ပြည်ပကုန်သွယ်မှုသတင်းများ

          ကမ္ဘောဒီးယား ဖွံ့ဖြိုးတိုးတက်မှုကောင်စီ (CDC) ၏ ရင်းနှီးမြှုပ်နှံမှုဘုတ်အဖွဲ့၊ အထွေထွေ အတွင်းရေးမှူးချုပ် Chea Vuthy သည် တရုတ်ပြည်သူသမ္မတနိုင်ငံမှ Zhongke Beifang ကုမ္ပဏီ၏ အထွေထွေမန်နေဂျာ Ms. Zhou Huitong ဦးဆောင်သော တရုတ်ရင်းနှီးမြှုပ်နှံသူများ ကိုယ်စားလှယ်အဖွဲ့အား လက်ခံတွေ့ဆုံခဲ့သည်။ တွေ့ဆုံပွဲတွင် Chea Vuthy က ကိုယ်စားလှယ်အဖွဲ့အားကြိုဆိုခဲ့ပြီး ကမ္ဘောဒီးယားနိုင်ငံအတွင်း ရင်းနှီးမြှုပ်နှံမှုများစီးဆင်းမှု အထူးသဖြင့် လွန်ခဲ့သည့် ဆယ်စုနှစ်များအတွင်း ကမ္ဘောဒီးယားသို့ တရုတ်ရင်းနှီးမြှုပ်နှံမှုများ တိုးတက်လာမှုနှင့်အတူ တရုတ်ရင်းနှီးမြှုပ်နှ့မှုအရင်းအမြစ်များသည် နှစ်စဉ်တိုးတက်လာခဲ့ ကြောင်းအလေးပေးပြောကြားခဲ့သည်။ ကိုယ်စားလှယ်အဖွဲ့ခေါင်းဆောင် Ms. Zhou Huitong က ကမ္ဘောဒီးယားနိုင်ငံတွင် ရင်းနှီးမြှုပ်နှံမှုအခွင့်အလမ်းများကို လေ့လာနေသည်မှာ (၂) နှစ်ခန့်ရှိကြောင်း၊ ယခုအချိန်တွင် ကုမ္ပဏီသည် ပြည်တွင်းဈေးကွက်နှင့် ပို့ကုန်အတွက် လယ်ယာထွက်ကုန်ပြုပြင်ရေးလုပ်ငန်းများတွင် ရင်းနှီးမြှုပ်နှံရန် ရည်ရွယ်ထားကြောင်း ပြောကြားခဲ့သည်။ တစ်ဖက်တွင် ကမ္ဘောဒီးယား၌ စပါး၊ ပီလောပီနံနှင့် သီဟိုဠ်စေ့ စသည့် သီးနှံအများအပြား ရှိသောကြောင့် ဒေသတွင်းစိုက်ပျိုးထုတ်လုပ်မှုတွင် ရင်းနှီးမြှုပ်နှံမှုများ လိုအပ် ကြောင်းပြောကြားခဲ့သည်။ Chea Vuthy က ကုမ္ပဏီ၏ ရင်းနှီးမြှုပ်နှံမှုစီမံကိန်းကို ကြိုဆိုခဲ့ပြီး စိုက်ပျိုးရေးကဏ္ဍသည် ဦးစားပေးကဏ္ဍဖြစ်ပြီး ကမ္ဘောဒီးယားတော်ဝင်အစိုးရ၏အာရုံစိုက်မှုကို ရရှိထားကြောင်းနှင့် ကုမ္ပဏီအား အမြတ်အစွန်းအများအပြားရရှိစေရေးအတွက် ရင်းနှီးမြှုပ်နှံမှု ဆိုင်ရာဆုံးဖြတ်ချက်များကို အမြန်ဆုံးချမှတ်နိုင်ရန် ပြောကြားခဲ့သည်။ 

DOCA(ရန်ကုန်)

