သတင်းနှင့် လှုပ်ရှားမှုများ

          ၂၀၂၂ခုနှစ်၊ ဇူလိုင်လ(၁၅)ရက်နေ့၊ နံနက်(၁၀:၀၀)နာရီအချိန်မှ (၁၁:၀၀)နာရီအချိန်ထိ ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူး နှင့်တာဝန်ရှိသူများသည် ကျိုင်းတုံမြို့မဈေးနှင့် မြို့ပေါ်ရပ်ကွက်ရှိ စားသုံးဆီရောင်းချသည့် ဆိုင်(၁၅) ဆိုင်အား ကုန်အညွှန်းအမှတ်အသားနှင့်ပတ်သက်၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

            ကွင်းဆင်းစစ်ဆေးရာတွင် စစ်ဆေးရေးမှူးနှင့် တာဝန်ရှိသူများက စားသုံးဆီရောင်းချသည့်ဆိုင်များကို “ဟင်းသီးဟင်းရွက်ဆီ (VegetableOil, CookingOil)နှင့် စပ်လျဉ်း၍ ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်” ထုတ်ပြန်ပြီးဖြစ်ကြောင်း၊ ယင်းသို့ ထုတ်ပြန်ပြီး (၆)လပြည့်မြောက်ပြီးသည့် ၂၀၂၂ခုနှစ်၊ ဇွန်လ၂၁ရက်နေ့တွင် စတင်အာဏာ သက်ရောက်ပြီးဖြစ်ကြောင်း၊ ထို့ကြောင့် စားသုံးဆီရောင်းချသည့် ဆိုင်များအနေဖြင့်ရောင်းချ သည့်ကုန်စည်တွင် ကုန်စည်၏အမျိုးအမည်၊ ကုန်စည်၏အသားတင်ပမာဏာနှင့် အရွယ်အစား၊ မြန်မာအလေးချိန်ယူနစ်ဖြစ်သော ပိဿာ၊ ကျပ်သား စသည်တို့ဖော်ပြပါရှိရမည်ဖြစ်ပြီး ယင်းအချက် အလက်များပါဝင်သည့် ဟင်းသီးဟင်းရွက်ဆီများကိုသာ ရောင်းချကြရန် အသိပညာပေးခြင်း ဆောင်ရွက်ခဲ့ပါသည်။ ကျိုင်းတုံမြို့ဈေးကွက်အတွင်း စားသုံးသူကာကွယ်‌ရေးဥပဒေ အခန်း(၁၈) ကုန်အညွှန်း အမှတ်အသားဖော်ပြချက်ပါ သတ်မှတ်ချက်နှင့်အညီ ပြည်တွင်းထုတ် အမေထွားဆီနှင့် စံပြဆီများ ရောင်းချလျက်ရှိပြီး ဒေသနေပြည်သူများအကြိုက်များ၍ ဝယ်လိုအားများနေသည့် နေကြာဆီနှင့် ပဲပုပ်ဆီများတွင်လည်း ကုန်အညွှန်းအမှတ်အသားပြည့်စုံစွာဖော်ပြပါရှိရေး၊ စီးပွားရေးလုပ်ငန်းရှင်များ လိုက်နာဆောင်ရွက်ရန် အစရှိသည်များနှင့် ဟင်းသီးဟင်းရွက်ဆီ (VegetableOil, CookingOil)နှင့် စပ်လျဉ်း၍ ကုန်အညွှန်းအမှတ်အသားပါရှိရေး ညွှန်ကြားချက်အမှတ် (၁/၂၀၂၁) သတ်မှတ်ချက်များနှင့် ကိုက်ညီမှုမရှိကြောင်း ဈေးကွက်စောင့်ကြည့်စစ်ဆေးတွေ့ရှိပါက စားသုံးသူကာကွယ်ရေး၏တည်ဆဲ ဥပဒေအရ အရေးယူဆောင်ရွက်သွားမည်ဖြစ်ကြောင်း ရှင်းလင်းပြောကြား၍ ဈေးကွက်စောင့်ကြည့်ခြင်းများ ဆောင်ရွက်ခဲ့ပါသည်။

DOCA(ရှမ်း)

