ပြည်ပကုန်သွယ်မှုသတင်းများ

     ကမ္ဘောဒီးယားနိုင်ငံသည် အာဆီယံအဖွဲ့ဝင်နိုင်ငံများနှင့် ကုန်သွယ်မှုပမာဏသည် ၂၀၂၄ ခုနှစ်၊ ပထမ (၁၁) လအတွင်းကန်ဒေါ်လာ၁၄.၃ ဘီလီယံအထိရှိပြီး ၂၀၂၃ ခုနှစ် အလားတူကာလ ကန်ဒေါ်လာ ၁၂.၆၈ ဘီလီယံမှ ၁၂.၈ ရာခိုင်နှုန်းတိုးမြင့်လာကြောင်း တရားဝင်အစီရင်ခံစာများ အရသိရသည်။ ကမ္ဘောဒီးယားသည် ၂၀၂၄ ခုနှစ်၊ ဇန်နဝါရီလမှ နိုဝင်ဘာလအတွင်း အာဆီယံနိုင်ငံများသို့ ကုန်ပစ္စည်း တန်ဖိုးအမေရိကန်ဒေါ်လာ ၄.၆၂ ဘီလီယံဖိုးတင်ပို့ခဲ့ပြီး ၂၀၂၃ ခုနှစ်၊ အလားတူကာလ ကန်ဒေါ်လာ ၄.၂၄ ဘီလီယံမှ ၈.၉ ရာခိုင်နှုန်းတိုးတက်ခဲ့ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန(MoC) ၏အစီရင်ခံစာအရသိရသည်။ အာဆီယံ အဖွဲ့ဝင်နိုင်ငံများမှ ကမ္ဘောဒီးယားနိုင်ငံသို့ သွင်းကုန်ပမာဏသည် ကန်ဒေါ်လာ ၉.၆၈ ဘီလီယံ ရှိသည်။ ဗီယက်နမ်၊ ထိုင်း၊ စင်္ကာပူ၊ အင်ဒိုနီးရှားနှင့် မလေးရှားနိုင်ငံတို့သည် ၂၀၂၄ ခုနှစ်၊ ပထမ (၁၁) လ အတွင်း ကမ္ဘောဒီးယားနိုင်ငံ၏ ထိပ်တန်းကုန်သွယ်ဖက် အာဆီယံအဖွဲ့ဝင်နိုင်ငံများ ဖြစ်သည်။ ကမ္ဘောဒီးယားဝန်ကြီးချုပ် Hun Manet က အာဆီယံအတွင်းနိုင်ငံများနှင့် တက်ကြွသောကုန်သွယ်မှုမိတ်ဖက်နိုင်ငံအဖြစ်ရပ်တည်ခဲ့ပြီး အထည်ချုပ်နှင့် စက်ဘီးကဲ့သို့သော ကမ္ဘောဒီးယားနိုင်ငံထုတ်ကုန်ပစ္စည်းများသည် အရည်အသွေးနှင့် သက်သာသောဈေးနှုန်းများဖြင့် အာဆီယံနှင့် ကမ္ဘာတစ်ဝှမ်းတွင် အသိအမှတ်ပြုခြင်းခံရကြောင်းပြောကြားခဲ့သည်။ ဝန်ကြီးချုပ် က အာဆီယံနှင့် ကမ္ဘာ့ကုန်သွယ်ရေးအဖွဲ့အပါအဝင် ဒေသတွင်းနှင့်ကမ္ဘော့ကုန်သွယ်ရေး သဘောတူညီချက်များတွင် ကမ္ဘောဒီးယားနိုင်ငံသည် ဈေးကွက်အတွင်း ပူးပေါင်းပါဝင်မှု မြှင့်မားသောနိုင်ငံအဖြစ်ရပ်တည်နေကြောင်း ထပ်မံပြောကြားခဲ့သည်။

Source : Khmer Times

DOCA(ရန်ကုန်)

