ပြည်တွင်းကုန်သွယ်မှုသတင်း

    မန္တလေးတိုင်းဒေသကြီး၊ ငါန်းဇွန်မြို့နယ်အနေဖြင့် ၂၀၂၅-၂၀၂၆ ခုနှစ်တွင် မိုးမြေပဲစိုက်ပျိုးရန် လျာထားမှုအနေဖြင့် (၁၈၂၈၃)ဧကရှိခဲ့ပြီး အမှန်စိုက်ပျိုးမှုအနေဖြင့်(၁၈၂၈၃)ဧက စိုက်ပျိုးနိုင်ခဲ့ပါသည်။ ယခင်နှစ်စိုက်ပျိုးမှုအနေဖြင့်စိုက်ပျိုးရန်လျာထားမှုမှာ (၂၁၅၈၇)ဧက ရှိခဲ့ပြီး အမှန်စိုက်ပျိုးမှုအနေ ဖြင့်(၂၂၂၆၉)ဧက စိုက်ပျိုးနိုင်ခဲ့ကြောင်းနှင့် တစ်ဧကပျမ်းမျှ အထွက်နှုန်းအနေဖြင့်(၄၈.၀၇)တင်း ထွက်ရှိ ခဲ့ကြောင်းသိရပါသည်။ ယခုဩဂုတ်လ ဒုတိယပတ်ခန့်မှစ၍ မြို့နယ်အတွင်းရှိ မြေပဲစိုက်ကျေးရွာများ တွင် မိုးဦးမြေပဲများကို ရိတ်သိမ်းလျက်ရှိပါသည်။

          မြို့နယ်အတွင်းရှိ သရက္ကန်အုပ်စုမှ ကျေးရွာများအနေဖြင့် မိုးဦးမြေပဲကို စိုက်ပျိုးရာတွင် ပင်ထောင်မျိုးများကို အများဆုံးစိုက်ပျိုးကြပြီး မိုးလယ်တွင် ပင်ပြန့်မြေပဲမျိုးကိုအများဆုံးစိုက်ပျိုးကြ ကြောင်းနှင့် မိုးဦးမြေပဲကို ပဲစဉ်းငုံသီးနှံဖြင့် သီးညှပ်ထည့်သွင်းစိုက်ပျိုးကြကြောင်း သိရသည်။ အုပ်စု အတွင်းရှိ မြေပဲစိုက်ယာမြေများသည် မိုးရွာသွန်းမှု ရက်ကွာဝေးခဲ့လျှင် မြေကျစ်လစ်မာကျောပြီး မြေပဲနုတ်ရာတွင် မြေပဲဥအားလုံးမရရှိဘဲ မြေတွင်း၌ကျန်ခဲ့ခြင်းများရှိ၍ မိုးရွာရက်ကိုစောင့်ဆိုင်း နုတ်လေ့ရှိရာ ဩဂုတ်လ (၂၂-၂၄)ရက်များတွင် မိုးရွာသွန်းမှုရှိသောကြောင့် မိုးဦးမြေပဲများကို ရိတ်သိမ်းမှု များလာပါသည်။  ပင်ထောင်မျိုးမှာ အလုံးသေး၍ကျစ်လစ်   မာကြောပြီး ဆီထွက်မှုလည်း ပင်ပြန့်မျိုး ထက်ပိုကြောင်း၊ ယခုနှစ် စိုက်ပျိုးချိန်တွင် မျိုးဈေးအနေဖြင့် အတောင့်တစ်တင်းလျှင်(၅၀၀၀၀) ကျပ်ခန့်နှင့် အဆံတစ်ပြည်လျှင် (၁၀၀၀၀)ကျပ်ခန့်ရှိကြောင်း၊ ယခင်နှစ် မျိုးဈေးမှာ(၄၀၀၀၀)ကျပ်ရှိခဲ့၍  ရာသီချိန်မြေပဲဈေးအနေဖြင့်(၃၅၀၀၀-၃၇၀၀၀)ကျပ်ရှိခဲ့ကြောင်း၊ ယခုနှစ်တွင် မိုးရွာသွန်းမှုများမှန်ကန် ကောင်းမွန်၍ မိုးဦးမြေပဲများ အထွက်နှုန်းကောင်းနိုင်ကြောင်းနှင့် မြေပဲကို  သီးသန့်စိုက်ပျိုးမှုနည်းပြီး ပဲစဉ်းငုံနှင့်သီးညှပ်ထည့်သွင်းစိုက်ပျိုးသဖြင့် အထွက်နှုန်းမှာ တင်း(၃၀)ဝန်းကျင်ခန့်သာ ထွက်ရှ ိကြောင်းနှင့် တစ်ဧကကုန်ကျစရိတ်မှာ (၅၀၀၀၀၀)ကျပ်ဝန်းကျင်များကုန်ကျကြောင်း၊ လက်ရှိကျေး ရွာများတွင် ဖြစ်ပေါ်နေသောဈေးနှုန်းမှာ မြေပဲတောင့်(အခြောက်)တစ်တင်းလျှင် (၄၀၀၀၀)ကျပ်ဝန်း ကျင်ခန့်ရှိပြီး လက်ရှိဈေးနှုန်းအရတစ်ဧက အကျိုးအမြတ်အနေဖြင့်(၆၀၀၀၀၀)ကျပ်ဝန်းကျင်ခန့် ရရှိနိုင် ကြောင်း အောင်ချမ်းသာကျေးရွာမှ မြေပဲစိုက်တောင်သူများထံမှ သိရသည်။