          ကမ္ဘောဒီးယား-တောင်ကိုရီးယား ကုန်သွယ်မှုတိုးတက်လာသည်နှင့်အမျှ Cambodia Angkor Air သည် တောင်ကိုရီးယားနောက်တောင်ဘက်ရှိ Muan ခရိုင်သို့ တိုက်ရိုက် ပျံသန်းမှုများစတင်ခဲ့သည်။ ဖနွမ်းပင်မှ ပထမဆုံးလေကြောင်းခရီးစဉ်များကို ဒီဇင်ဘာလ ၂၉ ရက်နေ့တွင်လည်းကောင်း၊ Siem Reap ပြည်နယ်မှ လေကြောင်းခရီးစဉ်များကို ၂၀၂၅ ခုနှစ်၊ ဇန်နဝါရီလ ၂ ရက်နေ့တွင်စတင်မည်ဖြစ်သည်။ Cambodia Angkor Air လေကြောင်းလိုင်းမှ ပြောရေးဆိုခွင့်ရှိသူက ပျံသန်းချိတ်ဆက်မှုအသစ်သည် ခရီးသွားများအတွက် အခွင့်အလမ်းများ ပိုမိုရရှိစေပြီး နှစ်နိုင်ငံ၏ ကြွယ်ဝသောယဉ်ကျေးမှု၊ လှပသောရှုခင်းများနှင့် ရင်းနှီးမြှုပ်နှံမှု အခွင့်အလမ်းများကိုရှာဖွေရန် ပိုမိုလွယ်ကူစေကြောင်းပြောကြားခဲ့သည်။ ကိုရီးယားစီးပွားရေး လုပ်ငန်းများကို ပိုမိုဆွဲဆောင်ရန်အတွက် ကမ္ဘောဒီးယားသည် ကိုရီးယားရင်းနှီးမြှုပ်နှံသူများနှင့် ပူးပေါင်း၍ အထူးစီးပွားရေးဇုန်များဖွံ့ဖြိုးတိုးတက်ရေးကို ဦးစားပေးဆောင်ရွက်လျက်ရှိသည်။ အလုပ်သမားနှင့် အသက်မွေးဝမ်းကြောင်းလေ့ကျင့်ရေးဝန်ကြီးဌာန၊ ဝန်ကြီး Heng Sour က တောင်ကိုရီးယားနိုင်ငံ Gyeonggi ပြည်နယ်မှ လာရောက်သည့် စီးပွားရေး ကိုယ်စားလှယ်အဖွဲ့ အား နိုင်ငံတော်၏အထူးစီးပွားရေးဇုန်များတွင် ရင်းနှီးမြှုပ်နှံမှုများပြုလုပ်ရန် နှင့် ကမ္ဘောဒီးယား-တောင်ကိုရီးယားလွတ်လပ်သော ကုန်သွယ်မှုသဘောတူညီချက်သည် ကိုရီးယားသို့ လယ်ယာထွက်ကုန်များတင်ပို့ရန်နှင့် ပြုပြင်ထုတ်လုပ်ရေးတို့တွင် ရင်းနှီးမြှုပ်နှံမှု များပြုလုပ်ရန် တွန်းအားတစ်ခုဖြစ်ကြောင်း ပြောကြားခဲ့သည်။

DOCA(ရန်ကုန်)

