Main menu

သတင်းနှင့် လှုပ်ရှားမှုများ

Powered by Drupal

မြို့မဈေးနှင့် ရပ်ကွက်များအတွင်း ကလေးအာဟာရမုန့်များအား ဈေးကွက်စောင့်ကြည့်စစ်ဆေး

        ဧရာဝတီတိုင်းဒေသကြီး မအူပင်ခရိုင်၊ ဓနုဖြူမြို့နယ်စားသုံးသူရေးရာဦးစီးဌာနမှ မြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည် မိတ်ဖက်အဖွဲ့များနှင့်အတူ စတိုးဆိုင်များတွင်ဖြန့်ဖြူးရောင်းချလျက်ရှိသည့် ကလေးအဟာရအမျိုးမျိုးနှင့်စပ်လျဉ်း၍ စားသုံးသူကာကွယ်ရေးဥပဒေပါ  ကုန်စည်များ၌ ကုန်အညွှန်းအမှတ် ပြည့်စုံစွာပါရှိ/မရှိ ကွင်းဆင်းစစ်ဆေးခြင်းကို (၂၀.၉.၂၀၂၃) ရက်နေ့နံနက်  (၀၉:၃၀) နာရီခွဲအချိန်က စစ်ဆေးခဲ့ကြောင်းသိရသည်။

          ဓနုဖြူမြို့နယ် စားသုံးသူရေးရာဦးစီးဌာနမှ မြို့နယ်ဦးစီးမှူးဦးစီးမှူးဦးဝင်းမင်းစိုးနှင့် ဝန်ထမ်းများ၊ မြို့နယ်အထွေထွေအုပ်ချုပ်ရေးဦးစီးဌာန၊ ကျန်းမာရေးနှင့်ကုသရေးဦးစီးဌာန၊ မြို့နယ်စည်ပင်သာယာ ရေးအဖွဲ့တို့မှ တာဝန်ရှိသူတို့က မြို့မဈေးနှင့် ရပ်ကွက်များအတွင်း ကုန်စုံဆိုင်များရှိ ကလေးအာဟာရ ဖြည့်စွက်စာအမျိုးမျိုးတို့တွင် စားသုံးသူရေးရာဦးစီးဌာန၏ စားသုံးသူကာကွယ်ရေးဥပဒေ (၂၀၁၉)၊ အခန်း (၁၈)၊ ပုဒ်မ (၄၁)၊ ကုန်အညွှန်း အမှတ်အသားဖော်ပြချက်နှင့် ကိုက်ညီမှု ရှိ/မရှိ၊ ညွှန်ကြားချက် အမိန့်အမှတ် (၂/၂၀၁၉) ဖြင့် ထုတ်ပြန်ထားသော ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့မဟုတ်) တစ်ခုထက်ပို၍ဖြစ်စေ ဖော်ပြရာ၌ စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်နှင့် ကိုက်ညီမှု ရှိ/မရှိနှင့် ကျန်းမာရေးဝန်ကြီးဌာနမှ ထုတ်ပြန်ထားသည့် နို့စို့ကလေးနှင့် ကလေးငယ်များအတွက် ဖော်စပ်ထုတ်လုပ်ထားသော အစားအသောက်များ ဈေးကွက်တင်ခြင်းဆိုင်ရာ အမိန့်ဖော်ပြထားခြင်းနှင့် ကိုက်ညီမှု ရှိ/မရှိတို့ကို ဈေးကွက်စောင့်ကြည့်စစ်ဆေးရေးပူးပေါင်းအဖွဲ့မှ ကွင်းဆင်းစစ်ဆေးကြကြောင်း သိရှိရပါသည်။

DOCA(ဧရာဝတီ)

နတ်စမ်းကျေးရွာ၌ စားသုံးသူကာကွယ်ရေးဆိုင်ရာ အသိပညာပေးဟောပြောဆွေးနွေးပွဲကျင်းပ

    ၂၃.၉.၂၀၂၃ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ဒုပြည်နယ်ဦးစီးမှူးသည် နတ်စမ်းကျေးရွာ၌ အိမ်တွင်းစက်မှုလက်မှုဦးစီးဌာနက ပြုလုပ်ကျင်းပသော သင်တန်းဆင်းပွဲ၌ ကျေးရွာသူ/ကျေးရွာသားများအား စားသုံးသူကာကွယ်ရေးဆိုင်ရာ အသိပညာပေး  ဟောပြောဆွေးနွေးပွဲ ကျင်းပပြုလုပ်ခဲ့ကြောင်း သိရှိရသည်။

