျပ်ဖြင့်ရောင်းချကြကြောင်းကိုလည်း လေ့လာသိရှိရပါသည်။

DOCA(ပဲခူး)

       ယခုနိုဝင်ဘာလ နောက်ဆုံးပတ်တွင် ပြည်ဈေးကွက်သို့ ကြက်သွန်နီသီးနှံအနေဖြင့် အဟောင်းလက်ကျန်များ အဆက်မပြတ် အများအပြားဝင်ရောက်မှုရှိလာပြီး ပခုက္ကူနယ်ဘက်မှ ပိဿာချိန် (၅၀၀၀)၊ အောင်လံနယ်ဘက်မှ ပိဿာချိန်( ၃၀၀၀)၊ ကျောက်ပန်းတောင်းဘက်မှ ပိဿာချိန် (၈၀၀၀)နှင့် ရေနံချောင်းဘက်မှ ပိဿာချိန် (၄၅၀၀)စသဖြင့် အသီးသီးဝင်ရောက်မှုရှိနေသည်။ ဈေးကွက်အတွင်းမှ ပန်းတောင်း၊ ဥသျှစ်ပင်၊ မြန်အောင်၊ ကြံခင်း၊ မိုးညို၊ ကြို့ပင်ကောက်၊ ပေါင်းတည်၊ နတ်တလင်းနယ်များသို့ တိုင်းကျော်နယ်ကျော် စီးဆင်းမှုများ၊ ဒေသတွင်းဝယ်လက်များ၊ အိတ်ဆွဲဝယ်ရောင်းသမားများနှင့် အရောင်းအဝယ်ဖြစ်လျက်ရှိပြီး ဝင်ရောက်လာသောကြက်သွန်နီများမှာ ခြောက်သွေ့ပြီး အရည်အသွေးကောင်းသဖြင့် ကြာရှည်လှောင်ထားမည့် သူများအနေဖြင့် အကြိုက်ဖြစ်သည့်အတွက် ဝင်ရောက်မှု၏ အားလုံးနီးပါးခန့် အရောင်းအဝယ်ဖြစ်လျက်ရှိနေသည်။ ဈေးနှုန်းများမှာ ဝင်ရောက်မှုရှိသည့် ဒေသအလိုက် ကွာခြားမှုရှိပြီး ပခုက္ကူကြက်သွန်နီမှာ (၃၃၀၀-၃၄၀၀)ကျပ်နှုန်း၊ အောင်လံနှင့် ရေနံချောင်းကြက်သွန်နီမှာ (၃၅၀၀-၃၆၀၀)ကျပ်နှုန်း၊ ကျောက်ပန်းတောင်းကြက်သွန်နီမှာ (၃၈၀၀-၄၀၀၀)ကျပ်နှုန်းတို့ဖြင့် ပွဲရုံများတွင် လက္ကားနှုန်း အသီးသီးရောင်းချလျက်ရှိကာ ပြည်မြို့ပေါ် လက်လီဈေးများတွင် တစ်ပိဿာလျှင် ကြီး၊ လတ်၊ သေး (၃၈၀၀-၄၂၀၀-၄၅၀၀-၄၇၀၀)ကျပ်နှုန်းတို့ဖြင့် ရောင်းဝယ်မှုဖြစ်လျက်ရှိကြောင်းသိရပါသည်။

DOCA(ပဲခူး)

        ပြည်ဈေးကွက်အတွင်း ယခုနိုဝင်ဘာလ နောက်ဆုံးပတ်တွင် ရှမ်းပြည်ဒေသမှထွက်ရှိသော ယာကွန်ဥ(ခေါ်)ရေကန်းစွန်းဥများ အဝယ်လိုက်ပြီး အရောင်းအဝယ်သွက်နေကြောင်းသိရပါသည်။ ယခင်က ယာကွန်ဥတစ်ပိဿာလျှင် (၄၀၀၀)ကျပ်ဖြင့်ရောင်းချခဲ့ပြီး ယခုနိုဝင်ဘာလ နောက်ဆုံးပတ်တွင် တစ်ပိဿာကို (၇၀၀၀)ကျပ်ဖြင့် အရောင်းအဝယ်ဖြစ်နေကြောင်းသိရှိရပါသည်။ Online ပေါ်တွင်လည်း ယာကွန်ဥ(ခေါ်)ရေကန်စွန်းဥကို စားသောက်သူများ အများအပြားရှိနေသောကြောင့် အရောင်းအဝယ်သွက်နေကြောင်းလည်းသိရှိရပါသည်။

DOCA(ပဲခူး)