DOCA(မန္တလေး)

     စားဖိုဆောင်အုပ်စုဝင် နံနံပင်သည် မြန်မာပြည်တွင် အထင်ရှားဆုံး ဟင်းခက်အမွှေးအကြိုင် ဖြစ်ပြီး နံနံစေ့ကိုလည်း ဟင်းခက်မဆလာပြုလုပ်ရာတွင် အသုံးပြုကြကြောင်း၊ နံနံပင်သည် အေးမြသော ရာသီဥတုကို ကြိုက်နှစ်သက်သောကြောင့် ဆောင်းရာသီတွင် အပင်ဖြစ်ထွန်းမှု အားကောင်းပြီး ဈေးကွက်တွင်လည်း ပေါများစွာ ဝယ်ယူစားသုံးရကြောင်း၊ မြင်းခြံမြို့နယ်၊ ဓားကျွန်း ကျေးရွာတွင် မိုးဦးကာလ မေလလယ်မှစ၍ နံနံပင်များကို ဝင်‌ငွေရရှိရန်စီးပွားဖြစ် တစ်နိုင်တစ်ပိုင် စိုက်ပျိုး ထားကြောင်း သိရှိရသည်။ နံနံကိုစိုက်ပျိုးရာတွင် ဘောင်များ ပြုလုပ်၍ စိုက်ပျိုးကြောင်း၊ ရေမဝပ် သောနုံးမြေသည် နံနံစိုက်ပျိုးရန် အကောင်းဆုံးမြေမျိုးဖြစ်ကြောင်း၊ ရွှံစေးဆန်သော မြေနှင့် သဲမြေများ၌ နွားချေး၊ မြေဆွေး၊ ဖွဲပြာတို့ကိုထည့်၍ သင့်တော်သော မြေအနေအထားရ အောင်ပြုပြင်၍ ဘောင်များကို (၄-၅)လက်မ အမြင့်ပြုလုပ်၍ (၂-၃)ပေ အကျယ်ဖြင့် အရှည်ကို လိုသ‌လောက်ထားကာ စိုက်ပျိုး ကြကြောင်း၊ အစေ့ကိုရေမစိမ်မီ အိတ်‌ပေါ်တင်ပြီး ပုလင်းဖြင့် နှစ်ခြမ်းကွဲသွားစေရန် အသာယာလှိမ့်ပါ၊ ထို့နောက်နှစ်ခြမ်းကွဲ မျိုးစေ့များကို မြန်မြန်အပင် ပေါက်စေရန် ရေတွင် (၂၄) နာရီ ကြာစိမ်ရကြောင်း၊ မျိုးစေ့(၂၄)နာရီ ရေစိမ်ရာ၌ ရေနှစ်ကြိမ် လဲပေးရကြောင်း၊ ပြီးလျှင်ဆယ်ယူ၍ စစ်ထားပြီး စိုက်ပျိုးရန်‌ဘောင်ပေါ်တွင်(၀.၅) လက်မအနက် မြောင်းများကို လေးလက်မခြားဆွဲပြီး မျိုးစေ့များကို မြေတွင်တိုက်ရိုက်ချ စိုက်ပျိုးကြောင်း၊ နံနံများကိုစိုက်ပျိုးပြီး (၃၀-၄၅) ရက်အကြာတွင် ခူးဆွတ် နိုင်ကြောင်း၊ အပင်လိုက်ခူးဆွတ် မည်ဆိုပါက စိုက်ပြီး (၄၂-၅၆) ရက် သားမှစတင် နုတ်ယူ ပြီး ဈေးကွက်တွင် ရောင်းချခြင်းများ ပြုလုပ်ကြောင်း၊ ယခုဩဂုတ်လနောက်ဆုံးပတ်တွင် အေးမြသီတာဈေး၌ ရောင်းချနေသော နံနံပင် (၁၀) ကျပ်သားလျှင် (၈၀၀) ကျပ်၊ တစ်ပိဿာလျှင်(၈၀၀၀) ကျပ် ပေါက်ဈေးများ ရှိကြောင်း၊ ယခင်ဇူလိုင်နောက်ဆုံးပတ်တွင် နံနံပင်ရွက် ၁၀ ကျပ်သားလျှင်(၁၀၀၀) ကျပ်၊ တစ်ပိဿာလျှင်    ( ၁၀၀၀၀) ကျပ် ပေါက်ဈေးများဖြင့်ရောင်းချကြောင်း၊ ကာလတူနှိုင်းယှဉ်ပါက ယခု နံနံရွက်ပင် ၁၀ ကျပ်သားလျှင် (၂၀၀)ကျပ်၊ တစ်ပိဿာလျှင် (၂၀၀၀) ကျပ်ခန့်ဈေးများကျဆင်းခဲ့ကြောင်း၊ မိုးရာသီကာလဖြစ်သောကြောင့် နံနံပင်များ ပေါများစွာထွက်ပေါ်သောကြောင့် ဈေးနှုန်းကျဆင်း ခြင်းဖြစ်ကြောင်း၊ ဈေးကွက်အနေဖြင့် ဒေသတွင်း စားသုံးရန်နှင့် တောင်သာမြို့သို့လည်း တင်ပို့ရောင်းချကြောင်း၊ ဈေးကွက်တွင်အရောင်းအဝယ် သွက်လျက်ရှိကြောင်း နံနံပင် ရောင်းချသူ၏ ပြောပြချက်အရသိရှိရသည်။