    အဆိုပါ ဟောပြောဆွေးနွေးပွဲတွင် စားသုံးသူရေးရာဦးစီးဌာနမှ ဒုပြည်နယ်ဦးစီးမှူး ဒေါ်မိရင်စနိုင်းမွန်မှ ကုန်စည်/ဝန်ဆောင်မှုများနှင့် စပ်လျဉ်း၍ စားသုံးသူနစ်နာဆုံးရှုံးမှုမရှိစေရေး အတွက် ဦးစီးဌာန၏ဆောင်ရွက်နေမှု၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှု့သင့်သည့်အကြောင်းများကို အကျယ်တဝင့်ဟောပြောဆွေးနွေးခဲ့ကြောင်း သိရှိရသည်။

      ဟောပြောပွဲသို့ သင်တန်းသား၊ သင်တန်းသူနှင့် စီးပွားရေးလုပ်ငန်းရှင် စုစုပေါင်း (၃၀) ဦး တက်ရောက်ခဲ့ကြကြောင်း သိရှိရပါသည်။

DOCA(မွန်)

ရေတွင်းကုန်း မူလတန်းကျောင်းတွင် စားသုံးသူကာကွယ်ရေး အသိပညာပေးဟောပြောခြင်း

        ဧရာဝတီတိုင်းဒေသကြီး မအူပင်ခရိုင်၊ ဓနုဖြူမြို့နယ်စားသုံးသူရေးရာဦးစီးဌာနမှ မြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ တိုင်းဆေးပညာ ဦးစီးဌာနတို့နှင့်အတူ ရေတွင်းကုန်းမူလတန်းကျောင်း၌ (၂၁.၉.၂၀၂၃) ရက်နေ့နံနက်  (၁၀:၃၅) နာရီအချိန်တွင် စားသုံးသူကာကွယ်ရေး အသိပညာပေး ဟောပြောခဲ့ကြပါသည်။

         ဓနုဖြူမြို့နယ်စားသုံးသူရေးရာဦးစီးဌာနမှ မြို့နယ်ဦးစီးမှူးဦးစီးမှူးဦးဝင်းမင်းစိုးက စားသုံးသူကာကွယ်ရေးလုပ်ငန်းစဉ်အကြောင်းကိုလည်းကောင်း၊ စားသုံးသူအခွင့်အရေးကိုလည်းကောင်း၊ စီးပွားရေး လုပ်ငန်းရှင်အဓိပ္ပာယ်ကိုလည်းကောင်း၊ စားသုံးရန်မသင့်သော အစားအစာအကြောင်းကို လည်းကောင်း၊ ဘေးအန္တရာယ်ကင်း ရှင်းသောကုန်စည်များကိုရွေးချယ်စားသောက်တက်စေရန် ကုန်အညွှန်းအမှတ်အသား ဖော်ပြခြင်းဆိုင်ရာကိစ္စရပ်နှင့်ပတ်သက်၍ ရှင်းလင်းခဲ့ပါသည်။ ထို့အပြင် ကျောင်းမုန့်ဈေးတန်းတွင် ရောင်းချသောမုန့်များတွင် ကုန်ပစ္စည်းအမျိုးအမည်၊ ထုတ်လုပ်ရက်စွဲ၊ သက်တမ်းကုန်ဆုံးရက်စွဲ၊ ကုန်စည်တွင်ပါဝင်သော ကုန်ကြမ်းပစ္စည်း အမျိုးအမည်ပစ္စည်းများ၏ ပမာဏ၊ ပါဝင်မှုအချိုးအစားစသည်တို့ကို ကြည့်ရှုပြီးမှ ဝယ်ယူစားသေက်ကြရန်နှင့် ကုန်စည်တစ်ခုကြောင့် စားသုံးသူအခွင့်အရေးနစ်နာဆုံးရှုံးမှုဖြစ်ပေါ်လာပါက စားသုံးသူရေးရာဦးစီးဌာနသို့ တိုင်ကြားနိုင်သည့် နည်းလမ်းများကို အသိပညာပေးခဲ့ပါသည်။

