ပြည်တွင်းကုန်သွယ်မှုသတင်း

                ပဲခူးတိုင်းဒေသကြီး ၊ ပြည်ကုန်စည်ဒိုင်တွင် မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲ၊ ပဲကြီးနှင့် ဘိုကိတ်ပဲများ အရောင်းအဝယ်ဖြစ်လျှက်ရှိပါသည်။

              မတ်ပဲနှင့်ပတ်သတ်၍ ပြည်ကုန်စည်ဒိုင်တွင် ဧပြီလအစတွင် မတ်ပဲတစ်တင်းကို ၄၆၀၀၀-၄၆၅၀၀-၄၇၀၀၀ကျပ် ဈေးဖြင့် တစ်ရက်ကို အိတ် ၃၀၀/၄၀၀ခန့် အရောင်းအဝယ်ရှိခဲ့ပါသည်။ သင်္ကြန်ပြီးကာလမှာတော့ မတ်ပဲဈေးပြန်မြင့်လာပြီး ပဲတစ်တင်းကို ၄၈၅၀၀-၄၉၀၀၀ကျပ်ဖြစ်လာပြီး အရောင်းအဝယ်မှာ အနည်းငယ်သာရှိခဲ့ပါသည်။ နောက်ဆုံးပတ်မှာတော့ ပဲတစ်တင်းကို ၄၈၅၀၀ကျပ်ဖြင့် အရောင်းအဝယ်အနည်းငယ်ရှိခဲ့ပါသည်။ ပြည်ကုန်စည်ဒိုင်တွင် မေလပထမပတ်တွင် မတ်ပဲဈေးကျလာပြီး ပဲတစ်တင်းကို ၄၇၆၀၀ကျပ်ဖြင့် အရောင်းအဝယ်ဖြစ်ပြီး ဒုတိယပတ်မှာတော့ ပဲဈေးမှာ ၄၈၀၀၀-၄၈၅၀၀ကျပ်ဖြင့် ဈေးပြန်တက်ခဲ့ပြီး တစ်ရက်ကို အိတ် ၁၀၀/၂၀၀ခန့်သာအဝယ်ရှိခဲ့ပါသည်။ တတိယပတ်မှာတော့ ပဲတစ်တင်းကို ၄၆၇၀၀-၄၇၀၀၀ကျပ်ဖြင့် ဈေးပြန်ကျခဲ့ပြီး နောက်ဆုံးပတ်မှာတော့ ပဲတစ်တင်းကို ၄၆၂၀၀-၄၇၂၀၀-၄၇၃၀၀-၄၇၅၀၀ကျပ်ဖြင့် ဈေးပြန်တက်ခဲ့ပြီး အရောင်းအဝယ်မှုမှာ လှောင်သမားများအဝယ်ရှိခဲ့ပြီး တစ်ရက်ကိုအိတ် ၃၀၀/၄၀၀ခန့် အဝယ်ရှိနေပါသည်။