             ကမ္ဘောဒီးယားနိုင်ငံနှင့် ဗီယက်နမ်နိုင်ငံတို့အကြား ကုန်သွယ်မှုသည် ယခုနှစ် ဇန်နဝါရီလမှ နိုဝင်ဘာလအတွင်း ကန်ဒေါ်လာ ၇.၀၈ ဘီလီယံအထိရောက်ရှိခဲ့ပြီး အမေရိကန် နိုင်ငံနောက်တွင် ဒုတိယအကြီးဆုံး ပို့ကန်ဈေးကွက်အဖြစ်ရပ်တည်ခဲ့သည်။ အကောက်ခွန်နှင့် ကုန်စည်စီးဆင်းမှုဦးစီးဌာန (GDCE) မှ ထုတ်ပြန်ခဲ့သော ကုန်သွယ်မှု အချက်အလက်များအရ ကမ္ဘောဒီးယားမှဗီယက်နမ်သို့ ပို့ကုန်တင်ပို့မှုမှာ ၂၆.၃ ရာခိုင်နှုန်းအထိမြင့်တက်ခဲ့ပြီး ကန်ဒေါ်လာ ၃.၂၉ ဘီလီယံရှိခဲ့သည်။ ဗီယက်နမ်၏ ကမ္ဘောဒီးယား သို့တင်သွင်းမှုမှာ ၁၆ ရာခိုင်နှုန်း တိုးလာခဲ့ ပြီး ကန်ဒေါ်လာ ၃.၇၉ ဘီလီယံရှိခဲ့သည်။ ကမ္ဘောဒီးယားသည် ဆန်၊ ရာဘာ၊ သီဟိုဠ်စေ့၊ ပီလော ပီနံ၊ ပြောင်း၊ ငှက်ပျောသီး၊ သရက်သီးနှင့် ဆေးရွက်ကြီးအပါအဝင် လယ်ယာထွက်ကုန်များကို ဗီယက်နမ်သို့အဓိကတင်ပို့နေသည်။ ဗီယက်နမ်မှ ဆောက်လုပ်ရေးသုံးပစ္စည်းများ၊ စက်ယန္တယား များ၊ လောင်စာဆီ၊ လျှပ်စစ် ပစ္စည်းများ၊ ဓာတ်မြေဩဇာ၊ တိရစ္ဆာန်အစာများ၊ ဟင်းသီးဟင်းရွက် နှင့် သစ်သီးဝလံများ တင်သွင်းသည်။ အစဉ်အလာအားဖြင့် ကမ္ဘောဒီးယား၏ သီဟိုဠ်စေ့အများစု ကို ဗီယက်နမ်သို့ တင်ပို့လျက်ရှိကြောင်း ကမ္ဘောဒီးယားသီဟိုဠ်စေ့အသင်း (CAC) ၏ အစီရင်ခံစာ အရသိရသည်။ ကမ္ဘောဒီးယားနှင့် ဗီယက်နမ်နိုင်ငံတို့အကြား မကြာမီကာလအတွင်း နှစ်နိုင်ငံ ကုန်သွယ်မှုကို ဒေါ်လာ ၁၀ ဘီလီယံကျော်နှင့် လာမည့်နှစ်များတွင်း ၂၀ ဘီလီယံကျော်အထိ တိုးမြှင့်ရန်ကြိုးပမ်းလျက်ရှိသည်။ ၂၀၂၄ ခုနှစ်၊ စက်တင်ဘာလအထိ ကမ္ဘောဒီးယားနိုင်ငံတွင် ကန်ဒေါ်လာ ၂.၉၁ ဘီလီယံဖြင့် ဗီယက်နမ်ရင်းနှီးမြှုပ်နှံမှု စီမံကိန်းစုစုပေါင်း ၂၀၈ ခုရှိပြီး ဗီယက်နမ်နိုင်ငံတွင် ကန်ဒေါ်လာ ၇၅.၇၆ သန်းဖြင့် ကမ္ဘောဒီးယားရင်းနှီးမြှုပ်နှံမှုစီမံကိန်းစုစုပေါင်း ၃၅ ခုရှိကြောင်းသိရှိရပါသည်။

Source : Khmer Times

DOCA(ရန်ကုန်)