    ကမ္ဘောဒီးယားနိုင်ငံနှင့်တောင်ကိုရီးယားနှစ်နိုင်ငံအကြား ကုန်သွယ်မှုပမာဏသည် ၂၀၂၄ ခုနှစ်တွင် အမေရိကန်ဒေါ်လာ ၇၆၂ သန်းအထိအရောက်ရှိခဲ့ပြီး ၂၀၂၃ ခုနှစ်နှင့်နှိုင်းယှဉ်ပါက ၁၁.၄၉ ရာခိုင်နှုန်းတိုးမြင့်လာခဲ့ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MoC) က ၁၉-၁၂-၂၀၂၄ ရက်နေ့က ထုတ်ပြန်ခဲ့သည်။ ၂၀၂၄ ခုနှစ်တွင် ကမ္ဘောဒီးယားနိုင်ငံ၏ ပို့ကုန် စုစုပေါင်းသည် ကန်ဒေါ်လာ ၂၈၈ သန်းရှိပြီး ကိုရီးယားနိုင်ငံမှ သွင်းကုန်တန်ဖိုး ကန်ဒေါ်လာ ၄၇၄ သန်းရှိကြောင်း အစီရင်ခံစာတွင်ဖော်ပြထားသည်။ ကမ္ဘောဒီးယားနိုင်ငံသည် အဓီကအားဖြင့် ဖိနပ်၊ ခရီးသွားထုတ်ကုန်များ၊ အဝတ်အထည်၊ လျှပ်စစ်ပစ္စည်းအစိတ်အပိုင်းများ၊ ရာဘာနှင့် စိုက်ပျိုးရေးထုတ်ကုန်များကို တောင်ကိုရီးယားနိုင်ငံသို့တင်ပို့သည်။ တောင်ကိုရီးယားမှ မော်တော်ယာဉ်များ၊ လျှပ်စစ်ပစ္စည်းများ၊ မီဖိုချောင်သုံးပစ္စည်းများ၊ အဖျော်ယမကားများ၊ ဆေးဝါးများနှင့် ကုန်ချောပလတ်စတစ်များကို တင်သွင်းသည်။ MOC သည် ကိုရီးယားနိုင်ငံ ၏ အမျိုးသားကုန်သွယ်မှုနှင့် နိုင်ငံခြားရင်းနှီးမြှုပ်နှံမှုမြှင့်တင်ရေးအေဂျင်စီ၏ ဥက္ကဋ္ဌနှင့်တွေ့ဆုံစဉ်က ဒစ်ဂျစ်တယ်နည်းပညာ၊ လျှပ်စစ်ပစ္စည်း၊ မော်တော်ကား ပြုပြင်ထုတ်လုပ်ရေး၊ စိုက်ပျိုးရေး နှင့် အစားအစာကဏ္ဍများတွင် ကမ္ဘောဒီးယားနှင့် ကိုရီးယားနှစ်နိုင်ငံအကြား ပူးပေါင်းဆောင်ရွက်မှုများ ဆက်လက်အားကောင်းစေရန် သဘောတူညီချက်များရယူခဲ့သည်။ ကမ္ဘောဒီးယား-ကိုရီးယားလွတ်လပ်သောကုန်သွယ်မှုသဘောတူညီမှုစာချုပ်(CKFTA) ကို ၂၀၂၂ ခုနှစ်၊ ဒီဇင်ဘာလ ၁ ရက်နေ့တွင် စတင်အသက်ဝင်ခဲ့ပြီး တောင်ကိုရီးယားမှ ရင်းနှီးမြှုပ်နှံသူများကို ကမ္ဘောဒီးယားတွင် ရင်းနှီးမြှုပ်နှံမှုများတိုးတက်လာစေရန်တွန်းအားပေးခဲ့ပြီး ကိုရီးယားမှ နိုင်ငံခြားတိုက်ရိုက် ရင်းနှီးမြှုပ်နှံမှု (FDI) သည် ၂၀၂၃ ခုနှစ်တွင် ကန်ဒေါ်လာသန်း ၃၀ ရရှိခဲ့သည်။

Source : Khmer Times

DOCA(ရန်ကုန်)

