ပြည်ပကုန်သွယ်မှုသတင်းများ

   ဗီယက်နမ်လျှပ်စစ်ကားထုတ်လုပ်သူဖြစ်သည့် VinFast ၏လုပ်ငန်းခွဲဖြစ်သည့် VinFast Auto India သည် အိန္ဒိယနိုင်ငံတွင် ၎င်းတို့၏ ပထမဆုံးအရောင်းပြခန်းကို ဂူဂျာရတ်ပြည်နယ် ဆူရတ်မြို့တွင် ဇူလိုင်လ ၂၇ ရက်နေ့က ဖွင့်လှစ်ခဲ့ပါသည်။ ထိုအရောင်းပြခန်းကို အိန္ဒိယနိုင်ငံ Tamil Nadu ပြည်နယ် Thoothukudi မြို့ရှိ ၎င်းတို့၏ အမေရိကန်ဒေါ်လာ ၂ ဘီလီယံတန်စက်ရုံ ဖွင့်ပွဲမတိုင်မီ ဖွင့်လှစ်ခဲ့ခြင်းဖြစ်ကြောင်း သိရပါသည်။ ဆူရတ်တွင်ဖွင့်လှစ်ခဲ့သည့် ထိုအရောင်း ပြခန်းသည်  အားကောင်းပြီး ဝယ်ယူသူဗဟိုပြုသည့် လျှပ်စစ်မော်တော်ကားဂေဟစနစ် တည်ထောင်ရန်  ကုမ္ပဏီ၏ ရေရှည်ကတိကဝတ်ရှိမှုကို အသားပေးပြသနေကြောင်း ကုမ္ပဏီက ပြောကြားခဲ့ပါသည်။ ထိုအရောင်းပြခန်းတွင် VinFast ၏ အကောင်းစားလျှပ် စစ်ကားမော်ဒယ်များ ဖြစ်သည့် VF 6 နှင့် VF 7  တို့ကိုခင်းကျင်းရောင်းချသွားမည်ဟု သိရပါသည်။ ၎င်းတို့၏တိုးချဲ့မှု လမ်းပြမြေပုံ၏တစ်စိတ်တစ်ပိုင်းအနေဖြင့် ကုမ္ပဏီသည် ၂၀၂၅ ခုနှစ်ကုန်တွင် မြို့ပေါင်း ၂၇ မြို့တို့ တွင် အရောင်းကိုယ်စားလှယ် ၃၅ ခုတည်ထောင်ရန် ရည်ရွယ်ထားကြောင်း သိရပါသည်။ VinFast ဆူရတ်အ‌ရောင်းပြခန်းကို အိန္ဒိယနိုင်ငံ၏ ထိပ်တန်းကားလက်လီရောင်းချသူ Chandan Car က ဖွင့်လှစ်သွားမည်ဖြစ်ကြောင်း သိရပါသည်။ ၃၀၀၀ စတုရန်းပေကျယ်ဝန်းသည့် ထိုပြခန်းတွင် ဝယ်ယူသူများအား ထိပ်တန်း ထုတ်ကုန်အတွေ့အကြုံများ၊ ဝယ်ယူမှုလုပ်ငန်းစဉ်မြန်ဆန်မှုနှင့် ကမ္ဘာ့အဆင့် ရောင်းချပြီး ဝန်ဆောင်မှုရရှိစေရန် ဆောင်ရွက်ပေးသွားမည်ဟု သိရပါသည်။ ဇူလိုင် လ ၁၅ ရက်နေ့ကလည်း VinFast သည် ၎င်းတို့၏ အကောင်းစား လျှပ်စစ် SUV များဖြစ်သည့် VF 6 နှင့် VF 7 တို့အတွက်ကြိုတင်မှာယူမှုများ တရားဝင်ဖွင့်လှစ်ပေးခဲ့ကြောင်း သိရပါသည်။ မော်တော် ကားများကို Thoothukudi ရှိ VinFast ၏ မကြာမီဖွင့်လှစ်မည့်စက်ရုံတွင် တပ်ဆင်မည် ဖြစ်ပြီး အိန္ဒိယအား ဗျူဟာမြောက်ဈေးကွက်နှင့် အနာဂတ်လျှပ်စစ်ကားထုတ်လုပ်ရာအချက် အချာ အဖြစ် ကုမ္ပဏီ၏ တည်ရှိမှုကို အားသစ်လောင်းပေးခဲ့ကြောင်း သိရပါသည်။ VinFast Asia ၏ အမှုဆောင်အရာရှိချုပ်ဖြစ်သူ Pham Sanh Chau က ဆူရတ်ရှိ VinFast ၏ပထမဆုံး အရောင်းပြခန်းသည် အိန္ဒိယတွင် ကုမ္ပဏီ၏ နက်ရှိုင်းစွာကတိကဝတ်ပြုမှု၏ သင်္ကေတ ဖြစ် ကြောင်း ပြောကြားခဲ့ပါသည်။ ထိုအရောင်းကိုယ်စားလှယ်မိတ်ဖက်ဖွဲ့မှုနှင့်အတူ လုပ်ငန်းသည် လျှပ်စစ်မော်တော်ယာဉ်များသာမက အရည်အသွေး၊ ယုံကြည်မှုနှင့် အကောင်းဆုံးဝန်ဆောင်မှုတို့ တည်ဆောက်သွားမည်ဟု သိရပါသည်။

