သတင်းနှင့် လှုပ်ရှားမှုများ

          မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်တွင် အထွေထွေ အုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ စားသုံးသူရေးရာ ဦးစီးဌာန၊ စီမံကိန်းရေးဆွဲရေးဦးစီးဌာန၊ ပြည်တွင်းအခွန်ဦးစီးဌာနနှင့် မြန်မာ့ဆက်သွယ်ရေးလုပ်ငန်း တို့  ပူးပေါင်း၍ လူသုံးကုန်နှင့်စားသုံးကုန်ပစ္စည်းများ ခွဲခြားရောင်းချမှု ရှိ/မရှိနှင့် လုံခြုံစိတ်ချရမှု ရှိသော ကုန်စည်များရောင်းချမှုရှိစေရေး ဈေးကွက်စောင့်ကြည့်စစ်ဆေးခြင်းကို ဖေဖော်ဝါရီလ(၅) ရက်နေ့လည် (၁၃း၀၀ )နာရီတွင် ကုန်စုံဆိုင်များသို့ မြေပြင်ကွင်းဆင်းဆောင်ရွက်ကြကြောင်း သိရသည်။

          အဆိုပါမြို့နယ်လူသုံးကုန်နှင့် စားသုံးကုန်ပစ္စည်းများခွဲခြားရောင်းချမှု စိစစ်ဖော်ထုတ်ရေး အဖွဲ့သည် မြို့နယ်တွင်း စတိုးဆိုင်ကြီးများနှင့် ကုန်ပစ္စည်းအရောင်းဆိုင်အချို့သို့ ကွင်းဆင်း၍ တယ်လီဖုန်းဆင်းကဒ်တစ်ချို့နှင့် ကုန်ပစ္စည်းများကို ကုန်အမှတ်တံဆိပ်ခွဲခြား၍ ရောင်းချခြင်းမရှိရန်၊ ‘မရောင်းပါ’ ဟုဆိုသည့် စာသားကပ်ထားခြင်းမရှိစေရန်နှင့် ကုန်စုံဆိုင်များတွင် ရောင်းချလျက် ရှိသော ကုန်စည်များအား စားသုံးသူကာကွယ်ရေးဥပဒေ အခန်း (၁၈) ပါ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ စီးပွားရေးလုပ်ငန်းရှင်များ လိုက်နာရမည့် ကုန်စည်အမျိုးအစားအလိုက် ကုန်စည်၏ တံဆိပ်အမှတ်အသား၊ အမျိုးအမည်၊ အရွယ်အစား၊ အရေအတွက်နှင့် အသားတင် ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့် ကုန်ဆုံးသည့် ရက်စွဲ၊ ကုန်ကြမ်းပစ္စည်းအမျိုးအမည်နှင့် ပါဝင်မှုနှုန်း အချိုးအစား၊ ထုတ်လုပ်သည့် အမှတ်စဉ်၊ ကျန်းမာရေးဘေးထွက်ဆိုးကျိုး( သို့ ) ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်၊ သက်ဆိုင်ရာဌာနများမှ ဖော်ပြရန်သတ်မှတ်ထားသော အချက်များကိုက်ညီမှုရှိ/ မရှိ စစ်ဆေးကြပြီး စီးပွားရေးလုပ်ငန်းရှင်များအား သက်တမ်းလွန်ကုန်ပစ္စည်းများ မရောင်းချရန် ကုန်အညွှန်းအမှတ် အသားပြည့်စုံမှန်ကန်စွာ ဖော်ပြထားသော ကုန်စည်များကိုသာ ဆက်လက်ဖြန့်ဖြူးရောင်းချရန်၊ စီးပွားရေးလုပ်ငန်းရှင်များအနေဖြင့် တာဝန်များ၊ တားမြစ်ချက်များအား လိုက်နာကြရန်၊ ကျင့်ဝတ် စည်းကမ်းများအညီ ရောင်းချကြရန်၊ ကုန်စည်များနှင့် စပ်လျဉ်း၍ အာမခံချက်၊ သတ်မှတ်ချက်နှင့် ပြည့်စုံမှန်ကန်သောသတင်းအချက်များကို အချိန်နှင့် တပြေးညီထုတ်ပြန်စေရန်နှင့် သက်ဆိုင်ရာဌာန များမှ ပြဌာန်းထားသောဉပဒေ၊ အမိန့် ၊ ညွှန်ကြားချက်များနှင့်အညီ လိုက်နာ၍ ဖြန့်ဖြူးရောင်း ချကြရန် အသိပညာပေး ဆွေးနွေးကြပြီး နေ့ ( ၁၅: ၃၀ )နာရီတွင် ကွင်းဆင်းဆောင်ရွက်မှု ပြီးစီးကြောင်း သိရသည်။