          ဟောပြောပွဲသို့ ကျောင်းသား/ကျောင်းသူ (၂၈၅)ဦးတက်ရောက်ခဲ့ကြပြီး ကျောင်းမုန့်ဈေးတန်းရှိ မုန့်များကိုလည်း စစ်ဆေးခဲ့ကြောင်းသတင်းရရှိပါသည်။

DOCA (ဧရာဝတီ)

မြောင်းမြခရိုင် ဝါးခယ်မမြို့နယ်၊ စားသုံးသူပြည်သူများအား အသိပညာပေး Talk Show ပြုလုပ်

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဝါးခယ်မမြို့နယ်တာဝန်ခံဦးအောင်မိုးသည် (၂၂.၉.၂၀၂၃) ရက်နေ့၊ နေ့လယ်(၁၅:၀၀)နာရီအချိန်တွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့နှင့် ပူးပေါင်းကာ စားသုံးသူပြည်သူများအား ဝါးခယ်မမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန၊ Community Centre ခန်းမတွင် စားသုံးသူအသိပညာပေး  Talk  Show  ပြုလုပ် ခဲ့ပါသည်။

     ထိုသို့ဟောပြောဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးမှ  စားသုံးသူ အသိပညာပေး Talk Show ပြုလုပ်ရခြင်း၏ရည်ရွယ်ချက်အား ရှင်းလင်းပြောကြားပြီး၊ စားသုံးသူ ရေးရာဦးစီးဌာန မြို့နယ်တာဝန်ခံမှ ဌာန၏မျှော်မှန်းချက်၊ ရည်မှန်းချက်များအား ရှင်းလင်း ပြောကြားခဲ့ပြီး၊ စားသုံးသူကာကွယ်ရေးဥပဒေ အခန်း(၉)ပါ စားသုံးသူ၏ အခွင့်အရေးနှင့်တာဝန်များ၊ ဥပဒေအခန်း(၁၀)ပါ စီးပွားရေးလုပ်ငန်းရှင်၏ တာဝန်များနှင့် ပြစ်မှုပြစ်ဒဏ်များ၊ တားမြစ်ချက်များ စားသုံးသူကာကွယ်ရေး ဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်း နှင့်စပ်လျဉ်း၍ မည်သည့်စီးပွားရေး လုပ်ငန်းရှင်မဆို ပုဒ်မ-၄၁ ပုဒ်မခွဲ (ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု(သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရ မည်ဖြစ်ကြောင်း၊ ကုန်စည်အမျိုးအစားအလိုက် သတ်မှတ်ထားသည့် ဥပဒေများနှင့်အညီလိုက်နာဆောင်ရွက်ကြရန် ဥပဒေတားမြစ်ချက်များအား လိုက်နာဆောင်ရွက်မှုမရှိပါက ပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း စီးပွားရေးလုပ်ငန်းရှင်များအနေဖြင့် ဥပဒေပါအချက်အလက်များသိရှိလိုပါက မြို့နယ်စားသုံးသူ တာဝန်ခံရုံး တွင်လည်းကောင်း၊ စားသုံးသူ ရေးရာဦးစီးဌာနရုံးချုပ်၏ www.doca. gov.mm website တွင် ဝင်ရောက် လေ့လာနိုင်ပါကြောင်း၊ စားသုံးသူများ နစ်နာမှုရှိလာပါက စားသုံးသူသတင်းပြန်ကြားရေးနှင့် တိုင်ကြားမှု လက်ခံ ဆောင်ရွက်ရေးစင်တာ CICC သို့ လူကိုယ်တိုင် ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင်ကြောင်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

 

 

လပွတ္တာခရိုင် လပွတ္တာမြို့နယ်၊ အခွန်လွတ်ဈေးတွင် ဆန်ကုန်သည်နှင့်ဆန်စက်လုပ်ငန်းရှင်အသင်းမှ သက်သာသောဈေးနှုန်းဖြင့် ဆန်ရောင်းချပေးခြင်း

     ဧရာဝတီတိုင်းဒေသကြီး၊       စားသုံးသူရေးရာဦးစီးဌာန၊ လပွတ္တာခရိုင် လပွတ္တာမြို့နယ် တာဝန်ခံဦးမြင့်ဌေးနှင့် ဝန်ထမ်းများသည် (၂၁.၉.၂၀၂၃)ရက်နေ့ နံနက်(၀၇:၃၀)နာရီမှစတင်၍ မြို့နယ်စည်ပင်သာယာရေးအဖွဲ့နှင့် ပူးပေါင်း၍လပွတ္တာမြို့နယ်၊ အခွန်လွတ်ဈေးတွင် ဆန်ကုန်သည်နှင့်ဆန်စက်လုပ်ငန်းရှင်အသင်းမှ ပြည်သူများသို့ ဆန်ရောင်းချပေးခြင်း ဆောင်ရွက်ခဲ့ပါသည်။

