ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ သာယာဝတီခရိုင်၊  အုတ်ဖိုမြို့နယ်သည် စိုက်ပျိုးရေးကိုအဓိကထား၍ အသက်မွေးဝမ်းကြောင်းလုပ်ကိုင်ကာ စီးပွားရေးဖွံ့ဖြိုးလျက်ရှိသော မြို့နယ်ဖြစ်ပါသည်။ ဆန်စပါး၊ မတ်ပဲတို့ကို အဓိကထား၍ စိုက်ပျိုးသည့်အပြင် ရာသီပေါ်သီးနှံများဖြစ်သော ငရုတ်၊ ဂေါ်ဖီ၊ သခွား၊ ရုံးပတီ၊ ချဉ်ပေါင်တို့ကိုလည်း‌ ဒေသတွင်းစားသုံးရန်သာမက အခြားမြို့နယ်များသို့တင်ပို့နိုင်သည်အထိ စိုက်ပျိုးလျက်ရှိပါသည်။

          အုတ်ဖိုမြို့အတွင်းရှိ လင်းလွန်းပင်ရွာ၊ ဥတိုရွာ၊ ကြက်ဆူတောရွာ၊ နနွင်းကုန်း၊ ငါးရှဉ့်ရိုး၊ သရက်ကုန်း၊ ကွေ့ချောင်း၊ ချောင်းနားရွာများသည် ရုံးပတီသီးကို အများဆုံးစိုက်ပျိုး၍ ဈေးကောင်းရရှိလျက်ရှိသည်။ ရုံးပတီပင်သည် ရာသီဥတုဒဏ်အကြမ်းခံနိုင်သဖြင့် ရွေးချယ်စိုက်ပျိုးကြကြောင်း၊ စိုက်ပျိုးချိန်မှ သီးနှံဆွတ်ခူးချိန်ထိ ၄၅ရက်ခန့်သာရှိသဖြင့် အချိန်တိုတိုနှင့် ဝင်ငွေရရှိနိုင်ကြောင်း ရုံးပတီသီးစိုက်တောင်သူတစ်ဦးထံမှသိရှိရပါသည်။ သွင်းအားစုအနေဖြင့် စိုက်ခင်းမြေထွန်ယက်ခ  (၁၆၀၀၀၀)၊ ပေါင်တင်ခ (၁၆၀၀၀၀)ကျပ်၊ စိုက်ပျိုးပင်စိုက်ရန် ကျင်းတူးခ  (၁၅၀၀၀၀)၊ မြက်ကောက်ခ (၁၅၀၀၀၀)ကျပ်၊ အပင်အားဆေး (၂၄၀၀၀၀)ကျပ်၊ အသီးအားဆေး (၂၄၀၀၀၀ကျပ်)၊ မျိုးစေ့ဖိုး(၈ထုပ်)(၃၆၀၀၀၀)ကျပ်၊ ခူးဆွတ်ခ(၃၅)ကြိမ်အတွက် လုပ်သားခ (၃၅၀၀၀၀)ကျပ်၊ သယ်ယူခ (၃၅ကြိမ်)အတွက် လုပ်သားခ (၁၄၀၀၀၀)ကျပ်၊ ရေသွင်းခြင်းအတွက် (၁၂ကြိမ်)လျှင် (၁၁၀၀၀၀၀) ကျပ်ကုန်ကျပါသည်။ မျိုးစေ့ဖိုး၊ ဆေးဖိုး၊ ရေသွင်းခ၊ ပေါင်းရှင်းခနှင့် အပင်စိုက်ပျိုးချိန်မှ ခူးဆွတ်ချိန်ထိ ကုန်ကျစရိတ်    ( ၃၀၅၀၀၀၀)ကျပ်ကုန်ကျနိုင်ပါသည်။ အောက်တိုဘာလအတွင်း ရုံး ပတီသီးတစ်တောင့်လျှင် ၂၅ကျပ်မှ ၂၈ကျပ်ကြားရရှိပါသည်။ ရုံးပတီသီးကို တစ်ရက်ခြားခူးဆွတ်ရပြီး တစ်ခါခူးဆွတ်လျှင် အတောင့်(၅၀၀၀)ခန့်ကို (၃၅)ရက်ခန့်ခူးဆွတ်ရပြီး အတောင့်ရေ  (၁၇၅၀၀၀)တောင့်ရသဖြင့် တစ်ဧကလျှင် ဝင်ငွေ (၄၅၅၀၀၀၀)ကျပ်ရရှိပါသည်။ အကျိုးအမြတ်အနေဖြင့် တစ်ဧကလျှင်(၁၅၀၀၀၀၀)ကျပ်အမြတ်ဝင်ငွေရရှိနိုင်ကြောင်း စိုက်ပျိုးသူတောင်သူတစ်ဦး၏ ပြောကြားချက်အရသိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့တွင်ရှိသော ငါးမွေးကန်များ၏ အဓိကအစားအစာသည် ဖွဲနုများဖြစ်သည်။ သာယာဝတီခရိုင်အတွင်းရှိ ဆန်စက်များကြိတ်ခွဲထုတ်လုပ်ရာမှ ထွက်ရှိသော ဆန်ထွက်ပစ္စည်းဖွဲနုများကို ဒေသတွင်းတိရိစ္ဆာန်အစားအစာအဖြစ် အသုံးပြုလျက်ရှိကြောင်းနှင့် အခြားသောတိုင်းနှင့်ပြည်နယ်များသို့လည်း တင်ပို့ရောင်းချလျက်ရှိကြောင်းသိရှိရပါသည်။ ယခင်ဩဂုတ်လ၊ နောက်ဆုံးအပတ်တွင် ဖွဲနုတစ်ပေါင်လျှင် ၃၁၀ကျပ်ဖြစ်ပြီး၊ ဖွဲနု ၆၅ပေါင်ပါ တစ်အိတ်လျှင် ၂၀၁၅၀ကျပ်ဈေးဖြင့် အရောင်းအဝယ်ဖြစ်နေကြောင်း၊ ယခုအောက်တိုဘာလ၊ ဒုတိယအပတ်တွင် ဖွဲနုတစ်ပေါင်လျှင် ၃၅၀ကျပ်သာပေါက်ဈေးရှိနေကြောင်း၊ ဖွဲနု ၆၅ပေါင်ပါ တစ်အိတ်လျှင် ၂၂၇၅၀ကျပ်ဈေးဖြင့် (လက်လီ)ရောင်းချရကြောင်း၊ ဖွဲနုဈေးကွက်အနေဖြင့် ယခင်လနှင့် ယခုလဈေးနှုန်းတို့ကိုနှိုင်းယှဉ်ပါက ဒေသတွင်းလိုအပ်ချက်များသောကြောင့် ဈေးနှုန်းသည် အတက်ဘက်သို့ဦး တည်လျက်ရှိကြောင်း ပွဲရုံပိုင်ရှင်တစ်ဦးထံမှသိရှိရပါသည်။

