ပြည်ပကုန်သွယ်မှုသတင်းများ

အာဖရိကဒေသရှိ ဆီနီဂေါ၊ ဂမ်ဘီယာနှင့် ဂျီဘိုတီ နိုင်ငံများသို့ အစိုးရချင်း ညှိနှိုင်းသည့် G2G အစီအစဉ်ဖြင့် ဆန်ကွဲတန်ချိန် ၇၅၀၀၀ ကို တင်ပို့ဖွယ်ရှိကြောင်း အိန္ဒိယ ကုန်သည်အသိုင်းအဝိုင်းက ပြောဆိုလျက်ရှိကြပါသည်။ ပြည်ပနိုင်ငံများ၏ စားနပ်ရိက္ခာ ဖြည့်ဆည်းရန် လိုအပ်ချက်အရ ဆန်ကွဲတင်ပို့ခြင်းကို အစိုးရအဖွဲ့၏ သဘောတူညီချက်ဖြင့် ခွင့်ပြုသွားမည်ဖြစ်ကြောင်း အိန္ဒိယအစိုးရက ပြီးခဲ့သည့် သီတင်းပတ်၌ အမိန့်ကြော်ငြာစာ ထုတ်ပြန်ခဲ့ပြီးနောက် ယခုကဲ့သို့ သတင်းထွက်ပေါ်လာခြင်းဖြစ်သည်။

အာဖရိကဒေသရှိ နိုင်ငံများစွာက အိန္ဒိယမှ ပေါင်းဆန်အပြင် ဆန်ကွဲများကိုပါ ဝယ်ယူလိုကြောင်း တောင်းဆိုမှုများရှိလာချိန်၌  ယခုကဲ့သို့ မူဝါဒပြောင်းလဲမှု ဖြစ်ပေါ်လာခြင်းလည်းဖြစ်သည်။ အိန္ဒိယအစိုးရသည် မတ်လအစောပိုင်း၌ ဆီနီဂေါသို့ ဆန်ကွဲတန်ချိန် ၂.၅ သိန်း၊ ဂမ်ဘီယာသို့ ဆန်ကွဲတန်ချိန် ၁ သိန်း၊ ဂျီဘိုတီနှင့် အီသီယိုးပီးယားသို့ ဆန်တန်ချိန် ၁၀၀၀၀ တင်ပို့ရန် ခွင့်ပြုခဲ့သည်။

နယူးဒေလီမြို့ အခြေစိုက် ဆန်ကုန်သည်တစ်ဦးဖြစ်သူ Mr. Rajesh Paharia Jain က ဗီယက်နမ်နှင့် ပါကစ္စတန် ပင်ရင်းဒေသဆန်များနှင့် နှိုင်းယှဉ်ပါက အိန္ဒိယဆန်ဈေးနှုန်းမှာ ပိုမိုသက်သာမှုရှိကြောင်း၊ သင်္ဘောပေါ်အရောက် FOB ဈေးနှုန်းအပေါ် ဆန်အဆင့်အတန်းအလိုက် ၂၀% ပို့ကုန်အခွန် တန်ဖိုးအားဖြင့် ၆၅ ဒေါ်လာမှ ၇၅ ဒေါ်လာအထိ ထပ်ဆောင်းကုန်ကျမှုရှိသည်ကိုပင် ကျယ်ပြန့်စွာ လက်ခံဝယ်ယူလျက်ရှိကြကြောင်း၊ အဆိုပါ အာဖရိက ၃ နိုင်ငံသို့ ဆန်ကွဲ တင်ပို့ရန်မှာ အိန္ဒိယပြည်ပကုန်သွယ်ရေးညွှန်ကြားမှုဦးစီးဌာနက မူဝါဒထုတ်ပြန်ရန် ကျန်ရှိနေကြောင်း၊ ဘင်္ဂလားဒေ့ရှ်နိုင်ငံသည်လည်း G2G အစီအစဉ်ဖြင့် အိန္ဒိယမှဆန်များ ဝယ်ယူတင်သွင်းမည်ဟု ခန့်မှန်းရကြောင်းဖြင့် ပြောဆိုပါသည်။