            ပဲခူးတိုင်းဒေသကြီး တရားမဝင်ကုန်သွယ်မှု တိုက်ဖျက်ရေး ဦးဆောင်ကော်မတီ၏ အစည်းအဝေး လမ်းညွှန်ချက်အရ အမိုနီယမ်နိုက်ထရိတ်များအား ဓာတ်မြေသြဇာများနှင့် ရောနှော သယ်ဆောင် အိတ် သွတ်သယ်ဆောင်မှု မရှိစေရေး စစ်ဆေးဆောင်ရွက်ရန် သာယာဝတီခရိုင် တရားမဝင် ကုန်သွယ်မှု တိုက်ဖျက်ရေး အဖွဲ့မှ သာယာဝတီခရိုင် လက်ပံတန်းမြို့တွင် ၁၃.၇.၂၀၂၂ ရက်နေ့ ၊ နံနက် ၁၀:၀၀ နာရီအချိန်၌ ပိုးသတ်ဆေး၊ ဓါတ်မြေသြဇာ ရောင်းချနေသော ဆိုင်များဖြစ်သည့် တောင်သူကြီး စိုက်ပျိုးရေးဆေးဆိုင်၊ စံ သစ္စာပွဲရုံနှင့် ဓာတ်မြေသြဇာဆေးဆိုင်၊ ရွှေလယ်ယာ စိုက်ပျိုးရေးဆေးဆိုင် ၊ ဧရာဝတီဓါတ်မြေသြဇာဆေးဆိုင်နှင့် သိုလှောင်ရုံများကို ကွင်းဆင်းစစ်ဆေးခဲ့ပါသည်။

          ထို့သို့ စစ်ဆေးရာတွင် ၎င်းစိုက်ပျိုးရေးဆေးနှင့် ဓာတ်မြေသြဇာ အရောင်းဆိုင် သိုလှောင်ရုံ များတွင် အမိုနီယမ်နိုက်ထရိတ် များကို ဓာတ်မြေသြဇာများနှင့် ရောနှောသယ်ဆောင်၊ အိတ်သွတ် သယ်ဆောင်၊ ရောင်းဝယ်မှုများ မရှိပါကြောင်း နှင့် ပုံမှန်စိုက်ပျိုးရေးသုံး ပစ္စည်းများကိုသာ ရောင်းဝယ်မှု ရှိပါကြောင်း ကွင်းဆင်းစစ်ဆေးတွေ့ရှိရပါသည်။

DOCA(ပဲခူး)

              ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ တောင်ငူခရိုင် ၊  ဖြူးမြို့နယ်တာဝန်ခံ ဒေါ်သန္တာစိုးနှင့် ဝန်ထမ်းများသည် ဇူလိုင်လ ၁၃ ရက်နေ့ နံနက်ပိုင်းက ဖြူးမြို့နယ် ဇေယျဝတီမြို့ရှိ ကုန်စုံဆိုင် ကြီးများ၌ ရောင်းချသော အမှတ်တံဆိပ်ပါ စားသုံးဆီများတွင် မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်အမှတ် ၂/၂၀၁၉ နှင့် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၏ ညွှန်ကြားချက်အမှတ် ၁/၂၀၂၁ တို့နှင့်အညီ ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်း ရှိမရှိကို ဈေးကွက်အတွင်း ကွင်းဆင်း၍ စောင့်ကြည့်စစ်ဆေးခြင်းကို ဆောင်ရွက်ခဲ့ပါသည်။

              ဖြူးမြို့နယ်၊ ဇေယျဝတီမြို့ပေါ်ရှိ ကုန်စုံဆိုင်များသို့ အမှတ်တံဆိပ်ပါ စားသုံးဆီများကို ဈေးကွက်စောင့်ကြည့် စစ်ဆေးရာ၌ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် အမှတ် ၂/၂၀၁၉ နှင့်အညီ ကုန်အမှတ်တံဆိပ်များ ဖော်ပြထားသည်ကို တွေ့ရှိရပြီး စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/၂၀၂၁ ကို လိုက်နာဆောင်ရွက်မှု အားနည်းသေးကြောင်း တွေ့ရှိရပါဖြင့် ညွှန်ကြားချက်နှင့်အညီ လိုက်နာဆောင်ရွက်ကြရန် အသိပညာပေးခဲ့ကြောင်း သိရှိရပါသည်။

DOCA(ပဲခူး)

               တောင်ငူခရိုင်၊ အုတ်တွင်းမြို့နယ်၊ မြေစီးကျေးရွာအုပ်စုမှ တောင်သူဦးလူအေး၏ခြံတွင် ဖီးကြမ်းငှက်ပျောသီးများကို အပျော်တမ်းစိုက်ပျိုးရာမှ အောင်မြင်ဖြစ်ထွန်းလျှက်ရှိရာ ယခုအခါ ၄ ဧက အထိ စိုက်ပျိုးပြီးဖြစ်ပါသည်။ ကြားညှပ်အနေဖြင့် အုန်းစိမ်းနှင့် အုန်းညိုပန်းများကို စိုက်ပျိုး ထားပါသည်။