DOCA(ပဲခူး)

          ၂၀၂၄ခုနှစ်၊ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေး၌ အောက်တိုဘာလ ဒုတိယပတ်တွင်ရောင်းချနေသော ဂေါ်ရခါးသီးများကို မန္တလေးမြို့မှ မှာယူရောင်းချကြောင်း၊ ဂေါ်ရခါးသီး အလုံးအကြီး/ အသေး သောင်းပြောင်းအလုံးအရေအတွက် (၂၀၀/၂၂၀)ပါ တစ်အိတ်လျှင် ငွေကျပ်(၁၀၀၀၀၀)ဖြင့်ဝယ်ယူရသည့်အတွက် တစ်လုံးလျှင် ပျမ်းမျှဈေးနှုန်း ကျပ်(၄၈၀)ခန့်ဖြစ်ကြောင်း၊  ကန့်ဘလူမြို့ စားသုံးသူပြည်သူများထံသို့ ရောင်းချရာတွင် ဂေါ်ရခါးသီး အလုံးအကြီး/ အသေးပေါ်မူတည်၍ တစ်လုံးလျှင် (၆၀၀/၇၀၀)ကျပ်တို့ဖြင့်ရောင်းချရသဖြင့် ဂေါ်ရခါးသီးတစ်အိတ်ကုန်လျှင် အကျိုးအမြတ်အနေဖြင့် ကျပ်(၂၀၀၀၀)ခန့်ရှိကြောင်း ကန့်ဘလူမြို့မစည်ပင်သာယာဈေး ကုန်စိမ်းသီးနှံအစုံရောင်းချသူတစ်ဦးထံမှသိရှိရပါသည်။

DOCA(စစ်ကိုင်း)

     ဝါတွင်းကာလဖြတ်သန်းပြီး မကြာမှီ ပွင့်လင်းကာလဆောင်းအငွေ့အသက်များဖြင့် သီတင်းကျွတ်တော့မည်ဖြစ်ရာ မြန်မာနိုင်ငံတွင် တနင်္သာရီတိုင်းဒေသကြီး၏ ပွဲတော်များမှ အထင်ကရ ပွဲ တော်ကြီးဖြစ်သည့် ထားဝယ်မြို့တွင်သာရှိသည့် ရိုးရာသပိတ်မျှောပွဲတော်ကြီးသည် သီတင်းကျွတ်လပြည့်နေ့ အာရုဏ်တက်ချိန်တွင် သတ်မှတ်နေရာများမှ ထားဝယ်မြစ်ကမ်းတစ်လျှောက် သမုဒ္ဒရာကြီးအတွင်းမှ ရှင်ဥပ္ပဂုတ္တမထေရ်တော်မြတ်အား မနက်အာရုဏ်ဆွမ်း ဆက်ကပ်လှူန်းဒါန်းသည့်အနေဖြင့် သပိတ်များအတွင်း ဆွမ်း၊ ဆီမီး၊ ရေ၊ ပန်း၊ အချိုအချဥ်များနှင့်  စက္ကူတံခွန်/ကုက္ကားများအား ထည့်ကာ ချောင်း၊ မြစ်များမှတစ်ဆင့် ပင်လယ်သမုဒ္ဒရာကြီးအတွင်းသို့ ဆပ်ကပ်ပူဇော်သည့် ပွဲတော်ကြီးဖြစ်ပါသည်။