             ကုလားပဲနှင့်ပတ်သတ်၍ ဧပြီလအစတွင် ပြည်ကုန်စည်ဒိုင်တွင် အရောင်းအဝယ်ဖြစ်လျှက်ရှိသော ကုလားပဲ ဟော်လန်တစ်တင်းကို ၄၃၅၀၀ကျပ်၊ ကုလားပဲ(မြကြေးမှုံ)တစ်တင်းကို ၄၄၅၀၀ကျပ်ဖြင့် ခွဲစက် သမားနှင့် ရန်ကုန်အဝယ်ရှိပြီး အရောင်းအဝယ်မှာ သွက်ခဲ့ပါသည်။ ဒုတိယပတ်မှာ ကုလားပဲ ဟော်လန်တစ်တင်းကို ၄၄၀၀၀ကျပ် ၊ ကုလားပဲ (မြကြေးမှုံ) တစ်တင်းကို ၄၅၀၀၀ကျပ်ဖြင့် အရောင်း အဝယ်ရှိခဲ့ပြီး တစ်ရက်ကိုအိတ် ၆၀၀/၇၀၀ခန့် အဝယ်ရှိခဲ့ပါသည်။ တတိယပတ်မှာတော့ ကုလားပဲ ဈေးတက်လာပြီး ကုလားပဲဟော်လန်တစ်တင်းကို ၄၅၅၀၀-၄၆၀၀၀ကျပ်၊ ကုလားပဲ (မြကြေးမှုံ) တစ်တင်းကို ၄၆၂၀၀ကျပ်ဖြင့် အဝယ်ရှိခဲ့ပါသည်။ နောက်ဆုံးပတ်မှာတော့ ကုလားပဲ ဟော်လန်တစ်တင်းကို ၄၄၈၀၀-၄၅၀၀၀ကျပ်၊ ကုလားပဲ (မြကြေးမှုံ) တစ်တင်းကို တစ်တင်းကို ၄၅၇၀၀-၄၅၈၀၀ကျပ်ဖြင့် ဈေးကျလာပြီး မြို့တွင်းအဝယ်နှင့် ရန်ကုန်အဝယ်ရှိခဲ့ပါသည်။ မေလပထမပတ်မှာ ကုလားပဲဟော်လန်တစ်တင်းကို ၄၅၀၀၀ကျပ်၊ ကုလားပဲ (မြကြေးမှုံ ဈေးအနည်းငယ်တက်လာပြီး မြို့တွင်းအဝယ်နှင့် ရန်ကုန် အဝယ်တစ်ရက်အိတ် ၂၀၀/၃၀၀ခန့် အဝယ်ရှိပါသည်။ ဒုတိယပတ်မှာ ကုလားပဲဈေး ထပ်တက်လာပြီး ကုလားပဲ (ဟော်လန်) တစ်တင်းကို ၄၆၅၀၀ကျပ်၊ ကုလားပဲ(မြကြေးမှုံ) တစ်တင်းကို ၄၈၀၀၀-၄၈၅၀၀ ကျပ်ဖြင့် ဈေးတက်ခဲ့ပြီး အဝယ်လည်းသွက်ခဲ့ပါသည်။ တတိယပတ်မှာတော့ ကုလားပဲ ဈေးထပ်တက်လာပြီး ကုလားပဲဟော်လန်တစ်တင်းကို ၄၇၀၀၀ကျပ်၊ ကုလားပဲ(မြကြေးမှုံ) တစ်တင်းကို ၄၈၅၀၀-၄၈၈၀၀-၄၉၀၀၀ကျပ်ဖြင့် ရန်ကုန်အဝယ်တစ်ရက်ကိုအိတ် ၄၀၀/၅၀၀ခန့် အဝယ်ရှိခဲ့ပါသည်။ မေလနောက်ဆုံးပတ်မှာ ကုလားပဲ(ဟော်လန်)တစ်တင်းကို ၄၈၃၀၀-၄၈၅၀၀ကျပ်၊ ကုလားပဲ (မြကြေးမှုံ) တစ်တင်းကို ၄၉၅၀၀ကျပ် ထိဈေးတက်လာခဲ့ပြီး ခွဲစက်သမားများ မြို့တွင်းရောင်းဝယ်မှုနှင့် လှောင်သမားများအဝယ်ရှိခဲ့ပါသည်။

