HighLight News

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်ဦးစီးမှူး ဒေါ်ဌေးဌေးသည်  စားသုံးသူများဘေးကင်းလုံခြုံမှုရှိစေရေးအတွက် မိတ်ဖက်ဌာနမြို့နယ်စည်ပင်သာယာရေးအဖွဲ့၏ ဦးဆောင်မှုဖြင့် (၁၉.၁.၂၀၂၂) ရက်နေ့၊နံနက်(၁၀:၃၀)နာရီအချိန်တွင် တောင်တွင်းကြီးမြို့၊ ရွှေကြာပင်ရပ်ကွက်ရှိ မြို့မဈေးအတွင်း စားသောက်ကုန်ရောင်းချသည့် ဈေးဆိုင်(၇)ဆိုင်သို့ မကွေးတိုင်းဒေသကြီး၊ အစားအသောက်နှင့် ဆေးဝါးကွပ်ကဲရေးဦးစီးဌာန(FDA) နှင့် ပူးပေါင်း၍ ဈေးကွက်ကွင်းဆင်းစစ်ဆေးခဲ့ပါသည်။ FDA မှ ဈေးကွက်အတွင်း နမူနာကောက်ယူ၍ ဓါတ်ခွဲစစ်ဆေးချက်အရ စားသုံးရန်မသင့် စားသောက်ကုန်ပစ္စည်း(၃၅)မျိုးအား ဈေးဆိုင်များတွင် ရောင်းချခြင်းရှိ/မရှိကို ပူးပေါင်းဈေးကွက်စောင့်ကြည့်စစ်ဆေးခဲ့ခြင်းဖြစ်ပြီး၊ ထိုသို့စစ်ဆေးခဲ့ရာတွင် စားသုံးရန်မသင့်သည့် စားသောက်ကုန်အချို့ကို စစ်ဆေးတွေ့ရှိရ၍  ဈေးကွက်အတွင်းမှ အမြန်ဆုံးပပျောက်စေရေးအတွက် မြို့နယ်စည်ပင်သာယာရေးအဖွဲ့မှ သိမ်းဆည်း၍ ဖျက်ဆီးခဲ့ပါကြောင်း သိရှိရပါသည်။

         ထုတ်လုပ်ရောင်းချဖြန့်ဖြူးရောင်းဝယ်ဖောက်ကားသူ ဈေးဆိုင်ပိုင်ရှင်များကိုလည်း စားသုံးသူကာကွယ်ရေး ဥပဒေ(၂၀၁၉)တွင်ပါရှိသော စီးပွားရေးလုပ်ငန်းရှင်၏ တာဝန်များနှင့်အခန်း(၁၈)ပါ ကုန်အညွှန်းအမှတ်အသားဆိုင်ရာ ပြဌါန်းချက်များနှင့်ပုဒ်မ(၄၁)၊ ပုဒ်မခွဲ(ခ)နှင့်(ဆ)တို့ပါ ကုန်အညွှန်း အမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ရေးသားဖော်ပြထားသော ကုန်ပစ္စည်းများကိုသာ စားသုံးသူများ ဘေးကင်းလုံခြုံမှုရှိစေရေးအတွက် ရောင်းချဖြန့်ဖြူးရမည်ဖြစ်ကြောင်း အသေးစိတ် ရှင်းလင်းဆွေးနွေးခဲ့ပြီး ထပ်မံစစ်ဆေးတွေ့ရှိပါက ဥပဒေအရအရေးယူခံရမည်ဖြစ်ကြောင်း အသိပေးရှင်းလင်းမှုအပေါ် ရောင်းချဖြန့်ဖြူးသူတို့မှလည်း သိရှိနားလည်ပါကြောင်း၊ ဝန်ခံကတိပြုခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