DOCA(မန္တလေး)

၅-၂-၂၀၂၅ ရက်နေ့ နံနက် (၁၀:၀၀) နာရီအချိန်တွင်  မြင်းခြံမြို့ပေါ်ရှိ စက်သုံးဆီအရောင်း ဆိုင်များ၊ ၊ စားအုန်းဆီအရောင်းဆိုင်များ၊ လူသုံးကုန်နှင့်စားသောက်ကုန် ပစ္စည်းရောင်းချနေသော အရောင်းဆိုင်များသို့ မြို့နယ်စီမံအုပ်ချုပ်ရေးအဖွဲ့ ဥက္ကဌ ၊ မြို့နယ်ရဲမှူး ၊ ပြည်တွင်းအခွန်များ ဦးစီးဌာန၊ မြို့နယ်စည်ပင်သာယာရေးအဖွဲ့နှင့် စားသုံးသူရေးရာဦးစီးဌာနတို့ ကွင်းဆင်းစစ်ဆေးခဲ့ ကြောင်းသိရှိရသည်။ စစ်ဆေးမှုလုပ်ငန်းစဉ်တွင် စက်သုံးဆီအရောင်းဆိုင်များ၌ စက်သုံးဆီများ ရောင်းချရာတွင် အရည်အသွေး ၊ အချိန်အတွယ်နှင့်သတ်မှတ်ရည်ညွှန်းဈေးနှုန်း များဖြင့်ရောင်းချ ခြင်းရှိ / မရှိ ၊ စားအုန်းဆီ အရောင်းဆိုင်များအနေဖြင့် စားအုန်းဆီများ အမှန်တကယ် ပြည်သူ့ လက်ဝယ်သို့ ရောင်းချခြင်း ရှိ / မရှိ ၊ အလေးချိန် ပြည့်ဝမှန်ကန်မှု ရှိ / မရှိ နှင့် လူသုံး ကုန်ပစ္စည်း များရောင်းချရာတွင် ကုန်ပစ္စည်များ ကုန်အမှတ်တံဆိပ် ခွဲခြား၍ရောင်းချခြင်း မရှိစေရေးကို အထူးအလေးထားဆောင်ရွက်လိုက်နာသွားရန်နှင့် ရောင်းချခြင်းကို စစ်ဆေးတွေ့ရှိပါက တရားဥပဒေနှင့်အညီ ထိရောက်စွာအရေးယူဆောင်သွားမည်ဖြစ်ကြောင်း လူသုံးကုန်နှင့်စားသုံး ကုန်ရောင်းချသူများသို့ ရှင်းလင်းဆွေးနွေးခဲ့ကြောင်းသိရသည်။

DOCA(မန္တလေး)

 စားသုံးသူရေးရာဦးစီးဌာန၊ မြန်အောင်မြို့နယ်ဦးစီးမှူးသည် (၁၁.၂.၂၀၂၅)ရက်နေ့ နံနက် (၁၀:၃၀)နာရီအချိန်တွင် မြန်အောင်မြို့နယ်၊ ရှားတောအုပ်စု၊ ရှမ်းကွင်းရွာရှိ ဆီလုပ်ငန်းရှင်များအား စားသုံးသူကာကွယ်ရေးအသိပညာပေးဟောပြောခြင်း ဆောင်ရွက်ခဲ့ ပါသည်။

