ပြည်ပကုန်သွယ်မှုသတင်းများ

အိန္ဒိယနိုင်ငံ၌ ဓာတ်မြေဩဇာလုပ်ငန်း ၁၁၂ ခု၏ လိုင်စင်များအား အစိုးရက ပယ်ဖျက်

အစိုးရက ထောက်ပံ့ပေးသည့် ဓာတ်မြေဩဇာများအား စက်မှုကုန်ထုတ်လုပ်ငန်းများသို့ လွှဲပြောင်းသုံးစွဲခြင်းကို တားဆီးရန်နှင့် အရည်အသွေးအာမခံချက်ရှိစေရန် လုပ်ဆောင်မှုအဖြစ် စံသတ်မှတ်ချက်များကို ဖောက်ဖျက်ကျူးလွန်သော ကုမ္ပဏီ ၁၁၂ ခု၏ လုပ်ငန်းလိုင်စင်များအား ဖျက်သိမ်းခဲ့ကြောင်းနှင့် လွန်ခဲ့သည့်ခြောက်လအတွင်း လုပ်ငန်းပေါင်း ၃၇၀ ကျော်ကို စစ်ဆေးခဲ့ပြီးနောက် အမှုဖွင့်အရေးယူမှု ၃၀ မှုရှိခဲ့ကြောင်း အိန္ဒိယ ဓာတုပစ္စည်းနှင့် ဓာတ်မြေဩဇာဝန်ကြီးဌာနက မေလ ၉ ရက်၊ အင်္ဂါနေ့တွင် ပြောကြားခဲ့သည်။

ပြည်နယ် ၁၅ ခုရှိ ဓာတ်မြေဩဇာလုပ်ငန်းပေါင်း ၃၇၀ ကို စစ်ဆေးရာတွင် ဓာတ်မြေဩဇာ အရောအနှော ပြုလုပ်သည့် စက်ရုံ ၂၂၀ ခု၊ ယူရီးယားစက်ရုံ ၁၃၀ ခု၊ Single Super Phosphate (SSP) ဓာတ်မြေဩဇာစက်ရုံ ၁၅ ခုနှင့် ပို့ကုန်လုပ်ငန်းရှင် ၅ ဦးတို့အား ပါဝင်ကြောင်း၊ စစ်ဆေးမှုတွင် ဂူဂျရတ်ပြည်နယ်မှ လုပ်ငန်း ၉၂ ခု အများဆုံး ပါဝင်ပြီး ၎င်း၏နောက်၌ ကီရာလာပြည်နယ်မှ ၅၄ ခု၊ တမီနာဒူပြည်နယ်မှ ၄၀ ခုနှင့် ကာနာတကာပြည်နယ်မှ လုပ်ငန်း ၃၉ ခုတို့ကို အများဆုံး စစ်ဆေးခဲ့ကြောင်း အဆိုပါဝန်ကြီးဌာန၏ သတင်းထုတ်ပြန်ချက်တွင် ဖော်ပြပါသည်။

ကမ္ဘာတစ်ဝန်း၌ ဓာတ်မြေဩဇာ အကျပ်အတည်း ဖြစ်ပေါ်လျက်ရှိသည့် အခြေအနေတွင် ၄၅ ကီလိုဂရမ်ဝင် ယူရီးယားဓာတ်မြေဩဇာ တစ်အိတ်လျှင် ၂၅၀၀ ရူပီးခန့် ကျသင့်သော်လည်း လယ်သမားများသို့ ၂၆၆ ရူပီး ဖြင့် ရောင်းချပေးခဲ့ကြောင်းနှင့် မူလရည်ရွယ်သော လုပ်ငန်းလမ်းကြောင်းမှ ပြောင်းလွှဲမှုရှိသည့် ဖြစ်စဉ်တွင် ပါဝင်ပတ်သက်မှုရှိသော ဖြန့်ဖြူးသူ သို့မဟုတ် အသုံးပြုသူ သို့မဟုတ် ဆိုင်ခွဲများအား ပြင်းပြင်းထန်ထန်အရေးယူသွားမည်ဖြစ်ကြောင်း ဓာတုပစ္စည်းနှင့် ဓာတ်မြေဩဇာဝန်ကြီး Mr. Mansukh Mandaviya က‌ ပြောကြားခဲ့သည်။

အဆိုပါ ဓာတ်မြေဩဇာလုပ်ငန်းများမှ နမူနာ ၂၆၈ ခုအား ရယူခဲ့ပြီး၊ နမူနာ ၅၉ ခု၏ ရလဒ်အား ‌စောင့်ဆိုင်းနေဆဲဖြစ်သည်။ သို့သော် နမူနာ ၈၉ ခုတွင် စံချိန်မမီသော ယူရီးယား ပါဝင်ကြောင်းတွေ့ရှိခဲ့သည်။ စက်ရုံ ၁၃၀ အား စစ်ဆေးရာတွင် ၁၂၀ မှာ ယူရီးယားမြေဩဇာအား လုပ်ငန်းလမ်းကြောင်းမှ ပြောင်းလွှဲမှုရှိသဖြင့် လုပ်ငန်းလိုင်စင် ၁၁၂ ခုအား ပယ်ဖျက်ခဲ့ကြောင်း ဝန်ကြီး Mr. Mandaviya က ပြောဆိုသည်။

အဆိုပါ စစ်ဆေးမှုများအရ အစိုးရက အထောက်အပံ့ပေးသည့် ဓာတ်မြေဩဇာများကို လမ်းကြောင်း ပြောင်းလွှဲမှုရှိခြင်းကြောင့် အမှုဖွင့်အရေးယူမှု ၃၀ မှုထိ ရှိလာခဲ့ပြီး ဂူဂျရတ်၊ ကီရာလာ၊ ဟာရီယာနာ၊ ရာဂျပ်စတန်နှင့် ကာနာတကာ ပြည်နယ်များမှ ဓာတ်မြေဩဇာ အိတ် ၇၀၀၀၀ အား သိမ်းဆည်းခဲ့ကြောင်း၊ အဆိုပါ အိတ်များအနက် ၂၆၁၉၉ အိတ်ကို ဓာတ်မြေဩဇာထိန်းချုပ်ရေးအမိန့် (FCO) စည်းမျဉ်းများအရ ဖျက်ဆီးခဲ့ကြောင်း၊ ပထမဆုံးအကြိမ်အဖြစ် လွန်ခဲ့သည့် ၁ နှစ်အတွင်း ယူရီးယား မှောင်ခိုရောင်းချသူ ၁၁ ဦးအား မှောင်ခိုရောင်းဝယ်မှု တားဆီးကာကွယ်ရေး ဥပဒေအရ ထောင်ဒဏ်ချမှတ်ခဲ့ကြောင်း၊ ယူရီးယားကို စိုက်ပျိုးရေးလုပ်ငန်းအပြင် အစေး၊ ကော်၊ သုံးထပ်သား၊ ပုံသွင်းမှုန့်၊ ပန်းကန်ခွက်ယောက်၊ နွားစာ၊ နို့ထွက်ပစ္စည်း၊ သတ္တုတွင်း ဖောက်ခွဲရေး ပစ္စည်း စသည်ဖြင့် စက်မှုလုပ်ငန်းများတွင် အသုံးပြုလာကြကြောင်း၊ တရားမဝင် ပြောင်းလဲသုံးစွဲမှု မြင့်တက်လာခြင်းကြောင့် မျိုးစေ့ကြဲကာလတွင် ယူရီးယားမြေဩဇာ ရှားပါးလာခြင်းဖြစ်ကြောင်း အိန္ဒိယဓာတုပစ္စည်းနှင့် ဓာတ်မြေဩဇာဝန်ကြီးဌာနက ဖော်ပြထားသည်။

