ပြည်တွင်းကုန်သွယ်မှုသတင်း

           ကယားပြည်နယ်အတွင်း ထွက်ရှိသော ဒေသထွက် အာလူးသည် ပြည်နယ်အတွင်း စားသုံးသူများအတွက် အရေးပါသော စားဖိုဆောင်သီးနှံတမျိုးဖြစ်သည်။ အာလူးမှာ အသီးသီး သည့်အာလူးနှင့် မြေထဲမှတူးဖော်ရသော အာလူးဟူ၍ (၂) မျိုးရှိသည့် အာလူးများအနက် မြေထဲ မှတူးဖော်ရသောအာလူးကို လူအများဆုံးကြိုက်နှစ်သက်ကြပါသည်။ အာလူးကို ဒေသအတွင်း ဒီးမောဆိုမြို့နယ်၊သေးဆူလဲကျေးရွာ၊ ကုန်းသာကျေးရွာ ၊ဒေါပေါ်ကလဲကျေးရွာတို့တွင်  စိုက်ပျိုး ထွက်ရှိသော်လည်း အခြားဒေသများဖြစ်သည့် ပင်လောင်း၊ အောင်ပန်း၊ ကလော၊ နောင်တရား မြို့တို့မှအများဆုံး ဝင်ရောက်လျက်ရှိပါသည်။ ယခုအပတ်တွင် ပြည်နယ်အတွင်း အာလူးဝင်ရောက်မှုမှာ ( ၆ )အိတ် ( ၁၂၀ ) ပိဿာရှိခဲ့ပြီး ယခုလက်ရှိ  ဈေးကွက်တွင်ဖြစ်ပေါ်နေသော အာလူး ဈေးနှုန်းမှာ အလုံးကြီး တစ်ပိဿာလျှင် (၂၀၀၀)ကျပ်၊ အလုံးသေး တစ်ပိဿာလျှင် (၁၇၀၀)၊ ၁၈၀၀ ကျပ်ဈေးဖြင့် အရောင်းအဝယ်ဖြစ်လျက်ရှိပြီး ယခင် ဇွန်လ ဒုတိယပတ်တွင် အာလူးအလုံးကြီး တစ်ပိဿာလျှင် (၂၅၀၀)ကျပ်၊ အလုံးသေး တစ်ပိဿာလျှင် (၂၃၀၀) ကျပ်သာ ရှိခဲ့ပြီး ယခင်ဇွန်လ ဒုတိယပတ်နှင့် ယခုဇူလိုင်လ ဒုတိယပတ်နှိုင်းယှဉ်မည်ဆိုလျှင် အာလူး အလုံးကြီး တစ်ပိဿာ (၅၀၀)ကျပ်၊ အလုံးသေး တစ်ပိဿာ( ၄၀၀ - ၅၀၀ ) ကျပ်ခန့်ဈေးနှုန်း ကျဆင်းလာကြောင်း၊ ဈေးနှုန်းကျဆင်းရခြင်းမှာ ဈေးကွက်အတွင်း ဒေသထွက် အာလူးများဝင် ရောက်မှုများပြားလာသောကြောင့် ဖြစ်သည်ဟု နောင်ယားဈေးရှိ အာလူးရောင်းချသူတစ်ဦးထံမှ သိရပါတယ်။

DOCA(ကယား)

             တညင်းသီးကို ကချင်ပြည်နယ်ရှိ ခြံဝန်းများ၊ ဥယျာဉ်ခြံမြေများတွင် စိုက်ပျိုးကြပါသည်။ ဇွန်လ နောက်ဆုံးပတ်မှစ၍ တညင်းသီးဈေးကွက် စတင်လာပြီး ဒညင်းသီး ၁ လုံးလျှင် ၃၀ ကျပ်မှ ၅၀ ကျပ် အထိပေါက်ဈေးရှိပါသည်။ တညင်းသီးရောင်းဝယ်ရေးလုပ်ကိုင်သူများမှာ မြို့ပေါ်ရပ်ကွက်၊ ကျေးရွာများတွင် အပင်ပြတ် (သို့မဟုတ်) အလုံးရေဖြင့် ဝယ်ယူကြရာ စိုက်ပျိုးသူများအနေဖြင့် အလုံးအရွယ်အစား ပေါ်မူတည်ကာ ၁၃ ကျပ် မှ ၁၇ ကျပ်အထိ ရရှိပါသည်။ ဒညင်းသီးဒိုင်များသို့ သွင်းပါက အလုံး အရွယ်အစားပေါ်မူတည်၍ တစ်လုံးလျှင် ၁၈ ကျပ်မှ ၂၀ ကျပ်အထိ ရရှိပါသည်။ တညင်းသီးကို အခွံနွှာပြီး တညင်းသီးများကို ပိုက်အိတ်များဖြင့် တစ်အိတ်လျှင် အလုံးရေ ၅၅၀၀ ခန့်ထိ ထည့်သွင်း၍ မန္တလေးဈေးကွက်သို့ အဓိကတင်ပို့ကြပါသည်။ကားဖြင့် သယ်ဆောင်ပါက အလုပ်သမားခအပါအဝင် တစ်အိတ်လျှင် မြစ်ကြီးနားမှ မန္တလေးသို့ ၆၅၀ဝိ/-ကုန်ကျစရိတ် ရှိပါသည်။ မန္တလေးဈေးကွက်တွင် တညင်းသီးအလုံးရေ ၅၀ မှ ၇၀ ပါ တစ်ပိဿာလျှင် ၂၅၀ဝိ/- ခန့်ပေါက်ဈေးရှိကြောင်း သိရှိရပါသည်။