ဟောပြောပွဲတွင် မြို့နယ်ဦးစီးမှူး ဦးမြင့်အောင်က စားသုံးသူကာကွယ်ရေးဥပဒေပါ စီးပွားရေး လုပ်ငန်းရှင်၏တာဝန်များအကြောင်း၊ စီးပွားရေးလုပ်ငန်းရှင်များအနေဖြင့် စားသုံးသူကို ခွဲခြားမှုမရှိဘဲ ဖြောင့်မတ်မှန်ကန်စွာဆက်ဆံခြင်း၊ စီးပွားရေးလုပ်ငန်း လုပ်ကိုင်ရာတွင်စီးပွားရေးကျင့်ဝတ်၊ စည်းကမ်း နှင့်အညီဆောင်ရွက်ရန်၊  ကုန်စည်နှင့် စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ် မှုရှိစေရေးနှင့် သတ်မှတ်အရည်အသွေး ပြည့်မီသော ကုန်စည်များကိုသာရောင်းချရန်၊ စားသုံးဆီ ရောင်းချသော လုပ်ငန်းရှင်များအနေဖြင့်ဈေးနှုန်းမြှင့်တင်ရောင်းချမှုမရှိစေရေး၊ ဈေးကွက်အတွင်း ဈေးနှုန်း မြှင့်တင် ရောင်းချခြင်းများတွေ့ရှိပါက စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနမှ ထုတ်ပြန်ထားသော အရေးကြီး ကုန်စည်နှင့်ဝန်ဆောင်မှုဥပဒေပါ ပြစ်မှုပြစ်ဒဏ်များအရ အရေးယူ ဆောင်ရွက်နိုင်သည့် အကြောင်းတို့ကို အသိပညာပေးဟောပြောခဲ့ပြီး ဆီလုပ်ငန်းရှင်များဘက်မှ လည်း သိလိုသည်များ မေးမြန်း၍ အပြန်အလှန် ဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

စားသုံးသူရေးရာဦးစီးဌာန၊ လေးမျက်နှာမြို့နယ်တာဝန်ခံသည် (၁၁.၂.၂၀၂၅)ရက်နေ့၊ နံနက် (၁၀:၃၀) နာရီအချိန်တွင် လေးမျက်နှာမြို့နယ်၊ ဗိုလ်ချုပ်လမ်း၊အမှတ်(၄)ရပ်ကွက်ရှိ စားသုံးသူရေးရာ ဦးစီးဌာန၊ မြို့နယ်တာဝန်ခံရုံး၌ ကုန်မျိုးစုံဆိုင်လုပ်ငန်းရှင် များအား စားသုံးသူကာကွယ်ရေးဆိုင်ရာ အသိပညာပေးဟောပြောခြင်း ဆောင်ရွက်ခဲ့ပါသည်။

အဆိုပါဟောပြောပွဲတွင် မြို့နယ်တာဝန်ခံ ဦးအောင်သန်းဌေးက  စားသုံးကာကွယ် ရေးဥပဒေပါ စီးပွားရေးလုပ်ငန်းရှင်၏တာဝန်များအကြောင်း၊ ကုန်အညွှန်းအမှတ်အသား အဓိပ္ပာယ်ဖွင့်ဆိုချက်၊ ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ မည်သည့် စီးပွားရေးလုပ်ငန်းရှင်မဆို ပုဒ်မ(၄၁) ပုဒ်မခွဲ(ခ) နှင့်(ဆ) တို့ပါ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြား ဘာသာတစ်ခု (သို့မဟုတ်) တစ်ခု ထက်ပို၍ တွဲလျက်ဖြစ်စေ ရေးသားဖော်ပြရမည့် အကြောင်း၊ ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှု များနှင့် စပ်လျဉ်း၍ ကုစားခွင့်ရရှိခြင်း များအကြောင်း၊ ပြစ်မှုနှင့်ပြစ်ဒဏ်များအကြောင်း၊ စားသုံးသူ မိဘပြည်သူများ အနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက် များ အကြောင်း သိရှိလိုပါက www.doca.gov.mm Websiteတွင် ဝင်ရောက်လေ့လာနိုင်ကြောင်း၊ စားသုံးသူ သတင်းပြန်ကြားရေး နှင့် တိုင်ကြားမှုလက်ခံ ဆောင်ရွက်ရေးစင်တာ (CICC) ရုံးခန်းများ ဖွင့်လှစ်ထားရှိမှု အခြေအနေတို့ကို လည်းကောင်း အသိပညာပေး ဆွေးနွေး ခဲ့ကြောင်းသိရှိရပါသည်။

DOCA(ဧရာဝတီ)