Source: The Hindu Business Line, 9 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

သံသတ္တုရိုင်း တစ်တန်လျှင် ဒေါ်လာ ၁၀၀ အောက် ဈေးနှုန်းကျဆင်း

ပြည်ပကုန်သွယ်မှုသတင်းများ

စင်ကာပူဈေးကွက်၌ သံသတ္တုရိုင်းဈေးနှုန်းမှာ မေလ ၈ ရက်၊ တနင်္လာနေ့တွင် ကျဆင်းခဲ့ပြီး ဩစတေးလျနှင့် ဘရာဇီးတို့မှ တင်ပို့ရောင်းချမှု အားကောင်းလာမှုနှင့်အတူ ထိပ်တန်းသံမဏိ ထုတ်လုပ်သူတရုတ်၏ ဝယ်လိုအား နှေးကွေးနေသဖြင့် တစ်တန်လျှင် ဒေါ်လာ ၁၀၀ အောက်ထိ ရောက်ရှိခဲ့သည်။

သံမဏိထုတ်လုပ်ရာ၌ အသုံးပြုသည့်ကုန်ကြမ်းအား အရောင်းအဝယ်အများဆုံးဖြစ်သည့် ဇွန်လအတွက် ကြိုတင်ချုပ်ဆိုသော စာချုပ်များ၏ စင်ကာပူအိတ်ချိန်းတွင် ဖြစ်ပေါ်သည့် ဈေးနှုန်းမှာ တစ်တန်လျှင် ၉၇.၀၅ ဒေါ်လာအထိ ၁.၇ ရာခိုင်နှုန်း ကျဆင်းခဲ့သည်။

Caixin Manufacturing ၏ ဝယ်ယူရေးစီမံခန့်ခွဲသူများ အညွှန်းကိန်း (PMI) အချက်အလက်များအရ ဧပြီလတွင် တရုတ်နိုင်ငံ၏ စက်ရုံအလုပ်ရုံ ဆောင်ရွက်မှုများ မမျှော်လင့်ဘဲ ကျဆင်းပြီးနောက် မေလ ၅ ရက်၊ သောကြာနေ့တွင် ၉၄.၂၀ ဒေါ်လာအထိ ကျဆင်းမှုက သံသတ္တုရိုင်း ဈေးကွက်အပေါ် ရိုက်ခတ်ခဲ့သည်။ သို့သော် ရှန်ဟိုင်းရှိ သံမဏိဈေးနှုန်းများ ပြန်လည်ကောင်းမွန်လာမှုနှင့်အတူ တရုတ်နိုင်ငံ Dalian ကုန်စည်ဒိုင်၌ သံသတ္တုရိုင်းများမှာ ငါးလတာကာလအတွင်း အနိမ့်ဆုံးဈေးနှုန်းသို့ ‌ရောက်ရှိပြီးနောက် သောကြာနေ့တွင် အရောင်းအဝယ် ပြန်လည်ကောင်းမွန်လာခဲ့သည်။

Dalian ရှိ သံသတ္တုရိုင်းများ၏ဈေးမှာ စက်တင်ဘာလစာချုပ်အရ တစ်တန်လျှင် ၇၀၂ ယွမ် (၁၀၁.၄၈ ဒေါ်လာ) ဖြင့် ၂.၂ ရာခိုင်နှုန်း မြင့်တက်လာခဲ့သည်။ တရုတ်နိုင်ငံအနေဖြင့် သံရည်ကြို လုပ်ငန်းဆောင်ရွက်နိုင်မှုများအပေါ်မူတည်၍ စာချုပ်ကို ဆက်လက်ချုပ်ဆိုသွားမည်ဖြစ်ကြောင်း၊ သံသတ္တုရိုင်းဝင်ရောက်မှု မြင့်တက်လာခြင်းနှင့် တရုတ်နိုင်ငံ၏ သံသတ္တုရိုင်းများပြားလာခြင်းတို့ကြောင့် ဩစတေးလျနှင့် ဘရာဇီးတို့၏ သံသတ္တုရိုင်းများ တင်ပို့မှုသည် သုံးလပတ်အတွင်း ပိုမိုမြန်ဆန်လာနိုင်သည်ဟု ခန့်မှန်းမိကြောင်း၊ သံသတ္တုရိုင်းဝယ်လိုအားအတွက် ဖြစ်နိုင်ချေရှိသော စုဆောင်းမှုမှာ တရုတ်၏ သံရည်ကြိုမီးဖိုများအတွက် ပိုမိုဈေးသက်သာစွာ သိုလှောင်ထားခြင်း ဖြစ်ကြောင်း Navigate Commodities မှ မန်နေဂျင်းဒါရိုက်တာ Mr. Atilla Widnell က ပြောကြားခဲ့သည်။ သို့သော် တည်ငြိမ်သော ငွေကြေးစီးဆင်းမှုဖြစ်စေရန်အတွက် ထုတ်လုပ်မှုကို လျှော့ချရန် တရုတ်နိုင်ငံ သံနှင့်သံမဏိအသင်းက ပြည်တွင်း သံမဏိထုတ်လုပ်သူများအား တိုက်တွန်းထားသည်။

သံရိုင်းများအနေဖြင့် တစ်တန်လျှင် ၉၅ ဒေါ်လာ ကြမ်းခင်းဈေးအထိဖြစ်နိုင်သည် ဟု ANZ ကုန်စည်ဆိုင်ရာ မဟာဗျူဟာရှင်များက ပြောဆိုကြောင်း၊ Shanghai Futures Exchange တွင် ပြန်လည်အားဖြည့် သံချောင်း (Rebar) ဈေးနှုန်းသည် ၃.၂ ရာခိုင်နှုန်း မြင့်တက်ခဲ့ပြီး၊ သံမဏိပြားအခွေ (Hot-rolled coil) မှာ ၃.၇ ရာခိုင်နှုန်းနှင့် သံမဏိချောင်း (Stainless Steel) သည် ၁.၁ ရာခိုင်နှုန်းအထိ ဈေးနှုန်းမြင့်တက်လာခဲ့ကြောင်း ရိုက်တာသတင်းဌာနက ဖော်ပြထားသည်။