              ငှက်ပျောပင်များကို မိုးဦးကျခါနီး ဧပြီ၊ မေလများတွင် စတင်စိုက်ပျိုးရပါသည်။ ပျိုးပင် များကို တောင်ငူမြို့နယ် လေးမိုင်ကျေးရွာမှ တစ်ပင်လျှင် ၅၀၀ ကျပ်နှုန်းဖြင့် ဝယ်ယူရပါသည်။ ငှက်ပျောစိုက်ရာတွင် သင့်လျော်သော မြေနေရာကို ရွေးချယ်ပြီး တစ်တောင်ဝန်းကျင် မြေကျင်းတူး ရပါသည်။ ပျိုးပင်ငယ်၏ အမြစ်လုံးကို ပြောင်စင်အောင် ဖြတ်ထုတ်ပြီး တူးထားသည့် မြေကျင်းထဲသို့ စိုက်ထည့်ကာ မြေဩဇာဓာတ်ပါသော သစ်ရွက်မြေဆွေးတို့ကို မြေပြင်နှင့်အညီ ဖြည့်ပေးရပါသည်။ ၎င်းမြေ၏ အပေါ်သို့ မြေတစ်ထွာခန့် ထပ်ဖို့ကာ ရေလောင်းပေးရပါသည်။ တစ်ကျင်းလျှင် ငှက်ပျော တစ်ပင်နှုန်းသာ စိုက်ပျိုးရပါသည်။ တစ်ပင်နှင့်တစ်ပင်ကို ၇ ပေမှ ၉ ပေခန့်အထိ ခြားပြီး စိုက်ပျိုးရပါသည်။ ပျိုးပင်စိုက်ပျိုး ပြီးပြီးချင်းတွင် အပင်ခြေပတ်လည်ကို ဝိုက်၍ မြေဩဇာကျွေးရပါသည်။ အပင်ပျိုများ ပိုးဝင်ခဲ့လျှင် မြေအောင်းပိုးသတ်ဆေးဖြစ်သော ကာလိုဖြူရမ်ကို သုံးစွဲပေးရပါသည်။

              စိုက်ပျိုးချိန် ၆ လကြာလျှင် အဖူးထွက်ပါသည်။ ငှက်ပျောပင်တစ်ခိုင် ရင်းမှည့်ချိန်သည် ၃ လ မှ ၄ လအထိ ကြာပါသည်။ ရင့်မှည့်လာသော အခိုင်များကို ခုတ်ယူ၍ တစ်ဖီးလျှင် ပျှမ်းမျှ ၄၀၀ ကျပ်နှုန်းဖြင့် ဒေသတွင်းငှက်ပျော ကုန်သည်များက လာရောက်ဝယ်ယူကြကြောင်း တောင်သူ ဦးလူအေး၏ ပြောပြချက်အရ သိရှိရပါသည်။

DOCA(ပဲခူး)

              ပဲခူးတိုင်းဒေသကြီး ၊စားသုံးသူရေးရာဦးစီးဌာန၊ အုတ်တွင်းမြို့နယ်တာဝန်ခံ ဒေါ်အေးအေးခိုင်နှင့် ဝန်ထမ်းများ သည် အုတ်တွင်းမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒုတိယမြို့နယ်ဦးစီးမှူး ဒေါ်ခင်ခင်မာ ဦးဆောင်သော ဝန်ထမ်းများနှင့်ပူးပေါင်း၍ ဇူလိုင်လ ၁၄ ရက်နေ့ နံနက်ပိုင်းက အုတ်တွင်း မြို့နယ် ကြို့ကုန်း အခြေခံပညာမူလတန်းလွန်ကျောင်းတွင် ကျောင်းသားကျောင်းသူများ သိသင့်သိထိုက်သော အသိပညာ ဗဟုသုတများ ရရှိစေရန်အတွက် အသိပညာပေးဟောပြောပွဲကို ပြုလုပ်ခဲ့ပါသည်။

              ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်အေးအေးခိုင်က စားသုံးသူ အခွင့်အရေးများ၊ စားသုံးသူနစ်နာဆုံးရှုံးမှုများ မဖြစ်စေရေးအတွက် စားသုံးသူရေးရာဦးစီးဌာနက ဆောင်ရွက်ပေးနေမှုများ၊ စားသုံးသူနစ်နာဆုံးရှုံးမှုများ ဖြစ်ပေါ်ပါက တိုင်ကြားနိုင်ခြင်းများ၊ ဈေးကွက်အတွင်း ကုန်စည်များဝယ်ယူရာတွင် ကုန်အညွှန်းအမှတ်အသားများ ဖတ်ရှုသင့်သည့် အကြောင်းများကိုလည်းကောင်း၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဒုတိယမြို့နယ် ဦးစီးမှူး ဒေါ်ခင်ခင်မာက စာဖတ်ခြင်းအကျိုးကျေးဇူးများကိုလည်းကောင်း အကျယ်တဝင့် ဟောပြောကြပါသည်။

              ဟောပြောပွဲသို့ ကျောင်းသားကျောင်းသူ ၁၂၆ ဦးတက်ရောက်ကြောင်း သိရှိရပါသည်။

DOCA(ပဲခူး)