ဟုမ္မလင်းမြို့ပေါ်ရှိ ပန်းရိုးမစားသောက်ဆိုင်အား မိတ်ဖက်ဌာနများနှင့် ပူးပေါင်း၍ ကွင်းဆင်းစစ်ဆေးခြင်း
(၂၄.၆.၂၀၂၆) ရက်နေ့တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကလေးခရိုင် ဦးစီးမှူးရုံးနယ်မြေအတွင်းရှိ ဟုမ္မလင်းမြို့နယ်တွင် မြို့နယ်တာဝန်ခံ ဒေါ်ခင်စန်းဝင်းမှ ဦးဆောင်၍ မိတ်ဖက်ဌာနများဖြစ်သည့် မြို့နယ်အထွေထွေအုပ်ချုပ်ရေးဦးစီးဌာန၊ ကျန်းမာရေးဦးစီးဌာန၊ စည်ပင်သာယာရေးကော်မတီနှင့် မြန်မာနိုင်ငံရဲတပ်ဖွဲ့တို့ ပူးပေါင်း၍ ဟုမ္မလင်းမြို့ပေါ်ရှိ စားသောက်ဆိုင်များသို့ သွားရောက်၍ ဝန်ဆောင်မှုကဏ္ဍနှင့် စပ်လျဉ်း၍ ကွင်းဆင်းစစ်ဆေး ဆောင်ရွက်ခဲ့ကြောင်း သိရသည်။
ကွင်းဆင်းစစ်ဆေးရာတွင် စားသောက်ဆိုင်ဖွင့်လှစ်ရောင်းချသည့် လုပ်ငန်းရှင်များအား မိမိတို့ရောင်းချသော စားသောက်ဆိုင်များတွင် အစားအသောက် ပြုပြင်ရောင်းချသည့်နေရာများ သန့်ရှင်းမှုရှိစေရန်၊ အစားအသောက် ကိုင်တွယ်ချက်ပြုတ်သူများ၊ မိမိတို့ဆိုင်ဝန်ထမ်းများ၏ တစ်ကိုယ်ရေသန့်ရှင်းမှုများရှိစေရန်၊ စားသောက်ဆိုင်အနေဖြင့် ဆိုင်တွင်ထားရှိသည့် Menu များတွင် ဖော်ပြထားသည့် ဈေးနှုန်းနှင့် ရောင်းချသည့် ဈေးနှုန်းများ ကိုက်ညီစွာ ဖော်ပြထားရှိရမည်ဖြစ်ပြီး ကုန်ကြမ်းပစ္စည်းများ စနစ်တကျ သိမ်းဆည်းထားသိုခြင်း၊ ချက်ပြုတ်ရာတွင် အသုံးပြုသည့် ဒယ်အိုး၊ ဒန်အိုးများကိုလည်း သန့်ရှင်းသပ်ရပ်စွာ ဆေးကြောသိမ်းဆည်းထားခြင်း၊ ပန်းကန်များကိုလည်း သန့်ရှင်းသပ်ရပ်စွာ ဆေးကြော၍ သန့်ရှင်းသပ်ရပ်စွာ ထားရှိရမည်ဖြစ်ပြီး အစားအသောက် ဝန်ဆောင်မှုကဏ္ဍအနေဖြင့် လုပ်ငန်းရှင်များ သိသင့်၊ လိုက်နာသင့်သည့် အချက်များအား အသိပညာပေး ဆွေးနွေးခဲ့ကြောင်း သိရှိရပါသည်။
DOCA(စစ်ကိုင်း)
