သတင်းနှင့် လှုပ်ရှားမှုများ

             ကရင်ပြည်နယ်၊ စားသုံးသူရေးရာဦးစီးဌာန၊ မြဝတီခရိုင်ဦးစီးမှူးရုံးမှ ခရိုင်ဦးစီးမှူး ဦးနိုင်မိုးကိုနှင့် ခရိုင်ဝန်ထမ်းများသည် ၁၅.၂.၂၀၂၂ ရက်နေ့ (၀၉း၃၀)နာရီအချိန်တွင် ခရိုင်စီမံအုပ်ချုပ်ရေးအဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ (FDA)၊ မြန်မာနိုင်ငံရဲတပ်ဖွဲ့၊ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ စည်ပင်သာယာရေးအဖွဲ့(ဈေး)များ ပါဝင်သော ပူးပေါင်းအဖွဲ့သည် FDAဦးဆောင်မှုဖြင့် အစားအသောက်နှင့်ဆေးဝါးကွပ်ကဲရေးဦးစီးဌာနမှ ထောက်ခံချက်မရှိဘဲ နယ်စပ်မှတရားမဝင် ဝင်ရောက်လာသော အသားချောင်းများ၊ စားသုံးမိ၍ ဘေးဥပါဒ်ဖြစ်ပွားနေကြောင်း တွေ့ရှိရသောကြောင့် စားသုံးခြင်းမပြုရန် ရောင်းဝယ်ဖောက်ကားမှုများ မြဝတီဘုရင့်နောင်ဈေးကြီးအတွင်း ရောင်းချမှု ရှိ/မရှိကို ဌာနဆိုင်ရာ ပူးပေါင်းစစ်ဆေးရေးအဖွဲ့ဖြင့် ကွင်းဆင်းစစ်ဆေးခဲ့ကြပါသည်။

          အဆိုပါ စစ်ဆေးမှုတွင် FDAမှ တားမြစ်ထုတ်ပြန်ထားသော ထိုင်းနိုင်ငံထုတ် ကြက်သားလုံးချောင်းများ ရောင်းချခြင်းကို မတွေ့ရှိရသော်လည်း၊ ပင်လယ်စာနှင့် အသားချောင်း၊ အသားပြားများ ရောင်းချနေသော ဆိုင်များတွင် သက်တမ်းလွန်သော အသားချောင်းများ၊ သတ်မှတ်စည်းကမ်း အေးခဲသောနေရာတွင်ထားရှိပြီး ရောင်းချခြင်းမျိုးမဟုတ်ဘဲ နေရောင်ခြည်နှင့် တိုက်ရိုက်ထိတွေ့ပြီး ရောဂါပိုးပေါက်ဖွားလွယ်စွာထားရှိပြီး ရောင်းချနေသော အသားပြား၊ အသားလုံး၊ အသားချောင်းများကို သိမ်းဆည်းခဲ့ကြောင်းသိရှိရပါသည်။

          သိမ်းဆည်းရမိသော စားသောက်ကုန် ပင်လယ်စာ အကင်၊ အသားလုံး၊ အသားပြား ရောင်းချနေသော ဆိုင်(၆)ဆိုင်နှင့် သိမ်းရမိသော တန်ဖိုးငွေကျပ် ၄၇၀၀၀/- ကျပ်တန်းဖိုးရှိသော သက်တမ်း လွန်နေသော အသင့်စားခေါက်ဆွဲထုတ် တရုတ်နိုင်ငံထုတ် (၁၅၀၀)တန် ၃ထုတ်၊ တရုတ်နိုင်ငံထုတ် သက်တမ်းလွန်ဟင်းခတ်မှုန့် ၁၅၀၀ကျပ်တန် (၇)ထုတ်၊ တရုတ်နိုင်ငံထုတ် သက်တမ်းလွန်ငရုတ်မှုန့် ၁၀၀၀ကျပ်တန် (၂)ထုတ်၊ ထိုင်းနိုင်ငံထုတ် သက်တမ်းလွန် အချဉ်ရည်ပုံး ၅၀၀၀/-တန် (၃)ပုံး၊ အကင်တစ်ပုံ တစ်ထောင်တန် (၁၅)ပုံစာ ၁၅၀၀၀ကျပ် နှင့် စုစုပေါင်းတန်းဖိုး ၄၇၀၀၀/- ကို အဖွဲ့စုံဖြင့် သိမ်းဆည်းခဲ့ပြီး စည်ပင်သာယာရေးအဖွဲ့(ဈေး)ရုံးခန်းမတွင် နေ့လည် (၁၃း၀၀)နာရီအချိန်တွင် အသားပြားရောင်းချသူလုပ်ငန်းရှင်များအား ခေါ်ယူတွေ့ဆုံ၍ ဌာနဆိုင်ရာ ပူးပေါင်းစစ်ဆေးရေးအဖွဲ့စုံ ရှေ့မှောက်တွင် သက်ဆိုင်ရာဌာန၏ဥပဒေနည်းလမ်းများ၊ စားသုံးသူရေးရာဦးစီးဌာနမှလည်း စားသုံးသူကာကွယ်ရေးသိကောင်းစရာများ လုပ်ငန်းရှင်တို့၏ လိုက်နာရမည့်တာဝန်၊ တားမြစ်ချက်များ၊ ပြစ်မှုပြစ်ဒဏ်များကို အကျယ်တဝင့် ရှင်းလင်းဆွေးနွေးခြင်းနှင့် လက်ကမ်းစာစောင်များဖြန့်ဝေပြီး၊ လုပ်ငန်းရှင်များအား သတ်မှတ်စည်းကမ်းများဖြင့် လိုက်နာဆောင်ရွက်ရောင်းချရန် ဝန်ခံကတိလက်မှတ်ရေးထိုးခြင်းနှင့် အများပြည်သူရှေ့မှောက်တွင် ဖမ်းဆီးခဲ့သော ပစ္စည်းများအား မြေမြှုပ်ခဲ့ကြောင်း သိရှိရပါသည်။

