သတင်းနှင့် လှုပ်ရှားမှုများ

      (၅.၁.၂၀၂၆)ရက်နေ့ နံနက်ပိုင်း(၁၀:၀၀)နာရီ အချိန်က ဧရာဝတီတိုင်းဒေသကြီး မြို့နယ်စားသုံးသူရေးရာဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ကျန်းမာရေး ဦးစီးဌာနတို့ပူးပေါင်း၍ ဓနုဖြူမြို့နယ်၊ ကျန်းမာရေးသုံးဆေး ဆိုင်(၁၀)ဆိုင်မှ ဆေးဝါး ရောင်းချခွင့် လိုင်စင်မရှိဘဲ ရောင်းချနေခြင်းရှိ/မရှိ စစ်ဆေးခြင်းနှင့် ဆေးဆိုင်များအား လစဉ်ပုံမှန် ဆေးဝါးကုန် ပြတ်လပ်မှု ရှိ မရှိနှင့် ကုန်ဈေးနှုန်း တည်ငြိမ်ရေး ကွင်းဆင်းစစ်ဆေးခြင်း များဆောင် ရွက်ခဲ့ပါသည်။

     ကွင်းဆင်းစစ်ဆေးရာတွင် ဓနုဖြူမြို့နယ်ဦးစီးမှူး ဦးဝင်းမင်းစိုးက အများပြည်သူများအား လုံခြုံစိတ်ချရသော ဆေးဝါးများရရှိနိုင်ရန် သက်တမ်းလွန်ဆေးဝါးများ၊ မြန်မာနိုင်ငံဆေး ဝါးမှတ်ပုံတင် မရှိသော ဆေးဝါးများ မရောင်းချစေရန်နှင့် ကောင်းမွန်သောဆေးဝါး ထားသိုမှုနှင့်  ကောင်းမွန်သော ဆေးဝါးရောင်းချမှုကျင့်စဉ်(GPP)နှင့်အညီ ရောင်းချစေရန် ၊ ဆေးဝါးများကို ဈေးကစားရန်ရည်ရွယ်၍ သိုလှောင်ထားခြင်း ရှိ/မရှိ၊ ဆေးအရောင်းဆိုင်များ သတ်မှတ်စည်း မျဉ်စည်းကမ်းချက်များနှင့် ညီ/မညီ ၊သတ်မှတ်ချက်များအတိုင်း ရောင်းချခြင်း ရှိ/မရှိ ၊ ဆေးဝါးဈေးနှုန်း အခြေအနေများကို မေးမြန်းခြင်း ၊ ဆေးဈေးနှုန်းများတည်ငြိမ်လျက်ရှိပြီး ဆေးအရောင်း ဆိုင်များက သတ်မှတ်ချက်များကို လိုက်နာမှု မရှိပဲ ရောင်းချခြင်းကို စစ်ဆေးတွေ့ရှိပါက သက်ဆိုင်ရာဌာနတို့ ဥပဒေများ၊ အရေးကြီး ကုန်စည်ဝန်ဆောင်မှု ဥပဒေအရ အရေးယူဆောင်ရွက်နိုင်မည်ဖြစ်ကြောင်း ဆိုင်ရှင်များအား အသိပေးပြောကြားခဲ့ကြောင်း သိရသည်။

DOCA (ဧရာဝတီ)

