ပြည်တွင်းကုန်သွယ်မှုသတင်း

           ဇန်နဝါရီလဒုတိယပတ်အတွင်း  မန္တလေးမြို့၊သီရိမာလာစျေး(ပိုက်ကျုံးစျေး)ရှိ   ငါး၊ ပုဇွန်နှင့် ရေထွက်ပစ္စည်းများ  အရောင်းသွက်လျှက်ရှိကြောင်း သိရပါတယ်။  ရေထွက်ပစ္စည်းဝင်ရောက်မှုမှာ  မန္တလေးဒေသတွင်းရှိ မွေးမြူရေးကန်များမှ တီလားဗီးယားငါး(ဂျပန်ငါး)၊ငါးကြင်းများ၊ရေချိုငါးမျိုးစုံ နှင့် ပုဇွန်များရောင်းချလျက်ရှိကြောင်း  သိရပါတယ်။ ရန်ကုန်တိုင်းဒေသကြီးနှင့် မြန်မာပြည်အောက် ပိုင်းမှထွက်ရှိသော ငါး၊  ပုဇွန်၊ ဂဏန်းများနှင့်ရေထွက်ပစ္စည်းများ လည်းဝင်ကြောင်း သိရပါတယ်။ မန္တလေးစျေးကွက်သို့ ဝင်ရောက်မှုအနေဖြင့် တစ်ရက်ခြားလျှင် ကား(၁၀ ဘီး) ၃စီးနှင့် ၄စီး အကြား ဝင်ရောက်မှုနှင့် ခေါက်တိုကန်တာကားအနေဖြင့်  တစ်ရက်လျှင် ၅ စီးနှင့် ၆ စီးအကြား ဝင်ကြောင်း သိရပါတယ်။ သီရိမာလာစျေးမှ ငါး၊ ပုဇွန်နှင့်   ရေထွက်ပစ္စည်းများအား  လက်လီ/လက္ကားဝယ်ယူ၍ မန္တလေးမြို့ပေါ်ရှိစျေးများသို့ ပြန်လည်ရောင်းချကြောင်းသိရပါတယ်။ဇန်နဝါရီလဒုတိယပတ်အတွင်း သီရိမာလာစျေးတွင် ဖြစ်ပေါ်ခဲ့သည့်တစ်ပိဿာစျေးနှုန်းများမှာ   ငါးသလောက်စျေး ၂၀၀၀ဝိ/- နှင့် ၃၅၀၀ဝိ/-၊ ငါးကြင်းဖြူစျေး  ၁၂၀၀ဝိ/- နှင့် ၁၆၀၀ဝိ/-၊ ငါးကြင်းနီစျေး  ၁၂၀၀ဝိ/- နှင့် ၁၄၀၀ဝိ/- ၊ ငါးအုံတုံစျေး  ၁၀၀၀ဝိ/-နှင့် ၁၄၀၀ဝိ/- ၊ ငါးမြစ်ချင်း၊  ငါးပတ်နှင့် ငါးရံ့စျေးများမှာ ၁၃၀၀ဝိ/-  နှင့် ၁၆၀၀ဝိ/-စျေး၊တီလားဗီးယား(ဂျပန်ငါး)စျေး ၈၀၀ဝိ/- နှင့်၁၀၀၀ဝိ/-၊ကတ်ကတစ်ငါးစျေး၃၀၀၀ဝိ/- နှင့် ၃၃၀၀ဝိ/- တို့ဖြင့်  အသီးသီးရောင်းချလျက်ရှိပြီး၊  အရွယ်အစားအလိုက်  အနည်းငယ်စျေးနှုန်း ကွာခြားမှုရှိပါတယ်။ မွေးမြူရေးပုဇွန်စျေးမှာ အမျိုးအစားပေါ်မူတည်၍  ၁၀၀၀ဝိ/-နှင့် ၁၃၀၀ဝိ/-စျေး၊ ပုဇွန်ကြားနှင့်ရေချိုပုဇွန်တုတ်စျေးမှာ  ၃၅၀၀ဝိ/- နှင့် ၅၀၀၀ဝိ/-စျေး ၊ ပြည်ကြီးငါး ၃၀၀၀ဝိ/- နှင့် ၅၀၀၀ဝိ/- စျေး၊ ဂဏန်းစျေး ၁၀၀၀ဝိ/- နှင့်  ၁၂၀၀ဝိ/-၊ကင်းမွန်စျေး ၂၀၀၀ဝိ/-နှင့်၂၅၀၀ဝိ/- ၊ ရေဘဝဲစျေး ၂၀၀၀ဝိ/- နှင့်၄၅၀၀ဝိ/- စျေးတို့ဖြင့်     အသီးသီး ရောင်းချလျက်ရှိပါတယ်။ သီရိမာလာ စျေးရှိ ရေထွက်ပစ္စည်းအရောင်းဆိုင်မှ  ပြောပြချက်အရ  နှစ်သစ်ကူးရာသီတွင် ရေထွက်ပစ္စည်းများ ပိုမိုရောင်းချခဲ့ရပြီး၊ ဇန်နဝါရီလဒုတိယပတ်အတွင်း  ရေထွက်ပစ္စည်းများမှာ စျေးကွက်တွင် အရောင်း သွက်လျှက်ရှိ‌ကြောင်း သိရပါတယ်။    