DOCA(ကချင်)

       ပြည်ခရိုင်အတွင်းရှိ၊ ပေါက်ခေါင်းမြို့နယ်တွင် ဥစားဘဲ မွေးမြူရေးလုပ်ငန်းများ လုပ်ကိုင်လျှက်ရှိရာ စားသုံးသူရေးရာဦးစီးဌာန၊ ပေါက်ခေါင်းမြို့နယ်တာဝန်ခံ ဦးကျော်ကျော်ထွန်းနှင့် ဝန်ထမ်းများသည် (၈.၇.၂၀၂၂)ရက်နေ့ နံနက် (၁၀)နာရီအချိန်တွင် ကင်ပွန်းခြုံအုပ်စု ရေဖြူကျေးရွာသို့ သွားရောက်၍ ဘဲမွေးမြူရေးခြံပိုင်ရှင်နှင့် တွေ့ဆုံ၍မေးမြန်းခဲ့ပါသည်။

          ပေါက်ခေါင်းမြို့နယ်၊ ကင်ပွန်းခြုံအုပ်စု ရေဖြူကျေးရွာရှိ ဥစားဘဲ မွေးမြူရေး လုပ်ကိုင်လျှက်ရှိသော ဦးချစ်ငွေနှင့်တွေ့ဆုံ၍ မေးမြန်းရာတွင် ၎င်းမှဘဲအကောင်ရေ (၃၀၀၀)မွေးမြူထားကြောင်း စတင်မွေးမြူသည့်အရွယ်မှာ အကောင်ပေါက်အရွယ်မှ စတင်မွေးမြူထားကြောင်း သိရပါသည်။ ဘဲများကို ကျွေးသည့်အစာမှာ CPစာ၊ ဆန်ကွဲ၊ ပုစွန်ဖွဲနှင့် စပါးများကိုကျွေးမွေးရပါသည်။ စတင်မွေးမြူသည့် အကောက်ပေါက်အရွယ်မှစ၍ ဥစမ်းသည့်အချိန် (၆)လတာကာလတွင် အစားကျွေးခ တစ်လလျှင် ၄သိန်းခွဲခန့်ကုန်ကျသည်ဟုသိရပါသည်။ ဥစမ်းကာလမှစ၍ တစ်နေ့ကုန်ကျစရိတ်မှာ ၈သောင်းဝန်းကျင်ခန့်ကုန်ကျပါသည်။ ဥစမ်းကာလတွင် တစ်နေ့လျှင် ဘဲဥ ၂၅/၃၀လုံးထိဥ ဥပြီး ဥစမ်းကာလအပြီး(၁)လအကြာတွင် တစ်နေ့လျှင် ဘဲဥနှုန်း ၁၁၀၀လုံး ခန့်ဥနိုင်ပြီး၊ ဥများ လှိုင်လှိုင် ဥချိန်တွင် တစ်နေ့လျှင် အလုံး ၂၀၀၀ခန့် ဥ ဥကြောင်းသိရပါသည်။ ဘဲဥဈေးမှာ ဖောက်သည်ဈေး တစ်လုံးလျှင် ၁၅၀ မှ ၂၀၀ကျပ်အထိ ရရှိသဖြင့် တစ်နှစ်လျှင် အသားတင်အကျိုးအမြတ်မှာ ပျမ်းမျှ သိန်း(၂၀၀) ဝန်းကျင်ခန့် ရရှိသည်ဟု သိရပါသည်။

