သတင်းနှင့် လှုပ်ရှားမှုများ

   (၂၉-၉-၂၀၂၃) ရက်နေ့၊ နေ့လယ် (၁၃:၀၀) နာရီအချိန်တွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးအစည်းအဝေးခန်းမ၌ ကရင်ပြည်နယ်ဦးစီးမှူး ဦးသန်းဦးဦးဆောင်၍ ပြည်နယ်/ခရိုင်များမှဝန်ထမ်းများ လစဥ် လုပ်ငန်းညှိနှိုင်းအစည်းအဝေးကျင်းပပြုလုပ်ခဲ့ကြောင်းနှင့် ဝန်ထမ်းထုဆန္ဒဖော်ထုတ်ပွဲ (ဒါဘာ) ကျင်းပပြုလုပ်ခဲ့ကြောင်းသိရသည်။

  အခမ်းအနားတွင် လစဥ် လုပ်ငန်းညှိနှိုင်းအစည်းအဝေးနှင့် ဝန်ထမ်းထုဆန္ဒဖော်ထုတ်ပွဲကို အစီအစဉ်အတိုင်းကျင်းပခဲ့ရာ ရှေးဦးစွာ ပြည်နယ်ဦးစီးမှူး ဦးသန်းဦးက အဖွင့်အမှာစကားပြောကြားခဲ့ပြီးနောက် ဝန်ထမ်းများအားလုံးအနေဖြင့် မိမိတို့လုပ်ငန်းများကိုဆောင်ရွက်ရာတွင် ဆောင်ရွက်ရမည့်မှတ်တမ်းများကို စနစ်တကျထားရှိရန်လိုအပ်ကြောင်းနှင့် အထက်ဌာနများ၏လမ်းညွှန်မှုများအပေါ် လိုက်နာဆောင်ရွက်ရမည့်အချက်များကိုလည်း ရှင်းလင်းနွေးဆွေးပြောကြား၍ (၆)လပတ်လုပ်ငန်းညှိနှိုင်းအစည်းအဝေးဆုံးဖြတ်ချက်နှင့် ဝန်ကြီးလမ်းညွှန်ချက်များအပေါ် အကျယ်တဝင့်ပြန်လည်ရှင်းပြခဲ့ပြီး အစီအစဥ်အရ ပြည်နယ်/ခရိုင်များမှ ဌာနခွဲအလိုက် တာဝန်ခံများက လုပ်ငန်းဆောင်ရွက်နိုင်မှုအခြေအနေများ၊ ဆက်လက်ဆောင်ရွက်ရမည့်အခြေအနေများကို ရှင်းလင်တင်ပြခဲ့ကြောင်းနှင့် ဝန်ထမ်းများ၏အခက်အခဲတင်ပြချက်များအပေါ် ပြည်နယ်ဦးစီးမှူးက ပေါင်းစပ်ဖြည့်ဆည်းဆောင်ရွက်ပေးခဲ့ပါသည်။

      အခမ်းအနားတွင် အစည်းအဝေးဆုံးဖြတ်ချက် ၁၅ချက်နှင့် ဝန်ထမ်းထုဆန္ဒဖော်ထုတ်ချက် ၄ချက်ဖော်ထုတ်နိုင်ခဲ့ပြီး  ပြည်နယ်/ခရိုင်များမှ ဝန်ထမ်း ၁၅ဦးတက်‌ရောက်ခဲ့ကြကြောင်းနှင့် အစည်းအဝေးကို နေ့လယ် (၁၅:၀၀) နာရီအချိန်တွင် ရုပ်သိမ်းခဲ့ကြောင်းသိရပါသည်။

DOCA(ကရင်)

မကွေးတိုင်းဒေသကြီး၊ ကုန်သည်များနှင့်စက်မှုလက်မှုလုပ်ငန်းရှင်များအသင်းအစည်းအဝေး ခန်းမ၌ ၂၀၂၃ခုနှစ်၊ စက်တင်ဘာလ(၂၇)ရက်နေ့၊ နေ့လယ်(၁၄:၀၀)နာရီအချိန်တွင် ကိုဗစ်-၁၉ရန်ပုံငွေမှ ချေးငွေရယူထားပြီး ၂၀၂၃ခုနှစ်၊ ဩဂုတ်လနှင့် စက်တင်ဘာလတို့တွင် ချေးငွေသက်တမ်း(၃)နှစ်ပြည့်မြောက်မည့် မကွေးမြို့ရှိ လုပ်ငန်းရှင်(၂၉)ဦးတို့ကို မကွေးတိုင်းဒေသကြီးကိုဗစ်ချေးငွေစိစစ်ကြပ်မတ်ရေးအဖွဲ့၏ တာဝန်ရှိသူများကတွေ့ဆုံခဲ့ကြပြီး ချေးငွေအတိုးနှင့် အရင်းများပေးဆပ်ရန်    တိုက်တွန်းဆွေးနွေးခဲ့ကြပါသည်။

