ပြည်ပကုန်သွယ်မှုသတင်းများ

     နည်းပညာနှင့်တစ်ပိုင်းလျှပ်ကူးပစ္စည်းများကို ဦးစားပေးပြသသည့် အပြည်ပြည်ဆိုင်ရာ ကုန် စည်ပြပွဲ တစ်ခုကို အိန္ဒိယနိုင်ငံ  နယူးဒေလီမြို့၌ ကျင်းပခဲ့သည်။နိုင်ငံခြားရင်းနှီးမြှုပ်နှံမှုကို ဆွဲ ဆောင်ရန် အိန္ဒိယအစိုးရနှင့် စက်မှုအဖွဲ့အစည်းတို့က အဆိုပါကုန်စည်ပြပွဲကို ဦးဆောင် ကျင်းပ ခဲ့ခြင်းဖြစ်သည်။

    အမေရိကန်အပါအဝင် ဥရောပ၊  အာရှနိုင်ငံနှင့် ဒေသများမှ ကုမ္ပဏီပေါင်း ၃၅၀ ကျော်ပါဝင် ပြသခဲ့သည်။ တစ်ပိုင်းလျှပ်ကူးပစ္စည်း  ပြုပြင်ထုတ်လုပ်သည့် စက်ယန္တရားများကို  ထုတ်လုပ်သော ဂျပန်ကုမ္ပဏီတစ်ခုဖြစ်သည့်  ဟာမာအီကုမ္ပဏီသည် အဆိုပါပြပွဲ၌ ဝင်ရောက်ပြသခဲ့ပြီး တစ်ပိုင်း လျှပ်ကူး ပစ္စည်းများပေါ်တွင် နာနိုအဆင့် အလွန်သေးငယ်သောချစ်ပ်ပြားများ  အသုံးပြုနိုင်သည့် နောက်ဆုံးပေါ်နည်းပညာကို မိတ်ဆက်ပြသခဲ့သည်။

     အိန္ဒိယနိုင်ငံသည် လူဦးရေထူထပ်များပြားသောကြောင့်  ၎င်း၏ တစ်ပိုင်းလျှပ်ကူးပစ္စည်း ဈေး ကွက်သည်လည်း    အလားအလာ အလွန်ကောင်းနိုင်ကြောင်း၊ ထို့အပြင် အိန္ဒိယနိုင်ငံသည် အလွန် အရေးပါသည့် ရင်းနှီးမြှုပ်နှံမှုပြုလုပ်ရာ နိုင်ငံတစ်နိုင်ငံဖြစ်လာနိုင်ကြောင်း ဟာမာအီကိုယ်စား လှယ် ဆမ်ပီအိယိုဆူကီက ပြောသည်။

    အိန္ဒိယအစိုးရသည် ၎င်း၏စီးပွားရေးဖွံ့ဖြိုး တိုးတက်မှုမဟာဗျူဟာ အစိတ်အပိုင်းတစ်ခု အနေဖြင့် တစ်ပိုင်းလျှပ်ကူးပစ္စည်းလုပ်ငန်းများကို မြေတောင်မြှောက်ပေးရန် အာရုံစိုက်လျက် ရှိသည်။ နိုင်ငံအတွင်း၌ ပထမဆုံးတစ်ပိုင်းလျှပ်ကူးပစ္စည်းများထုတ်လုပ်နိုင်ရန်  ဆောင်ရွက်လျက် ရှိပြီး ယခုနှစ်အကုန်တွင်  ပြည်တွင်းထုတ်လုပ်မှုစတင်နိုင်ရန် မျှော်မှန်းထားသည်။

   အိန္ဒိယနိုင်ငံ၏ တစ်ပိုင်းလျှပ်ကူးပစ္စည်းဈေးကွက်သည် ၂၀၃၀ ပြည့်နှစ်တွင် အမေရိကန် ဒေါ်လာ ဘီလီယံ ၁၀၀ တန်ဖိုးရှိလုပ်ငန်းကြီးအဖြစ် ကြီးထွားလာရန် မျှော်မှန်းထားသည်။ 