Source: Reuters, 9 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

အီသနောလောင်စာရောစပ်မှု ၁၂% ရရှိအောင် အိန္ဒိယသကြားစက်ရုံများက ဆောင်ရွက်လျက်ရှိ

ပြည်ပကုန်သွယ်မှုသတင်းများ

အိန္ဒိယနိုင်ငံ၌ ၂၀၂၂-၂၀၂၃ ခုနှစ်၊ အီသနောပေးသွင်းမှုနှစ် (Ethanol Supply Year – ESY) အတွက် စာချုပ်ချုပ်ဆိုထားသော အီသနောလီတာပေါင်း ၅၁၄ ကုဋေအနက် ဧပြီလ ၃၀ ရက်နေ့အထိ လီတာပေါင်း ၂၃၃ ကုဋေကို ရေနံထွက်ကုန်ဖြန့်ဖြူးရေးကုမ္ပဏီများက လက်ခံရရှိပြီးဖြစ်ရာ လောင်စာဆီ၌ အီသနောရောစပ်မှုကို ယခင်နှစ်ကာလတူတွင် ဆောင်ရွက်နိုင်မှု ၁၀% ထက် ပိုမိုလျက် ၁၁.၆၅% သို့ တိုးတက်ဆောင်ရွက်နိုင်ကြောင်း သိရှိရသည်။ ယခု ESY နှစ်အတွက် ဓာတ်ဆီတွင် အီသနော ရောစပ်ပါဝင်မှုကို ၁၂% အထိ တိုးမြှင့်ရန် အိန္ဒိယအစိုးရက ရည်မှန်းထားသည်။

တမီနာဒူပြည်နယ်မှအပ ကျန်ဒေသများတွင် ကြံကြိတ်ခွဲမှုများ ပြီးစီးဖြစ်၍ သကြားစက်ရုံများအနေဖြင့် ရာသီပိတ်သိမ်းချိန်အတွက် သိုလှောင်ထားသော တင်လဲရည်မှ အီသနောလောင်စာ ထုတ်လုပ်တော့မည်ဖြစ်သည်။ ကြံရည်မှ အီသနောထုတ်လုပ်မှုမှာ ပြီးဆုံးခဲ့ပြီဖြစ်ကြောင်း၊ သကြားထုတ်လုပ်နိုင်မှု ကျဆင်းနေချိန်၌ အီသနောထုတ်လုပ်နိုင်မှုမှာ အောင်မြင်မှုတစ်ရပ်ပင်ဖြစ်ကြောင်း အစိုးရအရာရှိတစ်ဦးက ပြောဆိုပါသည်။ ရေနံထွက်ကုန်ဖြန့်ဖြူးရေးကုမ္ပဏီများသည် လောင်စာဆီ ရောနှောမှုလိုအပ်ချက်အတွက် သကြားအခြေပြုစက်ရုံများမှ အီသနော လီတာပေါင်း ၃၇၄ ကုဋေနှင့် ကောက်ပဲသီးနှံ အခြေပြု အီသနောစက်ရုံများမှ လီတာပေါင်း ၁၄၀ ကုဋေ ဝယ်ယူရမည်ဖြစ်သည်။

ကြံရည်မှတိုက်ရိုက်ထုတ်လုပ်မည်ဆိုပါက ကြံတစ်တန်လျှင် အီသနော ၇၀ မှ ၇၅ လီတာ ထွက်ရှိနိုင်ပြီး တင်လဲရည်အပျစ် (B-Heavy Molasses) တစ်တန်မှ ထုတ်လုပ်လျှင် ဇီဝလောင်စာ ဆီလီတာ ၃၂၀ ထွက်ရှိနိုင်သည်။ သကြားလုပ်ငန်းနယ်ပယ် သတင်းအရင်းအမြစ်များအရ သကြားစက်ရုံများသည် ကြံရည်မှ အီသနောလီတာပေါင်း ၁၃၈ ကုဋေနှင့် တင်လဲရည်အပျစ်မှ လီတာပေါင်း ၂၃၀ ကုဋေ ပေးသွင်းရန် စာချုပ်ချုပ်ဆိုပြီး ဖြစ်ကြောင်း သိရှိရသည်။

အိန္ဒိယအစိုးရက ၂၀၂၃-၂၀၂၄ ခုနှစ်အတွက် ESY ရာသီအား ဒီဇင်ဘာလမှ နိုဝင်ဘာလအထိ ကာလအစား နိုဝင်ဘာလမှ အောက်တိုဘာလအထိ ကာလသို့ ရွှေ့ပြောင်းလိုက်ခြင်းကြောင့် ယခုနှစ်တွင် ၁၁ လသာ လုပ်ငန်းလည်ပတ်မည်ဖြစ်ပြီး အောက်တိုဘာလ ၃၁ ရက်နေ့အတွင်း အီသနော လောင်စာရောစပ်နိုင်မှု ၁၂% ရရှိရန် ဆောင်ရွက်ရမည်ဖြစ်သည်။

အိန္ဒိယ သကြားစက်ရုံလုပ်ငန်းရှင်များအသင်း (ISMA) ၏ စာရင်းများအရ ယခုနှစ် သကြားထုတ်လုပ်ရေးရာသီ (၂၀၂၂ ခုနှစ် အောက်တိုဘာလမှ ၂၀၂၃ ခုနှစ် စက်တင်ဘာလအထိ) တွင် ဧပြီလ ၃၀ ရက်နေ့အထိ သကြားတန်ချိန်ပေါင်း ၃၁၇.၉၁ သိန်း ထုတ်လုပ်နိုင်ခဲ့ကြောင်း၊ ယခင်နှစ် ကာလတူထုတ်လုပ်နိုင်မှု တန်ချိန် ၃၄၁.၆၃ သိန်းနှင့် နှိုင်းယှဉ်ပါက ၇% ကျဆင်းခြင်းဖြစ်ကြောင်း၊ အထူးသဖြင့် မဟာရဋ္ဌပြည်နယ်၌ တန်ချိန် ၂၇ သိန်း လျော့ကျခဲ့ကြောင်း၊ သို့ဖြစ်ရာ အီသနောထုတ်လုပ်ရန် သုံးစွဲမည့် သကြားပမာဏအား မူလက တန်ချိန် ၄၅ သိန်းမှ လျာထားရာမှ တန်ချိန် သိန်း ၄၀ သာ အသုံးပြုနိုင်မည်ဟု ISMA က ယခင်လ၌ လျော့ချခန့်မှန်းခဲ့ကြောင်း သိရှိရသည်။