     ကမ္ဘောဒီးယားနိုင်ငံတော်ဝင်အစိုးရ (RGC) သည် ကမ္ဘောဒီးယား၏ စက်မှုအခြေခံ၊  စီးပွားရေးကွဲပြားမှုကိုမြှင့်တင်ရန်နှင့် နိုင်ငံသားများအတွက်အလုပ်အကိုင်အခွင့်အလမ်းများ တိုးပွားလာစေရန်အတွက် ဦးစားပေးကဏ္ဍများတွင် ရင်းနှီးမြှုပ်နှံမှုများမြှင့်တင်ရန် အလေးထားဆောင်ရွက်လျက်ရှိကြောင်း ကမ္ဘောဒီးယားဖွံ့ဖြိုးတိုးတက်ရေးကောင်စီ (CDC) ဥက္ကဋ္ဌ Sun Chanthol ကပြောကြားခဲ့သည်။ Sun Chanthol က ၁၈-၁၂-၂၀၂၄ ရက်နေ့က ကျင်းပပြုလုပ်ခဲ့သော သုံးနှစ်တာရင်းနှီးမြှုပ်နှံမှုမြှင့်တင်ရေးနှင့် လုပ်ငန်းစီမံချက်များ ပြင်ဆင်ခြင်း အစည်းအဝေးတွင် ပြောကြားခဲ့ခြင်းဖြစ်ပြီး အစည်းအဝေးသို့ ကမ္ဘောဒီးယားနိုင်ငံဆိုင်ရာ ဩစတြေးလျ ဒုတိယအကြီးအကဲ Ms. Bridget Collier ၊ စီးပွားရေး ဖွံ့ဖြိုးတိုးတက်မှုအတွက် ကမ္ဘောဒီးယား-ဩစတြေးလျပူးပေါင်းဆောင်ရွက်မှု (CAPRED) ကိုယ်စားလှယ်များနှင့် ကျွမ်းကျင်သူစုစုပေါင်း ၄၀ ဦးတက်ရောက်ခဲ့သည်။ CAPRED အစီအစဉ်မှတဆင့် ဩစတြေးလျ နည်းပညာအကူအညီဖြင့် ရင်းနှီးမြှုပ်နှံမှုမြှင့်တင်ရေးအစီအစဉ်ဖွံ့ဖြိုးတိုးတက်ရေး အတွက် အဓိကကဏ္ဍများကိုဆွေးနွေးဆုံးဖြတ်ရန် အစည်းအဝေးကိုစီစဉ်ခဲ့ခြင်းဖြစ်သည်။ ရင်းနှီးမြှုပ်နှံမှု မြှင့်တင်ရေးဗျူဟာသည် ဦးစားပေးကဏ္ဍများကို ဖော်ထုတ်ခြင်း၊ ရင်းနှီးမြှုပ်နှံသူများကို ပံ့ပိုးပေးခြင်း၊ရင်းနှီးမြှုပ်နှံမှုများကို ဆွဲဆောင်နိုင်ရန်နှင့် ပေါ်ပေါက်လာသော ခေတ်ရေစီးကြောင်းများကို အသုံးချရန် တန်ဖိုးသတ်မှတ်ခြင်းတို့ကို ဦးစားပေးဆောင်ရွက် သွားမည်ဖြစ်သည်။ Sun Chanthol ကကမ္ဘောဒီးယား၏ လူမှုစီးပွားဖွံ့ဖြိုးတိုးတက်မှုအတွက် ဘဏ္ဍာရေးနှင့် နည်းပညာဆိုင်ရာ အကူအညီများ ပေးခဲ့ခြင်းအတွက် ဩစတြေလျအစိုးရအား ကျေးဇူးတင်ရှိကြောင်း ပြောကြားခဲ့သည်။ Ms. Bridget Collier က  နှစ်နိုင်ငံအစိုးရအကြား အထူးသဖြင့် CDC နှင့် ယခင်ကပူးပေါင်းဆောင်ရွက်မှုများအပေါ်ကျေနပ်အားရမိကြောင်းနှင့် ၃ နှစ်တာရင်းနှီးမြှုပ်နှံမှု မြှင့်တင်ရေးဗျူဟာသည် ကမ္ဘောဒီးယားနိုင်ငံအတွက် အရည်အသွေးနှင့် တန်ဖိုးမြင့် ရင်းနှီးမြှုပ်နှံမှုများကို ဆွဲဆောင်စေနိုင်မည့် ကမ္ဘောဒီးယားဖွံ့ဖြိုးတိုးတက်ရေးကောင်စီ အတွက် အရေးပါသော မှတ်တမ်းတစ်ခုဖြစ်လာမည်ဟုမျှော်လင့်ကြောင်း ပြောကြားခဲ့သည်။

Source : Khmer Times

DOCA(ရန်ကုန်)