DOCA(ပြည်ထောင်စုနယ်မြေ)

     အင်ဒိုနီးရှားစက်မှုနှင့် ကုန်သည်များအသင်း (Kadin)သည် အိန္ဒိယနှင့် ကုန်သွယ်ရေး ပမာဏကို အမေရိကန်ဒေါ်လာ ၅၀ ဘီလီယံထိ တိုးမြှင့်ရန် ရည်ရွယ်ထားကြောင်း သိရပါသည်။ Kadin ဥက္ကဌဖြစ်သူ Anindya Bakrie သည် ထိုရည်မှန်းချက်အရှိန်မြှင့်တင်ရန် အိန္ဒိယသံအမတ် Sandeep Chakravorty နှင့် တွေ့ဆုံခဲ့ကြောင်းသိရပါသည်။ Bakrie က ရည်မှန်းချက်သည် အနာဂတ်တွင် အမေရိကန်ဒေါ်လာ ၅၀ ဘီလီယံရောက်ရှိရန်ဖြစ်ကြောင်း ပြောကြားခဲ့ပါသည်။ လတ်တလောတွင် နှစ်နိုင်ငံကြားကုန်သွယ်မှုတန်ဖိုးသည် အမေရိကန်‌ဒေါ်လာ ၃၀ ဘီလီယံ ပတ်လည်ရှိပြီး အင်ဒိုနီးရှားက အမေရိကန်ဒေါ်လာ ၂၃ ဘီလီယံတန်ဖိုးတင်ပို့ကာ အမေရိကန် ဒေါ်လာ ၇ ဘီလီယံတန်ဖိုးပြန်လည်တင်သွင်းကြောင်း သိရပါသည်။ သံအမတ်ကြီးက အားကောင်း သောသံတမန်ဆက်ဆံရေးမှ အလုပ်အကိုင်များဖန်တီးပေးကာ သက်သာချောင်ချိမှုမြင့်တက်စေ မည့် သေချာရေရာသောစီးပွားရေးဆောင်ရွက်မှုများသို့ အသွင်ကူးပြောင်းရမည်ဖြစ်ကြောင်း ပြောကြားခဲ့ပါသည်။ သံအမတ်ကြီးက ယနေ့အချိန်၏ ကမ္ဘာလုံးဆိုင်ရာပထဝီနိုင်ငံရေး မသေချာ မရေရာမှုများကြောင့် ပူးပေါင်းဆောင်ရွက်မှုအားကောင်းခြင်းသည် ယခင်ကထက်ပိုမိုအရေးကြီး ကြောင်း၊ အိန္ဒိယ၏လူဦးရေ ၁.၄ ဘီလီယံ၊ အင်ဒိုနီးရှား၏ သန်း၃၀၀ နီးပါးနှင့်အတူ အခြားနိုင်ငံ၏ ဈေးကွက်ကို အခြားတစ်ခုက ကျားကန်ခြေကုပ်ယူသင့်ကြောင်း ပြောကြားခဲ့ပါသည်။ ထိုကနဦး ဆောင်ရွက်မှုသည် စားအုန်းဆီ၊ ‌မော်တော်ကားအစိတ်အပိုင်းများနှင့် လျှပ်စစ်ပစ္စည်းတို့ပါဝင်သည့် အင်ဒိုနီးရှားထုတ်ကုန်များအတွက် တင်ပို့ရန်အလားအလာကို အမေရိကန်ဒေါ်လာ ၁၄၅ ဘီလီယံ ထိ တိုးမြှင့်မည့် Kadin ၏ ကျယ်ပြန့်သော ဗျူဟာ၏တစ်စိတ်တစ်ပိုင်းဖြစ်ကြောင်း သိရပါသည်။

Antara News

DOCA (ရန်ကုန်)