DOCA(ရန်ကုန်)

ကမ္ဘောဒီးယားနိုင်ငံသည် ဆန်းသစ်တီထွင်မှု၊ ရင်းနှီးမြှုပ်နှံမှုနှင့် ရေရှည်တည်တံ့သော တိုးတက်မှုများအတွက် အခွင့်အလမ်းများဖန်တီးရန် 'CAMWATER, CAMBUILD, and CAMAUTO 2025' ကို ၂၀၂၅ ခုနှစ်၊ အောက်တိုဘာတွင် အိမ်ရှင်အဖြစ် လက်ခံကျင်းပရန် ပြင်ဆင်နေသည်။ ကုန်စည်ပြပွဲကို ကမ္ဘောဒီးယားနိုင်ငံ၊ ဖနွမ်းပင်မြို့ရှိ Diamond Island Exhibition & Convention Centre (DIECC) တွင် အောက်တိုဘာ ၁၄ ရက်မှ ၁၆ ရက်အထိ ကျင်းပမည်ဖြစ်ကြောင်း ၂၉-၇-၂၀၂၅ ရက်နေ့တွင် ထုတ်ပြန်သည့် သတင်းထုတ်ပြန်ချက်တွင် ဖော်ပြထားသည်။ ကြိုတင်ပြင်ဆင်မှုများ၏ တစ်စိတ်တစ်ပိုင်းအနေဖြင့် Informa Markets နှင့် ကမ္ဘောဒီးယား ရေပေးဝေသူများအသင်း (CWA) တို့သည် ကမ္ဘောဒီးယားနိုင်ငံ၏ ရေပေးဝေမှုဖွံ့ဖြိုးတိုးတက်ရေး အစီအစဉ်ကို တွန်းအားပေးရန်အတွက် ဖနွမ်းပင်မြို့တွင် နားလည်မှုစာချွန်လွှာ (MoU) ကို တရားဝင် လက်မှတ်ရေးထိုးခဲ့ကြသည်။ လက်မှတ်ရေးထိုးပွဲ အခမ်းအနားသို့ ဗိသုကာဘုတ်အဖွဲ့၊ ကမ္ဘောဒီးယား အင်ဂျင်နီယာများအဖွဲ့၊ ကမ္ဘောဒီးယား ရင်းနှီးမြုပ်နှံသူများအသင်းနှင့် ကမ္ဘောဒီးယား မော်တော်ကားလုပ်ငန်းအဖွဲ့ချုပ်တို့မှ အကြီးတန်းကိုယ်စားလှယ်များ တက်ရောက်ခဲ့ကြသည်။ ကမ္ဘောဒီးယား ဗိသုကာဘုတ်အဖွဲ့၏ အထွေထွေအတွင်းရေးမှူးနှင့် မြေယာစီမံခန့်ခွဲမှု၊ မြို့ပြနှင့် ဆောက်လုပ်ရေးဝန်ကြီးဌာန (MLMUPC) မှ အတွင်းရေးမှူးချုပ် Hang Sothsamphea က ပြပွဲ၏ အရေးပါမှုကို အလေးပေးပြောကြားခဲ့ပြီး လာမည့်ပြပွဲတွင် နိုင်ငံ၏ ဆောက်လုပ်ရေးကဏ္ဍနှင့် စက်မှုလုပ်ငန်းဖွံ့ဖြိုးတိုးတက်ရေးတွင် ပုဂ္ဂလိကကဏ္ဍ၏ အဓိကအခန်းကဏ္ဍကို မီးမောင်းထိုးပြသွားမည်ဖြစ်ကြောင်း ပြောကြားခဲ့ပါသည်။ ကမ္ဘောဒီးယား နိုင်ငံ၏ ရေသန့်ကဏ္ဍဖွံ့ဖြိုးတိုးတက်စေရန်အတွက် အသင်းအနေဖြင့် ယခုနှစ်အတွင်း နိုင်ငံတကာအသင်းအဖွဲ့များနှင့် ကုမ္ပဏီများနှင့် ပိုမိုပူးပေါင်းဆောင်ရွက်သွားရန် ရည်မှန်း ထားကြောင်း CWA ၏ အမှုဆောင်ဒါရိုက်တာ Lim Mich က ပြောကြားခဲ့သည်။ Cambodia Investor Contractor Architect Association ဥက္ကဋ္ဌ Seng Bunvirak က ပြပွဲ၏ အကျိုးကျေးဇူးများနှင့် ပတ်သက်၍ ပြောကြားရာတွင် ၎င်းသည် လုပ်ငန်းပိုင်ရှင်များနှင့် ကုမ္ပဏီများအတွက် ၎င်းတို့၏ ထုတ်ကုန်များကို ခင်းကျင်းပြသရန် ပလပ်ဖောင်းတစ်ခုအဖြစ် ဆောင်ရွက်သွားမည်ဖြစ်ကြောင်း ပြောကြားခဲ့သည်။ Informa Markets ၏ အထွေထွေမန်နေဂျာ Gerard Leeuwenburgh က အဆိုပါ ပြပွဲသည် အခြေခံအဆောက်အအုံ၊ ရေနှင့် သယ်ယူ ပို့ဆောင်ရေးတို့အတွက် ကမ္ဘောဒီးယား၏ အပြည့်စုံဆုံးသော စီးပွားရေးဂေဟစနစ်ကို ဖန်တီးရန် ရည်ရွယ်ထားကြောင်း ပြောကြားခဲ့သည်။ Gerard Leeuwenburgh က တာဝန်ရှိသူများအပြင် ပုဂ္ဂလိကအဖွဲ့အစည်းများနှင့် လုပ်ငန်းဆိုင်ရာအသင်းအဖွဲ့များ၏ ပံ့ပိုးကူညီမှုများအတွက် ကျေးဇူးတင်ရှိကြောင်း ဆက်လက်ပြောကြားခဲ့သည်။