          ပဲစင်းငုံနှင့်ပတ်သတ်၍ ပဲစင်းငုံသီးနှံမှာ ဧပြီလ၏ ပထမပတ်မှာ ပဲတစ်တင်းကို ၄၅၀၀၀ကျပ်ဖြစ်ပြီး ဒုတိယပတ်မှာတော့ ပဲစင်းငုံဈေးကျပြီး ပဲတစ်တင်းကို ၄၃၅၀၀ကျပ်ဖြင့် တစ်ရက်ကို အိတ် ၂၀၀/၃၀၀ခန့် အဝယ်ရှိခဲ့ပါသည်။ တတိယပတ်မှာ ပဲဈေးထပ်ကျပြီး ၄၂၅၀၀ကျပ်ဖြင့် အနည်းငယ်သာ အရောင်း အဝယ်ရှိပြီး တစ်ရက်ကို အိတ် ၁၀၀/၁၅၀ခန့်သာ အဝယ်ရှိခဲ့ပါသည်။ ဧပြီနောက်ဆုံးပတ်မှာတော့ ပဲတစ်တင်းကို ၄၃၀၀၀ကျပ်ဖြင့် တစ်ခါတစ်ရံမှသာအဝယ်ရှိပြီး အဝယ်ဖြစ်လျှင် အိတ် ၂၀၀/၃၀၀ခန့် ရန်ကုန်အဝယ်ရှိခဲ့ပါသည်။ မေလအစမှာ ပဲစင်းငုံတစ်တင်းကို ၄၄၀၀၀ကျပ်ဖြင့် ဈေးတက်ခဲ့ပြီး အရောင်းအဝယ်လည်း အနည်းငယ်သာရှိခဲ့ပါသည်။ မေလဒုတိယပတ်မှာတော့ ပဲဈေးမှာအေးနေပြီး တစ်တင်းကို ၄၄၀၀၀ ကျပ်ဖြင့် အရောင်းအဝယ်ဖြစ်ခဲ့ပါသည်။ မေလနောက်ဆုံးပတ်မှာ ပဲစင်းငုံဈေး အေးနေပြီး ပဲတစ်တင်းကို ၄၄၀၀၀-၄၄၅၀၀ကျပ်ဖြင့် တခါတရံမှသာ အရောင်းအဝယ်ဖြစ်ခဲ့ပါသည်။

            ဘိုကိတ်ပဲနှင့်ပတ်သတ်၍ ဧပြီပထမပတ်မှာ ဘိုကိတ်တစ်တင်းကို ၃၅၀၀၀-၃၅၅၀၀ကျပ်ဖြင့် အဝယ်ရှိပြီး ဒုတိယ ပတ်မှာတော့ ဘိုကိတ်တစ်တင်းကို ၃၅၅၀၀ကျပ်ဖြင့် ရန်ကုန်အဝယ်နှင့် မြို့တွင်း အဝယ်ရှိခဲ့ ပါသည်။ တတိယပတ်မှာတော့ ပဲဈေးကျပြီး ဘိုကိတ်တစ်တင်းကို ၃၄၀၀၀ကျပ်ဖြင့် ဈေးထပ်ကျလာခဲ့ပြီး နောက်ဆုံးပတ်မှာတော့ တတိယပတ်ဈေးဖြင့် ဈေးအေးနေပြီး အရောင်းအဝယ်မှာ တစ်ရက်ကိုအိတ် ၄၀/၅၀ ခန့် အဝယ်ရှိခဲ့ပါသည်။ မေလပထမပတ်နှင့် ဒုတိယပတ်တွင် ဘိုကိတ်ပဲဈေးအေးနေပြီး ပဲတစ်တင်းကို ၃၄၀၀၀ကျပ်ဖြင့် အရောင်းအဝယ်ဖြစ်ခဲ့ပါသည်။ တတိယပတ်မှာတော့ ပဲတစ်တင်းကို ၃၅၅၀၀ကျပ်ဖြစ်ခဲ့ပြီး နောက်ဆုံး ပတ်မှာတော့ ၃၆၀၀၀ကျပ်ဖြင့် ဈေးပြန်တက်ခါ တစ်ရက်ကိုအိတ် ၅၀/၁၀၀ခန့် အရောင်းအဝယ်ဖြစ်ခဲ့ပါသည်။

DOCA(ပဲခူး)