  ပထမဦးစွာ မကွေးတိုင်းဒေသကြီး၊ ကိုဗစ်-၁၉ရန်ပုံငွေမှထုတ်ပေးထားသည့်ချေးငွေများ အကျိုးရှိစွာအသုံးချမှုအပေါ် စိစစ်ကြပ်မတ်ရေးအဖွဲ့ဥက္ကဋ္ဌက ချေးငွေများ စတင်ချေးရန်စာချုပ်ချုပ်စဉ်အခါက ချေးငွေသက်တမ်းမှာ(၁)နှစ်ဖြစ်သော်လည်း ယခုအခါ (၃)နှစ်ပြည့်မြောက်ပြီဖြစ်သည့်အပြင် ကိုဗစ်-၁၉ရောဂါများလည်းမရှိတော့သည့်အတွက် နိုင်ငံတော်က ကိုဗစ်-၁၉ရန်ပုံငွေမှချေးငွေစာရင်းပိတ်သိမ်းလိုက်ပြီဖြစ်၍ အမြန်ဆုံးချေးငွေအတိုးနှင့် အရင်းများပေးဆပ်ကြရန် တိုက်တွန်းလိုကြောင်း၊ ပေးဆပ်ခြင်းမရှိပါက ချေးငွေသဘာတူစာချုပ်ပါအတိုင်း ဘဏ်လုပ်ထုံးလုပ်နည်းနှင့်အညီ အရေးယူဆောင်ရွက်သွားမည်ဖြစ်ကြောင်း ဆွေးန္ဂေးပြောကြားခဲ့ပါသည်။

  ဆက်လက်၍ အတွင်းရေးမှူးက စီးပွားရေးလုပ်ငန်းရှင်များအနေဖြင့် ကတိသစ္စာဆိုသည်မှာ အရေးကြီးကြောင်း၊ ချေးငွေအတိုးနှင့်အရင်းများကို သတ်မှတ်ကာလအတွင်း ပေးဆပ်လိုက်ခြင်းအားဖြင့် ယုံကြည်မှုတည်ဆောင်ပြီးသားဖြစ်ပါကြောင်း၊ မိမိတို့လုပ်ငန်းရာဇဝင်နှင့် မိမိတို့လုပ်ငန်း၏ပုံရိပ်များပါတက်လာမည်ဖြစ်ကြောင်း၊ ချေးငွေအတိုးနှင့်အရင်းများပေးဆပ်ပြီးနောက် မိမိတို့လုပ်ငန်းနှင့်ကိုက်ညီသည့်ချေးငွေများကို ပြန်လည်လျှောက်ထား၍ရမည်ဖြစ်ကြောင်း၊ သတ်မှတ်ကာလအတွင်း ပေးဆပ်သည့်အတွက် နောက်ထပ်ချေးငွေများ ပြန်လည်လျှောက်ထားသည့်အခါ ယုံယုံကြည်ကြည်ဖြင့် ထောက်ခံပေး၍ရမည်ဖြစ်ကြောင်း ဆွေးနွေးပြောကြားခဲ့ပါသည်။