         စားသုံးသူကာကွယ်ရေးဥပဒေပုဒ်မ ၁၊ ပုဒ်မခွဲ(ခ) အရ၊ အခန်း(၁၈)ပါ ကုန်အညွှန်းအမှတ်အသားဆိုင်ရာ ပြဋ္ဌာန်းချက်များသည် ဥပဒေပြဋ္ဌာန်းပြီး တစ်နှစ်ပြည့်မြောက်ပြီးသည့် နေ့ရက်ဖြစ်သော ၂၀၂၀ ခုနှစ်၊ မတ်လ ၁၆ ရက်နေ့တွင် အာဏာတည်ပြီး ဖြစ်ပါသည်။ စားသုံးသူကာကွယ် ရေးဥပဒေ ပုဒ်မ ၄၃ အရ စီးပွားရေးလုပ်ငန်းရှင်သည် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေဖော်ပြရာ၌ သတ်မှတ်ချက်များနှင့်အညီ အခက်အခဲမရှိလိုက်နာဆောင်ရွက်နိုင်ရန် ကုန်စည်အမျိုးအစားအလိုက်အုပ်စု(၈)ခုခွဲ၍ အသေးစိတ်ညွှန်ကြားချက်များကို မြန်မာနိုင်ငံစားသုံးသူကာကွယ်ရေးကော်မရှင်မှ၂၀၁၉ ခုနှစ်၊ ဒီဇင်ဘာလ ၃ရက်နေ့တွင် ညွှန်ကြားချက်အမှတ် ၂/၂၀၁၉ ကို ထုတ်ပြန်ပေးခဲ့ပြီးလည်းဖြစ်ပါသည်။

      စားသုံးသူကာကွယ်ရေးဥပဒေပါ စားသုံးသူအခွင့်အရေးများ အပြည့်အဝရရှိစေရန်၊ စားသုံးသူများ ဘေးအန္တရာယ်ကင်းရှင်းရေး၊ ကျန်းမာရေး၊ စိတ်ကျေနပ်မှုရရှိစေရေးအတွက် အာမခံချက်ပေးနိုင်သော အရည်အသွေးမြင့်မားသည့် ကုန်စည် သို့မဟုတ် ဝန်ဆောင်မှုများကို ဖော်ဆောင် ဖြည့်ဆည်းပေးနိုင်စေရန်၊ စီးပွားရေးလုပ်ငန်းရှင်များအနေဖြင့် ဥပဒေနှင့်အညီ ဆောင်ရွက်စေရန်၊ စားသုံသူတို့ကို ဘေးအန္တရာယ်ကင်းရှင်းမှုမရှိသော ကုန်စည် သို့မဟုတ် ဝန်ဆောင်မှုများ သုံးစွဲခြင်းကြောင့် ဖြစ်ပေါ်လာသောနစ်နာဆုံးရှုံးမှုများ ကာကွယ်ပေးရန်၊ဘေးအန္တရာယ်ဖြစ်စေသော ကုန်စည် သို့မဟုတ် ဝန်ဆောင်မှုများနှင့် စပ်လျဉ်း၍ အမြန်ဆုံးအရေးယူဆောင်ရွက်မှုများ လုပ်ဆောင်ရန် ရည်ရွယ်၍ မန္တလေးတိုင်းဒေသကြီးအတွင်းတွင် ဘဏ္ဍာရေးနှစ်အလိုက် စားသုံးသူရေးရာကော်မတီ ဥက္ကဋ္ဌထံတင်ပြ၍ ခွင့်ပြုချက်ရယူပြီး ဦးစားပေးကုန်စည်များ သတ်မှတ်လျက် သက်ဆိုင်ရာဌာနများနှင့် ပူးပေါင်းကာ ဈေးကွက်ရောက်ပြီး ကုန်စည်များကို စောင့်ကြည့်စစ်ဆေးလျက်ရှိရာ ၂၀၂၅-၂၀၂၆ ဘဏ္ဍာရေးနှစ်၊ ဧပြီလတွင် အသင့်သောက်အချိုရည် အမျိုးမျိုး၊ မေလတွင် စားသုံးဆီအမျိုးမျိုး၊ ဇွန်လတွင် အသင့်စားခေါက်ဆွဲခြောက်ထုပ်မုန့်အမျိုးမျိုး၊ ဇူလိုင်လတွင် အရန်သင့်အစားအစာအမျိုးမျိုး၊ ဩဂုတ်လတွင် သောက်ရေသန့်အမျိုးမျိုး၊ စက်တင်ဘာလတွင် ဆရာဝန်ညွှန်ကြားချက်မလို အိမ်သုံးဆေးဝါးသောက်ဆေးမျိုးမျိုး၊ အောက်တိုဘာလတွင် တိုင်းရင်းဆေးအမျိုးမျိုး၊ နိုဝင်ဘာလတွင် ကလေးနှင့် လူကြီးဖြည့်စွက်စာအမျိုးမျိုး၊ ဒီဇင်ဘာလတွင် ကလေးတစ်ကိုယ်ရည် သန့်ရှင်းရေးသုံးပစ္စည်းအမျိုးမျိုး၊ ဇန်နဝါရီလတွင် သွားတိုက်ဆေးအမျိုးမျိုး၊ ဖေဖော်ဝါရီလတွင် အသင့်စားခေါက်ဆွဲခြောက်ထုပ်အမျိုးမျိုးနှင့် မတ်လတွင် အရန်သင့်အစားအစာအမျိုးမျိုးတို့အား သက်ဆိုင်ရာဌာနများမှ စားသုံးရန်မသင့်ထုတ်ပြန်ထားသော ကုန်ပစ္စည်းများအား ဥပဒေများနှင့် အညီဖြစ်စေရေး ဈေးကွက်စောင့်ကြည့် စစ်ဆေးလျက်ရှိကြောင်း သိရသည်။