           ပဲခူးတိုင်း‌ဒေသကြီး ပြည်ပွဲရုံများသို့ အောင်ပန်းမှ ချင်း ၁၀ပိဿာအိတ် တစ်နေ့လျှင် ၄၀/၅၀ခန့် ပုံမှန် အဝင်ရှိနေသော်လည်း နယ်များတွင် မိုးများဆက်တိုက်ရွာသွန်းနေခြင်းကြောင့် အရောင်းအဝယ် အေးနေတယ်လို့ ပွဲရုံပိုင်ရှင်တစ်ဦးထံမှသိရပါသည်။ ခရိုင်အတွင်း လက်လီသမားတို့သာ အရောင်းအဝယ် ဖြစ်နေပါသည်။ ယခုတစ်ပတ် ချင်းဈေး(ပွဲရုံဈေး) တစ်ပိဿာလျှင် ၉၀၀-၁၀၀၀ကျပ်ဖြစ်ပြီး (လက်လီ) ဈေးမှာ ၁၅၀၀-၁၈၀၀ကျပ်ဈေးဖြစ်ပါသည်။ ဒါးလှီးချင်းဖတ် တစ်ပိဿာလျှင် ၁၇၀၀ကျပ် ဈေးတို့ဖြင့် ရောင်းချလျှက်ရှိပါသည်။

           နယ်များတွင် မိုးများဆက်တိုက်ရွာသွန်းနေသဖြင့် မန်ကျည်းမှည့် အရောင်းအဝယ် သိသိသာသာအေးလာသဖြင့် ပြည်မန်ကျည်းမှည့်ပွဲရုံများတွင် ယခုရက်ပိုင်း အရောင်း အဝယ် သိပ်မဖြစ်ဘူးလို့ ပွဲရုံပိုင်ရှင်တစ်ဦးကဆိုပါတယ်။ မန်ကျည်းမှည့်ဈေးမှာ လက်လီ သမားများက တစ်ခါ ဝယ်လျှင် (၁၀)ပိဿာလောက်သာ အနည်းငယ် အဝယ်ရှိကြပြီး၊ ဈေးနှုန်းမှာ ယခင်အပတ် ဈေးအတိုင်းသာဖြစ်ကြောင်း သိရပါသည်။ ယခုဇွန်လပထမပတ်တွင် မန်ကျည်းမှည့် တစ်ပိဿာ (ပွဲရုံဈေး) ၃၂၀၀ကျပ်တို့ဖြင့် လက်ကားရောင်းချနေပြီး လက်လီဈေးများတွင် တစ်ပိဿာလျှင် ၃၈၀၀-၄၀၀၀ကျပ်ဈေးဖြင့် ရောင်းချလျှက်ရှိနေပါကြောင်း သိရှိရပါသည်။

DOCA(ပဲခူး)

            ပဲခူးတိုင်း‌ဒေသကြီး ပြည်ပဲဈေးကွက်တွင် လက်လီရောင်းဝယ်မှုအဖြစ်များသလို ပြည်တွင်းဝယ်လက်များထဲ ပဲသီးနှံ အားလုံးလိုလို ယခုနှစ်ဈေးကောင်းရတယ်လို့ ဆိုရမှာဖြစ်ပါတယ်။ ဗိုလ်ကိတ်ပဲနှင့် ပဲလွမ်းဖြူ သီးနှံများမှာ ပဲဝင်ရောက်မှု့ အနည်းငယ်ရှိသလို လက်ကျန်ပဲများရှိခဲ့တာကြောင့် တစ်ရက်အိတ် ၂၀/၃၀ ကျော်ရောင်းချခဲ့ကြရပြီး ပဲဈေးနှုန်းများမှာ ဗိုလ်ကိတ်တစ်တင်း ၃၆၀၀၀ကျပ်၊ ပဲလွမ်းဖြူ တစ်တင်း ၃၈၀၀၀ကျပ်တို့ဖြင့် ရောင်းဝယ်နေခဲ့ကြသလို ထောပတ်ပဲနှင့် ပဲနီပြားသီးနှံကတော့ ဈေးကောင်းရလို့ ထောပတ်ပဲတစ်တင်း ၄၆၀၀၀ကျပ်၊ ပဲနီပြားတစ်တင်း ၄၇၀၀၀ကျပ်မှ ၅၀၀၀၀ကျပ် တို့ဖြင့် လက်လီပဲ ဈေးကွက်မှာ ဈေးအမြင့်ဖြင့် ရောင်းဝယ်နေကြတဲ့ ပဲများဖြစ်ခဲ့ပါတယ်။ အရောင်းအဝယ်ဖြစ်မှုကတော့ လက်လီဝယ်ယူမှုပိုများခဲ့ကြောင်း သိရှိရပါသည်။