အိန္ဒိယနိုင်ငံ၌ ပို့ကုန်အခွန် ၂၀ ရာခိုင်နှုန်းအပါအဝင် ဆန်ကွဲ ၅% ပါဝင်သော ဆန်ဖြူ FOB ဈေးနှုန်း ၁ တန်လျှင် ၄၈၀ ဒေါ်လာ၊ ဆန်ကွဲ ၂၅% ပါဝင်သောဆန် FOB ဈေးနှုန်း ၁ တန်လျှင် ၄၆၀ ဒေါ်လာဖြင့် တင်ပို့လျက်ရှိကြောင်း၊ အလားတူ ဆန်အမျိုးအစားများအတွက် FOB ဈေးနှုန်း ၁ တန်လျှင် ထိုင်းဆန်သည် ၅၁၁ ဒေါ်လာနှင့် ၄၉၄ ဒေါ်လာ၊ ဗီယက်နမ်ဆန်သည် ၄၉၈-၅၀၂ ဒေါ်လာနှင့် ၄၈၃-၄၈၇ ဒေါ်လာ ပေါက်ဈေးရှိရာ အိန္ဒိယဆန်သည် ဈေးနှုန်းအရ ယှဉ်ပြိုင်နိုင်မှုနှင့် တည်နေရာအရ သယ်ယူပို့ဆောင်စရိတ်သက်သာမှု အားသာလျက်ရှိကြောင်း၊ ပေါင်းဆန်တင်ပို့ရာတွင်လည်း ဆန်ကွဲ ၅% ပါဝင်သော ပေါင်းဆန် FOB ဈေးနှုန်း ၁ တန်လျှင် ထိုင်းနိုင်ငံမှ ၅၂၃ ဒေါ်လာနှင့် ပါကစ္စတန်နိုင်ငံမှ ၅၈၃-၅၈၇ ဒေါ်လာ အသီးသီး ကမ်းလှမ်းနေချိန်တွင် အိန္ဒိယကုန်သည်များအနေ ဖြင့် ဇူလိုင်လနှင့် ဩဂုတ်လ သင်္ဘောတင်ပို့မှုအတွက် ၃၈၅ ဒေါ်လာခန့်ဖြင့် ရောင်းချပေးနိုင်ကြောင်း သိရှိရပါသည်။

Source: The Hindu Business Line, 1 Jun 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

ရာသီဥတုပြောင်းလဲမှုကြောင့် စပါးစိုက်ပျိုးနိုင်သည့် ဧရိယာလျော့နည်း ကျဆင်းလာမှုနှင့် လိုက်လျောညီထွေရှိစေရန်၊ သဘာဝပတ်ဝန်းကျင်အား ကာကွယ်ရန်နှင့် ပြည်တွင်း စားနပ်ရိက္ခာဖူလုံမှု သေချာခိုင်မာစေရန်အတွက် ဗီယက်နမ်နိုင်ငံသည် ပြည်ပသို့ ဆန်တင်ပို့ရာတွင် အရည်အသွေးမြင့်ဆန်များ တင်ပို့မှုကို တိုးမြှင့်လျက် အရေအတွက်ကိုမူ လျော့ချသွားမည်ဖြစ်ပါသည်။