          စားသုံးသူရေးရာဦးစီးဌာန၏ လုပ်ငန်းတစ်ရပ်ဖြစ်သော ပြည်တွင်းကုန်သွယ်မှုလုပ်ငန်းများ ဖွံ့ဖြိုးတိုးတက်ရေးဆောင်ရွက်လျက်ရှိရာတွင် စားသုံးသူရေးရာဦးစီးဌာန၊ ပုသိမ်ခရိုင်၊ ရေကြည်မြို့နယ်တာဝန်ခံသည် ရေကြည်မြို့နယ်၊ ငါးသိုင်းချောင်းမြို့ရှိ “အောင်” ကြိမ်၊ဝါး၊ဗေဒါ လုပ်ငန်းရှင် ဦးအောင်လွင်နှင့် တွေ့ဆုံ၍ ဈေးနှုန်းဈေးကွက်အခြေအနေများအား မေးမြန်းဆွေးနွေးခဲ့ရာတွင် ကြိမ်၊ဝါး၊ ဗေဒါ လက်မှုလုပ်ငန်းများမှ ဦးထုပ်၊ ဖိနပ်၊ ပိုက်ဆံအိတ်၊ လက်ကိုင်အိတ်၊ တစ်ရှုးဘောက် စသည့်တို့ကို အရွယ်အစားပုံစံ အမျိုးမျိုးအား နေ့စဉ်အလုပ်သမား(၁၅)ဦးခန့်ဖြင့် အိမ်တွင်းလက်မှုလုပ်ငန်းများ ဆောင်ရွက်လျက်ရှိကြောင်း၊ အလုပ်သမားများ လုပ်ဆောင်နိုင်သည့်အပေါ်မူတည်၍ တစ်နေ့လျှင် ၄၀၀ဝိ/- မှ ၇၀၀ဝိ/- အထိ ရရှိကြကြောင်းသိရှိပါသည်။

            ဗေဒါလက်မှုလုပ်ငန်းဆောင်ရွက်ရန် ကုန်ကြမ်းကို ရေကြည်မြို့နယ်၊ ငါးသိုင်းချောင်းမြို့အနီး ချောင်းများ၊ အင်းအတွင်း သဘာဝအလျောက် ပေါက်ရောက်နေသော ဗေဒါပင်များမှရ၍ ချောင်းဖျားပတ်ဝန်းကျင်ရှိရွာများမှ ၂ ပေ(တစ်ထောင့်ထွာ)ခန့်ရှည်သော ဗေဒါအခြောက် တစ်ပင်လျှင် (၅)ကျပ်နှုန်းဖြင့် အပင်(၁၀၀)ပါ တစ်စည်းလျှင် (၅၀၀)ကျပ်နှုန်းဖြင့် ဝယ်ယူလျက်ရှိ၍ ချောင်းဖျားဝန်းကျင်မှရွာသားများ အလုပ်အကိုင်အခွင့်အလမ်းရရှိလျက် ဝင်ငွေတိုးနေကြပါသည်။ ဝါးခမောက်များကို တက်ဆိပ်၊ သောင်ကြီး၊ ဒေါင့်ကြီး၊ သရက်ချောင်း စသည့်အုပ်စု(၂၀)မှ ဝါးခမောက် အကြမ်းယက်လုပ်လျှက်ရှိပြီး တစ်လုံးလျှင် ၁၀၀ဝိ/-မှ ၃၀၀ဝိ/-ထိဈေးရှိ၍ ဗေဒါလက်ကိုင်အိတ် အမျိုးမျိုးမှာ တစ်လုံးလျှင် ၆၀၀ဝိ/- မှ ၁၂၀၀ဝိ/- ၊ ဗေဒါဖိနပ် တစ်ရံလျှင် ၁၅၀ဝိ/-မှ ၆၀၀ဝိ/-ထိရှိပါသည်။ ၎င်းလက်မှုပစ္စည်းများအား ပဲခူး၊ ရန်ကုန်၊ ကျိုက်ထီးရိုး၊ မန္တလေး၊ ပုဂံ၊ ညောင်ဦးမြို့များသို့ ပို့ဆောင် ရောင်းချခဲ့ပြီး Online မှ အမှာ များကိုလည်း ရောင်းချလျက်ရှိ၍ဒေသတွင်းရှိ အလုပ်သမားများ အလုပ်အကိုင်ရရှိစေရေးနှင့် ပြည်တွင်းဈေးကွက်သာမက ပြည်ပဈေးကွက်များပါရရှိစေရန် မျှော်လင့်လျက်ရှိကြောင်း သိရှိရပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)

