ပြည်တွင်းကုန်သွယ်မှုသတင်း

   ကျွန်းလှမြို့ ရပ်ကွက်ဈေးများတွင် သီးနှံမျိုးစုံရောဖြစ်သည့် ပန်းဂေါ်ဖီ၊ ‌ဂေါ်ဖီထုတ်၊ ‌ရွှေပဲသီး၊ မုံညှင်းထုတ်၊ ပန်းငရုတ်ပွသီး၊ ဂျူးမြစ်၊ ကန်ဇွန်းဥ၊ ခရမ်းချဉ်သီး၊ ငရုပ်သီးစိမ်း၊ ပြောင်းဖူး၊ တိုင်ထောင်ဘိုစားပဲသီး၊ ဂေါ်ရခါးသီး၊ ခါကြက်ဥ နှင့် ပန်းငရုပ်ပွသီးတို့ကိုပါ ရောင်းချလျက်ရှိကြောင်း သိရသည်။

   ၂၀၂၅ ခုနှစ်၊ အောက်တိုဘာလနောက်ဆုံးအပတ် သစ်ရာမြိုင်ဈေးအတွင်းရှိ ဂျူးမြစ် ဈေးနှုန်းမှာ ဂျူးမြစ် လက္ကား တစ်ပိဿာလျှင်(၈၀၀၀)ကျပ်၊ ဂျူးမြစ် လက်လီ တစ်ပိဿာလျှင်(၁၀၀၀၀)ကျပ်၊ ၅၀ကျပ်သားလျှင်(၅၀၀၀)ကျပ်၊ ၂၅ကျပ်သားလျှင်(၂၅၀၀)ကျပ်နှင့် ဂျူးမြစ်(၁၀)ကျပ်သားလျှင်(၁၀၀၀) ကျပ်ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း ဂျူးမြစ်ကို စားသောက်ဆိုင်များ ထမင်းဆိုင် များ၊ အကြော်မျိုးစုံရောင်းချသူများ နှင့် စားဖွယ်စုံဆိုင်များမှ အသုံးပြုသည့်အတွက် ရောင်းအားကောင်း လျက်ရှိကြောင်း ကုန်စိမ်းသီးနှံမျိုးစုံ ရောင်းချသူထံမှ သိရပါသည်။

DOCA(စစ်ကိုင်း)

   ကျွန်းလှမြို့နယ်၊ အင်းကောင်းကျေးရွာတွင် မိသားစုအပိုဝင်ငွေရရှိရန် မိမိတို့ပိုင် မြေကွက်အလွတ်များတွင် နှစ်စဉ် ကောက်ရိုးမှိုပျိုး၍ ရောင်းသည့်လုပ်ငန်းကို လုပ်ကိုင် လျက်ရှိကြောင်း သိရသည်။

          ၂၀၂၅ ခုနှစ် ၊ အောက်တိုဘာလ နောက်ဆုံးပတ် ကျွန်းလှမြို့တွင် ရောင်းချလျက်ရှိသော ကောက်ရိုးမှို ဈေးနှုန်းမှာ ကောက်ရိုးမှို တစ်ပိဿာလျှင် (၁၀၀၀၀) ကျပ်၊ (၅၀)ကျပ်သား လျှင်(၅၀၀၀)ကျပ်၊ (၂၅)ကျပ်သား (၂၀၀၀)ကျပ် နှင့်(၁၀)ကျပ်သားလျှင်(၁၀၀၀)ကျပ် ဈေးနှုန်းတို့ဖြင့် ရောင်းချလျက်ရှိပြီး ဈေးအနည်းငယ်ကျဆင်းလျက်ရှိကြောင်း သိရသည်။

DOCA(စစ်ကိုင်း)

      မြန်မာနိုင်ငံစက်သုံးဆီတင်သွင်းသိုလှောင်၊ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ တိုင်းဒေသကြီး၊ ပြည်နယ်အလိုက် မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများအား နေ့စဉ်ထုတ်ပြန်ပေးလျက်ရှိပါသည်။

   ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်တွင် စက်သုံးဆီဆိုင်(၈)ဆိုင် ရှိရာ ၂၀၂၅ခုနှစ် ယခင်စက်တင်ဘာလ (ဒုတိယပတ်)တွင် ဖြစ်ပေါ်ခဲ့သော စက်သုံးဆီဈေးနှုန်းများမှာ ဓာတ်ဆီ(92) တစ်လီတာလျှင်(၂၉၆၄)ကျပ်၊ ဓာတ်ဆီ(95) တစ်လီတာလျှင် (၃၀၃၄)ကျပ် ဒီဇယ်ရိုးရိုး တစ်လီတာ လျှင်(၂၆၁၄)ကျပ်၊ ဒီဇယ်(ပရီမီယမ်)တစ်လီတာလျှင် (၃၂၁၉)ကျပ် ဖြင့်ရောင်းချလျက်ရှိကြောင်း သိရပါသည်။

      ယခု အောက်တိုဘာလ (ဒုတိယပတ်)တွင် ဖြစ်ပေါ်ခဲ့သော စက်သုံးဆီ ဈေးနှုန်းများမှာ ဓာတ်ဆီ(92) တစ်လီတာလျှင်(၂၇၆၃)ကျပ်၊ ဓာတ်ဆီ(95) တစ်လီတာ လျှင်(၂၈၃၉)ကျပ် ဒီဇယ်ရိုးရိုး တစ်လီတာလျှင်(၂၅၄၄)ကျပ်၊ ဒီဇယ်(ပရီမီယမ်) တစ်လီတာလျှင် (၃၀၉၄)ကျပ် ဖြင့်ရောင်းချလျက်ရှိကြောင်း သိရပါသည်။

      ယခုအပတ်နှင့် နှိုင်းယှဉ်ပါက ဓာတ်ဆီ (92)တစ်လီတာလျှင် (၂၀၁)ကျပ်၊ ဓာတ်ဆီ (95) တစ်လီတာလျှင် (၁၉၅)ကျပ် ၊ ဒီဇယ်ရိုးရိုးဈေးနှုန်းမှာ တစ်လီတာ (၇၀)ကျပ်၊ ဒီဇယ် (ပရီမီယမ်)  တစ်လီတာလျှင်(၁၂၅)ကျပ် ဈေးကျသွားကြောင်း သိရပါသည်။

DOCA (ပဲခူး)

        ပိန်းဥသည် ကစီဓါတ်ပြည့်ဝတဲ့ သီးနှံတစ်ခုဖြစ်ပါသည်။ ပိန်းဥသည် မြေကြီးအတွင်းမှ တူးယူရရှိ သည့် ဥတစ်မျိုးဖြစ်ပါသည်။ ပိန်းပင်အား စိုက်ပျိုးရာတွင် အဓိကမှာ ရေရရှိသည့် မည်သည့်ဒေသတွင်း မဆို စိုက်ပျိုး၍ရပါသည်။ စတင်စိုက်ပျိုးပြီး အပင်သက်တမ်း (၅) လခွဲမှ (၆) လထိ သက်တမ်းရှိပါသည်။ မျိုးတစ်ဧကလျှင် အတက် (၂၀၀) တက် စိုက်ပျိုးလျှင် ပိန်းဥအချိန်  (၅၀၀၀) ထွက်ရှိပါသည်။ ပိန်းဥ စိုက်ပျိုးရာတွင် အသက်တက်၊ ဥမွှာ၊ ပိန်းရိုး၏အရင်းပိုင်းတို့မှ မျိုးယူ၍ စိုက်ပျိုးရနိုင်ပါသည်။ တစ်နှစ် စိုက်ပျိုးပြီး မျိုးဥများအားချန်ထားပြီး နောက်တစ်နှစ်အတွက် ပြန်လည်စိုက်ပျိုး၍ ရနိုင်သဖြင့် နောက်နှစ်အတွက် မျိုးဥများ မဝယ်ရခြင်းကြောင့် ငွေကြေးကုန်ကျသက်သာစေပါသည်။ ပိန်းဥဈေးမှာ နှစ်စဉ် ဈေးကောင်းသည့်အတွက် ပိန်းစိုက်ရာတွင် ဝင်ငွေတိုးစေကြောင်း သိရှိရပါသည်။ ပိန်းဥအမျိုးအစား များစွာရှိပြီး ပိန်းဥတစ်ပိဿာလျှင် (၅၀) ကျပ်သား ထွက်ရှိသည့် ပိန်းဥမျိုးရှိသလို ပိန်းဥအသေးမျိုးများ လည်းရှိကြောင်း သိရပါသည်။ ပိန်းဥရဲ့အပြင်ဘက်အလွှာဟာ အညိုရောင်ရှိပြီးအတွင်း အသားမှာ အဖြူရောင်ရှိပါသည်။ ပိန်းဥသည် အမျှင်ဓါတ်များစွာပါဝင်သည့်အတွက် ပိန်းဥကိုစားပေးခြင်းဖြင့် လေပွခြင်း၊ ဗိုက်အောင့်ခြင်း၊ ဝမ်းပျက်၊ ဝမ်းလျောခြင်းတို့မှ ကာကွယ်ပေးနိုင်ပါသည်။ ပိန်းဥ၏ အရသာမှာ ချိုမြိန်ပြီး အာလူးနှင့် အရသာဆင်တူပါသည်။ ပိန်းဥကို သရေစာအဖြစ်ပြုတ်စားခြင်း၊ အရံဟင်းအဖြစ် ချက်ပြုတ်စားသောက်၍ ရနိုင်သလို ပိန်းဥအခြောက်ပြား၊ ပိန်းဥကွက်သီး၊ ပိန်းဥခြောက်ကြော်၊ ပိန်းဥ ရေခဲမုန့်၊ ပိန်းဥသကြားလုံး၊ ပိန်းဥဂျယ်လီ၊ ပိန်းဥဝေဖာစသည့် သရေစာမျိုးစုံ ပြုလုပ်၍ ရနိုင်ပါသည်။ ဈေးကွက်အတွင်း ရောင်းချနေသည့် ပိန်းဥများမှာ ပိန်းဥအလုံးကြီး (၁)ပိဿာလျှင် (၈၀၀၀) ကျပ်၊ အလုံးသေးတစ်ပိဿာလျှင် (၅၀၀၀) ကျပ်နှုန်းဖြင့် ပြည်မြို့ဈေးကွက်အတွင်း အရောင်း အဝယ်ဖြစ်နေကြောင်း သိရှိရပါသည်။