DOCA (ကရင်)

           (၁၄-၂-၂၀၂၂)နေ့ နံနက်(၀၉:၃၀)အချိန်တွင် ရခိုင်ပြည်နယ် စစ်တွေမြို့ရှိ အစားသောက်နှင့်ဆေးဝါးကွပ်ကဲရေးဦးစီးဌာန(FDA)ဦးဆောင်ပြီး ထွေအုပ်၊ စည်ပင်၊ ကျန်းမာရေး၊ မွေး/ကု၊ မြန်မာနိုင်ငံရဲတပ်ဖွဲ့နှင့် စားသုံးသူရေးရာဦးစီးဌာနမှ (စစ်တွေခရိုင်ဦးစီးမှူး) ပါဝင်သော ပူးပေါင်းအဖွဲ့သည် စစ်တွေမြို့ပေါ် ရပ်ကွက်ရှိ စတိုးဆိုင်များ၊ ဈေးဆိုင်များအား ရှောင်တခင် ကွင်းဆင်းစစ်ဆေးခြင်း ဆောင်ရွက်ခဲ့ ပါသည်။

         ကွင်းဆင်းစစ်ဆေးရခြင်း၏ ရည်ရွယ်ချက်မှာ ဈေးကွက်အတွင်း အသင့်စားအသားချောင်း၊ အသားလုံး၊ အသားပြားများ၊ငါးအသားချောင်းနှင့် ပင်လယ်စာချောင်းအမျိုးမျိုးတို့သည် အစားအသောက်နှင့်ဆေးဝါးကွပ်ကဲရေးဦးစီးဌာနမှ ထောက်ခံချက်ရယူထားခြင်းမရှိဘဲ နယ်စပ်ဒေသမှ တရားမဝင် ဝင်ရောက်လာပြီး ပြည်တွင်း၌ ဖြန့်ဖြူးရောင်းချနေကြောင်း‌တွေ့ရှိရသည့်အတွက် ၎င်းအစားအသောက်များအား စားသုံးမိသည့် ကလေးသူငယ်များကို အသက်အန္တရာယ်ထိခိုက်နိုင်သည်အထိ ဆိုးကျိုးများဖြစ်ပေါ်နေသည့်အတွက် စားသုံးသူမိဘပြည်သူများဆင်ခြင်သတိပြု ရှောင်ရှားနိုင်ကြရန်နှင့် ဈေးကွက်အတွင်းမှပပျောက်စေရန် ရည်ရွယ်၍ ကွင်းဆင်းစစ်ဆေးဆောင်ရွက်ရခြင်းဖြစ်ပါသည်။