သမဝါယမသကြားစက်ရုံများအသင်းချုပ် (NFCSF) ကမူ ယခုနှစ် ကြံကြိတ်ခွဲရေးရာသီ၌ ၁-၁၀-၂၀၂၂ နေ့မှ ၃၀-၄-၂၀၂၃ နေ့အတွင်း သကြားတန်ချိန် ၃၂၀.၃၀ သိန်းခန့် ထုတ်လုပ်နိုင်ခဲ့ကြောင်း ခန့်မှန်းထားသည်။ NFCSF ၏ အချက်အလက်များအရ ၂၀၂၃ ခုနှစ်၊ ဧပြီလ ၃၀ ရက်နေ့အထိ အိန္ဒိယတစ်နိုင်ငံလုံး အတိုင်းအတာဖြင့် ကြံတန်ချိန် ၃၂၄၄.၃၃ သိန်း ကြိတ်ခွဲခဲ့ပြီး ကြံကြိတ်ခွဲမှုမှ သကြားပြန်လည် ထုတ်လုပ်ရရှိမှုနှုန်းမှာ ၉.၈၇% ရှိကြောင်း၊ ယခင်နှစ်ကာတူ၌ ကြံတန်ချိန် ၃၄၀၉.၆၂ သိန်း ကြိတ်ခွဲနိုင်ခဲ့ပြီး သကြားပြန်လည်ရရှိမှုမှာ ၁၀.၀၇% ဖြစ်၍ ယခုနှစ်တွင် ထုတ်လုပ်မှု ကျဆင်းခဲ့ကြောင်း သိရှိရပါသည်။

ဆီးဂိမ်းပြိုင်ပွဲ၌ ကမ္ဘောဒီးယား၏ ကျေးရွာတစ်ရွာထုတ်ကုန်တစ်မျိုး ကုန်စည်များ ခင်းကျင်းပြသ

ပြည်ပကုန်သွယ်မှုသတင်းများ

၂၀၂၃ ခုနှစ်၊ အရှေ့တောင်အာရှနိုင်ငံများ အားကစားပြိုင်ပွဲ ကျင်းပရာ ကမ္ဘောဒီးယားနိုင်ငံ၊ ဖနွမ်းပင်မြို့ရှိ Morodok Techo အားကစားရုံ၏ ပရိဝုဏ်အတွင်း ဆိုင်ခန်းငယ်များ၌ ဈေးကွက်အသစ်များ ရှာဖွေမြှင့်တင်ရန် ရည်ရွယ်ချက်ဖြင့် ဒေသထွက်စိုက်ပျိုးရေးနှင့် စက်မှုထုတ်ကုန်အမျိုးအမည်ပေါင်း ၂၀၀ ကျော်ကို ခင်းကျင်းပြသလျက်ရှိကြောင်း သိရှိရပါသည်။

ကမ္ဘောဒီးယားအမျိုးသားအဆင့် ကျေးရွာတစ်ရွာထုတ်ကုန်တစ်မျိုးမြှင့်တင်ရေးကော်မတီသည် ၁၀ ရက်ကြာ ကျင်းပသည့် ဆီးဂိမ်းပြိုင်ပွဲ၌ ကျေးလက်စိုက်ပျိုးရေးထုတ်ကုန်များ ခင်းကျင်းပြသနိုင်ရေး စီစဉ်ခဲ့ရာ ပြခန်း ၂၀ ကျော်ဖြင့် လုပ်ငန်းရှင် ၄၅ ဦးက ဒေသထွက်ကုန် ၂၀၀ ကျော်ကို ပါဝင်ပြသခဲ့ခြင်းဖြစ်သည်။ အဆိုပါကော်မတီ၏ အတွင်းရေးမှူးချုပ် Mr. Suong Noy က လယ်ယာထွက်ကုန်ပြပွဲ၏ အဓိကရည်ရွယ်ချက်မှာ နိုင်ငံတကာဧည့်သည်များအား ကမ္ဘောဒီးယား၏ အရည်အသွေးကောင်းမွန်သည့် ထုတ်ကုန်များကို သိရှိစေပြီး ဈေးကွက်ရှာဖွေမြှင့်တင်နိုင်ရန်နှင့် အလုပ်အကိုင် အခွင့်အလမ်းများ ရရှိစေရန်ဖြစ်ကြောင်း၊ ပြပွဲ၌ ပါဝင်သူများအနေဖြင့် မိမိတို့၏ ထုတ်ကုန်များကို တာဝန်ယူမှုဖြင့် ရိုးရိုးသားသား ရောင်းချလျက် ကမ္ဘောဒီးယား၏ ထုတ်လုပ်မှုကွင်းဆက် အရည်အသွေးအပေါ် ဂုဏ်ယူကြရန် တိုက်တွန်းလိုကြောင်း၊ အနာဂတ်တွင် ကျေးရွာတစ်ရွာ ထုတ်ကုန်တစ်မျိုး လှုပ်ရှားမှုတွင် ပါဝင်သောအဖွဲ့ဝင်များ၏ ထုတ်ကုန်များအား ကျယ်ပြန့်စွာ သိရှိလျက် အရောင်းအဝယ် ပိုမိုဖြစ်နိုင်ကြောင်း ပြောကြားခဲ့သည်။

ကမ္ဘောဒီးယားနိုင်ငံ၌ အသေးစားနှင့်အလတ်စားစီးပွားရေးလုပ်ငန်းများသည် စုစုပေါင်းလုပ်ငန်းများ၏ ၉၀ ရာခိုင်နှုန်းရှိပြီး GDP ၏ ၅၈ ရာခိုင်နှုန်းရှိသည့်အပြင် အလုပ်အကိုင်အနေဖြင့် ၇၀ ရာခိုင်နှုန်းကျော် ဖန်တီးပေးထားသည်။ ၆၄ နှစ်အတွင်း ပထမဆုံးအကြိမ် အိမ်ရှင်အဖြစ် အရှေ့တောင်အာရှနိုင်ငံများ အားကစားပြိုင်ပွဲအား လက်ခံကျင်းပသည့် အခွင့်အရေးကို ရယူလျက် ကမ္ဘောဒီးယားအစိုးရက ကျေးလက် စိုက်ပျိုးရေးထုတ်ကုန်များ မြှင့်တင်မှုကို ဆောင်ရွက်ခဲ့ခြင်းဖြစ်သည်။

Source: Khmer Times, 10 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

အာဆီယံ၏ ဒေသသုံးငွေကြေးဖြင့် ပေးချေရန် ကြေညာချက်မူကြမ်းကို ထိုင်းအစိုးရက အတည်ပြု

ပြည်ပကုန်သွယ်မှုသတင်းများ

အာဆီယံစီးပွားရေးအသိုက်အဝန်းအသေးစိတ်အစီအစဉ် ၂၀၂၅ အား အကောင်အထည်ဖော်ဆောင်မှု၏ အစိတ်အပိုင်းတစ်ရပ်ဖြစ်သည့် ဒေသတွင်းငွေပေးချေဆက်သွယ်ဆောင်ရွက်မှု တိုးတက်ရေးနှင့် ‌ဒေသသုံးငွေကြေးသို့ ကူးပြောင်းမှု မြင့်တင်ရေးဆိုင်ရာ အာဆီယံခေါင်းဆောင်များ၏ ကြေညာချက်မူကြမ်းကို ထိုင်းနိုင်ငံအစိုးရအဖွဲ့က မေလ ၉ ရက်နေ့တွင် လက်ခံအတည်ပြုခဲ့ကြောင်း သိရှိရပါသည်။