     ကမ္ဘောဒီးယား၏ ထွေထွေအခွန်ဦးစီးဌာန (GDT) နှင့်တရုတ်နိုင်ငံ၏ နိုင်ငံတော်အခွန်စီမံခန့်ခွဲရေးဌာနတို့သည် နိုင်ငံတော်၌ တရုတ်ရင်းနှီးမြှုပ်နှံမှုများကိုအားပေးရန် အခွန်မူဝါဒများ နှင့်ပတ်သက်၍ အလုပ်ရုံဆွေးနွေးပွဲတစ်ခုပြုလုပ်ခဲ့သည်။ တရုတ်နိုင်ငံရှိ ကမ္ဘောဒီးယား စီးပွားရေးအတိုင်ပင်ခံများနှင့် တရုတ်နိုင်ငံမှဌာနဆိုင်ရာအရာရှိများနှင့် တရုတ်စီးပွားရေး လုပ်ငန်းရှင်များ အလုပ်ရုံဆွေးနွေးပွဲသို့ တက်ရောက်ခဲ့သည်။ ဆွေးနွေးပွဲတွင် GDT ၏ ဉပဒေပြုရေး၊ အခွန်မူဝါဒနှင့် နိုင်ငံတကာအခွန်ပူးပေါင်းဆောင်ရွက်ရေး ညွှန်ကြားရေးမှူး Seng Cheaseth က အခွန်နှုန်းထားများလျော့ချခြင်းနှင့် အရည်အသွေးပြည့်မီသောရင်းနှီးမြှုပ်နှံမှု စီမံကိန်းများအတွက်  ကင်းလွတ်ခွင့်များအပါအဝင် ကမ္ဘောဒီးယား၏ဆွဲဆောင်မှုရှိသော အခွန် မတ်လုံးများကိုတင်ပြခဲ့သည်။ အဆိုပါအလုပ်ရုံဆွေးနွေးပွဲသည် ကမ္ဘောဒီးယားနှင့်တရုတ်နိုင်ငံတို့ အကြားခိုင်မာသောစီးပွားရေးဆက်ဆံမှုကို အလေးပေးခဲ့ပြီး နှစ်နိုင်ငံပူးပေါင်းဆောင်ရွက်မှုကို ပိုမိုခိုင်မာစေရန်ကြိုးပမ်းလျက်ရှိသည်။ တရုတ်ကိုယ်စားလှယ်အဖွဲ့သည် ကုန်ထုတ်လုပ်မှု၊ ခရီးသွားလုပ်ငန်းနှင့် အခြေခံအဆောက်အအုံဖွံ့ဖြိုးတိုးတက်ရေးစသည့် ကဏ္ဍအသီးသီးတွင် ရင်းနှီးမြှုပ်နှံမှုအခွင့်အလမ်းများရှာဖွေရန်စိတ်ဝင်စားကြောင်းပြောကြားခဲ့သည်။ တရုတ်နိုင်ငံ သည် ကမ္ဘောဒီးယား၏ ရင်းနှီးမြှုပ်နှံမှုနှင့် ကုန်သွယ်မှုတိုးမြင့်လာစေသည့် နှစ်နိုင်ငံပူးပေါင်း ဆောင်ရွက်မှုကြောင့် ၁၂ နှစ်တာကာလအတွင်း ကမ္ဘောဒီးယားနိုင်ငံ၏ အကြီးဆုံးနိုင်ငံခြား ရင်းနှီးမြှုပ်နှံမှု အရင်းအမြစ်ဖြစ်လာခဲ့သည်။ တရုတ်နိုင်ငံသည် ၂၀၂၄ ခုနှစ်၊ ပထမသုံးလပတ် အတွင်း ကန်ဒေါ်လာ ၁၁ ဘီလီယံအထိ နှစ်နိုင်ငံကုန်သွယ်မှုဖြင့် ကမ္ဘောဒီးယားနိုင်ငံ၏ ထိပ်တန်း ကုန်သွယ်ဖက်အဖြစ် ဆက်လက်ရပ်တည်နေပြီး ၂၀၂၃ ခုနှစ်၊ အလားတူကာလနှင့်နှိုင်းယှဉ်ပါက ၂၂ ရာခိုင်နှုန်းတိုးလာသည်။

Source : Khmer Times

DOCA(ရန်ကုန်)