          ပဲမျိုးစုံဈေးနှုန်းများမှာ ပြည်ပဝယ်လိုအားများသောပဲများထက် ပြည်တွင်းဝယ်လိုအားရှိသော ပဲသီးနှံများဈေးမြင့်လာခဲ့ကြောင်း သိရှိရပါသည်။ မတ်ပဲ၊ ပဲတီစိမ်း၊ ပဲစင်းငုံ၊ ပြည်ပဝယ်လက် အဓိကရှိသောပဲများတွင် ပဲတီစိမ်းနှင့် ပဲစင်းငုံသီးနှံမှာ ပဲအဝင်လုံးဝမရှိတော့ဘဲ မတ်ပဲသီးနှံသာ ဝင်ရောက်မှုအနည်းငယ်ရှိနေခဲ့ပါသည်။ ဒါ့ကြောင့် အရောင်းအဝယ်ဖြစ်မှု ပမာဏအနေဖြင့် မတ်ပဲ သီးနှံအိတ်ရေ ၁၀၀/၂၀၀ကျော် ပုံမှန်အရောင်းအဝယ်ဖြစ်ခဲ့ကာ ပိဿာ(၂၀) တစ်တင်း ၄၇၅၀၀ ကျပ်ဖြင့် ယခင်ရက်များကထက် ဈေးလျော့မသွားသော်လည်း သိသိသာသာ ဈေးမြင့်တက်ခဲ့ခြင်း မျိုးမရှိခဲ့ပါ။ ယခင်နှစ်က ဇွန်လဆန်းတွင် တစ်တင်း ၃၄၅၀၀ကျပ်ဖြင့် အရောင်းအဝယ် ဖြစ်ခဲ့တဲ့အတွက် ယခုနှစ်ဈေးကတော့ တစ်တင်းကျပ် ၁သောင်းကျော်မြင့်တက်လျှက်ရှိပြီး လှောင်သမားတောင်သူများအနေဖြင့် ငွေလို၍ထုတ်ရောင်းချမှု အနည်းငယ်သာရှိခဲ့ကြတာကိုတွေ့ရပါတယ်။ ပဲစင်းငုံသီးနှံမှာ ပဲအဝင်မရှိပေမယ့် လှောင်ပဲလက်ကျန်ရှိတာကြောင့် ရန်ကုန်ဝယ်လက်ဝယ်ယူမှု ရသည့်ရက်တွင် အိတ် ၁၀၀/၂၀၀ခန့် အရောင်းအဝယ်ဖြစ်ပြီး ပဲစင်းငုံသီးနှံဈေး တစ်တင်း ၄၄၅၀၀ကျပ်ဖြင့် ယခုနှစ်ဈေးထက်ကျပ် ၂သောင်းနီးပါးမြင့်တက်ခဲ့ကြောင်း သိရပါတယ်။ ယခင်နှစ်က ဇွန်လအတွင်း ပဲစင်းငုံဈေးမှာ တစ်တင်း ၂၉၀၀၀ကျပ်ဖြင့် ကျပ် ၃၀၀၀၀ အောက်လျော့နည်းခဲ့တဲ့အတွက် ယခုနှစ် ပဲစင်းငုံသီးနှံ ပဲအသစ်ပေါ်စမှစ၍ ဈေးကောင်းရရှိနေခဲ့တဲ့ သီးနှံဖြစ်ကြောင်း သိရှိရပါသည်။

DOCA(ပဲခူး)