         မန္တလေးတိုင်းဒေသကြီး၊ မိတ္ထီလာခရိုင်၊ မိတ္ထီလာမြို့နယ်၊ နွားစားငုတ်ကျေးရွာနေ ပြည်သူများသည် လက်မှုလုပ်ငန်းဖြစ်သော တောင်း၊ဆန်ကော၊ဆန်ကာ ယက်လုပ်ခြင်း လုပ်ငန်းကို ယခင်က ကျေးရွာတစ်ရွာလုံး မိရိုးဖလာ လုပ်ကိုင်လာခဲ့ကြရာမှ ယခုအခါ အကျိုးအမြတ်နည်းပါးခြင်း၊ ဝယ်ယူအသုံးပြုမှုနည်းပါးခြင်း၊ အခြား လုပ်ငန်းဖြစ်သော ပန်းရံ၊ လက်သမား၊ ဆံပင်ကျွတ်လုပ်ငန်းများကို ပြောင်းလဲလုပ်ကိုင်လာကြခြင်းတို့ကြောင့် တောင်း၊ဆန်ကော၊ ဆန်ကာယက်လုပ်ခြင်းလုပ်ငန်းကို အဓိက လုပ်ကိုင်သူ နည်းပါးလာကြောင်း သိရှိရပါသည်။ သို့သော် အပိုဝင်ငွေ ရရှိသည့် လုပ်ငန်းတစ်ခုအဖြစ် လုပ်ကိုင်ဆောင်ရွက်ခြင်းများ ရှိကြောင်း သိရှိရပါသည်။

          တောင်း၊ဆန်ကော၊ဆန်ကာများ ယက်လုပ်ရန် ကုန်ကြမ်းပစ္စည်းအနေဖြင့် ဝါး၊ထမ်းလျှော်နှင့် ကြိမ်များ ကိုဝယ်ယူအသုံးပြုရပါသည်။ ဝါးများကို နီးစပ်ရာဝါးအရောင်းဆိုင်များတွင် ဝယ်ယူကြရပြီး ထမ်းလျှော်နှင့်ကြိမ် များကို နီးစပ်ရာ(၅) ရက်တစ်ပတ်စျေးများတွင် ဝယ်ယူကြပါသည်။ ဝါး(၁)လုံးလျှင် ၁၀၀၀ ကျပ်၊ ထမ်းလျှော် (၁) ပိဿာလျှင် (၃၀၀၀)ကျပ်၊ ကြိမ်(၁)လုံး (၅၀၀) ကျပ် စျေးရှိပါသည်။

          ယက်လုပ်သောပစ္စည်း အမျိုးအစားများမှာ ၁၆ ပြည့်ဝင် တောင်းကြီး(ကြမ်း/ချော)၊၈ပြည်ဝင် ခွဲတောင်း (ချော)၊ ဆန်ကော(ကြမ်း)၊ ဆန်ကာ(ကြမ်း)၊ ပွဲတင်တောင်း(ကြမ်း) ဟူ၍ ယက်လုပ်ကြပါသည်။ တောင်းကြီး (ကြမ်း) တစ်လုံး ယက်လုပ်လျှင် ကုန်ကျစရိတ်(၁၀၀၀)ကျပ် ခန့်ကုန်ကျပြီး ရောင်းရငွေ (၂၅၀၀)ကျပ်ရရှိသဖြင့် တစ်လုံးလျှင် လုပ်အားခငွေ (၁၅၀၀)ကျပ် ရရှိကြောင်း၊ တနေ့လျှင် ၂ လုံးခန့် ပြီးစီးအောင် ယက်လုပ်နိုင်၍ တနေ့ဝင်ငွေ (၃၀၀၀)ကျပ်ခန့်ရရှိကြောင်း၊ တောင်းကြီးချောတစ်လုံး ယက်လုပ်လျှင် ကုန်ကျစရိတ်(၁၈၀၀) ခန့် ကုန်ကျပြီး ရောင်းရငွေ(၃၅၀၀) ကျပ်ရရှိ၍ တစ်လုံးလျှင် (၁၇၀၀) ကျပ်ရရှိကြောင်း၊တနေ့လျှင် ၂ လုံးပြီးစီး အောင် ယက်လုပ်နိုင်၍ တနေ့ဝင်ငွေ (၃၄၀၀) ကျပ်ခန့်ရရှိ တောင်း၊ဆန်ကော၊ဆန်ကာများသည်လည်း တနေ့ (၅)ချပ် ပြီးစီးအောင်ယက်လုပ်ရောင်းချ နိုင်သော်လည်း တစ်ရက်လုပ်အားခ (၃၀၀၀) ကျပ်ခန့် ရရှိကြောင်း သိရှိရပါသည်။

          စျေးကွက်အနေဖြင့် ထွက်ရှိလာသော တောင်း၊ဆန်ကော၊ဆန်ကာများကို မိတ္ထီလာမြို့ စည်အင်သာယာ စျေးသို့လည်ကောင်း၊ (၅) ရက် တစ်ပတ်စျေးများတွင်လည်းကောင်း၊ တောင်သူလုပ်ငန်း အသုံးပြုရန်အတွက် ရွာသို့လာရောက်ဝယ်သူများထံသို့လည်ကောင်း ရောင်းချရကြောင်းသိရှိရပါသည်။