ဗီယက်နမ်အစိုးရက မေလ ၂၆ ရက်နေ့၌ အတည်ပြုခဲ့သော ဆန်တင်ပို့မှု မဟာဗျူဟာအရ ၂၀၃၀ ပြည့်နှစ်တွင် ပြည်ပသို့ ဆန်တင်ပို့မှု တန်ချိန် ၄ သန်းသို့ ရောက်ရှိသည်အထိ နှစ်စဉ်တင်ပို့မှုပမာဏ လျော့ချမည်ဖြစ်ရာ ယခင်နှစ်၌ တင်ပို့မှုတန်ချိန် ၇.၁ သန်းနှင့် နှိုင်းယှဉ်ပါက ၄၄% ခန့် လျော့ကျမည်ဖြစ်သည်။ သို့ဖြစ်ရာ ၂၀၂၂ ခုနှစ်၌ ဆန်တင်ပို့မှု တန်ဖိုး ဒေါ်လာ ၃.၄၅ ဘီလီယံ ရှိရာမှ ၂၀၃၀ ပြည့်နှစ်တွင် ၂.၆၂ ဘီလီယံသို့ ကျဆင်းမည်ဖြစ်သည်။

ဗီယက်နမ်နိုင်ငံ၊ မဲခေါင်မြစ်ဝကျွန်းပေါ်ဒေသ၌ ရာသီဥတုပြောင်းလဲမှုကြောင့် စပါးစိုက်ပျိုးနိုင်သည့်ဧရိယာ ကျဆင်းလျက်ရှိရာ အချို့သောလယ်သမားများသည် သရက်၊ စပျစ်၊ ပိန္နဲနှင့် ဒူးရင်းစသည့် သစ်သီးဝလံစိုက်ခင်းများအဖြစ် ပြောင်းလဲစိုက်ပျိုးမှုနှင့် ပုစွန်မွေးမြူရေးကဲ့သို့ လုပ်ငန်းပြောင်းလဲမှုများ လုပ်ဆောင်လာကြကြောင်း၊ သို့ရာတွင် လယ်သမားအများစုသည် စပါးစိုက်ပျိုးမှု အပေါ် အမှီပြုနေကြရဆဲဖြစ်ကြောင်းဖြင့် ဆန်ကုန်သည်များက ရိုက်တာသတင်းဌာနသို့ ပြောဆိုခဲ့ကြသည်။ မဲခေါင်မြစ်ဝကျွန်းပေါ်ဒေသ၌ ရာသီဥတုပြောင်းလဲမှုကြောင့် ပင်လယ်ရေမျက်နှာပြင် မြင့်တက်လာမှုနှင့်အတူ လယ်ယာမြေများသို့ အငန်ဓါတ်ဝင်ရောက်မှုမှာ သိသာစွာ များပြားလာခဲ့ပြီး ဒေသခံများ၏ ပုစွန်မွေးမြူရေးလုပ်ငန်းသို့ ပြောင်းလဲလုပ်ကိုင်မှုမှာ နှစ်ကာလ အတန်ကြာမြင့်ခဲ့ပြီ ဖြစ်ပါသည်။

ဗီယက်နမ်အစိုးရ၏ ထုတ်ပြန်ချက်တွင် ပို့ကုန်ဈေးကွက် နိုင်ငံတစ်ရပ်ရပ်အပေါ် မှီခိုနေရမှု အား လျော့ချရန်အတွက် ၎င်း၏ ဆန်တင်ပို့မှုကို ဈေးကွက်ပေါင်းစုံသို့ ဖြန့်ခွဲမည်ဖြစ်ကြောင်း ဖော်ပြပါသည်။ လက်ရှိကာလတွင် ဗီယက်နမ်၏ အဓိက ဆန်ပို့ကုန်ဈေးကွက်မှာ ဖိလစ်ပိုင်နိုင်ငံဖြစ်ပြီး ယခင်နှစ်၌ စုစုပေါင်းဆန်တင်ပို့မှုပမာဏ၏ ၄၅% ခန့်ကို တင်ပို့ခဲ့သည်။ မေလအတွင်း အင်ဒိုနီးရှားနိုင်ငံ၌ ကျင်းပသော ဒေသတွင်းအစည်းအဝေးတွင် ဗီယက်နမ်နိုင်ငံအနေဖြင့် ဖိလစ်ပိုင်နိုင်ငံသို့ သင့်တင့်သည့် ဈေးနှုန်းဖြင့် ကာလရှည်ကြာစွာ ဆန်များပေးသွင်းရန် ဆန္ဒရှိကြောင်းဖြင့်  ဗီယက်နမ်ဝန်ကြီးချုပ် ဖန်မင်ချင်းက ဖိလစ်ပိုင်သမ္မတ ဖာဒီနန်မားကို့စ်ဂျူနီယာအား ပြောကြားခဲ့သည်။