        ထိုသို့ဆောင်ရွက်ရာတွင် စစ်တွေမြို့ပေါ်ရပ်ကွက်များရှိ စတိုး/ဈေးဆိုင်(၅)ဆိုင်အား စစ်ဆေးခဲ့ရာ ဆိုင် (၄)ဆိုင်တွင် စားသုံးရန်မသင့်သည့် အသင့်စား အသားချောင်း၊ အသားလုံးနှင့် အသားပြားများရောင်းချ‌နေကြောင်းတွေ့ရှိရသည့်အတွက် FDA မှ ရောင်းချသူများအား ဤအသင့်စား အသားချောင်း၊ အသားလုံးနှင့်အသားပြားများသည် စားသုံးသူများအား အသက်အန္တရာယ် ထိခိုက်စေနိုင်သည့်အတွက် ဖြန့်ဖြူးရောင်းချခြင်းမပြုလုပ်ကြရန်နှင့် ဆက်လက်ရောင်းချသည်ကို စစ်ဆေးတွေ့ရှိရပါက ရောင်းဝယ်ဖောက်ကားသူများအား အမျိုးသားအစားအသောက်ဥပဒေအရ အရေးယူဆောင်ရွက်သွားမည်ဖြစ်ကြောင်း အသိပညာပေးခြင်းနှင့် သတိပေးတားမြစ်ခြင်း စားသုံးသူရေးရာဦးစီးဌာနမှလည်း ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်ပစ္စည်းများတွင် မြန်မာဘာသာဖြင့် ဖော်ပြထားခြင်းမရှိသည့် ကုန်ပစ္စည်းများအား ရောင်းချပါက ၂၀၁၉ စားသုံးသူ ကာကွယ်ရေးဥပဒေအရ အရေးယူဆောင်ရွက်နိုင်ကြောင်း အသိပညာပေးခြင်းတို့ကို ဆောင်ရွက်ခဲ့ကြပြီး စားသုံးရန်မသင့်သည့် ထိုင်းစာသားအမှတ်တံဆိပ်ပါ အသားချောင်း၊ အသားလုံး၊ အသားပြား ပစ္စည်းအမျိုးအမည်(၂၀)မျိုး အရေအတွက်(၆၆)ထုပ် အားပူးပေါင်းအဖွဲ့မှ သိမ်းဆည်းခြင်းတို့ကိုဆောင်ရွက်ခဲ့ကြောင်း သိရှိရပါသည်။

DOCA(ရခိုင်)

        ပဲခူးတိုင်းဒေသကြီး၊ သာယာဝတီခရိုင် ၊ စားသုံးသူရေးရာဦးစီးဌာန ၊ ခရိုင်ဦးစီးမှူးဦး‌အောင်သိန်း ဦးဆောင်၍ ပြည်တွင်းတာဝန်ခံဒေါ်ခင်ခင်ထိုက်၊ လက်ပံတန်းမြို့နယ်တာဝန်ခံ ဦးချစ်ကိုကိုနှင့်အဖွဲ့သည် (၉.၂.၂၀၂၂) ရက်နေ့တွင် လက်ပံတန်းမြို့နယ် DENKO စက်သုံးဆီအရောင်းဆိုင်သို့ သွားရောက်၍ သတ်မှတ်ထားသော စက်သုံးဆီခွဲတမ်းများ၊ သတ်မှတ်အရည်အသွေးမပြည့်မှီသော ကုန်စည်များအား အမျိုးအစားတူကုန်စည်နှင့် ရောနှောရောင်းချခြင်းမပြုရန်နှင့် စျေးနှုန်းများ အရည်အသွေးများ အချိန်အတွယ်ပမာဏများအတိုင်း မှန်ကန်ပြည့်စုံစွာ ရောင်းချမှုရှိစေရေး စျေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်း သတင်းရရှိပါသည်။

DOCA(ပဲခူး)

           စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးဦးမျိုးအောင်သည် တောင်ငူမြို့နယ် ဈေးကွက်စောင့်ကြည့်စစ်ဆေးကြပ်မတ်ရေးကော်မတီဝင်များဖြစ်ကြသော မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့နှင့် မြို့နယ်စည်ပင်သာယာရေးအဖွဲ့တို့မှ တာဝန်ရှိသူများ၊ ခရိုင်ဦးစီးမှူးရုံးမှ ဌာနခွဲတာဝန်ခံနှင့် တောင်ငူမြို့နယ်တာဝန်ခံတို့နှင့်အတူ ဖေဖော်ဝါရီလ ၇ ရက်နေ့ နံနက်ပိုင်းက မြန်မာနိုင်ငံတော်ဗဟိုဘဏ်မှ ရည်ညွှန်းငွေလဲလှယ်နှုန်းဖြင့် ရောင်းချပေးသည့် နိုင်ငံခြားငွေရရှိသော စက်သုံးဆီကုမ္ပဏီများမှ တောင်ငူမြို့နယ်အတွင်း အထူးဈေးနှုန်းဖြင့် ရောင်းချသည့် စက်သုံးဆီဆိုင်များသို့ ကွင်းဆင်း၍ ကြပ်မတ်စစ်ဆေးဆောင်ရွက်ခဲ့ပါသည်။