          တောင်း၊ ဆန်ကော၊ ဆန်ကာ ယက်လုပ်ခြင်းလုပ်ငန်းအနေဖြင့် အကျိုးအမြတ် ရရှိလာမှုနည်းသည်ဟု ယူဆဖွယ် ရှိသော်လည်း ဒေသခံများအနေဖြင့် အပိုဝင်ငွေ ရရှိရေးအတွက် ၎င်းတို့၏ မိရိုဖလာလုပ်ငန်းကို ဆက်လက်လုပ်ကိုင်လျက်ရှိကြောင်း သိရှိရပါသည်။

စားသုံးသူရေးရာဦးစီးဌာန(မန္တလေးတိုင်းဒေသကြီး)

          ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ် ကျေးလက်ဒေသများတွင် နွေစပါး စိုက်ပျိုးရန် တောင်သူဦးကြီးများ ကြိုတင်ပြင်ဆင်မှုများ လုပ်ဆောင်လာကြပါသည်။ ၂၀၂၁ ခုနှစ်၊ မိုးစပါးကာလ မေလမှ အောက်တိုဘာလကုန်အထိ ၆ လတာ ကာလအတွင်း ရွာသွန်းသောမိုးရေချိန် မှာ ၇၂.၃၅ လက်မရှိကြောင်း တောင်ငူခရိုင်  မိုးလေဝသနှင့် ဇလဗေဒ ညွှန်ကြားမှုဦးစီးဌာန၏ မှတ်တမ်းအရ သိရပါသည်။ မြန်မာနိုင်ငံသည် ရေမြေသဘာဝနှင့် ပတ်ဝန်းကျင်၏ အလေးသာမှု ကြောင့် စိုက်ပျိုးရေးလုပ်ငန်းလုပ်ကိုင်သည့် တောင်သူဦးကြီးများကို ကောင်းကျိုးပြုလျက်ရှိပါသည်။

          တောင်ငူမြို့နယ်အတွင်း ပသိဆည်၊ ကမ်းနီဆည်၊ ကရင်ချောင်းဆည်၊ ခပေါင်းဆည်၊ ချောင်းပိတ်တမံပိတ်၊ အင်းအိုင်များ၊ စစ်တောင်းမြစ်ကိုအမှီပြု၍ မြစ်ရေတင်စီမံကိန်းများဖြင့် နွေစပါး များ စိုက်ပျိုးကြပါသည်။ ဆည်များအားလုံးတွင် နွေစပါးစိုက်ပျိုးရန် ရေလုံလောက်စွာ ရရှိပါသည်။ ဆည်များတွင် မိုးရေစုဆောင်းထားမှု လုံလောက်စွာရှိသောကြောင့် ခပေါင်းဆည်ရေ သောက် ၁၁၂၅၀ ဧက၊ ပသိဆည်ရေသောက် ၁၁၆၈ ဧက၊ ကမ်းနီဆည်ရေသောက် ၁၂၂၀ ဧက၊ ကရင် ချောင်းဆည်ရေသောက ၆၁၆ ဧက၊ ချောင်းပိတ်တမံပိတ်ရေသောက် ၆၂၅ ဧက၊ အင်းအိုင် ၁၂၉၉ ဧက၊ သဖန်းပင်လျှပ်စစ်မြစ်ရေတင်စီမံကိန်းမှ အနောက်ရွာတန်းရှည်ကျေးရွာအုပ်စု ၂၁၇ ဧကနှင့် သဖန်းပင်ကျေးရွာအုပ်စုမှ ၁၉၀ ဧကဖြင့် တောင်ငူမြို့နယ်အတွင်း စုစုပေါင်းနွေစပါး ၁၆၆၆၅ ဧက စိုက်ပျိုးမည်ဖြစ်ကြောင်း သိရပါသည်။