ဆန်အမျိုးအစားနှင့် အဆင့်အတန်းအလိုက် ဈေးကွက်ပေါင်းစုံသို့ ပြောင်းလဲတင်ပို့မည့် မဟာဗျူဟာအား ဗီယက်နမ်အစိုးရက ချမှတ်မှုနှင့် စပ်လျဉ်း၍  ဆန်စပါးစိုက်ပျိုးထုတ်လုပ်မှုသည် အစိုးရတစ်ရပ်၏ ဆုံးဖြတ်ချက်အပေါ် မူတည်ခြင်းမရှိပဲ ဈေးကွက် ဝယ်လိုအားနှင့် ရောင်းလိုအားတို့အပေါ် မူတည်ခြင်းသာဖြစ်ရာ အဆိုပါမဟာဗျူဟာ၏ လက်တွေ့အကောင်အထည်ဖော်နိုင်မှုမှာ စောဒကတက်ဖွယ်ရာရှိကြောင်းဖြင့် မဲခေါင်မြစ်ဝကျွန်းပေါ်ဒေသရှိ An Giang ပြည်နယ်မှ ဆန်ကုန်သည် တစ်ဦးက ရိုက်တာသတင်းဌာနသို့ ပြောကြားခဲ့ပါသည်။

Source: CNBC News, 27 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

၂၀၂၂ ခုနှစ်၊ ဧပြီလတွင် အိန္ဒိယနိုင်ငံ၌ နေကြာဆီ ဆိပ်ကမ်းအရောက်တစ်တန်ဈေးနှုန်းမှာ အမေရိကန်ဒေါ်လာ ၂၁၅၅ နှင့် ပဲပုပ်ဆီ ဆိပ်ကမ်းအရောက်တစ်တန်လျှင် အမေရိကန်ဒေါ်လာ ၁၉၀၉ ဖြစ်ပေါ်ခဲ့ပါသည်။ သို့ရာတွင် ၂၀၂၂ ခုနှစ်၊ ဇူလိုင်လတွင် ကုလသမဂ္ဂနှင့် တူရကီနိုင်ငံတို့၏ ကြားဝင်ဆောင်ရွက်မှုကြောင့် ရှရှားနှင့် ယူကရိန်း ကြား ပင်လယ်နက်ဒေသ ကောက်ပဲသီးနှံများ လွတ်လပ်စွာ တင်ပို့မှုဆိုင်ရာ သဘောတူ စာချုပ်ချုပ်ဆိုခဲ့ပြီး  အခြေအနေများပြောင်းလဲမှု ဖြစ်ပေါ်ခဲ့ပါသည်။ အဆိုပါသဘောတူစာချုပ်အရ ယူကရိန်းနိုင်ငံရှိ ကောက်ပဲသီးနှံများ၊ နေကြာဆီ၊ အသားနှင့် အစေ့အဆန်များကို လွတ်လပ်စွာ သင်္ဘောတင်ဆောင်၊ ဖြတ်သန်းသွားလာခွင့်ရရှိခဲ့ပါသည်။ အဆိုပါအခြေအနေက နိုင်ငံတကာဟင်းသီးဟင်းရွက်ဆီ ဈေးနှုန်းများကို ကျဆင်းစေပြီး ရှရှား - ယူကရိန်း ပဋိပက္ခ စစ်ကြိုကာလထက် ပိုမိုကျဆင်းကြောင်း၊ လက်ရှိအချိန်၌ မေလအတွင်း အိန္ဒိယနိုင်ငံအရောက် နေကြာဆီ CIF တစ်တန်ဈေးနှုန်းမှာ အမေရိကန်ဒေါ်လာ ၉၅၀ သာရှိပြီး ပဲပုပ်ဆီဈေးနှုန်းသည်လည်း တစ်တန်လျှင် ၉၉၀ သာရှိကြောင်း ChemAnalyst News သတင်း ဝက်ဘ်ဆိုက်၌ ဖော်ပြထားပါသည်။