        ဆန်များရောင်းချပေးခြင်း၏ ရည်ရွယ်ချက်မှာ စားသုံးသူပြည်သူများအား သက်သာသောဈေးနှုန်းဖြင့် ဝယ်ယူရရှိပြီး တစ်ဖက်တစ်လမ်းမှ စားဝတ်နေရေးအဆင်ပြေစေရန် ပြည်သူတစ်ဦးလျှင် ဧည့်မထဆန်(၁)ပြည်၊ (၂၅၀၀)ကျပ်နှုန်းဖြင့် တစ်ဦးလျှင်(၁)ပြည်နှုန်း ရောင်းချပေးခဲ့ကြောင်း သိရှိရပါသည်။

DOCA(ဧရာဝတီ)

 

မကွေးတိုင်းဒေသကြီး၌ စားအုန်းဆီသတ်မှတ်ဈေးနှုန်းထက် ပိုမိုရောင်းချမှုမရှိစေရေး မြို့နယ်စိစစ်ကြပ်မတ်ရေးအဖွဲ့နှင့်ပူးပေါင်းစစ်‌ဆေး

 မကွေးတိုင်းဒေသကြီးအစိုးရအဖွဲ့သည် မကွေးတိုင်းဒေသကြီး၊ မြို့နယ်အသီးသီးရှိဈေးဆိုင်များတွင် စားအုန်းဆီများသတ်မှတ်ဈေးနှုန်းထက်ပိုမိုရောင်းချမှုမရှိစေရေး မြို့နယ်စိစစ်ဖော်ထုတ်ကြပ်မတ်ရေးအဖွဲ့အဖြစ် မြို့နယ်စီမံအုပ်ချုပ်ရေးကောင်စီဥက္ကဋ္ဌနှင့် စားသုံးသူရေးရာဦးစီးဌာန၊ စည်ပင်သာယာရေးအဖွဲ့၊ မြို့နယ်ရဲတပ်ဖွဲ့တို့အား ဖွဲ့စည်းတာဝန်ပေးအပ်ခဲ့ပါသည်။

  မကွေးတိုင်းဆီကုန်သည်နှင့်ဆီလုပ်ငန်းရှင်များအသင်းမှရရှိသော ဆီခွဲတမ်းများကို (၁၉-၉-၂၀၂၃) ရက်နေ့တွင် ဒေါ်သီတာဦးဆီဆိုင်မှ (၁)ပိဿာလျှင် ကျပ်(၄၉၀၀)နှုန်းဖြင့် အိမ်ထောင်စု(၂၂၀)စုအတွက် စားအုန်းဆီ(၂၂၀)ပိဿာ၊ အောင်လံဆီစက်မှ အိမ်ထောင်စု(၅၅၀)စုအတွက် စားအုန်းဆီ (၅၅၀)ပိဿာ၊ ဦးသန်းဌေးဆီဆိုင်မှ အိမ်ထောင်စု(၃၃၀)စုအတွက် စားအုန်းဆီ(၃၃၀)ပိဿာ၊ ရွှေညီကိုဆီဆိုင်မှ အိမ်ထောင်စု(၃၃၀)စုအတွက် စားအုန်းဆီ(၃၃၀)ပိဿာ၊ ဆန်းရတနာတင့်ဆီဆိုင်မှ အိမ်ထောင်စု ၂၂၀)စုအတွက် စားအုန်းဆီ(၂၂၀)ပိဿာ၊ စကုမြို့ဦးစိုးလွင်ဆီဆိုင်မှ အိမ်ထောင်စု(၅၅၀)စုအတွက် စားအုန်းဆီ(၅၅၀)ပိဿာ၊ စုစုပေါင်းအိမ်ထောင်စု(၂၂၀၀)စုအတွက် စားအုန်းဆီ(၂၂၀၀)ပိဿာနှင့် (၂၀-၉-၂၀၂၃)ရက်နေ့တွင် မင်းမင်းဆီဆိုင်မှ အိမ်ထောင်စု(၄၄၀)စုအတွက် စားအုန်းဆီ(၄၄၀)ပိဿာ၊ ကောင်းဆီဆိုင်မှ အိမ်ထောင်စု(၈၈၀)စုအတွက် စားအုန်းဆီ(၈၈၀)ပိဿာ၊ ဦးအေးငွေဆီဆိုင်မှ အိမ်ထောင်စု(၃၃၀)စုအတွက် စားအုန်းဆီ(၃၃၀)ပိဿာ၊ စကုမြို့၊ ဦးထက်နိုင်လင်းဆီဆိုင်မှ အိမ်ထောင်စု (၅၅၀)အတွက် စားအုန်းဆီ(၅၅၀)ပိဿာ၊ စုစုပေါင်းအိမ်ထောင်စု(၂၂၀၀)စုအတွက် စားအုန်းဆီ (၂၂၀၀)ပိဿာရောင်းချ‌ပေးနေမှုများအား အလေးချိန်ပြည့်ဝမှန်ကန်မှုရှိစေရေးနှင့် ရောင်းချရာတွင် စနစ်တကျရှိစေရေးတို့အတွက် ကွင်းဆင်းကြီးကြပ်ဆောင်ရွက်ခဲ့ကြောင်း သိရှိရပါသည်။