          နွေစပါးကို ရက် ၉၀၊ ရတနာတိုး၊ နယူးဧရာ၊ ထိုင်းနှံကောက်စသည့် စပါးမျိုးများကို စိုက်ပျိုးကြပါသည်။ ထိုင်းနှံကောက်စပါးသည် ရာသီဥတုဒဏ်ခံနိုင်ခြင်း၊ ရာသီနှင့်ကိုက်ညီခြင်း၊ ဈေးကွက်ဝယ်လိုအား ရှိခြင်းတို့ကြောင့် အများဆုံးစိုက်ပျိုးကြောင်းသိရှိရပါသည်။ စိုက်ပျိုးရေးဦးစီးဌာနမှလည်း စပါး မျိုးသန့်များ ရောင်းချပေးလျက်ရှိပြီး ဆန်သည် မြန်မာပြည်သူတို့၏ အဓိက စားသုံးကုန်ဖြစ်ခြင်း၊ ပြည်ပနိုင်ငံများသို့ တင်ပို့ရောင်းချသည့် အဓိက ပို့ကုန်သီးနှံဖြစ်ခြင်းနှင့် မဟာဗျူဟာကျသော သီးနှံတစ်မျိုးဖြစ်ခြင်းကြောင့် တောင်သူဦးကြီးများ အားထား စိုက်ပျိုး ဆောင်ရွက်လျက်ရှိကြောင်း သိရပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်၍ ရေစကြိုမြို့နယ်တာဝန်ခံ ဦးမြတ်မင်းနှင့်အဖွဲ့သည် (၁၃.၁.၂၀၂၂) ရက်နေ့၊ နေ့လည်(၃:၀၀)နာရီအချိန်တွင် ကျေးရွာတစ်ရွာ၊ ထုတ်ကုန်တစ်မျိုး ထုတ်လုပ်မှုနှင့် ပြည်တွင်းကဏ္ဍ မြှင့်တင်နိုင်ရေးအတွက် ရေစကြိုမြို့၊ အမှတ် (၅) ရပ်ကွက်ရှိ “မနု ထန်းသီးမုန့်” ထုတ်လုပ်နေသည့် လုပ်ငန်းရှင်နှင့်တွေ့ဆုံပြီး ထန်းသီးမုန့်ထုတ်လုပ်ရောင်းဝယ်မှုအခြေအနေနှင့် အကျိုးအမြတ်ရရှိနိုင် မည့်အခြေအနေများကို မေးမြန်းဆွေးနွေးခဲ့ပါသည်။

          ကျေးရွာတစ်ရွာထုတ်ကုန်တစ်မျိုးနှင့်အညီ မကွေးဆိုလျှင် ပဲယို၊နှမ်းယို၊ ကျောက်ပန်းတောင်း ဆိုလျှင် အာလူးကြော်၊ ညောင်ဦးဆိုလျှင် ပုန်းရည်ကြီးဟူ၍ မြို့နှင့်ထွက်ကုန်များ ယှဉ်တွဲ၍ လူသိ များသလို ရေစကြိုဟုဆိုလျှင် ထန်းသီးမုန့်ကို ပြေးမြင်ရမည်ဖြစ်ပြီး ယခင်ကရန်ကုန်မြို့၊ အင်းလျားလိပ် ဟော်တယ်၌ ရေစကြိုထန်းသီးမုန့်ကို ရောင်းချခဲ့ရာ နိုင်ငံခြားသားများလွန်စွာကြိုက်နှစ်သက်ကြောင်း လုပ်ငန်းရှင်ကပြောကြားခဲ့ပါသည်။ ထန်းသီးမုန့်ပြုလုပ်မည်ဆိုလျှင် အဓိကအနေဖြင့် ဆန်၊ ထန်းလျှက် (သကာရည်)၊ ဆား၊ ကြက်ဥနှင့် အချဉ်ဖောက်စေရန် အုန်းမှုတ်ခွက်နှင့်အဓိကထန်းသီးမှည့်အနှစ် တို့လိုအပ်ကြောင်း သိရှိရပါသည်။