               ပဲခူးတိုင်းဒေသကြီး၊ တောင်ငူမြို့တွင် စားအုန်းဆီလက်လီ၊ လက်ကား အများဆုံးရောင်းချနေသည့် ပွဲရုံကြီး ၁၁ ရုံရှိရာ တောင်ငူမြို့နယ်တာဝန်ခံသည် ဇွန်လ ၈ ရက်နေ့တွင် ၎င်းပွဲရုံကြီးများသို့ ကွင်းဆင်း၍ ဈေးနှုန်းနှင့် လက်ကျန်အခြေအနေများကို မေးမြန်းခဲ့ပါသည်။ ထိုသို့ ကွင်းဆင်းကြည့်ရှုမေးမြန်းရာ တွင် ဆိုင်တစ်ဆိုင်သည် ဆီမရှိ၍ ပိတ်ထားသည်ကိုတွေ့ရှိရပြီး ကျန် ၁၀ ဆိုင်များမှာ ဆီပုံးများ ဖောက်၍ ရောင်းချနေသည်ကို တွေ့ရှိရပါသည်။ ဈေးနှုန်းမှာ ဆီပုံးခွံပါ ၁၀ ပိဿာတစ်ပုံးလျှင် ၈၀၀၀၀ ကျပ် ဖြစ်ပြီး ပုံးခွံမပါ ဖောက်ရောင်းပါက တစ်ပိဿာလျှင် ၇၇၀၀ ကျပ် ရောင်းချနေသည်ကို တွေ့ရှိရပါသည်။

              တောင်ငူမြို့ပေါ်တွင် ရပ်ကွက် ၂၇ ခုရှိရာ ရပ်ကွက်တိုင်းရှိ လမ်းဆုံတိုင်းတွင် မိသားစု လုပ်ကိုင်ဆောင်ရွက်နေသည့် ဘယာကြော်၊ ဘူးသီးကြော်ဆိုင်လေးများရှိပါသည်။ အကြော်ဆိုင်များအတွက် ဆီဝယ်ယူရရှိမှု အခက်အခဲအား မေးမြန်းကြည့်ရာ အကြော်ရောင်းသည့် ဆိုင်များအတွက် စားအုန်းဆီသည် အဓိကကျကြောင်း၊ ယခုအခါ စားအုန်းဆီဈေးတက်လာသောကြောင့် တစ်ပိဿာလျှင် ၇၇၀၀ ကျပ် ဝယ်ယူရပါကြောင်း၊ ယခင်က အကြော်သုံးခုလျှင် ၂၀၀ ကျပ်ရောင်းပါကြောင်း၊ ယခုအခါ စားအုန်းဆီဈေး တက်လာသည့်အတွက် အကြော်တစ်ခုလျှင် ၁၀၀ ကျပ် ရောင်းပါကြောင်း၊ အကြော်တစ်ခုလျှင် ၁၀၀ ကျပ်ရောင်းသော်လည်း အမြတ်ရရှိမှု နည်းပါကြောင်း၊ မိရိုးဖလာ အကြော်ရောင်းနေသည့်အတွက် ရောင်းနေရပါကြောင်း၊ တခါတလေ လက်ကျန်အကြော်နှင့် ထမင်းစားရသည်မှာ အမြတ်ဖြစ်ပါကြောင်း ၁၈ ရပ်ကွက်အတွင်း ဘယာကြော်၊ ဘူးသီးကြော်ရောင်းချသူ ဒေါ်စန်းစန်းအေး၏ ပြောပြချက်အရ သိရှိရပါသည်။

DOCA(ပဲခူး)

            စစ်ကိုင်းတိုင်းဒေသကြီး၊ မုံရွာမြို့ရှိ မုံရွာကုန်စည်ဒိုင်အဖွဲ့ဝင်များအနေဖြင့် မေလ လဆန်းပိုင်းမှ စတင်၍ ကုန်စည်ဒိုင် စတင်ပြန်လည် လည်ပတ်ခဲ့ကြောင်း သိရပါသည်။ ဇွန်လ ဒုတိယပတ်တွင် ဖြစ်ပေါ် နေသော ပဲဈေးနှုန်းများမှာ ပဲတီစိမ်း(ကြီး)တစ်တင်းကျပ် ၄၃၀၀၀၊ ပဲတီစိမ်း(သေး) တစ်တင်း ကျပ် ၃၆၀၀၀၊ ပဲစဉ်းငုံ တစ်တင်းကျပ် ၄၂၇၀၀၊ မတ်ပဲ တစ်တင်းကျပ် ၄၈၀၀၀၊ ကုလားပဲ ထိုင်ဝမ် တစ်တင်း ကျပ် ၄၄၅၀၀၊ ကုလားပဲ 929 တစ်တင်း ကျပ် ၄၂၇၀၀၊ ကုလားပဲ V2(သစ်) တစ်တင်း ကျပ် ၄၈၇၀၀၊ ကုလားပဲ V3,7 တစ်တင်း ကျပ် ၄၉၃၀၀ ဈေးနှုန်းများဖြင့် အရောင်းအဝယ် ဖြစ်နေ ကြောင်း သိရပါသည်။