DOCA(မန္တလေး)

    တနင်္သာရီတိုင်းဒေသကြီး၊ မြိတ်မြို့ပေါ်ရှိ စည်ပင်သာယာဈေးကြီးများနှင့် လမ်းဘေးသစ်သီးဆိုင်များတွင် ရောင်းချနေသော သစ်သီးဝလံဈေးနှုန်းများရောင်းချလျက်ရှိကြောင်း သိရှိရပါ  သည်။

          ယခု၂၀၂၅ခုနှစ်သြဂုတ်လနောက်ဆုံးပတ်တွင် ဖြစ်ပေါ်နေသော သစ်သီးဈေးနှုန်းများမှာ စပျစ်သီး၁ဆယ်သားလျှင် (၃၀၀၀)ကျပ်နှင့် စပျစ်သီးတစ်ကီလိုလျှင် (၂၀၀၀၀)ကျပ်၊ ပန်းသီး အကြီးတစ်လုံးလျှင် (၂၅၀၀)ကျပ်နှင့်ပန်းသီးအငယ်တစ်လုံးလျှင် (၁၂၀၀)ကျပ်၊ ရွှေလိမ္မော်တစ် ကီလိုလျှင် (၁၂၀၀၀)ကျပ်၊ ရင်ဂန်းချိုသီးတစ်ကီလိုလျှင် (၁၂၀၀၀)ကျပ်၊ မက်မန်းသီးတစ်ကီလို လျှင်(၁၂၀၀၀)ကျပ်၊  ယိုးဒယားပန်းမာလကာသီးတစ်ကီလိုလျှင် (၅၀၀၀)ကျပ်၊ သရက်သီးတစ်လုံး လျှင် (၂၅၀၀)ကျပ်နှင့် (၂၀၀၀)ကျပ်၊ သလဲသီးတစ်လုံးလျှင် (၂၅၀၀)ကျပ်၊ နဂါးမောက်သီးတစ်လုံး လျှင် (၄၀၀၀)ကျပ်၊ ဆမ်းကစ်သီးတစ်လုံးလျှင် (၂၅၀၀)ကျပ်၊ ပန်းဇီးသီးစိမ်းတစ်လုံးလျှင် (၇၀၀) ကျပ်၊ ပန်းသစ်တော်သီးတစ်လုံးလျှင်(၂၅၀၀)ကျပ်၊ လိုင်ချီးသီးနို့စည်ဗူးတစ်ဗူးလျှင် (၂၀၀၀)ကျပ်၊ လော်ကော်သီး ၁ဆယ်သားလျှင် (၂၀၀၀)ကျပ်၊ မက်မွန်သီးတစ်လုံးလျှင် (၁၅၀၀)ကျပ်၊ဖရဲသီး အကြီးတစ်လုံးလျှင်(၇၀၀၀)ကျပ်၊ နာနတ်သီးတစ်လုံးလျှင် (၂၅၀၀)ကျပ်၊ ကျွဲ‌ကောသီးတစ်လုံး လျှင် (၅၀၀၀)ကျပ်နှင့် (၄၅၀၀)ကျပ်ဖြင့် အသီးသီးရောင်းချနေကြောင်း မြိတ်မြို့ စည်ပင်သာယာ ဈေးကြီးတွင် ရောင်းချလျက်ရှိသော သစ်သီးဆိုင်များထံမှ သိရှိရပါသည်။

