ကျွန်းလှမြို့တွင် စိုက်ပျိုးရေးလုပ်ငန်းကို တစ်ပိုင်တစ်နိုင်အနေဖြင့် စိုက်ပျိုးကြရာတွင် စားဖိုဆောင် သီးနှံများဖြစ်သည့် ကန်ဇွန်း၊ ချဉ်ပေါင်၊ ကြက်ဟင်းခါး၊ ခဝဲ၊ ခဆော့သီး၊ ကင်းမုံသီး၊ ပဲတောင့်ရှည်သီး ၊ ရုံးပတီသီး နှင့် သခွားသီး စသည်တို့ကို စိုက်ပျိုးသည့်အနက် ငရုပ်သီးစိမ်းများဖြစ်သည့် မိုးထော်ငရုပ် (ကျောက်စိမ်းမျိုး)နှင့် ကုလားအော် ငရုပ်သီးစိမ်း တို့ကိုပါ စိုက်ပျိုးရောင်းချကြပါသည်။

               ၂၀၂၅ ခုနှစ်၊ ဩဂုတ်လ တတိယပတ်အတွင်း ကျွန်းလှမြို့၌ ဖြစ်ပေါ်နေသော ငရုပ်သီးစိမ်း ၏ ဈေးနှုန်း/ဈေးကွက် အနေဖြင့် မိုးထော်ငရုပ်(ကျောက်စိမ်းသီး) တစ်ပိဿာလျှင်(၄၀၀၀)ကျပ်၊ (၅၀)ကျပ် သားလျှင်(၂၀၀၀)ကျပ်၊ ကုလားအော် ငရုပ်သီးစိမ်း တစ်ပြည်လျှင်(၁၂၀၀၀)ကျပ်၊ နို့ဆီတစ်ဘူးလျှင်(၁၅၀၀) ကျပ်နှင့် ကုလားအော် ငရုပ်သီးစိမ်း တစ်ပုံလျှင်(၅၀၀)ကျပ် ဈေးနှုန်းတို့ဖြင့် လည်းကောင်း ပန်းငရုပ်ပွသီး ဈေးနှုန်းအနေဖြင့် ပန်းငရုပ်ပွသီး တစ်ပိဿာလျှင်(၁၂၀၀၀)ကျပ်၊ ပန်းငရုပ်ပွသီး(၅၀)ကျပ်သားလျှင် (၆၀၀၀)ကျပ် ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA (စစ်ကိုင်း)