          ထန်းသီးမုန့် ပြုလုပ်ရာတွင် ဆန်အနေဖြင့် ပေါ်ဆန်းဆလတ်နှင့် မနောသုခကို သုံးချိုး တစ်ချိုးရော၍ ရေစင်အောင်ဆေးပြီး (၁)နာရီခန့်ရေစိမ်ရကြောင်း၊ ထိုသို့ရေစိမ်ပြီးနောက် ဆန်ကို ကြိတ်စက်ဖြင့် ကြိတ်၍ထွက်ရှိလာသည့် မုန့်နစ်ရည်အား ထန်းလျှက်(သကာရည်) အေးခဲထားသော ထန်းသီးမှည့်အနှစ်တို့နှင့်ရောမွှေရကြောင်း၊ သန့်ရှင်းစေရန်အတွက် ဇကာစစ်ခါ စဉ့်အင်တုံအတွင်းသို့ ထည့်၍ အုန်းမှုတ်ခွက်ဖြင့် နာနာမွှေခါ(၇)နာရီခန့်  အုန်းမှုတ်ခွက်ထည့်စိမ်၍ နှပ်ထားရပြီး ရေနွေး ပွက်ပွက်ဆူနေသော ပေါင်းဖို ပေါ်တင်၍ (၂၅) မိနစ်ခန့်ပေါင်းလျှင် ထန်းသီးမုန့်ရပြီ ဖြစ်ကြောင်း မုန့်ပေါ်မှကြက်ဥဖြန်းပေးရကြောင်း၊ ထန်းသီးမှည့်လှိုင်လှိုင်ပေါ်သည့် ဝါဆိုလမှသီတင်းကျွတ်၊ တန်ဆောင်မုန်းထိ လက်ဆတ်သည့်ထန်းသီးမှည့်အနှစ် များများထည့်နိုင်သော်လည်း ထန်းသီးမှည့် ရှားပါးသည့်ကာလများအတွက် အေးခဲထားသည့် ထန်းသီးမှည့်အနှစ် အနည်းငယ်သာထည့်နိုင် ကြောင်း၊ ထန်းသီးမှည့်ထည့်၍ပြုလုပ်သည့် မုန့်မှာပို၍အရသာကောင်းမွန်ပြီး ပို၍နူးညံ့ကြောင်း၊ အချို့လုပ်ငန်းရှင်များအနေဖြင့် နည်းပညာအခက်အခဲကြောင့် ထန်းသီးမှည့်အနှစ်အစား ပွဆေးများ သုံး၍ ထုတ်လုပ်လာကြသဖြင့် ထန်းသီးမုန့် အရည်အသွေးလည်းကျဆင်းလာသည့် အတွက် Qualityပိုင်းကို အထူးထိန်းသိမ်းရန်လိုအပ်ကြောင်း လုပ်ငန်းရှင်ဒေါ်နုမှ ရှင်းလင်းပြောကြားခဲ့ပါသည်။

          ထန်းသီးမုန့်(၁)ပေါင်းပြုလုပ်ရန် ဆန် (၅) ဗူး၊ ထန်းလျှက် (သကာရည်) (၅၀) ကျပ်သား၊ ဆား (၁) ကျပ်ခွဲသား၊ ကြက်ဥ (၁)လုံးနှင့် နို့ကျဲ (၁၀)ကျပ်သား ထည့်၍ (၂၅) မိနစ် ပေါင်းရကြောင်း၊ ကျက်လျှင် ကြက်ဥ (၁) လုံးအပေါ်မှဖြန်းပေးရကြောင်း၊ အုန်းသီးကို ခြစ်၍ ဆုံဆီသန့်နှင့်ကြော်ခါ မုန့်ပေါ်မှ အုန်းဆံကြော်၊ ဆီ၊ သကြားနှင့် ဖရုံယို ဖြူးပေးကြောင်း၊ တန်ဖိုးအားဖြင့် (၉၀၀၀/-) ကျပ် ခန့်ကုန်ကျကြောင်း၊ မုန့်(၁)ပေါင်းလျှင် (၂)ပိဿာခွဲခန့်ထွက်ရှိကြောင်း၊ ထန်းသီးမုန့်(၁) ပိဿာကို (၅၀၀၀/-)ကျပ်ရောင်းရပါကြောင်း၊ (၁) ပေါင်းလျှင် (၁၂၅၀၀/-) ကျပ် ရရှိပြီး ဖောက်သည်အနေဖြင့် (၁)ပေါင်းလျှင် (၁၀၀၀၀/-)ပေးရကြောင်း၊  အကျိုးအမြတ် အနေဖြင့် ကိုယ်တိုင်ရောင်းလျှင် (၃၅၀၀/-)ကျပ်ရရှိပြီး ဖောက်သည်ယူရောင်းသူများအနေဖြင့် (၂၅၀၀/-) ကျပ်မြတ်ကြောင်း၊ နေ့စဉ် မုန့်(၁၅ မှ ၂၀)ပေါင်းခန့် ပြုလုပ်ရောင်းချလျက်ရှိကြောင်းနှင့် မွေးနေ့ကိတ်ကဲ့သို့ မွေးနေ့ထန်းသီး မုန့်များလည်း ပုံစံအမျိုးမျိုးဖြင့် အော်ဒါပြုလုပ်ပေးနေရကြောင်း  လုပ်ငန်းရှင်၏ပြောကြားမှုအား သိရှိခဲ့ရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)