DOCA(မန္တလေး)

                 ရန်ကုန်တိုင်းဒေသကြီး၊ သန်လျင်ခရိုင်၊ ‌သန်လျင်မြို့နယ်၌ ယခုနှစ်ဆောင်းရာသီစိုက်ပျိုးရာတွင် သီးထပ်သီးနှံစိုက်ပျိုးစွမ်းအားတိုးတက်စေရေးနှင့် ပြည်တွင်းစားသုံးမှုဖူလုံစေရေး၊ ပြည်ပသို့တင်ပို့နိုင်ရေးတို့အတွက် ပဲတီစိမ်းစိုက်ပျိုးလျက်ရှိရာ လက်ရှိအချိန်အထိ ဧက(၄၆၆၀၅) စိုက်ပျိုးပြီးစီးနေပြီဖြစ်ကြောင်း သိရသည်။

             သန်လျင်မြို့နယ်၌ ဆောင်းသီးနှံစိုက်ပျိုးရာသီတွင် ပဲတီစိမ်း(၄၆၇၂၆) ဧကစိုက်ပျိုးရန်လျာထားပြီး ဒေသခံစိုက်တောင်သူများက နိုဝင်ဘာလမှစတင်စိုက်ပျိုးခဲ့ရာ လက်ရှိအချိန်တွင် လျာထားချက်ရာနှုန်း ပြည့်နီးပါး (၄၆၆၀၅) ဧက စိုက်ပျိုးပြီးစီးခဲ့ပြီး ယခုနှစ်ဆောင်းသီးနှံစိုက်ပျိုးရာသီမှာ သန်လျင်မြို့နယ်အတွင်းရှိ ကျေးရွာများတွင် ပဲတီစိမ်းသီးနှံစိုက်ပျိုးစွမ်းအား တိုးတက်စေဖို့၊ ပိုးမွှားများမကျရောက်စေရန် အထွက်နှုန်းကောင်းမွန်စေရန်၊ လျာထားချက်ပြည့်မှီအောင်စိုက်ပျိုးနိုင်ရန်၊ စားသုံးဖို့ဖူလုံစေဖို့နှင့်ပဲစိုက် တောင်သူတွေ သီးနှံဝင်ငွေတိုးတက်စေရန်ရည်ရွယ်ပြီး ဒေသခံတောင်သူများနှင့်စိုက်ပျိုးရေးဦးစီးဌာန၊ ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနနှင့် စိုက်ပျိုးရေးသုတေသနဦးစီးဌာနတို့ပူးပေါင်းဆောင်ရွက်လျက်ရှိကြောင်းသိရပြီး သန်လျင်မြို့နယ်၌ အထွက်နှုန်းကောင်းသည့် ဆောင်းသီးထပ်ပဲတီစိမ်းသီးနှံအား ယခင်ကထက်ပိုမိုစိုက်ပျိုးခြင်းဖြင့် ဒေသအတွင်းစားသုံးမှုဖူလုံစေပြီး ပြည်ပသို့တင်ပို့နိုင်သည့်အတွက် ပဲစိုက်တောင်သူများနှင့် ဆက်စပ်လုပ်ငန်းလုပ်ကိုင်သူများ၏ လူမှုစီးပွားဘဝများ ပိုမိုတိုးတက်လာမည်ဖြစ်ကြောင်း သိရှိရပါသည်။