         မြင်းခြံမြို့နယ်အတွင်းရှိ ဈေးကွက်တွင် ရောင်းချနေသော ၂၀၂၅ခုနှစ်၊ ဩဂုတ်လ၌ ဖရုံစေ့လှော် လက်လီတစ်ဗူးလျှင် ၃၅၀၀ ကျပ်၊ တစ်ပြည်လျှင် ၂၅၀၀၀ ကျပ် ပေါက်ဈေးများရှိကြောင်း၊ ဒေသတွင်းစားသုံးမှုများပြီး ဈေးကွက်တွင် အရောင်းအဝယ် သွက်လျက်ရှိကြောင်း၊ ဖရုံစေ့လှော်များကို မုံရွာမြို့နှင့် ပခုက္ကူမြို့တို့မှ မှာယူရောင်းချကြောင်း သိရှိရသည်။  ဖရုံစေ့လှော်ကို တစ်နေ့လျှင် လက်တစ်ဆုပ်စာ (၂၈-၃၀) ဂရမ်ခန့် စားသုံးပေးခြင်းဖြင့် ကျန်းမာရေးအကျိုးကျေးဇူးများကို ရရှိစေပြီး ပရိုတင်းဓာတ်ပါဝင်သောကြောင့် ကြွက်သားနှင့် ဆဲလ်များအားကောင်းစေပြီး Omega 3၊ Omega 6  မဂ္ဂနီဆီယမ် ကြွယ်ဝစွာ ပါဝင်သောကြောင့် အရိုးကျန်းမာရေး၊ နှလုံးကျန်းမာရေးကို အထောက်အကူပြုကြောင်း၊ ဦးနှောက်လုပ်ဆောင်မှုနှင့် အရေပြားကျန်းမာရေးကိုလည်းအထောက် အကူပြုကြောင်း သိရှိရသည်။ အမျှင်ဓာတ်ပါဝင်သောကြောင့် အစာခြေစနစ်ကို ကောင်းမွန်စေပြီး ဝမ်းမှန်စေကာ အူလမ်းကြောင်းကျန်းမာရေးကို ကောင်းမွန်ကြောင်း၊ ဖရုံစေ့လှော်စားသုံးခြင်းဖြင့် ဆီးကျိတ်ရောင်ရမ်းခြင်း လက္ခဏာတွေကို သက်သာစေကြောင်း၊ ညအိပ်မပျော်ဖြစ်နေသော သူများအတွက် မအိပ်ခင် ဖရုံစေ့လှော် အနည်းငယ်စားပေးပါက ၎င်းတွင်အမိုင်နိုအက်ဆစ် ပါဝင်သောကြောင့် အိပ်စက်ခြင်းကို အထောကအကူပြုကြောင်း  ဖရုံစေ့လှော်သည် အာဟာရဓာတ် များစွာပါဝင်သောကြောင့် ပြည်တွင်း၌ အလွယ်တကူရနိုင်ပြီး ပရိုတင်းဓါတ်ကြွယ်ဝသော ဖရုံစေ့လှော်ကို စားသုံးသင့်ပါကြောင်း သိရှိရသည်။

DOCA(မန္တလေး)

         အနော်ရထာဆီစက်လုပ်ငန်းသည် မန္တလေးတိုင်းဒေသကြီး၊ ညောင်ဦးမြို့နယ်၊ သမဝါယမ အသင်းစု၏အောင်မြင်လျက်ရှိသည့် လုပ်ငန်းခွဲများအနက်တစ်ခုဖြစ်ပြီး (၁၉၇၁)ခုနှစ် ကတည်းက သမဝါယမထုတ်ကုန်လုပ်ငန်းတစ်ခုအဖြစ် အောင်မြင်စွာရပ်တည်ခဲ့သည်မှာ  ယနေ့အချိန်ကာလတိုင်အောင် ဖြစ်ပါသည်။

          သမဝါယမဦးစီးဌာနအဆင့်ဆင့်၏ လမ်းညွှန်ချက်များကိုလိုက်နာ၍ အခြေခံသမဝါယမ အသင်းများရှိ မြေပဲစိုက်အသင်းသားတောင်သူများ (၁)ဧက(၃)သိန်းကျပ်နှုန်းနှင့်ညီမျှသော သွင်းအားစုများကို နှစ်စဉ်ရာသီအလိုက်ပံ့ပိုးပေးပြီး သီးနှံပေါ်ချိန်ကာလတွင် မြေပဲဆံများအား ကာလပေါက်ဈေးနှင့် ဝယ်ယူပေးခြင်းဖြင့် သမဝါယမကန်ထရိုက်လယ်ယာစနစ်အား အကောင်အထည်ဖော် ဆောင်ရွက်လျက်ရှိပါသည်။ ဒေသအတွင်းရှိ မြေပဲစိုက်တောင်သူများမှ လာရောက်ရောင်းချသည့် မြေပဲဆံများကိုလည်း အချိန်အတွယ်မှန်ကန်စွာ ဈေးနှုန်းမှန်ကန်စွာဖြင့် ဝယ်ယူလျက်ရှိပါသည်။