            ဂျုံဖြူသန့်တစ်တင်း ကျပ် ၄၄၀၀၀၊ ဂျုံနီတစ်တင်း ကျပ် ၄၀၅၀၀၊ ပဲကြီး(သစ်) တစ်တင်း ကျပ် ၆၆၀၀၀၊ ပဲနီလုံး ရိုးရိုး တစ်တင်း ကျပ် ၄၂၅၀၀၊ ပဲနီလုံးကြား တစ်တင်း ကျပ် ၄၄၀၀၀၊  ပဲပုတ်စေ့(ဗမာ) တစ်တင်း ကျပ် ၅၆၀၀၀၊ ပဲပုတ်စေ့ (ရှမ်း)တစ်တင်း ကျပ် ၄၁၇၀၀၊ ထောပတ်ပဲ တစ်တင်း ကျပ် ၄၁၀၀၀၊  မြေထောက်ပဲ တစ်တင်း ကျပ် ၅၀၀၀၀၊ ပုဂံပဲ တစ်တင်း ကျပ် ၆၁၀၀၀၊ ပဲလွန်းဖြူတစ်တင်း ကျပ် ၃၅၀၀၀၊ ပဲလွန်းပြာ တစ်တင်း ကျပ် ၃၀၅၀၀၊ ပဲယင်းဝါတစ်တင်း ကျပ် ၄၃၀၀၀၊ အစေ့ထုတ်ပြောင်း(CP) တစ်တင်း ကျပ် ၁၈၀၀၀၊ ပြောင်းနီ တစ်တင်း ကျပ် ၁၃၅၀၀၊ ပြောင်းဖြူ တစ်တင်း ကျပ် ၁၄၀၀၀၊ ဆီထွက်သီးနှံများ ဖြစ်သော နှမ်းသီးနှံ ပေါက်ဈေးနှုန်း များမှာ နှမ်းညိုတစ်တင်း ကျပ် ၅၁၀၀၀၊ နှမ်းနက်တစ်တင်း ကျပ် ၆၅၀၀၀၊ နှမ်းဖြူ တစ်တင်း ကျပ် ၅၂၅၀၀၊ နှမ်းနီတစ်တင်း ကျပ် ၅၂၀၀၀၊ မြေပဲလုံး ဆံနီ တစ်ပိဿာ ကျပ်၄၀၅၀၊ မြေပဲလုံးဆံဖြူ တစ်ပိဿာ ကျပ် ၄၁၀၀၊ ပဲဖတ်တစ်ပိဿာ ကျပ် ၂၀၅၀၊ နှမ်းဖတ် တစ်ပိဿာ ကျပ် ၁၄၅၀၊ နေကြာဖတ် တစ်ပိဿာ ကျပ် ၁၀၈၀ ဈေးနှုန်းအသီးသီးဖြင့် အရောင်းအဝယ်ဖြစ်နေကြောင်း သိရပါသည်။

           ယခုအပတ်ဈေးနှုန်းများမှာ ယခင်အပတ်နှင့် နှိုင်းယှဉ်လျှင် ပဲဈေးနှုန်းများမှာ အနည်းငယ်ဈေးတက်နေပြီး၊ ဆီထွက်သီးနှံဈေးနှုန်းများဖြစ်သော မြေပဲဆံနှင့် နှမ်းသီးနှံ ဈေးနှုန်းများမှာ အနည်းငယ်‌ ဈေးကျနေကြောင်း သိရှိရပါသည်။

DOCA(စစ်ကိုင်း)