အဆိုပါကြေညာချက်မူကြမ်းသည် အထူးသဖြင့် အီလက်ထရွန်းနစ် ငွေပေးချေမှုစနစ်အပါအဝင် နယ်စပ်ဖြတ်ကျော် ငွေပေးချေမှုများအား အဟန့်အတား ကင်းရှင်းပြီး လုံခြုံစိတ်ချစွာ ဆောင်ရွက်နိုင်ရေးကို အထောက်အပံ့ပြုမည့် တီထွင်ဆန်းသစ်မှုနှင့် အခြေခံအဆောက်အအုံ ဖွံ့ဖြိုးတိုးတက်မှုလုပ်ငန်းနယ်ပယ်များအပေါ် လွှမ်းခြုံမှုရှိကြောင်း၊ ၎င်းမူကြမ်းအရ ‌ဒေသသုံးငွေကြေးသို့ ကူးပြောင်းရေးလုပ်ငန်းအဖွဲ့တစ်ရပ် ထူထောင်လျက် ပြင်ပငွေကြေးဈေးကွက် မတည်ငြိမ်မှုများ၏ ဒေသတွင်းသို့ ရိုက်ခတ်မှုမှ အကာအကွယ်ပေးခြင်း၊ ကုန်သွယ်မှုနှင့် ရင်းနှီးမြှုပ်နှံမှုကို အထောက်အကူပြုနိုင်ရေး ပြောင်းလွယ်ပြင်လွယ်ရှိသော နိုင်ငံခြားငွေလဲလှယ်မှုဆိုင်ရာ စံသတ်မှတ်ချက်များ ချမှတ်ခြင်းတို့ကို လုပ်ဆောင်မည်ဖြစ်ကြောင်း၊ မေလ ၁၁ ရက်နေ့တွင် အင်ဒိုနီးရှားနိုင်ငံ၊ Labuan Bajo မြို့၌ ကျင်းပမည့် အာဆီယံထိပ်သီးဆွေးနွေးပွဲတွင် ဒေသတွင်းခေါင်းဆောင်များက အဆိုပါကြေညာချက်မူကြမ်းအပေါ် စဉ်းစားဆွေးနွေးကြမည်ဖြစ်ကြောင်းနှင့် ၎င်းမူကြမ်းအား စည်းနှောင်မှုရှိသော သဘောတူညီချက်အဖြစ် မှတ်ယူနိုင်ခြင်း မရှိကြောင်းဖြင့် ထိုင်းနိုင်ငံအစိုးရ ပြောရေးဆို ခွင့်ရှိသူ Ms. Rachada Dhnadirek က ပြောကြားပါသည်။

ဒေသတွင်း ငွေပေးချေဆက်သွယ်ဆောင်ရွက်မှုကို ကြပ်မတ်ရန်နှင့် ‌ဒေသသုံးငွေကြေးသို့ ကူးပြောင်းမှုမြှင့်တင်ရေး လမ်းညွှန်ချက်များကို ချမှတ်နိုင်ရန်အတွက် အာဆီယံခေါင်းဆောင်များ သည် ဘဏ္ဍာရေးဝန်ကြီးများနှင့် ဗဟိုဘဏ် အုပ်ချုပ်ရေးမှူးများသို့ တာဝန်ပေးအပ်ထားပြီးဖြစ် ကြောင်း The Nation Thailand သတင်းဌာနက ဖော်ပြပါသည်။

Source: The Nation Thailand, May 09, 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

ဗီယက်နမ်နိုင်ငံ၌ ပထမဦးဆုံးတည်ဆောက်ခဲ့သော ရေနံချက်စက်ရုံအား အဆင့်မြှင့်တင်မည်

ပြည်ပကုန်သွယ်မှုသတင်းများ

ဗီယက်နမ်နိုင်ငံ၌ ပထမဦးဆုံး တည်ဆောက်ခဲ့သော နိုင်ငံ၏ အလယ်ပိုင်းဒေသ၊ ကွမ်ညိုင်ပြည်နယ်ရှိ Dung Quat Oil Refinery စက်ရုံ၏ ရေနံသန့်စင်ချက်လုပ်နိုင်စွမ်းကို တစ်ရက်လျှင် ရေနံစည်ပေါင်း ၁၄၈၀၀၀ မှ ၁၇၁၀၀၀ သို့ အဆင့်မြှင့်တင်နိုင်ရန် ရင်းနှီးမြှုပ်နှံမှုတန်ဖိုး အမေရိကန် ဒေါ်လာ ၁.၂၆ ဘီလီယံ ကျခံဆောင်ရွက်မည်ဖြစ်ကြောင်း သိရှိရပါသည်။

နိုင်ငံပိုင် PetroVietnam ၏ လက်အောက်၌ လုပ်ငန်းခွဲအဖြစ် အဆိုပါ ‌ရေနံချက်စက်ရုံအား လည်ပတ်လုပ်ကိုင်လျက်ရှိသည့် Binh Son ကုမ္ပဏီက ၎င်း၏အစုရှယ်ယာများမှ ဒေါ်လာ ၅၀၃ သန်းကိုထည့်ဝင်မည်ဖြစ်ပြီး ကျန်ပမာဏကို ချေးငွေရယူမှုဖြင့် ဆောင်ရွက်မည်ဖြစ်ကြောင်း၊ လက်ရှိကာလ၌ ဧရိယာအကျယ်အဝန်း ၁၀.၆ ဟက်တာတွင် စက်ရုံတည်ဆောက်ထားရာမှ ဧရိယာ ၄၁ ဟက်တာအထိ တိုးချဲ့တည်ဆောက်ခြင်းကို ၂၀၂၈ ခုနှစ် ပထမ သုံးလပတ်၌ ပြီးစီးရန် လျာထားကြောင်း၊ စက်ရုံအား အဆင့်မြှင့်တင်ရာတွင် ကန့်ပါဝင်မှုများပြားသည့် ရေနံစိမ်းများကို ဥရောပ အဆင့်-၅ စံနှုန်းနှင့်အညီ သန့်စင်နိုင်ရေး ထပ်ဆောင်းနည်းပညာရပ်များပါဝင်သည့် အလုပ်ရုံများကို ထည့်သွင်းတည်ဆောက်မည်ဖြစ်ကြောင်း၊ စက်ရုံအားအဆင့်မြှင့်တင်ရန် ၂၀၁၄ ခုနှစ်တွင် အတည်ပြုခဲ့သော်လည်း စက်ရုံဒီဇိုင်း၊ ငွေကြေးရရှိနိုင်မှုနှင့် အခြားအတည်ပြုမှုလုပ်ငန်းစဉ်များအရ ဆိုင်းငံ့ထားရှိခဲ့ကြောင်း၊ ယခုအခါ မူလလျာထားခဲ့သည့်တစ်ရက်လျှင် ‌ရေနံစည် ၁၉၂၀၀၀ ကို သန့်စင် ချက်လုပ်နိုင်ရန်မှ ‌ရေနံစည် ၁၇၁၀၀၀ သို့လည်းကောင်း၊ ရင်းနှီးမြှုပ်နှံမှုတန်ဖိုးအား ဒေါ်လာ ၅၄၀ သန်း လျော့ချလျက် ဒေါ်လာ ၁.၂၆ ဘီလီယံသို့လည်းကောင်း ပြင်ဆင်ခဲ့ခြင်းဖြစ်ကြောင်း Vietnam News သတင်းဌာနက ဖော်ပြပါသည်။