DOCA(မကွေး)

ရွှေဘိုမြို့၊ အ.ထ.က(၂)တွင် စားသုံးသူကာကွယ်ရေး အသိပညာပေးဟောပြောပွဲဆောင်ရွက်

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသ ကြီး၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေး အသိပညာပေးဟောပြောပွဲများကို လစဉ် စီမံချက်များပြည့်မီကျော်လွန်အောင် ဆောင်ရွက်လျက်ရှိရာ (၂၁.၉.၂၀၂၃)ရက်နေ့၊ နံနက်(၁၁:၃၀)နာရီ အချိန်တွင် ရွှေဘိုမြို့၊ အမှတ်(၂)အခြေခံပညာအထက်တန်းကျောင်း၌ စားသုံးသူကာကွယ်ရေး အသိပညာ ပေးဟောပြောပွဲ ဆောင်ရွက်ခဲ့ပါသည်။

        အဆိုပါဟောပြောပွဲတွင် စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ  ဒု-ခရိုင်ဦးစီးမှူး ဒေါ်နှင်းနှင်းခိုင်က စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် လိုက်နာရမည့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွန်းအမှတ်အသားဖော်ပြခြင်းအကြောင်းနှင့် ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် အမှတ်(၂/၂၀၁၉)ပါအကြောင်းများနှင့် ဈေးကွက်စောင့်ကြည့်စစ်ဆေးခြင်း ဆောင်ရွက်နေမှုအခြေအနေ များ၊ စားသုံးသူအခွင့်အရေးနှင့် အကျိုးစီးပွားနစ်နာဆုံးရှုံးမှုများရှိပါက တိုင်ကြားနိုင်ကြောင်းနှင့် တိုင်ကြား နိုင်သည့်နေရာများ၊ ဌာနနှင့်သက်ဆိုင်သောအကြောင်းများကို မေးမြန်းစုံစမ်းနိုင်သည့် Consumer Call Center 1535 အကြောင်း၊ တိုင်ကြားစာများကို စိစစ်ညှိနှိုင်းဖြေရှင်းပေးသည့် အကြောင်းများကိုရှင်းလင်း ဆွေးနွေးခဲ့ကြောင်း၊ ရွှေဘိုမြို့နယ်တာဝန်ခံ ဦးသန့်ဇော်လင်းက ဌာန၏ဆောင်ပုဒ်၊ မျှော်မှန်းချက်နှင့် ရည်မှန်းချက်တာဝန်များ၊ ဌာနမှဆောင်ရွက်လျက်ရှိသော လုပ်ငန်းများအကြောင်းကို ရှင်းလင်းဆွေးနွေး ခဲ့ရာ ကျောင်းသား/ကျောင်းသူ(၁၉၈)ဦးနှင့် ဆရာ/ဆရာမ(၁၀)ဦး စုစုပေါင်း(၂၀၈)ဦးတက်ရောက်ခဲ့ပြီး စားသုံးသူကာကွယ်ရေးအသိပညာပေး လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

 

 