          နိုင်ငံတော်၏လိုအပ်ချက်ဖြစ်သော ဒေသအတွင်း၊ နိုင်ငံအတွင်း စားသုံးဆီဖူလုံစွာ စားသုံးနိုင်ရေးအတွက် ညောင်ဦးမြို့နယ်အတွင်းရှိ သမဝါယမအသင်းများမှ အသင်းသားများအား ဆီထွက်သီးနှံများ ပိုမိုစိုက်ပျိုးလာနိုင်စေရေး၊ သီးနှံများ၏အထွက်နှုန်း တိုးတက်လာစေရေးတို့အတွက်လည်း စည်းရုံး ဆောင်ရွက်လျက်ရှိပြီး ဆီထွက်သီးနှံစိုက်ပျိုးထုတ်လုပ်ရေး သမဝါယမအသင်းများ တိုးချဲ့ဖွဲ့စည်းနိုင် ရေးအတွက်လည်း ဆောင်ရွက်လျက်ရှိသည်။

              ညောင်ဦးမြို့ရှိ အနော်ရထာဆီစက်လုပ်ငန်းသည် အမှတ်(၃)နယ်မြေ၊ မြို့မကွက်သစ်ရပ်တွင်တည်ရှိပြီး စက်ရုံမြေအကျယ်အဝန်းအနေဖြင့်(၅.၈၉)ဧကရှိရာ စက်ရုံအဆောက်အဦအနေဖြင့် အလျား(၁၂၄)ပေ၊ အနံ(၇၆)ပေ၊ အမြင့်(၁၅)ပေရှိသော အုတ်ခင်း၊ အုတ်ကာ၊ သွပ်မိုးဖြင့်တည်ဆောက် ထားပါသည်။ ဆီကြိတ်ခွဲခြင်းလုပ်ငန်းကို(၁)နှစ်ပတ်လုံး ကြိတ်ခွဲထုတ်လုပ်နိုင်ရေးအတွက် ကုန်ကြမ်းများဝယ်ယူသိုလှောင်လျက်ရှိရာ လိုအပ်သည့်ရင်းနှီးမြှုပ်နှုံမှုများကို ညောင်ဦးမြို့နယ်သမဝါယမအသင်း အုပ်စုပိုင်ငွေဖြင့် လုပ်ကိုင်ဆောင်ရွက်လျက်ရှိပါသည်။

          ညောင်ဦးမြို့နယ်သမဝါယမအသင်းစုပိုင် အနော်ရထာဆီစက်လုပ်ငန်းအား သမဝါယမ အကြီးအမှူးအဆင့်ဆင့်၏ လမ်းညွှန်မှုကိုခံယူ၍ ညောင်ဦးမြို့နယ်၊ သမဝါယမဦးစီးဌာန ဦးစီးအရာရှိနှင့်အတူ မြို့နယ်သမဝါယမအသင်းစု၏ အမှုဆောင်ဒါရိုက်တာအဖွဲ့နှင့်ဝန်ထမ်းများမှ လုပ်ငန်းများအား အကောင် အထည်ဖော်ဆောင်ရွက်ရာတွင် အဆင်ပြေချောမွေ့စေရေးအတွက် အချိန်ပြည့်ကြီးကြပ် ဆောင်ရွက်လျက်ရှိသည်။