          ထို့ကြောင့် ဘဲမွေးမြူရေးလုပ်ငန်းကို တပိုင်တနိုင်မှ စီးပွားဖြစ်မွေးမြူရန်အတွက် အရင်းအနှီးများစွာ လိုအပ်လျှက်ရှိပြီး ယခုအချိန်တွင် ဘဲဥဈေးများမြင့်တက်လာသဖြင့် ယခင်နှစ်ထက် အကျိုးအမြတ်များပိုမိုရရှိလာ၍ နောက်နှစ်များတွင် ပိုမိုတိုးချဲ့၍ မွေးမြူရန် စီစဉ်လျှက်ရှိကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး ၊ သာယာဝတီခရိုင် ၊ ဇီးကုန်းမြို့နယ်တွင် (၄.၇.၂၀၂၂) ရက်နေ့ နေ့လယ် ( ၁၃:၀၀) အချိန်၌ ဇီးကုန်းမြို့နယ်ရှိ ဒေသခံပြည်သူများအား ဦးခင်မောင်ဆွေ ကုန်စုံဆိုင်၊ ရုံးလမ်းတွင် စားအုန်းဆီများကို တစ်ပိဿာလျှင် ၆၃၀၀/ကျပ် ဈေးနှုန်းဖြင့် လူတစ်ဦးလျှင် တစ်ပိဿာနှုန်းဖြင့် ရောင်းချပေးခဲ့ပါသည်။

          မြို့နယ်အတွင်း စားအုန်းဆီများအား ဖြန့်ဖြူးရောင်းချပေးရာ၌ ကျန်းမာရေးနှင့် ညီညွတ်စေရန် Food Grade Clean Drum များဖြင့် လည်းကောင်း၊ Food Grade Bowser Truck ဖြင့်လည်းကောင်း၊ ပေပါအဝါများဖြင့်သာ ထည့်သွင်းရောင်းချမှု ရှိ/မရှိ ၊ သက်သာသော ဈေးနှုန်းဖြင့် ဈေးကွက်အတွင်း ရောင်းချနိုင်စေရန်နှင့်  ကုန်စည်စီးဆင်းမှု မပြတ်လပ်စေရန် ရည်ရွယ်၍ စားသုံးသူ ရေးရာဦးစီးဌာနမှ ဝန်ထမ်းများ ကြီးကြပ်ပြီး ဆီလုပ်ငန်းရှင်များမှ First Top Co; Ltd ၊ ငုဝါလမ်း ဘုရင့်နောင်ပွဲရုံမှ တင်သွင်း၍ ဒေသခံပြည်သူများအား ဖြန့်ဖြူး‌ရောင်းချပေးနေကြောင်း သိရှိရပါသည်။

          ဇီးကုန်းမြို့နယ်၌ ဇူလိုင်လဆန်းပိုင်းတွင် ဖြစ်ပေါ်နေသော စားအုန်းဆီဈေးမှာ ၆၈၀၀/၇၀၀၀/ ၇၃၀၀/၇၅၀၀ ကျပ်ရှိခဲ့ပြီး ၄.၇.၂၀၂၂ ရက်နေ့တွင် ၈၀၀၀/ ကျပ်ဖြင့် ဈေးကွက်အတွင်း ဖြန့်ဖြူး ရောင်းချနေပြီး မြေပဲဆီ တစ်ပိဿာလျှင်  ၁၀၀၀၀/၊ နှမ်းဆီ တစ်ပိဿာလျှင် ၁၁၀၀၀/ကျပ် ဈေးနှုန်းများဖြင့် ရောင်းချပေးလျှက်ရှိကြောင်း သိရှိရပါသည်။

DOCA(ပဲခူး)

                စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး   စားအုန်းဆီ အဓိက ထုတ်လုပ်တင်ပို့သည့် မလေးရှား နိုင်ငံနှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်း တွက်ချက်၍ ပြည်တွင်းဈေးကွက်၌ရောင်းဝယ်ဖောက်ကားရမည့် အခြေခံ လက်ကား ရည်ညွှန်းဈေးနှုန်းကို ထုတ်ပြန်ပေးလျက်ရှိပါသည်။

              ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၂ ခုနှစ်၊ ဇူလိုင်လ ၁၈ ရက်နေ့မှ ၂၄ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်း ဈေးနှုန်းမှာ စားအုန်းဆီ တစ်ပိဿာလျှင် ၃၆၆၅ ကျပ် ဖြစ်ကြောင်း ထုတ်ပြန်ကြေညာထားပါသည်။

              ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

              အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်း၏ Facebook Page  တွင် ဝင်ရောက်ကြည့်ရှုနိုင်ကြောင်း သိရသည်။