          မအူပင်မြို့နယ်အတွင်းရှိ ရောင်းချနေသော  ဘဲဥများ ဖော်ဖော်ဝါရီလ ဆန်းပိုင်း အတွင်း အနည်းငယ်ကျဆင်းလာကြောင်း တွေ့ရှိရသည်။ မအူပင်တွင် ဥစားကြက်ခြံ (၁၇၁)ခြံရှိပြီး၊ ဘဲမွေးမြူရေးခြံ (၈၀)ခြံ ရှိကြောင်း သိရသည်။ ပြည်သူများသည်  ကြက်ဥ၊ ဘဲဥ များကို အဓိက ဟင်းတစ်မယ် အဖြစ်စားသုံးကြသည်။ ကြက်ဥပြုတ်၊ ဘဲဥကျော် များကို နံနက်စာအဖြစ်လည်း စားသုံး ကြပြီး မြို့နယ်တွင်း ပြည်သူများ စားသုံးနိုင်ရန် ကြက်ဥ၊ ဘဲဥများကို   မအူပင်၊ ညောင်တုန်းမြို့ နယ် အတွင်းရှိ မွေးမြူရေးခြံများမှ မှာယူ၍ ဈေး၊ ကုန်မျိုးစုံဆိုင်၊ ရပ်ကွက်လက်လီ ဆိုင်များမှာ ရောင်းချ ကြပြီး ကြက်ခြံ၊ ဘဲခြံများမှ လက်ကားဈေး အနည်းငယ်ကျဆင်းကြောင်းသိရပြီး မိမိတို့ မြို့နယ်အတွင်းမှ မွေးမြူသော ကြက်ဥ၊ ဘဲဥများကို အခြားဒေသများသို့ တင်ပို့ ရောင်းချလျက် ရှိပါသည်။

               ၂၀၂၄ခုနှစ် ၁၁ပိုင်းခန့်က ကြက်ဥ၊ ဘဲဥဈေး မြှင့်တက်လာ၍ သက်ဆိုင်ရာဌာနများက လုပ်ငန်းရှင်များဖြင့် ချိတ်ဆက်၍ နေရာဒေသရပ်ကွက် အသီးသီးတွင် သတ်မှတ်ချက်နှင့်အညီ ပြည်သူ များကို ကြက်ဥ၊ ဘဲဥ၊ သား၊ငါး နှင့် ဆီ၊ ဆန်များကို နေ့စဉ် ရောင်းချပေးလျှက် ရှိသည်။ ကြက်ဥများမှာ လက်ကားဈေး အလုံး/ အကြီး၊ အသေးပေါ်မူတည်၍ ကြက်ဥတစ်လုံးလျှင် ၃၅၀ ကျပ်မှ ၃၇၀ ကျပ်ဖြင့်လည်းကောင်း ဘဲဥ တစ်လုံးလျှင် ၄၇၀ ကျပ်မှ ၄၈၀ ကျပ်အထိ ရောင်းချပေးလျှက်ရှိပြီး လက်လီဈေးအနေဖြင့် ကြက်ဥ တစ်လုံး ၃၇၀-၃၈၀ ကျပ်၊ ဘဲဥ တစ်လုံး ၅၀၀-၅၅၀ကျပ်ဖြင့် ကြောင်းချနေသည်။

ယနေ့  ဘဲဥ တစ်လုံး ဘဲခြံ များမှ လက်ကားဈေး အနည်းငယ်ကျဆင်းလာပြီး ဘဲဥ တစ်လုံး ငွေကျပ် ၄၄၀ မှ ၄၆၀ ကျပ် ထိ ကျဆင်းလာပြီး ယခင်ဈေးနှင့် နှိုင်းယှဉ်ပါက ၃၀-၂၀ ကျပ် ကျဆင်းလပြီး ရှေ့ရက်များတွင်လည်း အနည်းငယ်ကျဆင်းနိုင်ကြောင်း ခြံလုပ်ငန်းရှင်ထံမှ သိရသည်။ ကြက်ဥ ဈေးမှာ အလုံးကြီး ၃၈၀ကျပ် ဖြင့် တည်ငြိမ် လျှက် ရှိကြောင်း သိရသည်။

DOCA(ဧရာဝတီ)