DOCA(ရန်ကုန်) 

             ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်၌ ယခုနှစ်ဆောင်းသီးနှံ သီးထပ်စိုက်ပျိုးရာသီတွင် ပဲစိုက်ပျိုးစွမ်းအားတိုးတက်စေရန်နှင့် ပြည်တွင်း၌ စားသုံးမှုဖူလုံစေရေးနှင့် ပြည်ပသို့တင်ပို့နိုင်ရေးအတွက် ပဲတီးစိမ်းစိုက်ပျိုးလျက်ရှိရာ လက်ရှိအချိန်ထိ ဧက(၁၀၄၄၉၄) စိုက်ပျိုးပြီးစီးပြီးဖြစ်ကြောင်းနှင့် ပဲတီစိမ်းအထွက်နှုန်းကောင်းပြီး ပိုမိုစိုက်ပျိုးနိုင်ရေး ဆောင်ရွက်လျက်ရှိကြောင်း ခရမ်းမြို့နယ် စိုက်ပျိုးရေးဦးစီးဌာနမှ သိရသည်။

           ခရမ်းမြို့နယ်၌ ယခုနှစ်ဆောင်းသီးနှံစိုက်ပျိုးရာသီတွင် ပဲတီစိမ်းစိုက်ပျိုးခြင်းကို တစ်မြို့နယ်လုံးအတိုင်းအတာဖြင့် (၁၀၄၅၅၈) ဧက စိုက်ပျိုးရန်လျာထားပြီး ဒေသခံတောင်သူများမှ ယခုနှစ်နိုဝင်ဘာလမှ စတင်စိုက်ပျိုးခဲ့ရာ လက်ရှိအချိန်ထိ ဧက (၁၀၄၄၉၄) ပြီးစီးအောင်စိုက်ပျိုးနိုင်ခဲ့ပြီး ယခုနှစ်ဆောင်းသီးနှံသီးထပ် စိုက်ပျိုးရာသီတွင် ခရမ်းမြို့နယ်အတွင်း ပဲတီစိမ်းစိုက်ပျိုးစွမ်းအားတိုးတက်စေဖို့နှင့် တောင်သူသီးနှံ ဝင်ငွေတိုးပွားစေဖို့ရည်ရွယ်ပြီး ပဲတီးစိမ်းစိုက်ပျိုးခဲ့ပြီး သတ်မှတ်လျာထားဧကပြည့်မှီစေဖို့နှင့် အထွက်နှုန်းကောင်းမွန်စေဖို့အတွက် ဒေသခံတောင်သူတွေကို ပဲတီစိမ်းစိုက်ပျိုးရေးနှင့် ပတ်သတ်ပြီး စိုက်ပျိုးရေးဆိုင်ရာအသိပညာပေးခြင်းများကို တောင်သူများနှင့် ပူးပေါင်းဆောင်ရွက်လျက်ရှိကြောင်း သိရှိရပါသည်။

DOCA(ရန်ကုန်) 