  ထို့နောက် အဖွဲ့ဝင်တစ်ဦးဖြစ်သူတိုင်း စီးပွားရေးဘဏ်မန်နေဂျာက ကိုဗစ်-၁၉ချေးငွေသဘောတူစာချုပ်ပါ ချေးငွေသက်တမ်းမှာ (၁)နှစ်ဖြစ်သော်လည်း ယခုအခါ (၃)နှစ်ပြည့်မြောက်ပြီဖြစ်ပါကြောင်း၊ နိုင်ငံတော်ကလည်း ကိုဗစ်-၁၉ရန်ပုံငွေခေါင်းစဉ်ဖြင့် ချေးငွေစာရင်းများကိုပိတ်သိမ်းခွင့်မပြုတော့ပါကြောင်း၊ ဘဏ်မှသတိပေးစာများထုတ်၍ အကြောင်းကြားရလျှင် မိမိတို့လုပ်ငန်းနာမည်ထိခိုက်မည်ဖြစ်၍ အမြန်ဆုံးချေးငွေအတိုးနှင့် အရင်းများပြန်ဆပ်ကြစေလိုကြောင်း တိုက်တွန်းပြောကြားခဲ့ပါသည်။ ဆက်လက်၍ ကုန်သည်များနှင့်စက်မှုလက်မှုလုပ်ငန်းရှင်များအသင်းဥက္ကဋ္ဌ ဦးဖိုးနီက ၎င်းသည်လည်း လုပ်ငန်း(၂)ခုအတွက် ချေးငွေရယူထားရပြီး ယခုအခါ ချေးငွေအတိုးနှင့် အရင်း များပြန်လည်ပေးဆပ်ပြီးပါကြောင်း၊ ယခုကဲ့သို့ ပေးဆပ်ပြီးဖြစ်သည့်အတွက် တခြားခေါင်းစဉ်တစ်ခုခုဖြင့် ချေးငွေရယူလိုလျှင် အချိန်မရွေးချေးငွေရယူနိုင်ကြောင်းပြောကြားခဲ့ပြီး ညနေ(၁၆:၀၀)နာရီအချိန်တွင် အစည်းအဝေးရုပ်သိမ်းခဲ့ပါသည်။ အဆိုပါအစည်းအဝေးတွင် မကွေးတိုင်းဒေသကြီး၊ ကိုဗစ်-၁၉ရန်ပုံငွေမှထုတ်ပေးထားသည့်ချေးငွေများ အကျိူးရှိစွာအသုံးချမှုအပေါ် စိစစ်ကြပ်မတ်ရေးအဖွဲ့ဥက္ကဋ္ဌ၊ အတွင်းရေးမှူး၊ အဖွဲ့ဝင်များ၊ ကုန်သည်များနှင့်စက်မှုလက်မှုလုပ်ငန်းရှင်များအသင်းဥက္ကဋ္ဌနှင့်လုပ်ငန်းရှင်များ၊ စုစုပေါင်း(၁၈)ဦးတက်ရောက်ခဲ့ကြကြောင်းသိရပါသည်။

DOCA(မကွေး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင် ဦးစီးမှူးရုံးအနေဖြင့် “ထုတ်ကုန်လုံခြုံစိတ်ချရမှုအစ ကုန်အညွှန်းအမှတ်အသားက” ဆိုသည့်အတိုင်း ဈေးကွက်အတွင်း ရောင်းချလျက်ရှိသော ကုန်စည်များကို ထုတ်ကုန်လုံခြုံစိတ်ချရမှုရှိစေရေးအတွက် ကုန်အညွှန်းအမှတ်အသားများကို ညွှန်ကြားချက်နှင့်အညီ ဖော်ပြထားခြင်းရှိ/မရှိ သက်ဆိုင်ရာဌာန များနှင့်ပူးပေါင်း၍ ဈေးကွက်စောင့်ကြည့်စစ်ဆေးခြင်းကို လစဉ်ဆောင်ရွက်လျက်ရှိပါသည်။