          မန္တလေးတိုင်းဒေသကြီးအတွင်းရှိ လုပ်ငန်းများနှင့်ကုန်စည်အမျိုးအစားအားလုံး ရာခိုင်နှုန်းပြည့် ကုန်အညွှန်းအမှတ်အသားဖော်ပြနိုင်စေရန်အတွက် အစီအစဉ်အသစ်တစ်ရပ် တိုးမြှင့်ဆောင်ရွက်သည့်အနေဖြင့် ကုန်အညွှန်းအမှတ်အသား စစ်ဆေးဆောင်ရွက်မှုများနှင့် စပ်လျဉ်း၍ ယခင်က ဈေးကွက်ရောက်ပြီး ကုန်စည်များကို စစ်ဆေးဆောင်ရွက်သည့်စနစ် (Post Market Surveillance) ဖြင့် အဓိကထား စစ်ဆေးခဲ့ပြီး ယခုအခါ ပြည်တွင်း၌ ကုန်စည်ထုတ်လုပ်သည့် လုပ်ငန်းများ၊ ပြည်ပမှ ကုန်စည်တင်သွင်းဖြန့်ဖြူးသည့်လုပ်ငန်းများအား ဈေးကွက်မရောက်မီ စစ်ဆေးသည့်စနစ် (Pre-Market Surveillance) ဖြင့် စစ်ဆေးဆောင်ရွက်ခြင်းအား ကုန်စည်ထုတ်လုပ်သည့်လုပ်ငန်းများ၊ စက်ရုံများ၊ ကုမ္ပဏီများ၊ ပြည်ပမှ ကုန်စည်တင်သွင်းဖြန့်ဖြူးသည့် လုပ်ငန်းစာရင်းများပြုစု၍ လအလိုက် အကောင်အထည်ဖော်ဆောင်ရွက်မည့် လျာထားချက်များသတ်မှတ်ကာ လုပ်ငန်းစီမံချက်ရေးဆွဲ၍ စားသုံးသူရေးရာကော်မတီဥက္ကဋ္ဌထံ တင်ပြခွင့်ပြုချက်ရယူပြီး စစ်ဆေးဆောင်ရွက်ခြင်းများအား ၂၀၂၄ ခုနှစ်၊ ဖေဖော်ဝါရီလမှ စတင်၍ သက်ဆိုင်ရာ မိတ်ဖက်ဌာနများဖြစ်သည့် အထွေထွေအုပ်ချုပ်ရေးဦးစီးဌာန၊ စည်ပင်သာယာရေးကော်မတီနှင့် အစားအသောက်နှင့် ဆေးဝါးကွပ်ကဲရေးဦးစီးဌာနတို့နှင့် ပူးပေါင်း၍ ဆောင်ရွက်လျက်ရှိရာ၂၀၂၅ခုနှစ်၊ ဒီဇင်ဘာလ၂၂ရက်နေ့၊ နံနက် (၁၁:၀၀) နာရီအချိန်တွင် မန္တလေးမြို့ပေါ်ရှိ ချမ်းမြသာစည်မြို့နယ်တွင် စားသောက်ကုန်အမျိုးမျိုး ထုတ်လုပ်သည့် "ဦးကာက"စားသောက်ကုန်လုပ်ငန်းသို့ဈေးကွက်မရောက်မီ စစ်ဆေးခြင်း (Pre Market Survillance) ဆောင်ရွက်ခဲ့ကြောင်းနှင့် ဆက်လက်၍လည်း စဉ်ဆက်မပြတ် ဆောင်ရွက်သွားမည်ဖြစ်ကြောင်း သတင်းရရှိပါသည်။

