သတင်းနှင့် လှုပ်ရှားမှုများ

ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်အတွင်းရှိ ဆေးအရောင်းဆိုင်များ သတ်မှတ်စည်းမျဉ်စည်းကမ်းချက်များနှင့် ညီ/မညီ ကျန်းမာရေးဝန်ကြီးဌာနက သတ်မှတ်ချက်များ အတိုင်း ရောင်းချခြင်း ရှိ/မရှိ ကွင်းဆင်းစစ်ဆေးခြင်းလုပ်ငန်းကို ၁၀.၂.၂၀၂၅ ရက်နေ့ နံနက် (၁၀၀၀)နာရီက ကွင်းဆင်းစစ်ဆေး ဆောင်ရွက်ခဲ့ကြောင်း သိရသည်။

ထိုသို့ကွင်းဆင်းစစ်ဆေးရာတွင် ဒုတိယမြို့နယ်အုပ်ချုပ်ရေးမှူး နှင့် မြို့နယ်စီမံအုပ်ချုပ်ရေး အဖွဲ့ဝင်များ၊  မြို့နယ်ပြည်သူ့ကျန်းမာရေးဦးစီးဌာနမှူး နှင့် တာဝန်ရှိသူများ ပူးပေါင်း၍ ညောင်တုန်း မြို့နယ် (၄)ရပ်ကွက်၊ (၅)ရပ်ကွက်၊ (၇)ရပ်ကွက်ရှိ စျေးတန်းနှင့် ရပ်ကွက်အတွင်းရှိ ဦးမြင်ဆွေ ဆေးဆိုင်၊ မိဘမေတ္တာဆေးဆိုင်၊ ဦးထွန်းဝေဆေးဆိုင်၊  အိမ်သုံးဆေး အရောင်းဆိုင်များတို့အား ကျန်းမာရေးဝန်ကြီးဌာန၏ ညွှန်ကြားချက်များအတိုင်း ရောင်းချခြင်း ရှိ/မရှိ၊ ပြဌာန်းထားသည့် ဥပဒေ၊ နည်းဥပဒေ ညွှန်ကြားချက်များအားလိုက်နာမှု ရှိ/မရှိကို ပုံမှန်စစ်ဆေးခြင်း၊ ဈေးကွက် အတွင်း ဆေးဝါးများ ဈေးနှုန်းမြှင့်တင်ရောင်းချခြင်း နှင့် ဈေးကစားရန်ရဉ်ရွယ်၍ သိုလှောင်ထားခြင်း ရှိ/မရှိကို စစ်ဆေးခြင်း၊ တားမြစ်ဆေးများ၊ မူးယစ်ဆေးအုပ်စုဝင်ဆေးများ၊ ခွင့်ပြုချက်မရှိသည့် ကြီးကြပ်ကန့်သတ်ဆေးဝါးများ၊ ထိန်းချုပ်ဆေးဝါးများ၊ သက်တမ်းလွန်ဆေးဝါးမျာ၊ ဆေးဝါးအတု များ၊ ဆေးဝါးမှတ်ပုံတင်မရှိသည့် ဆေးဝါးများ၊ သုံးစွဲရန်မသင့်သည့် ဆေးဝါးများ ဝယ်ယူတင် သွင်းခြင်း ရောင်းချခြင်း ရှိ/မရှိကို  ကွင်းဆင်းစစ်ဆေးခြင်းများဆောင်ရွက်ခဲ့ကြပြီး တွေ့ရှိပါက အရေးကြီးကုန်စည် ဝန်ဆောင်မှု ဥပဒေအရလည်းကောင်း၊ အမျိုးသားဆေးဝါးဉပဒေပါ ပြဋ္ဌာန်းချက် များအရ အရေးယူအပြစ်ပေးခံရနိုင်သည့် အခြေအနေများကို အသိပညာပေး ဆွေးနွေးပြီး လိုအပ်သည်များကို လမ်းညွှန်မှာကြားခဲ့ကြောင်းသိရသည်။

DOCA (ဧရာဝတီ)

ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ညောင်တုန်း မြို့နယ်ဦး စီးမှူးရုံးမှ တာဝန်ရှိသူများသည် ၁၁.၂.၂၀၂၅ ရက်နေ့က မြို့နယ်အထွေထွေ အုပ်ချုပ် ရေးဦးစီးဌာန၊ အစည်းအဝေးခန်းမတွင် ဌာနဆိုင်ရာများနှင့်အတူ ညောင်တုန်းမြို့နယ် ငရုတ်လုပ်ငန်းရှင်(၅၄) ဦးအား တွေ့ဆုံ၍  လုပ်ငန်းရှင်အသိပညာပေးခြင်း ဟောပြော ဆွေးနွေးခဲ့ကြသည်။

    အဆိုပါဆွေးနွေးပွဲတွင် ညောင်တုန်းမြို့နယ်ဦးစီးမှူး ဦးအောင်လွင် က စားသုံးသူကာကွယ် ရေးဥပဒေ(၂၀၁၉) စီးပွားရေးလုပ်ငန်းရှင်များ လိုက်နာရမည့် တာဝန်အကြောင်း ကိုလည်းကောင်း ၊ ညောင်တုန်းတွင် ငရုတ်သီးနှံ စိုက်ပျိုးထုတ်လုပ်နေ၍ ဈေးကွက်ရရှိနေသော ငရုတ်စိုက်ပျိုးထုတ်လုပ်မှု ပိုမိုစိုက်ပျိုးနိုင်ရေးနှင့်  ဈေးကွက်ခိုင်မာရေး၊ ပိုးမွှားအန္တရာယ်ကာကွယ်ရေးနှင့် ပြည်တွင်းမှ ဒေသတွင်း ထွက်ကုန်စည်များကို အရည်အသွေးပြည့်မီစွာစိုက်ပျိုးထုတ်လုပ်နိုင်ရေး၊ ပြည်ပသို့တင်ပို့ ရောင်းဝယ်နိုင် သည်အထိ တိုးမြင့်စိုက်ပျိုးနိုင်ရေးနှင့် ဝန်ကြီးဌာန၏ဆောင်ရွက်မှုများကို ရှင်းလင်းခြင်း ငရုတ် တစ်ဧကစာ စိုက်ပျိုးပျိုးပါက အကြမ်းဖျဉ်း ကုန်ကျစရိတ် (၃)သိန်းမှ (၅)သိန်းကြား ကုန်ကျနိုင်ကြောင်း စိုက်ပျိုးသူ များထံမှ ကွင်းဆင်းသိရှိရ၍ ငရုတ်စိုက်ပျိုးမှု ကုန်ကျစရိတ်သည် ဒေသတစ်ခုနှသ့် တစ်ခု ကုန်ကျစရိတ် တူညီမှု မရှိနိုင်ကြောင်း၊ ငရုတ်ပထွက်တိုးရေးနှင့် ငရုတ်ဈေးကွက်ရရှိစေရေး ဌာနများက လည်း ပြည်တွင်ကုန်သွယ်မှု ဖွံ့ဖြိုးတိုးတက်စေရေးကို ဆောင်ရွက် လျှက်ရှိကြောင်း အကျယ်တဝင့် အပြန်အလှန် ဆွေးနွေးခဲ့ကြပြီး စားသုံးသူကာကွယ်ရေးလုပ်ငန်းစဉ် စီးပွားရေးလုပ်ငန်းရှင် သိကောင်းစရာများနှင့် ပတ်သက်၍ အသေးစိတ်ရှိလိုပါက Consumer Call Center 1535 သို့ ဆက်သွယ် မေးမြန်းနိုင် ကြောင်းစသည်တို့ကို အသိပညာပေး ဟောပြောခဲ့ကြောင်း သိရသည်။

DOCA (ဧရာဝတီ)