          အနော်ရထာဆီစက် ကြိတ်ခွဲထုတ်လုပ်မှုအနေဖြင့် ယခင်ကဆီဆုံ(၂)လုံးဖြင့် ကြိတ်ခွဲထုတ်လုပ်ခဲ့ရာမှ ၂၀၂၄-၂၀၂၅ ဘဏ္ဍာရေးနှစ်အတွင်း စပါယ်ရှယ်ဝမ်းဆီဆုံအသစ်(၁)လုံး ထပ်မံတိုးချဲ့ဝယ်ယူတပ်ဆင်ခဲ့သည်။ စပါယ်ရှယ်ဝမ်းဆီစုံကြိတ်ခွဲနိုင်မှုအနေဖြင့် တစ်နာရီမြေပဲဆံ(၆၃)ပိဿာ ကြိတ်ခွဲ ထုတ်လုပ်နိုင်ပြီး လုပ်သားဦးရေ(၁၀)ဦးဖြင့် လုပ်ငန်းများအား လုပ်ကိုင်ဆောင်ရွက်လျက်ရှိသည်။ ကြိတ်ခွဲထုတ်လုပ်ရာတွင် စနစ်တကျသိုလှောင်ထားသည့် မြေပဲဆံများအား တနင်္ဂနွေနေ့မှအပ နေ့စဉ် ကြိတ်ခွဲလျက်ရှိသည်။ ကြိတ်ခွဲထုတ်လုပ်ရာတွင်(၁)ရက်ပျမ်းမျှကြိတ်ခွဲနိုင်မှုနှင့် ထုတ်လုပ် နိုင်မှုအနေဖြင့် မြေပဲဆံ(၇၀၀)ပိဿာခန့် ကြိတ်ခွဲ၍ မြေပဲဆီ(၂၉၄)ပိဿာ(၂.၅)ပေပါနှင့်(၁)နှစ် ပျမ်းမျှ ကြိတ်ခွဲနိုင်မှုနှင့် ထုတ်လုပ်နိုင်မှု မြေပဲဆံ(၂၁၈၄၀၀)ပိဿာ၊ မြေပဲဆီ(၉၁၇၀၀)ပိဿာ (၇၉၇)ပေပါ ထုတ်လုပ်လျက်ရှိပြီး အမျိုးသားလုပ်သားဦးရေ(၁၀)ဦးဖြင့် ထုတ်လုပ်လည်ပတ်လျက်ရှိပါသည်။

          မြေပဲဆံကုန်ကြမ်းများ ဝယ်ယူမှုအခြေအနေဖြင့် ညောင်ဦးမြို့နယ်အတွင်းရှိ မြေပဲစိုက်တောင်သူ များထံမှ ဝယ်ယူလျက်ရှိပြီး လိုအပ်ပါက ပခုက္ကူ၊ ကျောက်ပန်းတောင်း၊ မန္တလေးမြို့များမှလည်း ဝယ်ယူ ၍လုပ်ငန်းလည်ပတ်သွားမည်ဖြစ်ပါသည်။ ဝယ်ယူပြီး မြေပဲဆံများအား အရည်အသွေးကောင်းမွန်မှု ရှိစေရေးအတွက် ခြောက်သွေ့အောင်နေလှမ်း၍ ဖုန်ချဇကာစက်ဖြင့် ဆောင်ရွက်ပြီး စနစ်တကျ သိုလှောင်ထားရှိကြောင်း သိရသည်။ ထိုကြောင့် ဝယ်လိုအားမြင့်မားကာ ဒေသတွင် ကုန်သွယ်မှုမြင့်တက်လာ၍ မြေပဲစိုက်တောင်သူများအစဉ်တိုးတက်၍ တောင်သူတို့ဘဝ စိုပြေလှပလာသည်ကို တွေ့မြင်ရ သည်။ 

          အနော်ရထာဆီစက်လုပ်ငန်းအနေဖြင့် ၂၀၂၄-၂၀၂၅ ဘဏ္ဍာနှစ်တွင် မြေပဲဆံ(၁၈၀၅၆၂) ပိဿာ ကြိတ်ခွဲထုတ်လုပ်ခဲ့ရာ ဆီ(၆၇၅၀)ပိဿာ ထုတ်လုပ်ရောင်းချနိုင်ခဲ့ကြောင်း ယခုနှစ်တွင်လည်း (၉၃၅၀၀)ပိဿာကြိတ်ခဲ့ပြီး ဆီပိဿာချိန် (၄၇၀၀)ပိဿာ ထုတ်လုပ်ပြီးဖြစ်ပြီး လက်ရှိဆီကြိတ်ခွဲရန် မြေပဲဆံ လက်ကျန်အနေဖြင့်(၆၀၀၀၀)ပိဿာနှင့်မြေပဲဆီလက်ကျန်မှာ ဆီပိဿာချိန် (၁၂၀၀၀)ခန့်ကျန်ရှိပါသည်။