             ကမ္ဘောဒီးယားတော်ဝင်အစိုးရ (RGC) သည် ၎င်းတို့၏ လုပ်ငန်းတိုးတက်မှုနှင့် နိုင်ငံသားများ၏ လူနေမှုအဆင့်အတန်းကို မြှင့်တင်ရန်အတွက် အရင်းအမြစ်များကို အထောက်အပံ့နှင့် လက်လှမ်းမီစေရန် အလွတ်သဘောစီးပွားရေးအတွက် ဒစ်ဂျစ်တယ်မှတ်ပုံတင်စနစ်အသစ်ကို ၁၆-၁၂-၂၀၂၄ ရက်နေ့က မိတ်ဆက်ခဲ့သည်။ စက်မှု၊ သိပ္ပံ၊ နည်းပညာနှင့် တီထွင် ဆန်းသစ်မှုဝန်ကြီးဌာန (MISTI)  မှ ကြီးမှူးကျင်းပသည့် ‘Digital Platform for Onboarding the Informal Economy’  တွင်ဝန်ကြီးချုပ် Hun Manet က အွန်လိုင်းမှတ်တင်စနစ်အသစ် အတွက် လျှောက်လွှာများသည် အခမဲ့ဖြစ်ကြောင်းပြောကြားခဲ့သည်။ အလွတ်သဘော စီးပွားရေးဖွံ့ဖြိုးတိုးတက်မှုနှင့် အသက်မွေးဝမ်းကြောင်း ချဲ့ထွင်မှုများအတွက် အခွင့်အလမ်းများ ဖန်တီးရန်ရည်ရွယ်၍ ပံ့ပိုးမှုများလိုအပ်ကြောင်း ထပ်မံပြောကြားခဲ့သည်။ MISTI ဝန်ကြီးနှင့် အလွတ်သဘောစီးပွားရေးဖွံ့ဖြိုးတိုးတက်မှု ပူးပေါင်းဆောင်ရွက်ရေး ကော်မတီ ဥက္ကဋ္ဌ Hem Vanndy က  ထိုဒစ်ဂျစ်တယ်ပလပ်ဖောင်းသည် တရားမဝင်စီးပွားရေး များအတွက် ပြဿနာများ ကိုဖြေရှင်းပေးမည်ဖြစ်ကြောင်းနှင့် သက်ဆိုင်ရာအာဏာပိုင်များကို တရားဝင်စီးပွားရေး ကဏ္ဍတွင် ပေါင်းစည်းနိုင်သည်အထိ ၎င်းတိုး၏ထုတ်ကုန်စွမ်းအား၊ စီးပွားရေးတိုးတက်မှုနှင့် ယှဉ်ပြိုင်နိုင်စွမ်းကိုမြှင့်တင်ပေးမည်ဖြစ်ကြောင်း ပြောကြာခဲ့သည်။ အွန်လိုင်းပလပ်ဖောင်းသည် မှတ်ပုံတင်ခြင်းလုပ်ငန်းစဉ်ကို လွယ်ကူချောမွေ့စေပြီး လျှောက်ထားသူများသည် အစိုးရ၏ ပံ့ပိုးကူညီမှုအမျိုးမျိုးကိုအလွယ်တကူရယူနိုင်စေရန်၊ ၎င်းတို့၏ လုပ်ငန်းများကို ရေရှည်တည်တံ့စေရန်နှင့် တရားဝင်စီးပွားရေးသို့ ကူးပြောင်းရာတွင် လွယ်ကူချောမွေ့စေသည်ဟု လူမှုစီးပွားသုတေသနပညာရှင် Dr Tech  ကပြောကြားခဲ့သည်။ “The Cambodia Labor Force Survey 2019” အရ ကမ္ဘောဒီးယားနိုင်ငံတွင် လုပ်သားအင်အား ၇.၉ သန်းခန့်ရှိပြီး လုပ်သားအင်အား၏ ၂၁.၅ ရာခိုင်နှုန်းသည်တရားဝင်စီးပွားရေးကဏ္ဍတွင် အလုပ်လုပ်ကိုင်လျက်ရှိပြီး ကျန်ရှိသော ၆.၂ သန်းသည် တရားမဝင်စီးပွားရေးကဏ္ဍတွင် အလုပ်လုပ်ကိုင်နေသူများဖြစ်ကြောင်း သိရှိရပါသည်။

Source : Khmer Times

DOCA(ရန်ကုန်)