          ခရိုင်ဦးစီးမှူးနှင့် တာဝန်ရှိသူများသည် နံနက် ၁၀ နာရီတွင် တောင်ငူမြို့ရှိ Regency စက်သုံးဆီအရောင်းဆိုင်သို့လည်းကောင်း၊ နံနက် ၁၁:၃၀ နာရီတွင် တောင်ငူမြို့နယ်၊ ရန်ကုန်-မန္တလေးအမြန် လမ်းရှိ Nilar Yoma စက်သုံးဆီအရောင်းဆိုင်သို့လည်းကောင်း ရောက်ရှိပြီး ဈေးနှုန်းနှင့် အချင်အတွယ်မှန်ကန်ရေးတို့ကို ကြည့်ရှုစစ်ဆေးခဲ့ပါသည်။ ခရိုင်ဦးစီးမှူးက စက်သုံးဆီဈေးနှုန်း မြှင့်တက်မှုမရှိစေရေးနှင့် ဈေးနှုန်းတည်ငြိမ်မှုရှိစေရေးအတွက် စည်းကမ်းသတ်မှတ်ချက်များနှင့်အညီ ရောင်းချကြရန် သက်ဆိုင်ရာဆိုင်တာဝန်ခံများအား မှာကြားခဲ့ကြောင်း သတင်းရရှိပါသည်။

DOCA(ပဲခူး)

             စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံဦးဇော်ဇော်ထွေးသည် ဖေဖော်ဝါရီလ ၅ ရက်နေ့ နံနက်ပိုင်းက ရေတာရှည်မြို့နယ်၊ ညောင်ပင်သာကျေးရွာအုပ်စု၊ ဘိုးကြာညိုကျေးရွာ စနစ်ကျလယ်ယာမြေ ဧက ၁၀၀ ကွင်း၌ အမှတ် ၅၈ စက်မှုလယ်ယာစခန်းက ပြုလုပ်သည့် လူစီးနင်းမောင်းနှင်နိုင်သော သမန်းမွှေစက်တုံးကရိယာ မောင်းနှင်သရုပ်ပြပွဲသို့ တက်ရောက်လေ့လာခဲ့ပါသည်။

                အဆိုပါသရုပ်ပြမောင်းနှင်ပွဲသို့ တောင်ငူခရိုင် စီမံအုပ်ချုပ်ရေးအဖွဲ့ ဥက္ကဌဦးမိုးထက်နှင့် ရေတာရှည်မြို့နယ်မှ တာဝန်ရှိသူများတက်ရောက်ပြီး စက်မှုလယ်ယာဦးစီးဌာန တောင်ငူခရိုင် ဦးစီးမှူးဦးအောင်သိန်းလွင်က စနစ်ကျလယ်ယာမြေဖော်ထုတ်ခြင်းလုပ်ငန်း စီမံကိန်းဆောင်ရွက်ပြီးစီးမှုအခြေအနေများကိုလည်းကောင်း၊ စက်မှုလယ်ယာဦးစီးဌာန၊ ရေတာရှည်မြို့နယ်ဦးစီးမှူးဦးသန်းဦးက စက်ကရိယာနှင့်ပတ်သက်၍လည်းကောင်း ရှင်းလင်းတင်ပြပါသည်။

          ရေတာရှည်မြို့နယ်၊ ညောင်ပင်သာကျေးရွာအုပ်စု၊ ဘိုးကြာညိုကျေးရွာ စနစ်ကျလယ်ယာမြေ ဧက ၁၀၀ ကို ပဲခူးတိုင်းဒေသကြီးအစိုးရအဖွဲ့၏ ၂၀၂၁-၂၀၂၂ ဘဏ္ဍာနှစ် ငွေလုံးငွေရင်းရန်ပုံငွေ ကျပ် ၁၂၄.၉ သန်းဖြင့် ဆောင်ရွက်လျှက်ရှိပြီး နွေစပါးအတွက် လုပ်ငန်းလျာထားချက်မရှိသေးသော်လည်း စီမံကိန်းဆောင်ရွက်မှု ၇၀ ရာခိုင်နှုန်းပြီးစီးပြီဖြစ်သဖြင့် နွေစပါးစိုက်ပျိုးနိုင်ရန် ကြိုးပမ်းဆောင်ရွက်လျှက်ရှိကြောင်း သိရပါသည်။

DOCA(ပဲခူး)