DOCA(မန္တလေး)

               ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံ ဦးမိုးမင်းသန်းနှင့် ဝန်ထမ်းတို့သည် ၂၀၂၅ ခုနှစ်၊ ဒီဇင်ဘာလ (၂၄) ရက်နေ့၊ နံနက် (၁၁:၀၀) နာရီအချိန်တွင် အမှတ်(၃) ရပ်ကွက်ရှိ ပြည်သူ (၁၂) ဦးအား ကျိုက်လတ်မြို့နယ စားသုံးသူရေးရာဦးစီး ဌာန မြို့နယ်တာဝန်ခံရုံးတွင် Online Sale နှင့်ပက်သက်၍ အသိပညာပေး ဟောပြောခဲ့ပါသည်။

                        မြို့နယ်တာဝန်ခံ ဦးမိုးမင်းသန်းက လူထုဆက်သွယ်ရေး နည်းလမ်းများ ဖြစ်သော Facebook page ၊ Tik Tok  အစရှိသော သတင်းမီဒီယာများတွင် Online စနစ်ဖြင့် ရောင်းချလျက်ရှိသော ကုန်ပစ္စည်းများနှင့် ပက်သက်၍ Online မှတ်ပုံတင်ရမည်ဖြစ်ကြောင်း၊ Online ပေါ်တွင် လိမ်လည်မှုများ ဖြစ်ပေါ်နေ၍ စားသုံးသူပြည်သူများ နစ်နာဆုံးရှုံးမှု မဖြစ်ပေါ်စေရေးအတွက် Online မှတ်ပုံတင်ခြင်း၊  မိမိတို့၏ ကုန်ပစ္စည်းနှင့် မိမိလုပ်ငန်းများအား တာဝန်ယူ၊ တာဝန်ခံခြင်းဖြင့် လုပ်ငန်းရှင်ဘက်မှ လိုက်နာဆောင်ရွက်ကြရန် Online မှတ်ပုံတင်ခြင်းဆိုင်ရာ အချက်အလက် များကို အကျယ်တဝင့် ရှင်းပြခြင်း၊ Online မှတ်ပုံတင်ရာတွင် website မှဝင်ရောက်၍ လျှောက်လွှာရေးသွင်း မှတ်ပုံတင်နည်း အဆင့်တို့အား ရှင်းလင်းပြောကြားခဲ့ပြီး စားသုံးသူများ နစ်နာဆုံးရှုံးမှု ဖြစ်ပေါ်လာပါက Call Centre 1535 သို့ ဆက်သွယ်တိုင်ကြားနိုင်ကြောင်း အသိပညာပေးဟောပြောခဲ့ပါသည်။