          ကမ္ဘောဒီးယားနိုင်ငံ၏ ရာဘာရောင်းအားသည် ၂၀၂၄ ခုနှစ်တွင် ကန်ဒေါ်လာ ၆၄၀ သန်းအထိရောက်ရှိခဲ့ပြီး  ၂၀၂၃ ခုနှစ်မှ ၃၀ ရာခိုင်နှုန်းတိုးလာခဲ့ကြောင်း စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာန (MAFF) ၏ တရားဝင်အစီရင်ခံစာအရသိရသည်။ Tbong Khmum ခရိုင်၊ Tbong Khmum ပြည်နယ် တွင်ကျင်းပပြုလုပ်ခဲ့သော ကမ္ဘောဒီးယားနိုင်ငံတွင် ရှေးအကျဆုံးရာဘာစိုက်ခင်း နှစ် (၁၀၀) ပြည့် အထိမ်းအမှတ်နှင့် Techo-Thipadei ရာဘာ အမွေအနှစ်ဥယျာဉ်ဖွင့်လှစ်ခြင်းအခမ်းအနားတွင် အဆိုပါအချက်အလက်များကို ပြောကြားခဲ့ခြင်း ဖြစ်သည်။ အခမ်းအနားတွင် (MAFF) ဝန်ကြီး Dith Tin က ကမ္ဘောဒီးယား ရာဘာလုပ်ငန်း၏ အရေးပါမှုကိုအလေးပေးပြောကြားခဲ့ပြီး လွန်ခဲ့သောရာစုနှစ်များအတွင်း နိုင်ငံ၏စီးပွားရေးဖွံ့ဖြိုး တိုးတက်မှုများတွင် အရေးကြီးသောအခန်းကဏ္ဍမှ ပံ့ပိုးကူညီမှုများကို အသိအမှတ်ပြုကြောင်း ပြောကြားခဲ့သည်။ ထို့အပြင် အစေးအထွက်နှုန်းမရှိတော့သည့် ရာဘာပင်အဟောင်းများသည် ရာဘာသစ် ထုတ်လုပ်သည့် စက်ရုံများအတွက် အရေးပါသော ကုန်ကြမ်းပစ္စည်း အရင်းအမြစ် တစ်ခုဖြစ်သည်။ အဆိုပါရာဘာပင်အဟောင်းများသည် ပရိဘောဂနှင့် အခြား ထုတ်ကုန်များ ထုတ်လုပ်ပြီး ရာဘာစိုက်ပျိုးသူများအတွက် အပိုဝင်ငွေလမ်းကြောင်းတစ်ခု ဖန်တီးပေးကြောင်း Dith Tin ကပြောကြားခဲ့သည်။ ရာဘာစိုက်ပျိုးသည့် ဧရိယာသည် ၂၀၀၀ ခုနှစ်တွင် ဟက်တာ ၅၀,၀၀၀ ကျော်မှ ၂၀၂၀ ခုနှစ်တွင် ဟက်တာ ၄၀၀,၀၀၀ ကျော်အထိ တိုးလာခဲ့ကြောင်း MAFF ၏ ရာဘာဆိုင်ရာညွှန်ကြားရေးမှူးချုပ် Khun Kakada က ပြောကြားခဲ့သည်။ ရာဘာကုန်ထုတ် စွမ်းအားသည် နှစ်စဉ်တန်ချိန် ၅၀,၀၀၀ မှ ၃၅၀,၀၀၀ တန် အထိတိုးလာပြီး နိုင်ငံတော်၏ စီးပွားရေးအတွက် တစ်နှစ်လျှင် ကန်ဒေါ်လာ ၅၀၀ သန်းခန့် ပံ့ပိုးနိုင်မည်ဟုပြောကြားခဲ့သည်။ ထို့အပြင် ရာဘာကဏ္ဍသည် အလုပ်သမား ၁၄၀,၀၀၀ ကိုပံ့ပိုး ပေးနိုင်ခဲ့ပြီး အလုပ်သမားများ၏ မိသားစုများအပါအဝင် မှီခိုသူ ၄၂၀,၀၀၀ ကျော်ကို အကျိုးခံစားခွင့်များရရှိစေသည်ဟု Khun Kakada က ထပ်လောင်းပြောကြားခဲ့သည်။ ပြည်တွင်း ကားတာယာထုတ်လုပ်သော စက်ရုံများ နှင့် ပြုပြင်ထုတ်လုပ်သောစက်ရုံးများတိုးလာမှုကြောင့် ရာဘာဝယ်လိုအားသည် သိသိသာသာ မြှင့်တက်ခဲ့သည်။

DOCA(ရန်ကုန်)