     အင်ဒိုနီးရှားအစိုးရသည် မွေးမြူရေးသမားများအားပံ့ပိုးပေးရန်နှင့် ကြက်ဥနှင့် ကြက်ဘဲ ဈေးနှုန်းများတည်ငြိမ်ရေးကူညီရန်အတွက် အစားအစာထောက်ပံ့မှုနှင့် ဈေးနှုန်းတည်ငြိမ်ရေး ပရို ဂရမ် (SPHP) အောက်တွင် ပြောင်းတန်ချိန် ၅၂၄၀၀ ကို ပံ့ပိုးရောင်းချပေးသွားမည်ဟု နိုင်ငံတော်အစား အစာအေဂျင်စီ၏ အကြီးအကဲဖြစ်သူ Arief Prasetyo Adi က စက်တင်ဘာလ ၁ ရက်နေ့က ပြောကြားခဲ့ပါသည်။ မွေးမြူရေးသမားများအတွက် အစာကိုသင့်တော်သောဈေးနှုန်း နှင့် ဝယ်ယူနိုင်ရန် ပြောင်းကို နိုင်ငံတော်ထောက်ပံ့ပို့ဆောင်ရေးအေဂျင်စီ (Bulog) က စီမံခန့်ခွဲသည့် အစိုးရအရန်ထားရှိမှုမှတစ်ဆင့် တစ်ကီလိုဂရမ်ကို ရူပီး ၅၅၀၀ နှင့် ရောင်းချသွား မည်ဟု သိရပါသည်။ နည်းပါးသောအစာဈေးနှုန်းက ယခုနှစ်ကုန်ထိ ထုတ်လုပ်မှုကုန်ကျစရိတ် နည်းပါးရန်နှင့် ဥဈေးနှုန်းများတည်ငြိမ်ရန်ကူညီပေးနိုင်မည်ဟု မျှော်မှန်းရကြောင်း Arief က ပြောကြားခဲ့ပါသည်။ Arief က ထိုကနဦးဆောင်ရွက်မှုသည် မွေးမြူရေးသမားများအား ဥများကို ကောင်းမွန်သောဈေးနှုန်းနှင့် ထုတ်လုပ်စေနိုင်ပြီး ထုတ်လုပ်သူများနှင့် စားသုံးသူများ နှစ်ဖက်စလုံး ကို ကူညီပေးနိုင်မည်ဟု ပြောကြားခဲ့ပါသည်။ စိုက်ပျိုးမွေးမြူရေးဝန်ကြီးဌာနအောက်ရှိ တိရိစ္ဆာန် မွေးမြူရေးနှင့် ကျန်းမာရေးဦးစီးဌာန၏ ညွှန်ကြားရေးမှူးချုပ် Agung Suganda က၎င်း၏ရုံးသည် ဖြန့်ဖြူးမှုများကို ကြီးကြပ်ရန်နှင့် မွေးမြူရေးသမားများအား အစာဈေးနှုန်းမတည်ငြိမ်မှုမှ ကာကွယ် ရန်အတွက် Food Task Force နှင့် အတူတကွလုပ်ကိုင်နေကြောင်း ပြောကြားခဲ့ပါသည်။ Agung ကလတွင် အဓိကထုတ်လုပ်သည့်ဧရိယာများ၌ ပြောင်းဈေးနှုန်းများမြင့်တက်မှုကြောင့် ကြက်ဘဲ မွေးမြူရေးသမားများအပေါ် ဖိအားများသက်ရောက်စေခဲ့ကြောင်း ပြောကြားခဲ့ပါသည်။ တုန့်ပြန်မှု အနေဖြင့် ဝန်ကြီးဌာနသည် သင့်လျော်သောဈေးနှုန်းနှင့် ရောင်းချနိုင်ရန်အတွက် Bapanas ၊ the Food Task Force နှင့် အခြားအေဂျင်စီများနှင့် ညှိနှိုင်းဆောင်ရွက်လျှက်ရှိကြောင်း သိရပါသည်။ Suganda က အစိုးရသည်တိရိစ္ဆာန်အစာဈေးနှုန်းများကို ထိန်းချုပ်ရန် များစွာသောအဆင့်များဖြင့် ဆောင်ရွက်လျှက်ရှိကြောင်း ပြောကြားခဲ့ပါသည်။ ၎င်းတို့တွင် တိရိစ္ဆာန်အစာလုပ်ငန်းနယ်ပယ် အား ဈေးနှုန်းမြှင့်တင်ခြင်းကိုရှောင်ရှားရန်တိုက်တွန်းခြင်း၊ မွေးမြူရေးသမားများအား စဉ်ဆက် မပြတ်ပြောင်းရရှိစေရန် ပံ့ပိုးပေးခြင်းနှင့် မွေးမြူရေးသမားများအား အစာရောင်းချသူများနှင့် ချိတ်ဆက်ပေးခြင်းတို့ပါဝင်ကြောင်း  သိရပါသည်။ အစားအစာဖူလုံမှုနှင့် ကြက်ဘဲမွေးမြူရေးကဏ္ဍ ငွေကြေးဖောင်းပွမှုဖြစ်လာနိုင်သောကြောင့် အစာအတွက်ပြောင်းရရှိရေးသည် အစိုးရ၏ ထိပ်တန်း စိုးရိမ်မှုတစ်ခုအဖြစ် ဆက်လက်တည်ရှိနေကြောင်း သိရပါသည်။