DOCA(ရန်ကုန်)

တရုတ်ပြည်သူ့သမ္မတနိုင်ငံ၊ Nanjing Xinyada နည်းပညာကုမ္ပဏီသည် ကမ္ဘောဒီးယား နိုင်ငံ၏ ပညာရေးကဏ္ဍတွင် ရင်းနှီးမြှုပ်နှံရန် စိတ်ဝင်စားနေပြီး ပညာရေး၊ လူငယ်နှင့် အားကစားဝန်ကြီးဌာနထံမှ အလားအလာရှိသော ပံ့ပိုးကူညီမှုများကို ရှာဖွေလျက်ရှိသည်။ ၂၈-၇-၂၀၂၅ ရက်နေ့က ဖနွမ်းပင်မြို့တွင် ပညာရေး၊ လူငယ်နှင့် အားကစားဝန်ကြီး Hang Chuon Naron နှင့် Nanjing Xinyada နည်းပညာကုမ္ပဏီ မှ ညွှန်ကြားရေးမှူးချုပ် Zeng Botao  တို့ တွေ့ဆုံစဉ် ပညာရေးပူးပေါင်းဆောင်ရွက်မှုသည် ကမ္ဘောဒီးယား-တရုတ် အသက် မွေးဝမ်းကျောင်းနှင့် နည်းပညာဆိုင်ရာပညာရေး၊ ကမ္ဘောဒီးယား-တရုတ် ဒစ်ဂျစ်တယ် တက္ကသိုလ် ထူထောင်ရေးနှင့် နိုင်ငံတကာ ပညာရေးဆိုင်ရာ တရုတ်တက္ကသိုလ်များနှင့် ကမ္ဘောဒီးယားနိုင်ငံ ICT အကြား ချိတ်ဆက်မှုတို့ကို အဓိကထားဆွေးနွေးခဲ့ကြသည်။ Chuon Naron က ကမ္ဘောဒီးယားနိုင်ငံရှိ ပညာရေးနှင့် လူ့စွမ်းအားအရင်းအမြစ်မြှင့်တင်ရေးတို့တွင် အထောက်အကူဖြစ်စေရန်အတွက် ဝန်ကြီးဌာနနှင့် ရင်းနှီးမြှုပ်နှံကာ ပူးပေါင်းဆောင်ရွက် လိုသည့် တရုတ်ကုမ္ပဏီ၏ ရည်ရွယ်ချက်ကို ထောက်ခံအားပေးကြောင်း ပြောကြားခဲ့သည်။ ဆက်လက်၍ Chuon Naron က ကမ္ဘောဒီးယား နိုင်ငံ၏ ပညာရေး၊ အထူးသဖြင့် ဒစ်ဂျစ်တယ်နည်းပညာ ကျွမ်းကျင်မှု ဖွံ့ဖြိုးတိုးတက်ရန် အလေးအနက်ပြောကြားပြီး လက်ရှိနှင့် အနာဂတ်တွင် အလုပ်သမားစျေးကွက် လိုအပ်ချက်များကို ဖြည့်ဆည်းပေးနိုင်ရန် သက်ဆိုင်ရာ လုပ်ငန်းအဖွဲ့တစ်ရပ်ထူထောင်ကာ ဆက်လက်၍ စောင့်ကြည့်ဆွေးနွေးသွားရန် အကြံပြုခဲ့သည်။