Dung Quat စီးပွားရေးဇုန်တွင် ၂၀၀၅ ခုနှစ်၌ တည်ဆောက်ခဲ့သော အဆိုပါ ရေနံချက်စက်ရုံ မှ သန့်စင်ပြီး ရေနံထွက်ကုန်များအား ၂၀၁၀ ပြည့်နှစ်မှ စတင်၍ ရောင်းချခဲ့ပြီး လက်ရှိကာလတွင် နှစ်စဉ်ရေနံစိမ်း တန်ချိန် ၆.၅ သန်းမှ ကုန်ချောထုတ်လုပ်ပေးလျက်ရှိရာ ပြည်တွင်းလိုအပ်ချက်၏ ၃၅% ကို ဖြည့်ဆည်းပေးလျက်ရှိသည်။

Source: Vietnam News, May 09, 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

အိုပက်နိုင်ငံများထံမှ အိန္ဒိယနိုင်ငံ၏ ရေနံစိမ်းဝယ်ယူမှု ကျဆင်းခဲ့ခြင်း

ပြည်ပကုန်သွယ်မှုသတင်းများ

အိန္ဒိယနိုင်ငံ၏ ရေနံစိမ်းတင်သွင်းမှု ကာလတစ်လျှောက်တွင် အိုပက် (OPEC) အဖွဲ့ဝင်နိုင်ငံများထံမှ ဝယ်ယူမှုမှာ ၂၀၂၃ ခုနှစ် ဧပြီလ၌ အနိမ့်ကျဆုံး အခြေအနေသို့ ရောက်ရှိခဲ့ပါသည်။

ကမ္ဘာ့စွမ်းအင်ကုန်စည်စီးဆင်းမှုကို လေ့လာဆန်းစစ်သည့် လန်ဒန်မြို့အခြေစိုက် Vortexa လီမိတက်၏ အစီရင်ခံစာအရ အိန္ဒိယနိုင်ငံ၏ ၂၀၂၂ ခုနှစ် ဧပြီလအတွက် ရေနံစိမ်းတင်သွင်းမှုပမာဏတွင် အိုပက်အဖွဲ့ဝင်နိုင်ငံများသည် ဈေးကွက်ဝေစု ၇၂% ရရှိခဲ့ကြောင်း၊ အိန္ဒိယနိုင်ငံသည် ၂၀၂၃ ခုနှစ် ဧပြီလအတွင်း တစ်ရက်လျှင် ရေနံစိမ်းစည်ပေါင်း ၄.၆ သန်း တင်သွင်းခဲ့ရာတွင် အိုပက်အဖွဲ့ဝင်နိုင်ငံများထံမှ တင်သွင်းမှုမှာ တစ်ရက်လျှင် ရေနံစိမ်းစည်ပေါင်း ၂.၁ သန်း ပါဝင်သဖြင့် ဈေးကွက်ဝေစုအားဖြင့် ၄၆% သို့ လျော့ကျခဲ့ကြောင်း၊ ယခင်နှစ် ဖေဖော်ဝါရီလ၌ ရုရှား-ယူကရိန်း စစ်ပွဲစတင်ခဲ့သည့် နောက်ပိုင်း အိန္ဒိယသည် ဈေးနှုန်းသက်သာသော ရုရှားနိုင်ငံထုတ် ရေနံစိမ်းများကို ပိုမိုဝယ်ယူတင်သွင်းခဲ့ရာ တစ်ချိန်က အိန္ဒိယဈေးကွက်ဝေစု၏ ၉၀% ကို ရယူထားခဲ့သော အိုပက်နိုင်ငံများထံမှ ဝယ်ယူတင်သွင်းမှုမှာ ကျဆင်းလာခဲ့ခြင်းဖြစ်ကြောင်း သိရှိရသည်။

၂၀၂၂ ခုနှစ် ဖေဖော်ဝါရီလမတိုင်မီက ရုရှားနိုင်ငံအနေဖြင့် အိန္ဒိယ ရေနံစိမ်းတင်သွင်းမှုဈေးကွက်၌ ဝေစုရရှိမှုမှာ ၁% ပင် မပြည့်ခဲ့သော်လည်း အိန္ဒိယရေနံကုမ္ပဏီများသည် ယခုနှစ် ဧပြီလအတွင်း တစ်ရက်လျှင် ရေနံစိမ်းစည်ပေါင်း ၁.၆၇၈ သန်းကို ဝယ်ယူတင်သွင်းခြင်းဖြင့် ရုရှားနိုင်ငံ၏ အိန္ဒိယဈေးကွက်၌ ဝေစုရရှိမှုကို ၃၆% သို့ ရောက်ရှိစေခဲ့သည်။ Vortexa ၏ စာရင်းများအရ အိန္ဒိယ၏ ရုရှားနိုင်ငံထံမှ ရေနံစိမ်းတင်သွင်းမှုမှာ ၂၀၂၂ ခုနှစ် မတ်လတွင် တစ်ရက်လျှင် ရေနံစည်ပေါင်း ၆၈၆၀၀ သာရှိရာမှ ၂၀၂၃ ခုနှစ် မတ်လ၌ တစ်ရက်လျှင် ရေနံစည်ပေါင်း ၁.၆၄ သန်းသို့ တိုးတက်ခဲ့ကြောင်း သိရှိရသည်။

Source: Economic Times, May 07, 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

ထိုင်းနိုင်ငံ၌ ၂၀၂၃ ခုနှစ် ပထမ ၃ လအတွင်း ဆန်တန်ချိန် ၂ သန်းကျော် တင်ပို့

ပြည်ပကုန်သွယ်မှုသတင်းများ

ထိုင်းနိုင်ငံအနေဖြင့် ၂၀၂၃ ခုနှစ် ဇန်နဝါရီလမှ မတ်လအတွင်း ပြည်ပသို့ ဆန်တန်ချိန် ၂.၀၆ သန်း၊ တန်ဖိုးအားဖြင့် ဘတ်ငွေ ၃၈.၀၆ ဘီလီယံကျော် တင်ပို့နိုင်ခဲ့ရာ ယခင်နှစ်ကာလတူနှင့် နှိုင်းယှဉ်ပါက ကုန်စည်ပမာဏ၌ ၈.၄၈% တိုးတက်လျက် တန်ဖိုးအားဖြင့် ၂၉.၂၆% တိုးတက်ခဲ့ကြောင်း သိရှိရသည်။