      အဆိုပါပွဲတော်ကြီးအတွက် ထားဝယ်မြို့ရှိ မြေအိုးသပိတ်များ၊ မြေသောက်တော်ရေခွက် အသေးများနှင့် တံခွန်/ကုက္ကားများမှာ ယခုနှစ်တွင် အနည်းငယ်အရောင်းသွက်လျက်ရှိပြီး ဆေးရည် အမဲသုတ်လိမ်းထားသော မြေအိုးသပိတ်အသေး တစ်လုံးလျှင် (၂၅၀၀/၃၀၀၀)ကျပ် ဖြင့် ရောင်းချလျက်ရှိပြီး သပိတ်အိုးများအတွင်း ထည့်သွင်းကပ်လှူသည့် မြေသောက်တော်ရေခွက် အသေး တစ်ခွက်လျှင်(၁၅၀/၂၀၀)ကျပ်ခန့်၊ တံခွန်/ကုက္ကား တစ်စုံလျှင် (၅၀၀/၆၀၀)ကျပ်ခန့် ရှိပြီး သပိတ်အိုးများ၊ မြေသောက်တော်ရေခွက်၊ တံခွန်/ကုက္ကား ပြုလုပ်ရသဖြင့် ဒေသခံများမှာလည်း တစ်နိုင်တစ်ပိုင် ဝင်ငွေများ ရရှိလျက်ရှိကြောင်း သိရှိရပါသည်။

DOCA(တနင်္သာရီ)

          မိုးရာသီအချိန်တွင်သာစားရသည့် ပေါ်ဦးပေါ်ဖျားဖြစ်သည့် ငါးလူးနှင့်ငါးဖမ်းမများကို ရွှေဘိုမြို့နှင့် ၁၆မိုင်ဝေးသည့် ကျောက်မြောင်းမြို့မှ ရွှေဘိုမြို့ပေါ်သို့ လာရောက်ရောင်းချလျက်ရှိကြောင်း၊ စားသုံးသူများသည်  မြစ်ရိုးမှလာသည့် ငါးဖြစ်သော ငါးလူးနှင့်ငါးဖမ်းမများကို သူ့ထက်ငါ အပြိုင်ဝယ်ယူလျက်ရှိကြောင်း၊ ငါးမှာ အချိုနှင့် ငါးစားနယ်ဟူ၍ (၂)မျိုးရှိကြောင်းသိရှိရပါသည်။

          ငါးလူးနှင့် ငါးဖမ်းမအချိုဆိုသည်မှာ ဆားမနယ်ဘဲ မြစ်ရိုးမှဖမ်းလာသည့် လတ်လတ်ဆက်ဆက်ငါးများကိုခေါ်ဆိုပြီး၊ ငါးစားနယ်ဆိုသည်မှာ ငါးကို ဆားနှင့်နယ်ပြီး (၁)ည (သို့မဟုတ်) (၂)ညသိပ်ထားသည်ကိုခေါ်ဆိုကြောင်း၊ ငါးလူးငါးစားနယ်ကြော်၊ ဖရုံးသီးဟင်းနှင့် မကျည်းသီးစိမ်းတို့ကိုချက်စားလျှင်  စားကောင်းသည့် ဟင်းအမယ်ဖြစ်ကြောင်း၊ ငါးအချိုနှင့် ငါးစားနယ်ဈေးနှုန်းမှာ ဈေးနှုန်းတူညီကြောင်း၊ ငါးလူးနှင့် ငါးဖမ်းမဈေးနှုန်းမှာ အရွယ်အစားအကြီး/အသေးပေါ်မူတည်၍ နှစ်ဆယ့်ငါးကျပ်သားလျှင် (၃၀၀ဝိ/-)ကျပ်မှ (၄၀၀ဝိ/-)ကျပ်ထိရောင်းချပြီး (၁)ပိဿာဈေးနှုန်းမှာ (၁၂၀၀ဝိ/-)   ကျပ်နှင့် (၁၆၀၀ဝိ/-) ကျပ်ထိဈေးနှုန်းဖြင့် ရောင်းချလျက်ရှိကြောင်းသိရှိရပါသည်။

DOCA(စစ်ကိုင်း)