              ဝါးတန်းဆန်စပါးကုန်စည်ဒိုင်သို့ (၂.၁.၂၀၂၅) မှ (၆.၁.၂၀၂၅) နေ့ထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၁၂၃၇၇) အိတ်၊ ပေါ်ကျွဲ (၃၉၁၄) အိတ်၊ ဧည့်မထ (၃၇၂၀၂) အိတ်၊ ဆန်ကွဲ (၈၄၈၁) အိတ် ဝင်ရောက်ခဲ့ပြီး ပဲခူးတိုင်း (အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၃၃၅၅) အိတ် နှင့် ပဲခူးတိုင်း (အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ်များမှ ဧည့်မထ (၁၀၄၁၀) အိတ်၊ ငစိန် (၆၄၀) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ် ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံ မြို့နယ်များမှ ဧည့်မထ (၈၉၀၀) အိတ်တို့ဝင်ရောက်မှုရှိကြောင်း ဝါးတန်း ဆန်စပါးကုန်စည် ဒိုင်၏ ပြောကြားချက်အရ သိရှိရပါသည်။

DOCA(ရန်ကုန်)

             ၆.၁.၂၀၂၅ ရက်နေ့၊ ဘုရင့်နောင်ကုန်စည်ဒိုင်တွင် ဖြစ်ပေါ်ခဲ့သော ရေထွက်ကုန်ပစ္စည်းများ၏ တစ်ပိဿာ ဈေးနှုန်းများမှာ ဖျာပုံရွှေပုဇွန်ရှယ် မှာ ကျပ် ၂၈၀၀၀၀၊ ဖျာပုံရွှေပုဇွန်ရိုးရိုးကျပ် ၂၀၀၀၀၀၊ ဖျာပုံချိုကြီးရှယ် ကျပ် ၁၄၀၀၀၀၊ ဖျာပုံချိုကြီးရိုးရိုး ကျပ် ၁၀၀၀၀၀၊ ဖျာပုံချို သေးရှယ်ကျပ် ၉၀၀၀၀ ၊ ဖျာပုံ ချိုသေးရိုးရိုးကျပ် ၇၀၀၀၀ ၊မြိတ်ပုဇွန်လတ် ကျပ် ၁၂၀၀၀၀၊ မြိတ်ပုဇွန်ရိုးရိုး ကျပ် ၉၀၀၀၀၊ ရေချိုငါးခြောက် များဖြစ်ကြသော ငါးကျီးကြပ်တိုက်ကြီး   ကျပ် ၉၀၀၀၀ ၊ ငါးကျီးကြပ်တိုက်သေး  ကျပ် ၇၀၀၀၀ ၊ ငါးမြွေထိုး ကျပ် ၄၀၀၀၀ ၊ ငါးရံ့ခြောက်ကြီး ကျပ် ၇၅၀၀၀ ၊ ငါးရံ့ခြောက်လတ်ကျပ် ၆၀၀၀၀ ၊ ငါးရံလုံးရှယ် ကျပ် ၄၀၀၀၀ ၊ ရေငံငါးခြောက်များဖြစ်ကြသော ကလိန် ကျပ် ၁၀၀၀၀ ၊ ငါးကွမ်းရှပ်ကြီး ကျပ် ၃၅၀၀၀၊ ငါးတံခွန်မျှင်ကြီး ကျပ် ၂၀၀၀၀၊ ငါးတံခွန်လုံးကြီး ကျပ် ၆၀၀၀၊ ငါးနှပ်ခြောက်ကြီး(ရှယ်) ကျပ် ၃၅၀၀၀ ၊ ငါးရွှေသေး ကျပ် ၁၀၀၀၀ ၊ ငါးမီးတံသွယ် ကျပ် ၇၀၀၀  ဈေးတို့အသီးသီးရှိကြကြောင်း ကုန်စည်ဒိုင်မှ စုံစမ်းသိရှိရပါသည်။

DOCA(ရန်ကုန်)