ထိုသို့ ပထမ ၃ လပတ်၌ ဆန်တန်ချိန် ၂ သန်းကျော်တင်ပို့မှုတွင် အီရတ်နိုင်ငံသို့ ၁၆.၃၈% ၊ အင်ဒိုနီးရှားနိုင်ငံသို့ ၁၃.၀၈% ၊ အမေရိကန်ပြည်ထောင်စုသို့ ၈.၆၂% ၊ တောင်အာဖရိကနိုင်ငံသို့ ၈.၂၄% နှင့် ဆီနီဂေါနိုင်ငံသို့ ၅.၈၆% ပါဝင်ခဲ့ကြောင်း၊ ကုန်စည်၏အရည်အသွေးနှင့် ပြိုင်ဘက်ကင်းသည့် ကြန်အင်လက္ခဏာတို့အရ ထိုင်းဆန်သည် ကမ္ဘာ့ဈေးကွက်တွင် ရေပန်းစားကျော်ကြားမှုရှိကြောင်း၊ ကွဲပြားခြားနားသော စပါးမျိုးများအား စိုက်ပျိုးထုတ်လုပ်မှု၊ ပြည်ပသို့ တင်ပို့ခြင်းမပြုမီ စံချိန်စံညွှန်းများ စစ်ဆေးမှုနှင့် ကမ္ဘာ့ဆန်ဈေးကွက်အခြေအနေ စသည်တို့ကို ဆန်စပါးစိုက်ပျိုး ထုတ်လုပ်သည့်တောင်သူများအနေဖြင့် ပိုမိုသိမြင်နားလည်စေရန် ရည်ရွယ်လျက် “ထိုင်းဆန်စပါး ညီလာခံ ၂၀၂၃” ကို ဧပြီလ ၂၄ ရက်နေ့နှင့် ၂၅ ရက်နေ့များ၌ ချင်းရိုင်မြို့တွင် နိုင်ငံခြားကုန်သွယ်မှု ဦးစီးဌာနက စီစဉ်ကျင်းပခဲ့ကြောင်း၊ ကမ္ဘာ့ဆန်စပါး စိုက်ပျိုးထုတ်လုပ်မှုနှင့် ဈေးကွက်တင်ပို့မှုတွင် ဦးဆောင်နိုင်ငံ ဖြစ်လာစေရေး မျှော်မှန်း အကောင်အထည်ဖော်လျက်ရှိသော ထိုင်းဆန်စပါး မဟာဗျူဟာ (၂၀၂၀-၂၀၂၄) နှင့်အညီ အဆိုပါ ညီလာခံကို ကျင်းပခဲ့ခြင်းဖြစ်ကြောင်း အစိုးရ၏ ပြောရေးဆိုခွင့်ရှိသူ Mr. Anucha Burapachaisri က မေလ ၂ ရက်နေ့တွင် ပြောကြားခဲ့ပါသည်။

ထိုင်းနိုင်ငံ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် ၂၀၂၃ ခုနှစ်အတွင်း ပြည်ပသို့ ဆန်တန်ချိန် ၇.၅ သန်းမှ ၈ သန်းအထိ တင်ပို့နိုင်ရေး လျာထားဆောင်ရွက်လျက်ရှိကြောင်း သိရှိရသည်။

Source: The Nation Thailand, 2 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

ကမ္ဘာ့ဘဏ်က ယခုနှစ်တွင် နိုင်ငံတကာ ဆန်ဈေး ၁၇ ရာခိုင်နှုန်း တက်မည်ဟု ခန့်မှန်းထား

ပြည်ပကုန်သွယ်မှုသတင်းများ

နိုင်ငံတကာဆန်ဈေးအနေဖြင့် ယခင်နှစ်နှင့် နှိုင်းယှဉ်လျှင် ၁၇ ရာခိုင်နှုန်းအထိ မြင့်တက်လျက် ၂၀၂၃ ခုနှစ်တွင် တစ်တန်လျှင် ၅၁၀ ဒေါ်လာအထိ ရောက်ရှိနိုင်ကြောင်း ကမ္ဘာ့ဘဏ်က ခန့်မှန်းလျက်ရှိသည်။

ဝါရှင်တန်မြို့တွင် ဧပြီလ ၂၇ ရက်နေ့က ထုတ်ပြန်သည့် နှစ်စဉ်ကုန်စည်ဈေးကွက်အလားအလာခန့်မှန်းချက်တွင် ယခုနှစ်ပထမသုံးလပတ်တွင် အားကောင်းသောဝယ်လိုအားနှင့် ကြပ်တည်းသည့်ထောက်ပံ့မှုများကြောင့် ဆန်ဈေးနှုန်းမှာ ၁၁ ရာခိုင်နှုန်း မြင့်တက်လာသည်ဟု ဖော်ပြခဲ့သည်။

အိန္ဒိယ၊ ထိုင်းနှင့် ဗီယက်နမ်တို့တွင် အမေရိကန်ဒေါ်လာနှင့်ယှဉ်၍ ငွေကြေးများတန်ဖိုးတက်ခြင်းနှင့်အတူ အာရှဒေသအတွင်း ပွဲတော်များနှင့် ပြန်လည်သိုလှောင် စုဆောင်းခြင်းများကြောင့် ဝယ်လိုအားများပြားခြင်းဖြစ်ကြောင်း၊ ကြပ်တည်းသော ထောက်ပံ့မှုဟုဆိုရာတွင် တရုတ်၊ အိန္ဒိယ၊ မြန်မာ၊ ထိုင်းနှင့် ဗီယက်နမ် စသည့် အာရှ၏ဆန်ထုတ်လုပ်သည့် နိုင်ငံများ ပါဝင်လျက်ရှိကြောင်း၊ ယခင်နှစ်၌ ပါကစ္စတန်နိုင်ငံတွင် ရေကြီးနစ်မြုပ်မှုကြောင့် စပါးရိတ်သိမ်းမှုနှင့် ဆန်တင်ပို့မှုထိခိုက်ခဲ့ခြင်းသည်လည်း ဆန်ဈေးနှုန်းများ မြင့်တက်စေသည့် အကြောင်းအရင်းတစ်ရပ်ဖြစ်ကြောင်း ကမ္ဘာ့ဘဏ်၏ အစီရင်ခံစာ၌ ဖော်ပြပါသည်။

ထိုင်းနိုင်ငံ၏ ဆန်ကွဲ ၅ ရာခိုင်နှုန်း ပါဝင်သော ဆန်လုံးရှည်ဈေးနှုန်းအပေါ် အခြေခံ၍ နိုင်ငံတကာဆန်ဈေးနှုန်းများသည် ပျမ်းမျှ တစ်တန်လျှင် ၂၀၂၀ ပြည့်နှစ်တွင် ၄၉၇ ဒေါ်လာ၊ ၂၀၂၁ ခုနှစ်တွင် ၄၅၈ ဒေါ်လာနှင့် ယခင်နှစ်က ၄၃၇ ဒေါ်လာအထိ ကျဆင်းခဲ့သည်။