          ဈေးနှုန်းအနေဖြင့် ယခင်နှစ်တွင် ပဲဆီတစ်ပိဿာအနိမ့်ဆုံး(၁၆၀၀၀)နှုန်းရှိပြီး ယခုလက်ရှိ ကာလတွင်(၁)ပိဿာ(၁၇၀၀၀)နှုန်းရှိကြောင်း သိရသည်။ တင်ပို့ရောင်းချသည့် နေရာဒေသများ အလိုက် တင်ပို့ခများအနေဖြင့်(၁၀)ပိဿာ ပုံးတစ်ပုံးလျှင် ရန်ကုန်-၇၀၀၀၊ မန္တလေး-၂၀၀၀၊ နေပြည်တော်-၅၀၀၀၊ ထားဝယ်မြို့ ၁၄၀၀၀ ကျပ်နှုန်းများ  အသီးသီးရှိပြီး သယ်ယူပို့ဆောင်ရေး စရိတ်ပေါ်မူတည်၍ ဈေးအနည်းငယ် ပြောင်းလဲနိုင်မှုကိုလည်း စားသုံးသူမိဘပြည်သူများ နားလည်မည်ဟုမျှော်လင့်မိပါသည်။

           ဖြန့်ဖြူးရောင်းချမှုအနေဖြင့် ကြိတ်ခွဲထုတ်လုပ်သည့် မြေပဲဆီများအား ဆီစစ်ခုံဖြင့် စစ်ချ၍ရရှိလာသော မြေပဲဆီသန့်များအား အနော်ရထာဆီစက်၊ ညောင်ဦးပဲဆီသန့်၊ အမှတ်တံဆိပ်ဖြင့် (၅၀)ကျပ် သား ၊ (၁)ပိဿာ၊ (၂)ပိဿာ၊ (၃)ပိဿာ၊ (၅)ပိဿာ၊ (၁၀)ပိဿာ ဘူးများဖြင့် သန့်ရှင်းသပ်ရပ်စွာ စနစ် တကျထုတ်ပိုး၍ ဖြန့်ဖြူးရောင်းချလျက်ရှိသည်။ မြေပဲဆီသန့်များ ဖြန့်ဖြူးရောင်းချရာတွင် ညောင်ဦးမြို့နယ်အတွင်းရှိ စားသောက်ဆိုင်များ၊ အရောင်းဆိုင်များထံသို့ အရောက်ပို့စနစ်ဖြင့် ရောင်းချပေးလျက်ရှိပြီး မိသားစုအသုံးပြုရန် ဝယ်ယူသူများအနေဖြင့်လည်း အဆင်ပြေချောမွေ့စွာ ဝယ်ယူနိုင်ရေးအတွက် ဆီစက်တည်ရှိရာနေရာတွင် နေ့စဉ်(၁၀)ကျပ်သားမှစ၍ လက်လီ၊ လက်ကား ဖြန့်ဖြူးရောင်းချ ပေးလျက်ရှိသည့်အပြင် မန္တလေး၊ ရန်ကုန်၊ နေပြည်တော်၊ ထားဝယ်မြို့များရှိ မြို့နယ်သမဝါယမ အသင်းစုများနှင့် ချိတ်ဆက်၍လည်း ဖြန့်ဖြူးရောင်းချလျက်ရှိကြောင်း သိရသည်။

          အနော်ရထာဆီစက်လုပ်ငန်းအနေဖြင့် စေတနာကိုအရင်းခံကြိတ်ခွဲထုတ်လုပ်လျက်ရှိရာ ဒေသတွင်း မြေပဲစိုက်တောင်သူများအတွက်  ဈေးကွက်ခိုင်မာမှုရှိလာစေခြင်း၊ ဒေသတွင်း အလုပ်အကိုင်အခွင့်အလမ်း ပိုမိုတိုးတက်လာခြင်း၊ ဈေးနှုန်းမှန်ကန်စွာဖြင့် အရည်အသွေးပြည့်ဝကောင်းမွန်သော မြေပဲဆီများကို ဝယ်ယူစားသုံးနိုင်ခြင်း၊ စားသုံးသူတို့အပေါ် ဘေးအန္တာရာယ်ကင်းရှင်းစွာ စားသုံးနိုင်ခြင်း စသည့်အကျိုးကျေးဇူးများရရှိပြီး တောင်သူဦးကြီးများလည်း ပြုံးပျော်လျက် နိုင်ငံတော်၏ စီးပွားရေး၊ လူမှုရေး မဏ္ဍိုင်များပါ တစ်ထောင့်တစ်နေရာမှ အထောက်အပံ့ပြုလျက်ရှိကြောင်းသိရှိရပါသည်။