DOCA (ပဲခူး)

        အာတာလွတ်ဥပင်သည် ယနေ့အချိန်အခါတွင် ဈေးကောင်းရရှိပြီး တောင်သူများအတွက် အကျိုး ဖြစ်ထွန်းသော သီးနှံတစ်မျိုးဖြစ်ပါသည်။ အာတာလွတ်ပင်သည် အကြမ်းခံရုံသာမက စိုက်ပျိုးစဉ်ကာလ တစ်လျှောက်တွင် အခြားသောသီးနှံများကဲ့သို့ အသေးစိတ်ဂရုစိုက်စရာ မလိုအပ်ပေ၊ နေရာဒေသမရွေး စိုက်ပျိုးကျရသော သီးနှံဖြစ်ပါသည်။ အထွက်နှုန်းအနေဖြင့် တစ်ဧကလျှင် ပျမ်းမျှပိဿာ (၃၀၀၀) ကျော် ထိ ထွက်ရှိပါသည်။ ယခုအချိန်အခါတွင် ပြည်မြို့ အတွင်းရှိ ဈေးကွက်များတွင် အာတာလွတ် (ခေါ်) ဝါးဥ များ ဝင်ရောက် ရောင်းချလျက်ရှိနေပြီ ဖြစ်ပါသည်။ ၎င်းအာတာလွတ် (ခေါ်) ဝါးဥများကို ရွှေတောင်မြို့ နှင့် အနီးတဝိုက်ရှိ ကျေးရွာများတွင် စိုက်ပျိုးကြပြီး ထွက်ရှိလာသော အာတာလွတ် (ခေါ်) ဝါးဥကို ရွှေတောင်မြို့ရှိဈေးကွက်များနှင့် ပြည်မြို့နယ်အတွင်းရှိ ဈေးကွက်များတွင် ရောင်းချလျက်ရှိကြောင်း သိရှိရပါသည်။ ပြည်မြို့နယ်အတွင်းရှိ ဈေးကွက်များတွင် ရောင်းချလျက်ရှိသော အာတာလွတ် (ခေါ်) ဝါးဥကို တစ်ပိဿာလျှင် (၄၀၀၀) ကျပ်နှုန်းဖြင့် ရောင်းချလျက်ရှိကြောင်း သိရှိရပါသည်။

DOCA (ပဲခူး)