၂၀၂၄ ခုနှစ်၊ မေလ (၂၀) ရက်နေ့မှ (၂၃) ရက်နေ့အထိ Hybrid စနစ်ဖြင့် ဘရူနိုင်းနိုင်ငံ၊ ဘန်ဒါဆရီဘဂါဝမ်မြို့၌ ကျင်းပပြုလုပ်ခဲ့သည့် “(၂၈) ကြိမ်မြောက် အာဆီယံစားသုံးသူကာကွယ်ရေး ကော်မတီအစည်းအဝေးနှင့် ဆက်စပ်အစည်းအဝေးများ”သို့ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာနမှ ညွှန်ကြားရေးမှူးချုပ်၊ ဦးအောင်အောင် ဦးဆောင်၍ ဒုတိယ ညွှန်ကြားရေးမှူးချုပ်၊ ညွှန်ကြားရေးမှူးများ၊ ဒုတိယညွှန်ကြားရေးမှူးများနှင့် ဘာသာရပ်ဆိုင်ရာ အရာထမ်းများက ရုံးအမှတ် (၅၂)၊ စားသုံးသူရေးရာဦးစီးဌာန၊ နေပြည်တော်တွင် Virtual စနစ်ဖြင့် တက်ရောက်ခဲ့ပါသည်။
အစည်းအဝေးကျင်းပရခြင်း၏ ရည်ရွယ်ချက်မှာ အာဆီယံစားသုံးသူကာကွယ်ရေးကော်မတီ အဖွဲ့ဝင်နိုင်ငံများအနေဖြင့် အာဆီယံစားသုံးသူကာကွယ်ရေးမဟာဗျုဟာလုပ်ငန်းစီမံချက် (၂၀၁၆-၂၀၂၅) ပါလုပ်ငန်းများကို ပိုမိုထိရောက်စွာ လိုက်ပါအကောင်အထည်ဖော်ဆောင်ရွက်ရန်၊ အာဆီယံစားသုံးသူ ကာကွယ်ရေးမဟာဗျုဟာလုပ်ငန်းစီမံချက် (၂၀၂၆-၂၀၃၀)တွင် ထည့်သွင်းသွားမည့်လုပ်ငန်းများကို အကြံပြုဆွေးနွေးရန်နှင့် အာဆီယံနိုင်ငံများနှင့် မိတ်ဖက်အဖွဲ့အစည်းများမှ အရင်းအမြစ်တည်ဆောက် ရေးဆိုင်ရာ နည်းပညာအကူအညီများကို ရယူဖလှယ်နိုင်ရန်တို့အတွက် ဖြစ်ပါသည်။
(၂၈) ကြိမ်မြောက် အာဆီယံစားသုံးသူကာကွယ်ရေးကော်မတီအစည်းအဝေးနှင့် ဆက်စပ် အစည်းအဝေးများ ဖွင့်ပွဲအခမ်းအနားတွင် အိမ်ရှင် ဘရူနိုင်းနိုင်ငံမှ စီးပွားရေးစီမံကိန်းနှင့် စာရင်းအင်း ဦးစီးဌာနမှ ညွှန်ကြားရေးမှူးချုပ်ဖြစ်သူ Ms. Heidi Farah Sia Abd Rahman၊ အာဆီယံစားသုံးသူ ကာကွယ်ရေးကော်မတီဥက္ကဋ္ဌအဖြစ် တာဝန်ယူဆောင်ရွက်သည့် စင်ကာပူနိုင်ငံ ယှဉ်ပြိုင်မှုနှင့် စားသုံးသူကာကွယ်ရေးကော်မရှင်မှ လက်ထောက်အမှုဆောင်အရာရှိချုပ်ဖြစ်သူ Mr. Loke Shiu Meng တို့မှ အဖွင့်အမှာစကားပြောကြားခဲ့ကြပြီး အစည်းအဝေးသို့ လေ့လာသူအဖြစ် တက်ရောက် သည့် Timor- Leste နိုင်ငံမှ ကိုယ်စားလှယ်တစ်ဦးကလည်း မိတ်ဆက်စကားပြောကြားခဲ့ပါသည်။ (၂၈) ကြိမ်မြောက် အာဆီယံစားသုံးသူကာကွယ်ရေးကော်မတီအစည်းအဝေးနှင့် ဆက်စပ်အစည်းအဝေး များတွင် အဓိကအားဖြင့် အာဆီယံစီးပွားရေးဝန်ကြီးများအစည်းအဝေး၊ အဆင့်မြင့်စီးပွားရေးအရာရှိ များ အစည်းအဝေးနှင့် ဆက်စပ်အစည်းအဝေးတွင် ချမှတ်ခဲ့သည့် ဆုံးဖြတ်ချက်များ၊ အာဆီယံ စားသုံးသူကာကွယ်ရေးမဟာဗျုဟာလုပ်ငန်းစီမံချက်(၂၀၁၆-၂၀၂၅) ပါ ဆောင်ရွက်နေသည့်လုပ်ငန်း များနှင့် နှစ်အလိုက် ဦးစားပေးဆောင်ရွက်လျက်ရှိသည့် လုပ်ငန်းများ၊ အာဆီယံမိတ်ဖက်အဖွဲ့အစည်း များမှ နည်းပညာအကူအညီပေးအပ်၍ အကောင်အထည်ဖော်ဆောင်ရွက်နေသည့် လုပ်ငန်းများနှင့် ရှေ့ဆက်လက်ဆောင်ရွက်သွားမည့်လုပ်ငန်းများနှင့် ဩစတြေးလျ၊ နယူးဇီလန်၊ ကနေဒါ၊ တရုတ်နိုင်ငံ တို့နှင့် လွတ်လပ်သော ကုန်သွယ်မှုဒေသသဘောတူညီချက်ပါ စားသုံးသူကာကွယ်ရေးကဏ္ဍနှင့် စပ်လျဉ်း ၍ အကောင်အထည်ဖော်ဆောင်ရွက်ရေးကိစ္စရပ်များကို ဆွေးနွေးခဲ့ကြပါသည်။