DOCA(တနင်္သာရီ)

   တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့နယ်တွင် သစ်သီးမျိုးစုံဖြစ်သည့် ပန်းသီး၊ ဇီးသီး၊ နဂါးမောက်သီး၊ သရက်သီး၊ ဌက်ပျောသီး၊ နာနတ်သီး၊ လိမ္မော်သီး၊ စပျစ်သီး၊ သခွားမွေး သီး၊ ပန်းသစ်တော်၊ လိုင်ချီးသီး၊ စိမ်းစားဥနှင့် အစရှိသည့်သီးနှံများကို မြိတ်မြို့ဈေးကြီးများနှင့် လမ်းဘေးသစ်သီးဆိုင်များတွင် ရောင်းချနေကြောင်း သိရှိရပါသည်။

          ၂၀၂၅ခုနှစ် သြဂုတ်လနောက်ဆုံးပတ်တွင် မြိတ်မြို့ပေါ်ရှိ ရောင်းချနေသော စပျစ်သီး အစေ့လွတ်ဈေးနှုန်းမှာ တစ်ကီလိုလျှင် (၂၀၀၀၀)ကျပ်ရှိကြောင်း သစ်သီးရောင်းချသူများထံမှ သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ မြိတ်မြို့ပေါ်တွင် ကျွဲကောသီးသည် လူကြိုက်များပြီး ဈေး ကောင်းများရရှိလျက်ရှိကြောင်း သိရှိရပါသည်။ ကျွဲကောသီးများကို ပဲခူးတိုင်း၊ ရန်ကုန်တိုင်းနှင့် မွန်ပြည်နယ်များတွင် အများဆုံးစိုက်ပျိုးကြောင်း သိရှိရပါသည်။ ကျွဲကောသီးသည် သဲနုံးမြေတွင် စိုက်ပျိုးပြီး ဇွန်လနှင့် သြဂုတ်လများတွင် ပိုမိုစိုက်ပျိုးကြောင်း သိရှိရပါသည်။ ကျွဲကောသီးများ စားသုံးခြင်းဖြင့် သွားနှင့် ခံတွင်းကိုပိုမိုကောင်းမွန်စေပြီး ကိုယ်အလေးချိန်များထိန်းချုပ်ပေးခြင်း နှင့် သွေးဖိအားများကို အလွန်ပင်ကောင်းမွန်စေသော သီးနှံတစ်မျိုးဖြစ်ပါသည်။ အခြားသော သီးနှံများမှာလည်း အလွန်ပင်ရောင်းကောင်းကြောင်းလည်း သိရှိရပါသည်။ ယခုမြိတ်မြို့ပေါ်တွင် မော်လမြိုင်ကျွဲကောသီးများကို အများဆုံးတင်သွင်းရောင်းချကြကြောင်းလည်း သိရှိရပါသည်။

          ယခု၂၀၂၅ခုနှစ်၊ သြဂုတ်လနောက်ဆုံးပတ်တွင် မော်လမြိုင်ကျွဲကောသီးတစ်လုံးလျှင် (၄၅၀၀)နှင့် (၅၀၀၀)ကျပ်ဖြင့် ရောင်းချနေကြောင်း သိရှိရပါသည်။

DOCA(တနင်္သာရီ)