          ၂၀၂၅ ခုနှစ်၊ ဖေဖော်ဝါရီလ (၁၀) ရက်နေ့၊ နံနက်(၁၁:၀၀) နာရီအချိန်တွင်  မုံရွာခရိုင်၊ စားသုံးသူရေး ရာဦးစီးဌာန မှ ခရိုင်ဦးစီးမှူး၊  အထွေထွေအုပ်ချုပ်ရေးဦးစီးဌာန၊ တိုင်းဒေသကြီးရေနံထွက်ပစ္စည်း ကြီးကြပ်စစ်ဆေးရေးဦးစီးဌာန၊ မီသတ်ဦးစီးဌာန၊ ရဲတပ်ဖွဲ့တို့ နှင့်ပူးပေါင်း၍ မုံရွာမြို့ပေါ်ရှိ စက်သုံးဆီအရောင်းဆိုင်များအား စက်သုံးဆီအချင်အတွယ်ပြည့်ဝမှန်ကန်မှုရှိ/မရှိ၊ သတ်မှတ်ရည်ညွှန်းဈေး အတိုင်းရောင်းချနေမှုရှိ/မရှိ၊ စက်သုံးဆီပြတ်လပ်မှု ရှိ/မရှိနှင့် စက်သုံးဆီလက်ကျန် အခြေအနေတို့ကို ပူးပေါင်း ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

           ထိုသို့စစ်ဆေးရာတွင် မုံရွာမြို့နယ်အတွင်းရှိ စက်သုံးဆီအရောင်းဆိုင်များတွင် စက်သုံးဆီလက်ကျန် အနေဖြင့် စက်သုံးဆီများလုံလောက်စွာသိုလှောင်ထားရှိပြီး သတ်မှတ်ရည်ညွှန်းဈေး အတွင်းသာ ရောင်းချကာ အချင်အတွယ်ပြည့်ဝမှန်ကန်မှုရှိသည်ကို စစ်ဆေးတွေ့ရှိရပါသည်။ စစ်ဆေးရေးမှူးနှင့် သက်ဆိုင်ရာတာဝန်ရှိ သူများသည် စက်သုံးဆီအရောင်းဆိုင်တာဝန်ခံများအား အချင်အတွယ်မှန်ကန်မှုရှိစေရေးအလေးထားရန်၊ သတ်မှတ်ရည်ညွှန်းဈေးအတွင်းသာရောင်းချရန် အသိပညာပေးဆောင်ရွက်ခဲ့ကြောင်း သိရှိရပါသည်။

DOCA(စစ်ကိုင်း)

မန္တလေးတိုင်းဒေသကြီး၊ ညောင်ဦးခရိုင် စားသုံးသူရေးရာဦးစီးဌာန ခရိုင်ဦးစီးမှူး ဦးသန်းစိုး (လက်ထောက်ညွှန်ကြားရေးမှူး)သည် (၉.၂.၂၀၂၅) ရက်နေ့ နေ့လည် (၁၄:၀၀) နာရီအချိန်တွင် ညောင်ဦးမြို့ရှိ စားသုံးဆီလက်လီလက္ကားအရောင်းဆိုင်ရှင်များအား  ညောင်ဦးခရိုင်ဦးစီးမှူးရုံးတွင် ကုန်ဈေးနှုန်း တည်ငြိမ်ရေးနှင့် စားသုံးဆီများကို သတ်မှတ်ရည်ညွှန်းဈေးဖြင့် ရောင်းချစေရေး တွေ့ဆုံ ဆွေးနွေးခဲ့ကြောင်းသိရသည်။

နိုင်ငံတော်မှ ပြည်သူများကို သက်သာသောဈေးဖြင့် ရောင်းချပေးသော စားသုံးဆီများကို အလေးချိန်ပြည့်မှီစွာ ရောင်းချရေး၊ သတ်မှတ်ဈေးနှုန်းများအတိုင်း ရောင်းချစေရေး၊  ကုန်စည်နှင့် ဝန်ဆောင်မှုများနှင့်ပတ်သက်၍ စားသုံးသူများထိခိုက်နစ်နာမှု မဖြစ်ပေါ်စေရေးကာကွယ်ပေးခြင်း၊ စီးပွားရေးလုပ်ငန်းရှင်များအား ဥပဒေနှင့်အညီဆောင်ရွက်စေရေး စားအုန်းဆီ အရောင်းဆိုင်များ အနေဖြင့် စားအုန်းဆီများ အမှန်တကယ် ပြည်သူ့လက်ဝယ်သို့ ရောင်းချစေရေးတို့အတွက် လုပ်ငန်းရှင်များနှင့် တွေ့ဆုံဆွေးနွေးခဲ့ရာ လုပ်ငန်းရှင်(၃၀)ဦးတက်ရောက်ခဲ့ကြောင်း သိရသည်။       