                                      ထို့အပြင် စားသုံးသူများသာမက ကုန်စည်နှင့် ဝန်ဆောင်မှု ထုတ်လုပ်ဖြန့်ဖြူး ရောင်းချ နေသော လုပ်ငန်းရှင်များပါ စားသုံးသူကာကွယ်ရေး ကိစ္စရပ်များနှင့် ပက်သက်၍ သိရှိလိုသည် များကို မည်သူမဆို မေးမြန်းနိုင်ပါကြောင်း၊ စားသုံးသူနစ်နာဆုံးရှုံးမှု တစ်ရပ်ရပ်ကို တိုင်ကြားလိုပါကလူကိုယ်တိုင်သော်လည်းကောင်း၊လူထုဆက်သွယ်ရေးနည်းလမ်းတစ်ခုခုဖြင့်သော်လည်းကောင်း၊သက်ဆိုင်ရာဦးစီးမှူးရုံးသို့သက်သေခံအ ထောက်အထား နှင့်အတူ တိုင်ကြားနိုင်ပါကြောင်း အသိပညာပေးဟော ပြောခဲ့မှုအပေါ် သတင်းရရှိပါသည်။

(Doca ဧရာဝတီ)

            စားသုံးသူရေးရာဦးစီးဌာန၊ကြံခင်းမြို့နယ်တာဝန်ခံသည်(၂၄.၁၂.၂၀၂၅)ရက် နေ့လည်(၁၂:၀၀) အချိန်တွင် ကြံခင်းမြို့နယ်ထွေအုပ်ရုံး ဧရာဦးခန်းမ၌ ဆန်စက်လုပ်ငန်းရှင်(၂၀)ဦး အား My Ro တွင် ဆန်စပါးသိုလှောင်ရုံမှတ်ပုံတင်ခြင်း နှင့်စပ်လျဉ်း၍ အသိပညာပေးဟောပြောခြင်းကို ဆောင်ရွက်ခဲ့ပါ သည်။

          ထိုသို့ဆောင်ရွက်ရာတွင် မြို့နယ်တာဝန်ခံ ဦးကျော်နိုင်ဝင်းက မြန်မာနိုင်ငံဆန်စပါး အသင်းချုပ် နှင့် စားသုံးသူရေးရာဦးစီးဌာနတို့ ပူးပေါင်းအကောင်အထည်ဖော် ဆောင်ရွက်လျက်ရှိသည့် မြန်မာ ဆန်စပါး အွန်လိုင်း(MyRo)တွင် ၂၀၂၃ ခုနှစ် နိုဝင်ဘာလ(၃၀)ရက်နေ့မှ စတင်၍ ဆန်တန်ချိန် ၂၅ နှင့်အထက် သိုလှောင်ရုံ သို့မဟုတ် စပါးတင်း ၂၅၀၀ နှင့်အထက် သိုလှောင်မှုများအား မှတ်ပုံတင် လုပ်ငန်းများ ဆောင်ရွက်လျက်ရှိကြောင်း၊ ဆန်စပါးသိုလှောင်ရုံမှတ်ပုံတင်ခြင်း နှင့်စပ်လျဉ်း၍ ပြည်တွင်း ၌ ဆန်စပါး ဖူလုံရေး၊ ပြည်ပသို့စနစ်တကျတင်ပို့နိုင်ရေး၊ ဆန်စပါးဈေးနှုန်း ဈေးကွက်နှင့် ဈေးနှုန်း တည်ငြိမ်မှန်ကန်‌ ရေး၊ ဆန်စပါးသိုလှောင်ရုံတည်ရှိမှုအခြေအနေများကို စနစ်တကျစာရင်း ပြုစု မှတ်တမ်းတင်နိုင်ရေး၊ သိုလှောင်ရုံကုန်အမှတ်လက်ခံရေးတို့ကို အခြေပြုသည့် ငွေကြေးထောက်ပံ့မှု စနစ်ကို ဖော်ဆောင်နိုင်ရေးတို့အတွက် ပြည်တွင်း၌ လုပ်ကိုင်ဆောင်ရွက်လျက်ရှိသည့် ဆန်စပါး သိုလှောင်ရုံ မှတ်ပုံတင်လုပ်ငန်းစဉ်များအား အသေးစိတ် အသိပညာပေး ရှင်းလင်း ဆွေးနွေးခဲ့ပြီး၊ မှတ်ပုံ တင်ထားပြီးသည့်   ဆန်စပါး သိုလှောင်ရုံလုပ်ငန်းရှင်များအနေဖြင့်  ကုန်ရ၊ ကုန်ထုတ်၊ ကုန်လက်ကျန် စာရင်းများအား လစဉ် လ ဆန်း ၁ရက်နေ့ မှ  ၇ ရက်နေ့ အတွင်း Update ဖြည့်သွင်းနိုင်ရေး စသည်တို့ ကို အသိပညာပေး ဟောပြောခဲ့ကြောင်း သိရှိရပါသည်။