              ကမ္ဘောဒီးယားနိုင်ငံ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MoC) နှင့် ကိုရီးယားသမ္မတနိုင်ငံ၊ ကုန်သွယ်ရေး၊ စက်မှုနှင့် စွမ်းအင်ဝန်ကြီးဌာန (MOTIE) တို့သည် ကုန်သွယ်မှုဆက်ဆံရေးများမြှင်တင်ရန်နှင့် နိုင်ငံတော်၏ ရင်းနှီးမြှုပ်နှံမှုအလားအလာများကို မြှင့်တင်ခြင်းဖြင့် နှစ်နိုင်ငံဆက်ဆံရေးခိုင်မာစေရန် စီးပွားရေးဆိုင်ရာအခမ်းအနားကို ကျင်ပခဲ့ သည်။ အဆိုပါ ‘Cambodia-Korea Trade and Investment Forum’ ကို စီးပွားရေးနှင့် ကူးသန်းရောင်းဝယ်ရေးဝန်ကြီး Cham Nimu မှ ဥက္ကဋ္ဌအဖြစ်ဆောင်ရွက်ခဲ့ပြီး ကိုရီးယားစက်မှု မဟာမိတ်ဖိုရမ် (KIAF) ဥက္ကဋ္ဌ Marn-Ki Jeong နှင့် ကမ္ဘောဒီးယားနိုင်ငံဆိုင်ရာ ကိုရီးယား သံအမတ်ကြီး Park Jung-Wook တို့က နှစ်နိုင်ငံလွတ်လပ်သောကုန်သွယ်မှု သဘောတူညီချက် (FTA) ကိုဆွေးနွေးညှိနှိုင်းခဲ့ကြသည်။ အဆိုပါဖိုရမ်တွင် နှစ်နိုင်ငံကုန်သွယ်မှုနှင့် ရင်းနှီးမြှုပ်နှံမှု များအားကောင်းစေရန်ရည်ရွယ်ပြီး နိုင်ငံတော်၏ ရင်းနှီးမြှုပ်နှံမှုအလားအလာကို မြှင့်တင်ရန်နှင့် အစိုးရ၊ ပုဂ္ဂလိက ပူးပေါင်းဆောင်ရွက်မှုလွယ်ကူစေရန် ရည်ရွယ်ကြောင်းပြောကြားခဲ့သည်၊၊ MoC ၏ကြေညာချက်အရ ဖိုရမ်သည်စိုက်ပျိုးရေး၊ ကုန်ထုတ်လုပ်မှု၊ နည်းပညာနှင့် ဒစ်ဂျစ်တယ်ကုန်သွယ်မှုကဲ့သို့သော ဦးစားပေးကဏ္ဍများတွင် အခွင့်အလမ်းများကို ပြသခဲ့ပြီး ကမ္ဘာဒီးယား-ကိုရီးယား မိတ်ဖက်ဆက်ဆံရေးကိုပိုမိုအားကောင်းစေကာ ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ အလားအလာများကိုလေ့လာရန် အခွင့်အလမ်းကောင်းတစ်ခုဖြစ်သည်။  အမှာစကားတွင် ကမ္ဘောဒီးယားရင်းနှီးမြှုပ်နှံမှုဘုတ်အဖွဲ့ (CIB) ၏ ဒုတိယအထွေထွေ အတွင်း ရေးမှူး Suon Sophal က ကမ္ဘောဒီးယားဖွံ့ဖြိုးတိုးတက်ရေးကောင်စီ(CDC) နှင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန (MoC) တို့၏လုပ်ငန်းအဖွဲ့အားမြှင့်တင်ရန် အတွက် အဆိုပါ ဖိုရမ်ကိုပူးတွဲကျင်းပခြင်းအတွက် ကျေးဇူးတင်ရှိကြောင်းပြောကြားခဲ့သည်။ ကမ္ဘောဒီးယားနိုင်ငံတွင် ရင်းနှီးမြှုပ်နှံရခြင်း၏ အဓိကအကြောင်းအရင်းများတွင် နိုင်ငံရေးနှင့် စီးပွားရေးတည်ငြိမ်မှု၊ ပထဝီအနေအထား၊ လူ့စွမ်းအားနှင့်ထုတ်လုပ်မှု၊ စီးပွားရေးလိုလားသော အစိုးရနှင့်ရင်းနှီးမြှုပ်နှံမှုကဏ္ဍတွင် ဖြေလျော့ပေးထားသောမူဝါဒများပါဝင်ကြောင်း Sophal က ထပ်မံပြောကြားခဲ့ကြောင်းသိရှိရပါသည်။

Source : Khmer Times

DOCA(ရန်ကုန်)