DOCA(မန္တလေး)

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူဈေးကွက်၌ ဩဂုတ်လ(စတုတ္ထပတ်)တွင် ပဲစဉ်းငုံ သီးနှံများ ဈေးကျဆင်းပြီး အရောင်းအဝယ်ဖြစ်ကြောင်း သိရှိရသည်။ ၂၀၂၅ ခုနှစ်၊ သီးနှံပေါ်စ ဇန်နဝါရီလတွင် တစ်တင်းလျှင် ကျပ်(၁၂၆၅၀၀-၁၂၂၀၀၀)ဈေးဖြင့် အရောင်းအဝယ်ဖြစ်ပြီး ပြည်ပ ဈေးကွက် ဝယ်လိုအားနည်း၍ ဈေးတရိပ်ရိပ်ကျဆင်း၍ အရောင်းအဝယ် ဖြစ်လျက်ရှိသည်။ ပဲစဉ်းငုံ သီးနှံဈေးကွက်သို့ ပခုက္ကူ၊ မြိုင်၊ ပေါက်၊ ရေစကြို၊ ဆိပ်ဖြူမြို့နယ်အတွင်းရှိ ကျေးရွာများ၊ စစ်ကိုင်း တိုင်းဒေသကြီးနှင့် မန္တလေးတိုင်းဒေသကြီးအတွင်းရှိ ကျေးရွာများမှ အများဆုံးစိုက်ပျိုးပြီး ပခုက္ကူပဲ ဈေးကွက်သို့ ဝင်ရောက်လျက်ရှိပြီး ယခုရာသီချိန်တွင် တောင်သူများတွင် ပဲလက်ကျန်နည်းပြီး မြို့ ပေါ်ရှိကုန်သည်များမှ သီးနှံလှိုင်လှိုင်ပေါ်ချိန်တွင် ဝယ်ယူသိုလှောင်ထားသော ပဲစဉ်းငုံနီများ ပြန်လည် ထုတ်ရောင်းမှုများကြောင်း၊ ဩဂုတ်လ (စတုတ္ထပတ်)တွင် တစ်ရက်လျှင် ပဲစဉ်းငုံနီ ပိဿာ (၃၀)ဝင် အိတ် (၃၀၀-၃၅၀)ခန့် အရောင်း အဝယ်ဖြစ်ကြောင်း သိရှိရသည်။