Source: Khmer Times, 30 Apr 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

မလေးရှားနိုင်ငံ၌ ရာသီဥတုကြောင့် စပါးစိုက်ခင်း ဟက်တာ ၈၀၀၀ ခန့် အထွက်နှုန်း ထိခိုက်ဖွယ်ရှိ

ပြည်ပကုန်သွယ်မှုသတင်းများ

မလေးရှားနိုင်ငံ Kelantan ပြည်နယ်၌ စပါးစိုက်ခင်း ဟက်တာ ထောင်ချီမှာ ပူပြင်းသော ရာသီဥတုကြောင့် ယခုနှစ်တွင် မျှော်မှန်းထားသည့် အထွက်နှုန်းကို ရရှိနိုင်ဖွယ်မရှိကြောင်း သိရှိရပါသည်။

အဆိုပါ Kelantan ပြည်နယ်အတွင်း စပါးစိုက်ခင်း ၂၆၈၃၃ ဟက်တာအနက် ဒေသ ၅ ခုရှိ ဟက်တာ ၇၈၀၀ ခန့်မှာ ပူပြင်းသော ရာသီဥတုနှင့် မိုးခေါင်ရေရှားမှုဒဏ်ကို ကြုံတွေ့နေရကြောင်း၊ ပြီးခဲ့သည့်နှစ် ဒီဇင်ဘာလ၌ စိုက်ပျိုးပြီး ယခုနှစ်ဧပြီလတွင် ရိတ်သိမ်းသည့် ၂၀၂၂ ခုနှစ် ဒုတိယစပါးစိုက်ရာသီအတွင်း မုတ်သုံရာသီအပြောင်းအလဲဒဏ်ကို လယ်သမား ၃၉၀ နီးပါး ခံစားရခဲ့ကြောင်း၊ ဤအချက်က စပါးခင်းများ ကြီးထွားဖွံ့ဖြိုးမှုအပေါ် သက်ရောက်မှုရှိပြီး အခြေအနေ ပိုမိုဆိုးရွားလာပါက ကောက်ပဲသီးနှံပင်များ၏ အရိုးတံများ ထိခိုက်ပျက်စီးမည်ဖြစ်ကြောင်း၊ ရာသီဥတုပူပြင်းမှုက ရေအရင်းအမြစ်များ ရှားပါးမှုကို ဖြစ်ပေါ်စေပြီး လယ်ကွင်းများသို့ ရေပေးဝေမှုကို အလှည့်ကျစနစ်ဖြင့် ဖြန့်ဝေနေရကြောင်း၊ သို့ဖြစ်ရာ စပါးအထွက်နှုန်း လျော့ကျလာနိုင်ပြီး လယ်သမားများ၏ဝင်ငွေကိုလည်း သက်ရောက်မှုရှိလာနိုင်ကြောင်းဖြင့် ပြည်နယ်ရှိ Kemubu စိုက်ပျိုးရေးဖွံ့ဖြိုးတိုးတက်မှု အာဏာပိုင်အဖွဲ့မှ အထွေထွေမန်နေဂျာ Mohd Faizul Mustafa က ပြောကြားခဲ့သည်။

Kemubu စိုက်ပျိုးရေး အာဏာပိုင်အဖွဲ့ အနေဖြင့် လယ်သမားများ ကြီးမားစွာ ဆုံးရှုံးမှု မဖြစ်ပေါ်စေရန်အတွက် ရာသီဥတုဒဏ်ခံနေရသည့် ဒေသများသို့ ရွေ့လျားပန့်များ ပေးဝေခြင်း၊ စက်ရေတွင်းများ တူးဖော်ရန်အတွက် မြေအောက်ရေအရင်းအမြစ်များ ဖော်ထုတ်ခြင်းနှင့် ၎င်းတို့ အဖွဲ့ထံ၌ မှတ်ပုံတင်ထားသော ပန့်များအတွက် ဒီဇယ်လောင်စာများ ထောက်ပံ့ခြင်း စသည့် အစီအမံများ ဆောင်ရွက်ခဲ့ကြောင်း၊ စပါးစိုက်ခင်းများသို့ ရေရောက်ရှိရန်အတွက် ဆည်မြောင်းသွယ်၍ ရေပေးဝေခြင်းစနစ်ကိုလည်း အသုံးပြုသွားမည်ဖြစ်ကြောင်း သိရှိရသည်။

Source: The Star, May 04, 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

Languages

Main menu

ပြည်ပကုန်သွယ်မှုသတင်းများ

အိန္ဒိယနိုင်ငံ၌ ဓာတ်မြေဩဇာလုပ်ငန်း ၁၁၂ ခု၏ လိုင်စင်များအား အစိုးရက ပယ်ဖျက်

သံသတ္တုရိုင်း တစ်တန်လျှင် ဒေါ်လာ ၁၀၀ အောက် ဈေးနှုန်းကျဆင်း

အီသနောလောင်စာရောစပ်မှု ၁၂% ရရှိအောင် အိန္ဒိယသကြားစက်ရုံများက ဆောင်ရွက်လျက်ရှိ

ဆီးဂိမ်းပြိုင်ပွဲ၌ ကမ္ဘောဒီးယား၏ ကျေးရွာတစ်ရွာထုတ်ကုန်တစ်မျိုး ကုန်စည်များ ခင်းကျင်းပြသ

အာဆီယံ၏ ဒေသသုံးငွေကြေးဖြင့် ပေးချေရန် ကြေညာချက်မူကြမ်းကို ထိုင်းအစိုးရက အတည်ပြု

ဗီယက်နမ်နိုင်ငံ၌ ပထမဦးဆုံးတည်ဆောက်ခဲ့သော ရေနံချက်စက်ရုံအား အဆင့်မြှင့်တင်မည်

အိုပက်နိုင်ငံများထံမှ အိန္ဒိယနိုင်ငံ၏ ရေနံစိမ်းဝယ်ယူမှု ကျဆင်းခဲ့ခြင်း

ထိုင်းနိုင်ငံ၌ ၂၀၂၃ ခုနှစ် ပထမ ၃ လအတွင်း ဆန်တန်ချိန် ၂ သန်းကျော် တင်ပို့

ကမ္ဘာ့ဘဏ်က ယခုနှစ်တွင် နိုင်ငံတကာ ဆန်ဈေး ၁၇ ရာခိုင်နှုန်း တက်မည်ဟု ခန့်မှန်းထား

မလေးရှားနိုင်ငံ၌ ရာသီဥတုကြောင့် စပါးစိုက်ခင်း ဟက်တာ ၈၀၀၀ ခန့် အထွက်နှုန်း ထိခိုက်ဖွယ်ရှိ

Pages

You are here

ပြည်ပကုန်သွယ်မှုသတင်းများ

Pages