Antara News

DOCA (ရန်ကုန်)

       အင်ဒိုနီးရှားနိုင်ငံဘာလီစာရင်းအင်းရုံး (BPS) က နိုင်ငံခြားခရီးသွားလာ‌ရောက်လည်ပတ်မှု ဆက်လက်မြင့်တက်နေပြီး ၂၀၂၅ ခုနှစ် ဇူလိုင်လတွင် ၂၀၂၅ ခုနှစ်အတွက် အမြင့်ဆုံးလည်ပတ်မှု အရေအတွက် ရရှိခဲ့ကြောင်း စက်တင်ဘာလ ၁ ရက်နေ့က ထုတ်ပြန်ခဲ့ပါသည်။ ဇူလိုင်လတွင် စုစုပေါင်းနိုင်ငံတကာလည်ပတ်သူ ၆၉၇၁၀၇ ဦးရရှိခဲ့ပြီး ဇွန်လကထက် ၉.၂၉ ရာခိုင်နှုန်းမြင့်တက် ခဲ့ကြောင်း သိရပါသည်။ ဇွန်လတွင်လည်း စံချိန်တင်လည်ပတ်သူ ၆၀၂၂၁၃ ဦးရှိခဲ့ပြီး ကျွန်းသို့ နိုင်ငံတကာခရီးသွားလာရောက်လည်ပတ်မှု တည်ငြိမ်စွာ မြင့်တက်‌နေကြောင်း သိရပါသည်။ BPS ဘာလီ၏ အများပြည်သူဆက်ဆံရေးအသင်း၏အကြီးအကဲ Ari Kurnianto က ဇူလိုင်လတွင် ပင်လယ်မှ လာရောက်လည်ပတ်မှုကျဆင်းခဲ့သော်လည်း လေကြောင်းမှလာရောက်လည်ပတ်မှုမှာ ၉.၃၀ ရာခိုင်နှုန်းမြင့်တက်ခဲ့ကြောင်း သိရပါသည်။ BPS က ထိုသို့မြင့်တက်လာမှုသည် ဩစတေးလျ၏ ဆောင်းရာသီကျောင်းအားလပ်ရက်နှင့် ဥရောပတွင်အပူလှိုင်းသတိပေးချက် အစရှိသည့် များစွာသော ရာသီဥတုဆိုင်ရာ အကြောင်းအရာများက တစ်စိတ်တစ်ပိုင်းအနေဖြင့် ပါဝင်နေကြောင်း မှတ်ချက်ပြုခဲ့ပါသည်။ နိုင်ငံအားဖြင့်ဆိုပါက ဇူလိုင်လတွင် ဩစတေးလျခရီးသွား လာရောက်လည်ပတ်မှုက ၁၆၁၀၅၁ ဦးဖြင့် ဦးဆောင်ခဲ့ပြီး ၎င်း၏နောက်တွင် တရုတ်က ၅၉၆၅၁ ဦး၊ အိန္ဒိယက ၄၅၂၈၈ ဦး၊ ပြင်သစ်က ၃၈၄၆၀ ဦးနှင့်‌တောင်ကိုရီးယားက ၃၈၂၇၅ ဦးတို့ဖြင့် အသီး သီးရပ်တည်နေကြောင်း သိရပါသည်။ ထိုပမာဏထဲတွင် ပြင်သစ်ခရီးသွားလာရောက်လည်ပတ်မှု က ဇွန်လထက် ၆၀.၇၀ ရာခိုင်နှုန်းမြင့်တက်ခဲ့ကြောင်း သိရပါသည်။ ၂၀၂၅ ခုနှစ်၏ ဇန်နဝါရီလမှ ဇူလိုင်လထိဆိုပါက ဘာလီသို့နိုင်ငံခြားခရီးသွားလာရောက်လည်ပတ်မှုမှာ ၂၀၂၄ ခုနှစ်တူညီသည့် ကာလနှင့်နှိုင်းယှဉ်ပါက ၁၂.၄၆ ရာခိုင်နှုန်းမြင့်တက်ခဲ့ကြောင်း သိရပါသည်။