(DOCA ဧရာဝတီ)

                    ဖျာပုံခရိုင်၊ ဘိုကလေးမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းတို့သည် ၂၀၂၅ ခုနှစ်၊ ဒီဇင်ဘာလ (၂၂) ရက်နေ့၊ နံနက် (၁၀:၀၀ နာရီ အချိန်တွင် (၁၅)လမ်း၊ (၉) ရပ်ကွက်ရှိ ဦးဟန်မင်းဦး ပိုင်ဆိုင်သော “ဇာမဏီ” ဖယောင်းတိုင်လုပ်ငန်းသို့ ကွင်းဆင်းစိစစ်ခဲ့ပါသည်။

             လူသုံးကုန်ဖြစ်သော “ဇာမဏီ” ဖယောင်းတိုင် လုပ်ငန်းမှ ကုန်ကြမ်းအနေဖြင့် ဖယောင်းခဲနှင့် ကြိုးတို့ပါဝင်ပြီး တစ်နေ့ထုတ်လုပ်မှု အနေဖြင့် ဖယောင်းတိုင် အကြီး/အသေး အထုပ်(၂၀၀) ခန့် ယခုလတွင် ထုတ်လုပ်လျက်ရှိပြီး ဈေးနှုန်းအနေဖြင့် ဖယောင်းတိုင် အတို(ရှယ်) ဈေးနှုန်း (၃၀၀၀) ကျပ်၊ (၁၅) တိုင်ပါ အသေးတစ်ထုပ်လျှင် (၂၀၀၀) ကျပ်၊ (၃၂) တိုင်ပါ (ရှယ်) တစ်ထုပ်လျှင် (၁၉၀၀) ကျပ်၊ (၃၂) တိုင်ပါ အနီကြီး တစ်ထုပ်လျှင် (၁၇၀၀) ကျပ်ဖြင့် အမျိုးအစားအစုံကို လက်လီ/လက်ကား ရောင်းချပေးလျက်ရှိသည်။ လုပ်သားအနေဖြင့် (၃) ဦးထားရှိပြီး နေ့စားခ(၆၀၀၀/၇၀၀၀) ကျပ်နှုန်းဖြင့် ပေးချေရသည်။ ဈေးကွက် အနေဖြင့် ဒေသအတွင်း၌သာ ဖြန့်ဖြူးရောင်းချလျက်ရှိပါသည်။

               ထို့နောက် မြို့နယ်တာဝန်ခံမှ ထုတ်လုပ်သော ကုန်စည်နှင့် ပက်သက်၍ ထုတ်ကုန် လုံခြုံစိတ်ချရမှု ရှိစေရေးအတွက် အရည်အသွေး ပြည့်မီသည့် ကုန်စည်များကိုသာ ရောင်းချရန် ပြောကြားခဲ့ကြောင်း သတင်းရရှိပါသည်။

(Doca ဧရာဝတီ)