DOCA(ရန်ကုန်)

           ၂၀၂၅ ခုနှစ်၏ ပထမနှစ်ဝက်တွင် ဗီယက်နမ်-စင်ကာပူကုန်သွယ်ရေးတန်ဖိုးမှာ စင်ကာပူ ဒေါ်လာ ၁၉.၅ ဘီလီယံရှိခဲ့ပြီး ၂၀၂၄ ခုနှစ် တူညီသည့်ကာလထက် ၂၈.၅ ရာခိုင်နှုန်းရှိခဲ့ကာ ဗီယက်နမ်သည် စင်ကာပူ၏ ၁၀ ခုမြောက်အကြီးမားဆုံးကုန်သွယ်ရေးမိတ်ဖက်ဖြစ်ကြောင်း စင်ကာပူ၏ Accounting and Corporate Regulatory Authority (ACRA) ၏အဆိုအရ သိရပါ သည်။ စင်ကာပူသည် ဗီယက်နမ်သို့ စင်ကာပူဒေါ်လာ ၁၃.၉ ဘီလီယံတန်ဖိုးတင်ပို့ပြီး ဗီယက်နမ် ထံမှ စင်ကာပူဒေါ်လာ ၅.၅ ဘီလီယံတန်ဖိုးတင်သွင်းကြောင်း သိရပါသည်။ ထိုပထမနှစ်ဝက်တာ ကာလတွင် စင်ကာပူ၏ပြည်တွင်း၌ထုတ်လုပ်သည့်ကုန်ပစ္စည်းတင်ပို့မှုတန်ဖိုးမှာ စင်ကာပူဒေါ်လာ ၃.၉ ဘီလီယံနှင့် ယာယီတင်သွင်းပြီးပြန်လည်တင်ပို့သည့်တန်ဖိုးမှာ စင်ကာပူဒေါ်လာ ၁၀.၁ ဘီလီယံတန်ဖိုးရှိကြောင်း သိရပါသည်။ စင်ကာပူသည် ကုန်သွယ်ရေးပိုငွေ စင်ကာပူဒေါ်လာ ၈.၄ ဘီလီယံရရှိခဲ့ကြောင်း သိရပါသည်။ ဗီယက်နမ်သို့ပို့ကုန်များကြားတွင် HS 85 (လျှပ်စစ်စက် ပစ္စည်း၊ အစိတ်အပိုင်းနှင့်တပ်ဆင်ပစ္စည်းများ)နှင့် HS 27 (လောင်စာ၊ ရေနံနှင့်ဆက်စပ်ပစ္စည်း များ)တို့မှာ စုစုပေါင်းတန်ဖိုးစင်ကာပူဒေါ်လာ ၉.၅ ဘီလီယံရှိကြောင်း သိရပါသည်။ တစ်ချိန် တည်းမှာပင် စင်ကာပူသည် ဗီယက်နမ်ထံမှ HS 85 ကိုစင်ကာပူဒေါ်လာ ၂.၇ ဘီလီယံတန်ဖိုး တင်သွင်းခဲ့ပြီး စုစုပေါင်းတင်သွင်းမှုတန်ဖိုး၏ ၄၉.၈ ရာခိုင်နှုန်းရှိကြောင်း သိရပါသည်။ စင်ကာပူရှိ ဗီယက်နမ်ကုန်သွယ်ရေးအတိုင်ပင်ခံ Cao Xuan Thang က ဗီယက်နမ်၏စင်ကာပူနှင့် ထိပ်တန်း ကုန်သွယ်ရေးမိတ်ဖက်အဖြစ်တည်ရှိနေခြင်းသည် စီးပွားရေးချိတ်ဆက်မှုနက်ရှိုင်းခြင်းကို ရောင်ပြန်ဟပ်ပြီး ထောက်ပံ့မှုကွင်းဆက်၊ ဟာလာဈေးကွက်ဝင်ရောက်ခြင်းနှင့် အစိမ်းရောင်နှင့် ဒစ်ဂျစ်တယ်ကနဦး ဆောင်ရွက်မှုများအစရှိသည့် အပြန်အလှန်အကျိုးရှိသောဧရိယာများတွင် ပူးပေါင်းဆောင်ရွက်မှု အခွင့်အလမ်းသစ်များအတွက် အခြေခံအုတ်မြစ်တစ်ခုဖြစ်ခဲ့ကြောင်း ပြောကြားခဲ့ကြောင်း သိရှိရပါသည်။