Antara News          

DOCA (ရန်ကုန်)

      ကမ္ဘောဒီးယားနိုင်ငံ၊ စိုက်ပျိုးရေး၊ သစ်တောနှင့် ရေလုပ်ငန်း (MAFF) ဝန်ကြီး Dith Tina နှင့် တရုတ်နိုင်ငံ အကောက်ခွန် အထွေထွေ အုပ်ချုပ်ရေးဝန်ကြီး Sun Meijun တို့ ၁-၉-၂၀၂၅ ရက်နေ့က တရုတ်ဈေးကွက်သို့ ကမ္ဘောဒီးယား လယ်ယာထွက်ကုန် တင်ပို့မှု မြှင့်တင်ရန် အစီအမံများကို ဆွေးနွေးခဲ့ကြသည်။ တရုတ်နိုင်ငံ၊ Beijing (ပေကျင်း) မြို့တွင် ကျင်းပပြုလုပ် ခဲ့သော အဆိုပါ အစည်းအဝေးသို့ ကမ္ဘောဒီးယားနိုင်ငံဆိုင်ရာ MAFF ၏ နိုင်ငံခြားရေး ၀န်ကြီး Prak David နှင့် MAFF နိုင်ငံတကာ ပူးပေါင်းဆောင်ရွက်ရေး ဦးစီးဌာန ညွှန်ကြားရေးမှူး Prum Somany နှင့်တရုတ်နိုင်ငံမှ တာဝန်ရှိသူများ တက်ရောက်ခဲ့ကြသည်။ အစည်းအဝေးတွင် ကမ္ဘောဒီးယား လယ်ယာထွက်ကုန်များအတွက် တရုတ်နိုင်ငံ၏ ကြီးမားသော သွင်းကုန်ဈေးကွက် ကို ဖွင့်လှစ်ရန်၊ နှစ်နိုင်ငံပူးပေါင်းဆောင်ရွက်မှုကို အရှိန်မြှင့်တင်ရန်နှင့် ပို့ကုန်မြှင့်တင်ရန်၊ လယ်ယာစီးပွားရေးတွင် ရင်းနှီးမြှုပ်နှံမှုကို ဆွဲဆောင်ရန်နှင့် ကုန်သွယ်မှုယှဉ်ပြိုင်နိုင်စွမ်းကို အားကောင်းစေမည့် လုပ်ငန်းစဉ်များကို အဓိကထား ဆွေးနွေးခဲ့ကြသည်။

Source: Khmer Times                                                                                  

DOCA (ရန်ကုန်)