     ထိုသို့ဈေးကွက်စောင့်ကြည့်စစ်ဆေးခြင်းကို စက်တင်ဘာလအတွင်း စားသုံးသူရေးရာဦးစီး ဌာနမှဦးဆောင်၍ (၆.၉.၂၀၂၃)ရက်နေ့တွင် ကန့်ဘလူမြို့ အမှတ်(၃)ရပ်ကွက်ရှိ ဆေးနှင့်ဆေးပစ္စည်း အရောင်း(၄)ဆိုင်သို့လည်းကောင်း၊ (၇.၉.၂၀၂၃)ရက်နေ့တွင် ကျွန်းလှမြို့ ပိတောက်မြိုင်ရပ်ကွက်ရှိ ဆေးနှင့်ကုန်မျိုးစုံရောင်းဝယ်ရေးဆိုင်(၁)သို့လည်းကောင်း၊ (၁၃.၉.၂၀၂၃) ရက်နေ့တွင် ကန့်ဘလူမြို့၊ အမှတ်(၅)ရပ်ကွက်ရှိ ကုန်စုံဆိုင်(၁)ဆိုင်သို့လည်းကောင်း၊ (၁၄.၉.၂၀၂၃)ရက်နေ့တွင် ကန့်ဘလူမြို့၊ မြို့မဈေးရှိ ကုန်စုံဆိုင်(၁)ဆိုင်သို့လည်းကောင်း၊ (၁၈.၉.၂၀၂၃)ရက်နေ့တွင် ကျွန်းလှမြို့ ၊သစ်ရာမြိုင်ရပ်ကွက်ရှိ ကုန်စုံဆိုင်(၁)ဆိုင်သို့လည်းကောင်း၊ (၁၉.၉.၂၀၂၃)ရက်နေ့တွင် ကန့်ဘလူမြို့၊ အမှတ်(၅)ရပ်ကွက်ရှိ စက်သုံးဆီအရောင်းဆိုင်(၁)ဆိုင်သို့လည်းကောင်း ကွင်းဆင်းစစ်ဆေးခဲ့ရာ ဈေးကွက်စောင့်ကြည့်စစ်ဆေးခြင်း စုစုပေါင်း(၅)ကြိမ်နှင့် အထူးဈေးကွက်စောင့်ကြည့်စစ်ဆေးခြင်း(၁)ကြိမ်ဆောင်ရွက်ခဲ့ပြီး  အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိ ပါသည်။

DOCA(စစ်ကိုင်း) 

    စစ်ကိုင်းတိုင်းဒေသကြီးအစိုးရအဖွဲ့မှ ခွဲဝေချထားသည့် စားအုန်းဆီများအား ကသာခရိုင်စီမံအုပ်ချုပ်ရေးအဖွဲ့၏ လမ်းညွှန်မှုဖြင့် ခရိုင်ကုန်ဈေးနှုန်းတည်ငြိမ်ရေးလုပ်ငန်းအဖွဲ့မှ ကြီးကြပ်၍ စားအုန်းဆီ များအား သတ်မှတ်ရည်ညွှန်းဈေးဖြင့် ရောင်းချပေးခြင်းကို  စားအုန်းဆီကုန်သည်များနှင့် ပူးပေါင်း၍ နိုင်ငံ့ဝန်ထမ်းများနှင့် ပြည်သူများသို့ ရောင်းချပေးလျက်ရှိရာ ၂၀၂၃-ခုနှစ် စက်တင်ဘာလ(၂၆)ရက်နေ့ နံနက်(၈)နာရီမှစ၍ ကသာမြို့၊ ရွှေအိုးကြီးဆီဆိုင်တွင် သက်သာသောနှုန်းထားဖြင့် နိုင်ငံ့ဝန်ထမ်းများအား ဒုတိယအကြိမ် ထပ်မံရောင်းချပေးခဲ့သည်။

  ခရိုင်ကုန်ဈေးနှုန်းတည်ငြိမ်ရေးလုပ်ငန်းအဖွဲ့အနေဖြင့် (၂၄.၉.၂၀၂၃)ရက်နေ့တွင် ကသာခရိုင်၊ မြို့နယ်နိုင်ငံ့ဝန်ထမ်းများအား ဝန်ထမ်းတစ်ဦးလျှင် တစ်ပိဿာနှုန်း (၅၇၂၀)ကျပ်ဖြင့် (၅၅၀)ပိဿာကို ပထမအကြိမ် ရောင်းချပေးခဲ့ပြီး (၂၆.၉.၂၀၂၃)ရက်နေ့တွင် မြို့နယ်အဆင့်ဌာနဆိုင်ရာ(၂၈)ဌာနအား တစ်ပိဿာလျှင် (၅၅၂၀)ကျပ်နှုန်းဖြင့် (၄၄၀)ပိဿာ ရောင်းချပေးခဲ့ကြောင်း၊ တိုင်းဒေသကြီးအစိုးရအဖွဲ့၏ စားအုန်းဆီခွဲတမ်းရရှိမှုအပေါ်မူတည်၍ ပြည်သူများနှင့် နိုင်ငံ့ဝန်ထမ်းများအား ထပ်မံရောင်းချပေးသွားမည်ဖြစ်ကြောင်းနှင့် ခရိုင်အတွင်းမြို့နယ်များဖြစ်သည့် အင်းတော်မြို့နယ်၊ ထီးချိုင့်မြို့နယ်နှင့် ဗန်းမောက်မြို့နယ်များတွင်လည်း စားအုန်းဆီများအား သက်သာသောနှုန်းထားဖြင့် ဖြန့်ဖြူးရောင်းချပေးရန် စီစဉ်လျက်ရှိကြောင်း သိရှိရပါသည်။