DOCA(မန္တလေး)

          မြင်းခြံခရိုင်သည် မန္တလေးတိုင်းဒေကြီးတွင်ပါဝင်ပြီး မြို့နယ်(၃)ခုဖြင့် ဖွဲ့စည်းထားသော ခရိုင်မြို့ဖြစ်သည်။ မြင်းခြံမြို့သည် ဧရာဝတီမြစ်၏ လက်ဝဲဘက်ကမ်းပေါ်တွင် တည်ရှိကာ ဆည်ရေသောက်ဧရိယာများတွင် စိုက်ပျိုးရေးလုပ်ငန်းများလည်း အသင့်အတင့်ဆောင်ရွက်လျက် ရှိသဖြင့် တောင်သူများအနေဖြင့် ပဲမျိုးစုံ၊ အစေ့ထုတ်ပြောင်း၊ ဆီထွက်သီးနှံစသည်တို့ကို စိုက်ပျိုးလျက်ရှိပြီး ဆောင်းကြက်သွန်နီကိုလည်း အားထားစိုက်ပျိုးလျက်ရှိသည်။

          မြင်းခြံခရိုင်ချုပ်အနေဖြင့် ၂၀၂၄-၂၀၂၅ခုနှစ် ဆောင်းကြက်သွန်နီ လျာထားဧက (၂၀၁၉၈) ဧကတွင် ရာနှုန်းပြည့်စိုက်ပျိုးထားရှိပြီး ယခင်နှစ်စိုက်ဧကထက် (၅၂၄)ဧက ပိုမိုစိုက်ပျိုးနိုင်ခဲ့သည်။ မြို့နယ်များအနေဖြင့် စိုက်ပျိုးထားရှိမှုမှာ မြင်းခြံမြို့နယ်တွင် စိုက်ဧက(၈၆၀၀)ဧက၊ တောင်သာ မြို့နယ်တွင် (၉၂၀၄)ဧကနှင့် နွားထိုးကြီးမြို့နယ်တွင် (၂၃၉၄)ဧက စိုက်ပျိုးထားရှိကြောင်း သိရှိရသည်။

          ဆောင်းကြက်သွန်နီကို နိုဝင်ဘာလနှင့်ဒီဇင်ဘာလတို့တွင် စတင်စိုက်ပျိုးပြီး မတ်လနှင့် ဧပြီလတို့တွင် ရိတ်သိမ်းထွက်ပေါ်လေ့ရှိကြောင်း၊ စိုက်ပျိုးချိန်မှ ရိတ်သိမ်းချိန်အထိ (၄)လခန့် ကြာမြင့်ပြီး ဆောင်းကြက်သွန်နီ(ခေါ်)နွေကြက်သွန်နီများသည် ဧပြီလနှင့်မေလများတွင် လှိုင်လှိုင် ထွက်ပေါ်လာကာ ဈေးကွက်ထဲ၌ တွင်တွင်ကျယ်ကျယ်ဝင်ရောက်လာမည်ဖြစ်ကြောင်း၊ မြင်းခြံ ဒေသမှ ထွက်ရှိသော ဆောင်းကြက်သွန်နီသည် အခွံပါးကာ အရောင်အသွေးလှပခြင်း၊ လုံးဝိုင်းသည့် သဏ္ဍာန်ရှိခြင်းတို့ကြောင့် ပထမတန်းစားကြက်သွန်နီဖြစ်ပြီး ဈေးကွက်တွင် မျက်နှာပန်းလှပသည့် သီးနှံဖြစ်သည့်အတွက် မြင်းခြံဒေသအတွင်းရှိ တောင်သူများသည် ဆောင်းကြက်သွန်နီကို စီးပွားဖြစ်စိုက်ပျိုးလုပ်ကိုင်လျက်ရှိကြောင်း သိရှိရသည်။

DOCA(မန္တလေး)