DOCA (ရန်ကုန်)

Vietnam Plus

               ကာတာအခြေစိုက် ကုမ္ပဏီနှစ်ခုဖြစ်သည့် Al Mansour Holding (AMH) နှင့် LCH Investment Group Co., Ltd. တို့မှ ကိုယ်စားလှယ်အဖွဲ့သည် လက်ရှိတွင် ကမ္ဘောဒီးယားနိုင်ငံ ၏ စိုက်ပျိုးရေးနှင့်ခရီးသွားကဏ္ဍများတွင် ရင်းနှီးမြှုပ်နှံမှု အခွင့်အလမ်းများကို ရှာဖွေလျက်ရှိ သည်။ Fahd Al Dosari ဦးဆောင်သော ကိုယ်စားလှယ်အဖွဲ့သည် အထက်လွှတ်တော် ဥက္ကဋ္ဌ Hun San အား ၂၂-၇-၂၀၂၅ ရက်နေ့က ဂါရဝပြုတွေ့ဆုံခဲ့ကြသည်။ အထက်လွှတ်တော် ပြောရေးဆိုခွင့်ရှိသူ Chea Thyrith ၏ ပြောကြားချက်အရ Fahd Al Dosari ၏ ခရီးစဉ်သည် ကမ္ဘောဒီးယား၏ ရင်းနှီးမြှုပ်နှံမှု အခင်းအကျင်း၊ အထူးသဖြင့် စိုက်ပျိုးရေး၊ ခရီးသွားလုပ်ငန်းနှင့် ဧည့်ဝတ်ကျေပွန်မှုတို့ကို ပိုမိုနားလည်လာစေရန်ဖြစ်ကြောင်း Hun San အား ပြောကြားခဲ့သည်။ ကမ္ဘောဒီးယားနိုင်ငံ၏ ဘေးကင်းမှု၊ တည်ငြိမ်မှုနှင့် ငြိမ်းချမ်းသော ပတ်ဝန်းကျင်သည် နိုင်ငံခြားရင်းနှီးမြှုပ်နှံသူများအတွက် ဆွဲဆောင်မှုရှိသော နေရာတစ်ခုဖြစ်စေရန် အဓိကအချက်ဖြစ်ကြောင်း Fahd Al Dosari က အလေးပေးပြောကြားခဲ့သည်။ တုံ့ပြန်သည့် အနေဖြင့် Hun San သည် ကာတာကိုယ်စားလှယ်အဖွဲ့အား နွေးထွေးစွာကြိုဆိုခဲ့ပြီး ကမ္ဘောဒီးယားနိုင်ငံ၏ အလားအလာမြင့်မားသောကဏ္ဍများ အထူးသဖြင့် စိုက်ပျိုးရေး၊ စက်မှုလုပ်ငန်းနှင့် ခရီးသွား လုပ်ငန်းများတွင် ရင်းနှီးမြှုပ်နှံမှုများ ပြုလုပ်ကြရန်  အားပေးတိုက်တွန်းခဲ့သည်။ ကမ္ဘောဒီးယား နိုင်ငံသည် ကမ္ဘာ့ဈေးကွက်သို့ တင်ပို့ရောင်းချရန် ရည်ရွယ်သည့် စိုက်ပျိုးရေးထုတ်ကုန် လုပ်ငန်းများတွင် ရင်းနှီးမြှုပ်နှံမှုများ ပြုလုပ်ရန် အထူးစိတ်ဝင်စားကြောင်း Fahd Al Dosari က ပြောကြားခဲ့ကြောင်း သိရှိရပါသည်။

DOCA(ရန်ကုန်)

Source: Khmer Times