ကျွန်းလှမြို့ပေါ်ရှိ ဆေးဆိုင်များနှင့်ကုန်စုံဆိုင်အား  ကလေးအာဟာရဖြည့်စွက်စာ အမျိုးမျိုးတွင် ကုန်အညွှန်းအမှတ်အသားပြည့်စုံမှု ရှိ/ မရှိ ဈေးကွက်စောင့်ကြည့်

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ ကျွန်းလှမြို့နယ် တာဝန်ခံရုံးအနေဖြင့်  စားသုံးသူပြည်သူများ ဘေးအန္တရာယ် ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှု ရှိစေရေးအတွက် ဈေးကွက်စောင့်ကြည့် စစ်ဆေးခြင်းများဆောင်ရွက်လျက်ရှိရာ ၂၀၂၃ခုနှစ်စက်တင်ဘာလ(၇)ရက်နေ့ နံနက် (၀၈:၃၀)နာရီ အချိန်တွင် ကျွန်းလှမြို့ပေါ်ရပ်ကွက်များအတွင်းရှိ ဆေးဆိုင်များနှင့် ကုန်စုံဆိုင် (၈) ဆိုင် အား ကျွန်းလှမြို့နယ် စီမံအုပ်ချုပ်ရေးအဖွဲ့ရုံးမှ ဒုတိယ ဦးစီးမှူး ဦးအောင်ရာဇာဖြိုး၊ ကျွန်းလှမြို့မရဲစခန်းမှ ဒုရဲအုပ် ယုဝေမင်း၊ မြို့နယ်ကျန်းမာရေးဦးစီးဌာနမှ ဝန်ထမ်းနှစ်ဦး၊ မြို့နယ်စည်ပင်သာယာရေးအဖွဲ့မှ ဦးသိန်းထွန်း (ဥယျာဉ်မှူး)နှင့် စားသုံးသူရေးရာဦးစီးဌာန၊  ကျွန်းလှမြို့နယ်တာဝန်ခံ (အကြီးတန်းစာရေး) ဒေါ်ဝေဝေအောင် တို့မှ  ကလေးအာဟာရဖြည့်စွက်စာအမျိုးမျိုးအား ဈေးကွက်စောင့်ကြည့် စစ်ဆေးခြင်း ဆောင်ရွက်ခဲ့ပြီး ဖြစ်ပါသည်။