          ဈေးနှုန်းအနေဖြင့် ပဲစဉ်းငုံနီ တစ်တင်းလျှင် အရောင်းအဝယ်ဖြစ်သောဈေးနှုန်းမှာ ဖေဖော် ဝါရီလတွင် ပဲစဉ်းငုံနီတစ်တင်းလျှင် အမြင့်ဈေး ကျပ်(၉၃၀၀၀-၉၂၀၀၀)၊ မတ်လတွင် ပဲစဉ်းငုံနီ တစ် တင်းလျှင် ကျပ်(၉၄၅၀၀-၉၃၀၀၀)၊ ဧပြီလတွင် တစ်တင်းလျှင် ကျပ်(၉၃၀၀၀-၉၂၆၀၀)၊ မေလတွင် တစ်တင်းလျှင် ကျပ်(၇၈၀၀၀-၇၅၀၀၀)ဖြင့် အရောင်းအဝယ်ဖြစ်ခဲ့ကြောင်း၊ ဇွန်လ(ဒုတိယပတ်)တွင် ပဲစဉ်းငုံ တစ်တင်းလျှင် ကျပ်(၈၆၀၀၀-၈၅၀၀၀)ဖြင့် ဈေးတက်၍ အရောင်းအဝယ်ဖြစ်ခဲ့ပြီး ဇူလိုင် (တတိယပတ်)တွင် ဈေးဆက်လက်မြင့်တက်၍ ပဲစဉ်းငုံတစ်တင်းလျှင် ကျပ်(၈၈၀၀၀-၈၅၀၀၀) ဈေးဖြင့် အရောင်းအဝယ်ဖြစ်ခဲ့ကြောင်း၊ ယခုဩဂုတ်လ (စတုတ္ထပတ်)တွင် ပဲစဉ်းငုံတစ်တင်းလျှင် ကျပ်(၇၈၀၀၀-၈၀၂၀၀) ဈေးနှုန်းအနည်းကျဆင်း အရောင်းအဝယ်ဖြစ်ပြီး  ဈေးကွက်သို့ ကုန်ဝင်သ လောက်အရောင်းအဝယ်ဖြစ်ကြောင်း၊ ပခုက္ကူဈေးကွက်သို့ ဝင်ရောက်လာသည့် ပဲစဉ်းငုံနီများကို ရန်ကုန်၊ မန္တလေး ဈေးကွက်သို့ တင်ပို့ပြီး ထိုမှတစ်ဆင့် ပြည်ပအိန္ဒိယနိုင်ငံသို့ တင်ပို့လျက်ရှိ ကြောင်း၊ ပဲစဉ်းငုံသီးနှံသည် ပြည်ပပို့ကုန် ပဲတစ်မျိုးဖြစ်၍ ဈေးကွက် ဝယ်လိုအားပေါ် မူတည်ပြီး နေ့စဉ်နှင့်အမျှ ဈေးနှုန်းပြောင်းလဲမှုရှိကြောင်း ဈေးကွက်မှ သိရှိရသည်။

DOCA (မကွေး)

     မွန်ပြည်နယ်သည် ကွမ်းသီးထွက်ရှိသည့်ပြည်နယ်တစ်ခုဖြစ်ရာ ကွမ်းသီးစိုက်ဧက (၅၆၅၀၆) ဧကရှိပြီး တန်ချိန် (၉၀၀၀၀) သောင်းကျော်ထွက်ရှိကြောင်း သိရှိရသည်။ ကွမ်းသီးပင်သည် ဧပြီလနှင့် မေလတွင် စတင်အပွင့်ပွင့်ကာ သီးကင်းနုများ စတင်သီးကြပြီး ဇွန်၊ ဇူလိုင်၊ ဩဂုတ်လ (မိုးတွင်းကာလ)၌ ကွမ်းသီးနုများ လှိုင်လှိုင်သီးကြသည်။ ယခုမိုးရာသီ ကွမ်းသီးနုများထွက်ရှိချိန်တွင် ဈေးကောင်းရရှိလျက်ရှိကြောင်း သိရှိရသည်။ အဆိုပါ ကွမ်းသီးနု များကို မွန်ပြည်နယ်ရှိ ကွမ်းသီးနုပေါင်းစက်ရုံများမှ တစ်ပိဿာလျှင် (၅၀၀၀) ကျပ်ဖြင့် ဝယ်ယူ ကြကြောင်းသိရှိရသည်။

     ယခင်နှစ်က ကွမ်းသီးနုပေါင်းစက်ရုံ (၂) ရုံမှ ကွမ်းသီးနုပေါင်းတန်ချိန် (၁၀၀၀) ကို တရုတ် နိုင်ငံသို့ တင်ပို့ရောင်းချခဲ့ပြီး ယခုနှစ်တွင် ကွမ်းသီးနုပေါင်းစက်ရုံများ ပိုမိုတိုးချဲ့တည်ဆောက်လာ ကြသဖြင့် ယခုနှစ်တွင် ကွမ်းသီးနုပေါင်းများ ပိုမိုတင်ပို့နိုင်မည်ဖြစ်ကြောင်း သိရှိရပါသည်။

DOCA (မွန်)