DOCA(စစ်ကိုင်း)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် အသစ်ခန့်အပ်ထားသောဝန်ထမ်းများ၊ လက်ရှိဝန်ထမ်းများ၏ လူ့စွမ်းအားအရင်းအမြစ် ဖွံ့ဖြိုးတိုးတက်စေရန်၊စားသုံးသူကာကွယ်ရေးဆိုင်ရာများအားသိရှိစေရန် ၊ ဦးစီးဌာန၏ မျှော်မှန်းချက်(Vision)၊ ရည်မှန်းချက် (Mission) များကို အောင်မြင်စွာ ပူးပေါင်းအကောင်အထည်ဖော်ဆောင်ရွက်နိုင်ရန် ရည်ရွယ်၍ ရခိုင်ပြည်နယ်ဦးစီးမှူးရုံးတွင် (၂၁-၉-၂၀၂၃) ရက်နေ့ မှ (၂၂-၉-၂၀၂၃) ရက်နေ့အထိ (၂/၂၀၂၃) ကြိမ်မြောက် စားသုံးသူကာကွယ်ရေးဆိုင်ရာသင်တန်းအား ဖွင့်လှစ်ပို့ချခဲ့ကြောင်း သတင်းရရှိပါသည်။

   အဆိုပါ သင်တန်းတွင် ရခိုင်ပြည်နယ်စားသုံးသူရေးရာဦးစီးဌာန ပြည်နယ်ဦးစီးမှူး ဦးတင်ဇော်ထွန်းက အဖွင့်အမှာစကားပြောကြားပြီး၊ ရခိုင်ပြည်နယ်ဦးစီးမှူးရုံး၊ စားသုံးသူရေးရာဌာနခွဲတာဝန်ခံ ဒေါ်နှင်းယုထွန်း (ဦးစီးအရာရှိ)က စားသုံးသူရေးရာဌာန၏ မျှော်မှန်းချက်၊ ရည်မှန်းချက် များ၊ဌာန၏သမိုင်းအကျဉ်း၊ စားသုံးသူကာကွယ်ရေးဥပဒေနှင့် နည်းဥပဒေပြဌာန်းဆောင်ရွက်ထားရှိမှု၊ စားသုံးသူကာကွယ်ရေးဆိုင်ရာလုပ်ငန်းများ ဆောင်ရွက်နေမှုများ ၊ စားသုံးသူကာကွယ်ရေး  ကော်မရှင်နှင့် စားသုံးသူရေးရာကော်မတီ ဖွဲ့စည်းခြင်း ၊ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များနှင့် စာသုံးသူသတင်း ပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ဖွင့်လှစ်ထားရှိမှု၊ စားသုံးသူနစ်နာ ဆုံးရှုံးမှုနှင့်ပတ်သက်၍တိုင်ကြားနိုင်သူများ၊ တိုင်ကြားနိုင်သည့်နည်းလမ်းများ၊တိုင်ကြားချက်များကို ကိုင်တွယ်ဖြေရှင်းပုံအဆင့်ဆင့်စသည့် စားသုံးသူကာကွယ်ရေးဥပဒေပါ အကြောင်းအရာများအား Power Point ဖြင့် အသေးစိတ်ပြောကြားခဲ့ပြီး၊ သင်တန်းသား/သူများက သိရှိလိုသည်များအား နားလည်သဘောပေါက်အောင် ရှင်းလင်းပြောကြားခဲ့ကြောင်း သိရှိရပါသည်။ အဆိုပါသင်တန်းသို့ ရခိုင်ပြည်နယ်ဦးစီးမှူးရုံးဌာနခွဲအသီးသီးမှ သင်တန်းသား/သူ(၁၀) ဦးတက်ရောက်ခဲ့ကြပြီး သင်တန်းအပြီးတွင် ရခိုင်ပြည်နယ်ဦးစီးမှူး ဦးတင်ဇော်ထွန်းက သင်တန်းဆင်းလက်မှတ်များ ပေးအပ်ခဲ့ကြောင်း  သတင်းရရှိပါသည်။

DOCA(ရခိုင်)