     အဆိုပါ ဆေးဆိုင်များနှင့်ကုန်မျိုးစုံရောင်းဝယ်ရေးဆိုင်တွင် ရောင်းချသည့် ကလေးအာဟာရဖြည့်စွက် စာအမျိုးမျိုးအား ဈေးကွက်စောင့်ကြည့်ရာတွင် မြန်မာနိုင်ငံစာသုံးသူကာကွယ်ရေးကော်မရှင်က ထုတ်ပြန် ထာသည့် ညွှန်ကြားချက်အမှတ်(၂/၂၀၁၉)ဖြင့် ထုတ်ပြန်ထားသော “ကုန်စည်များတွင် မြန်မာဘာသာဖြင့် ဖြစ်စေ ၊ မြန်မာဘာသာနှင့် အခြားဘာသာတစ်ခုခု(သို့မဟုတ်) တစ်ခုထက်ပို၍ ဖြစ်စေ ဖော်ပြရာ၌ စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်” တွင်  ပါရှိရမည့် ကုန်အညွှန်း အမှတ် အသားဆိုင်ရာ လိုက်နာရမည့်အချက်များနှင့် ကုန်ပစ္စည်း အမျိုးအမည်၊  အရွယ်အစား၊ အရေအတွက်နှင့် အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓါတ်မတည့်ကြောင်း ဖော်ပြချက်၊ ဘေးထွက်ဆိုးကျိုး နှင့် ကြိုတင်သတိပေးချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ် သည့်ရက်စွဲ၊ သက်တမ်းကုန်ဆုံးသည့်ရက်စွဲများကိုလည်း ထည့်သွင်းဖော်ပြရမည်ဖြစ်ကြောင်း ၊ ကလေး အဟာရဖြည့်စွက်စာအမျိုးမျိုးကို ဆရာဝန်ညွှန်ကြားချက်မလိုဘဲ အလွယ်တကူဝယ်ယူသုံးစွဲနိုင်ပြီး စားသုံးသူ အများစုက ယခုလက်ရှိတွင်လည်း ဝယ်ယူအသုံးပြုမှုများနေသော ကုန်စည်ဖြစ်ပြီး ကလေးအာဟာရဖြည့်စွက် စာအမျိုးမျိုးသည် ဘေးကင်းလုံခြုံစိတ်ချရမှုမရှိပါက ကလေးငယ်များကို ကြီးမာသော ဘေးအန္တရာယ် ဖြစ်စေနိုင်ခြင်း၊ မိခင်နို့ရည်(သို့မဟုတ်)မိခင်နို့ရည်အစားထိုးအစာဖြစ်သဖြင့် အဟာရပြည့်ဝစွာ မရရှိနိုင်သည့် ကလေးငယ်များအတွက် ထုတ်လုပ်ထားသည့် ကလေးအဟာရဖြည့်စွက်စာများတွင် အသက်ပိုင်းအခြား တိကျစွာဖော်ပြထားခြင်းမရှိပါက ကလေးငယ်များတွင် အန္တရာယ်ဖြစ်စေနိုင်ခြင်း ၊ ဖျော်စပ်သုံးစွဲရန်အညွှန်း ကိုလည်း မြန်မာဘာသာဖြင့် တိကျစွာဖော်ပြထားခြင်းမရှိသည့် ကုန်စည်များကြောင့် ကလေးငယ်များတွင် ကျန်းမာရေးထိခိုက်မှုများ ဖြစ်ပွားစေနိုင်ခြင်းတို့ကြောင့်  စားသုံးသူကာကွယ်ရေးဥပဒေပါ ကုန်အညွှန်း အမှတ်အသား ပြည့်စုံစွာဖော်ပြခြင်း ရှိ/ မရှိကို ဈေးကွက်စောင့်ကြည့်စစ်ဆေးဆောင်ရွက်ရခြင်းဖြစ်ကြောင်း၊  ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော ကုန်စည်များ ရောင်းချနေသည်ကို စစ်ဆေး တွေ့ရှိရပါက စားသုံးသူကာကွယ်ရေး ဥပဒအရ အရေးယူဆောင်ရွက်သွားမည် ဖြစ်ကြောင်း နှင့် စားသုံးသူ ကာကွယ်ရေးဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ် များအကြောင်းတို့ကို အသိပေးပြောကြားခဲ့ပြီး စားသုံးသူအကာအကွယ်ပေးရေးအသိပညာ‌ပေးလက်ကမ်း စာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

တောင်ငူခရိုင် ဆီကုန်သည်နှင့် ဆီလုပ်ငန်းရှင်များအသင်းဖွဲ့စည်း

     တောင်ငူခရိုင် ဆီကုန်သည်နှင့်ဆီလုပ်ငန်းရှင်များအသင်း ဖွဲ့စည်းရေး အခမ်းအနားကို စက်တင်ဘာလ ၂၂ ရက်နေ့ မွန်းလွဲပိုင်းက တောင်ငူမြို့ ခရိုင်အထွေထွေအုပ်ချုပ်ရေးဦးစီးဌာန၊ ဘုရင့်နောင်ခန်းမ၌ ကျင်းပရာ တောင်ငူခရိုင်စီမံအုပ်ချုပ်ရေးကောင်စီ ဥက္ကဌ ဦးနေဝင်းအောင် တက်ရောက်၍ အဖွင့်အမှာစကားပြောကြားပါသည်။

 ဆက်လက်၍ စားသုံးသူရေးရာဦးစီးဌာန၊ ခရိုင်ဦးစီးမှူးဦးမျိုးအောင်က အသင်းဖွဲ့စည်းရခြင်း၏ ရည်ရွယ်ချက်ကို ရှင်းလင်းပြောကြားပြီး စက်တင်ဘာလ ၂၀ ရက်နေ့က ပြုလုပ်သည့် ကြိုတင်ညှိနှိုင်းအစည်းအဝေးတွင် သဘောတူညီမှုရရှိထားပြီးဖြစ်သည့် အလုပ်အမှုဆောင်အဖွဲ့ အဆိုပြုအမည်စာရင်းကို အစည်းအဝေးသို့ တင်ပြ၍ အတည်ပြုချက် ရယူပါသည်။

  ထို့နောက် တောင်ငူခရိုင် ဆီကုန်သည်နှင့်ဆီလုပ်ငန်းရှင်များအသင်း ဥက္ကဌ ဦးကျော်သိန်းက ဝမ်းမြောက်စကားပြောကြားပြီး ခရိုင်စီမံအုပ်ချုပ်ရေးအဖွဲ့ ဥက္ကဌ ဦးနေဝင်းအောင်က နိဂုံးချုပ် စကားပြောကြားပါသည်။

    တောင်ငူခရိုင် ဆီကုန်သည်နှင့်ဆီလုပ်ငန်းရှင်များအသင်းတွင် တောင်ငူမြို့ တိုင်းထက်လွန် ပွဲရုံပိုင်ရှင် ဦးကျော်သိန်းက ဥက္ကဌအဖြစ်ဆောင်ရွက်၍ အလုပ်အမှုဆောင်အဖွဲ့ဝင် ၁၅ ဦးဖြင့် ဖွဲ့စည်းခဲ့ကြောင်းနှင့် အခမ်းအနားသို့ တောင်ငူခရိုင်စီမံအုပ်ချုပ်ရေးအဖွဲ့ဝင်များ၊ ဒုတိယ ခရိုင်အုပ်ချုပ်ရေးမှူး၊ မြို့နယ်စီမံအုပ်ချုပ်ရေးအဖွဲ့ ဥက္ကဌ၊ မြို့နယ်စည်ပင်သာယာရေးအဖွဲ့ အမှုဆောင်အရာရှိနှင့် တောင်ငူခရိုင်မှ ဆီကုန်သည်နှင့်ဆီစက်ပိုင်ရှင် ၂၆ ဦး တက်ရောက်ကြောင်း သိရပါသည်။

DOCA(ပဲခူး)

 

ရေတာရှည်မြို့ စက်သုံးဆီအရောင်းဆိုင်များသို့ ပူးပေါင်းအဖွဲ့ဖြင့် ကွင်းဆင်းစစ်ဆေး

   စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် စက်တင်ဘာလ ၂၀ ရက်နေ့ ညနေ ၃ နာရီအချိန်တွင် ရေတာရှည်မြို့နယ် အထွေထွေအုပ်ချုပ်ရေးဦးစီးဌာန ဒုတိယမြို့နယ်အုပ်ချုပ်ရေးမှူး ဦးထွန်းထွန်းလင်း ဦးဆောင်သော ဈေးကွက်စောင့်ကြည့်စစ်ဆေးရေးအဖွဲ့ဖြင့် ရေတာရှည်မြို့ရှိ စက်သုံးဆီအရောင်းဆိုင်များသို့ ကွင်းဆင်းစစ်ဆေးရာတွင် ပူးပေါင်း ပါဝင်ဆောင်ရွက်ခဲ့ပါသည်။

      ပူးပေါင်းအဖွဲ့သည် စက်သုံးဆီများ အလေးချိန်နှင့် ဈေးနှုန်းမှန်ကန်ရေး၊ မီးဘေးအန္တ ရာယ် ကြိုတင်ကာကွယ်ရေးအတွက် ပလတ်စတစ်ပုံးဖြင့် ရောင်းချမှုမပြုရေး၊ သက်ဆိုင်ရာဌာနဆိုင်ရာများ၏ ဥပဒေ၊ အမိန့် ၊ ညွှန်ကြားချက်များနှင့်အညီ လိုက်နာဆောင်ရွက်ရေး၊ စားသုံးသူစိတ်ကျေနပ်မှုရှိစေရေးကို အလေးထားဆောင်ရွက်ရေးတို့ကို စစ်ဆေးဆောင်ရွက်ခဲ့ပါသည်။

  ပူးပေါင်းအဖွဲ့တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့မှူးရုံး၊ မြို့နယ်မီးသတ်တပ်ဖွဲ့၊ မြို့နယ်စည်ပင်သာယာရေးအဖွဲ့တို့မှ တာဝန်ရှိသူများပါဝင်ပြီး ရေတာရှည်မြို့ရှိ စက်သုံးဆီ အရောင်းဆိုင်များဖြစ်သော လှဂုဏ်ရည်၊ အောင်မေတ္တာ၊ ဟန်ဝင်းအောင်နှင့် Petro K အရောင်းဆိုင်များကို ကွင်းဆင်းစစ်ဆေးခဲ့ကြောင်း သိရပါသည်။

DOCA(ပဲခူး)

 

Pages

Subscribe to RSS - သတင်းနှင့် လှုပ်ရှားမှုများ