အိန္ဒိယနိုင်ငံသည် နှစ်စဉ် စားသုံးဆီပမာဏ တန်ချိန် ၂၃.၅ သန်းမှ ၂၄ သန်းကြား စားသုံးမှု ရှိရာ စားအုန်းဆီအား တန်ချိန် ၈.၈၅ သန်း၊ ပဲပုပ်ဆီကို တန်ချိန် ၄.၅ သန်းမှ ၅ သန်းကြား၊ မုန်ညှင်း ဆီအား တန်ချိန် ၃ သန်းမှ ၃.၅ သန်းကြား၊ နေကြာဆီကို တန်ချိန် ၂ သန်းမှ ၂.၅ သန်းကြား သုံးစွဲ ကြောင်း၊ ပြည်တွင်းလိုအပ်ချက် ပြည့်မီစေရန် စားသုံးဆီတန်ချိန် ၁၃.၅ သန်းနှင့် ၁၄ သန်းကြား နှစ်စဉ် တင်သွင်းရကြောင်း သိရပါသည်။ အိန္ဒိယပြည်တွင်း၌ နေကြာဆီကို တန်ချိန် ၅၀၀၀၀ နှင့် စားအုန်းဆီကို တန်ချိန် ၃ သိန်းသာ ထုတ်လုပ်နိုင်သဖြင့် ၎င်းဆီ ၂ မျိုးကို အဓိက တင်သွင်းနေရကြောင်းနှင့် ပြည်တွင်းဈေးကွက် လိုအပ်ချက်အတွက် မုန်ညှင်းဆီကို ၁၀၀ ရာခိုင်နှုန်း ထုတ်လုပ် နိုင်ပြီး ပဲပုပ်ဆီကို ၃၀-၃၂ ရာခိုင်နှုန်း အသီးသီး ထုတ်လုပ်နိုင်ကြောင်း ဖော်ပြပါရှိပါသည်။

Source: ChemAnalyst News, 23 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

အိန္ဒိယနိုင်ငံတွင် ယခင်နှစ် ဝါဂွမ်းဈေးနှုန်းသို့ မြင့်တက်ရောက်ရှိရန် မျှော်မှန်းပြီး သိုလှောင်ထားခဲ့ကြသော ဝါဂွမ်းများကို လယ်သမားများမှ ဈေးကွက်သို့ပို့ဆောင် ရောင်းချမှုများပြားလာသဖြင့် ဝါဂွမ်းဈေးနှုန်းများမှာ ၈% မှ ၁၂% အကြား အသီးသီးလျော့နည်းကျဆင်းခဲ့ကြောင်း သိရှိရပါသည်။

တစ်ထုပ်လျှင် ၁၇ဝ ကီလိုဂရမ်ရှိ ဝါဂွမ်းဘေထုပ်များ ဈေးကွက်အတွင်း ဝင်ရောက်မှုမှာ  ယခင်က တစ်ရက်လျှင် ပျမ်းမျှ ၂ဝဝဝဝ ထုပ်သာရှိခဲ့ရာမှ ၂ဝ၂၃ ခုနှစ် မေလတွင် ၅ ဆ မြင့်တက်ခဲ့ပြီး တစ်ရက်လျှင် ဝါဂွမ်းဘေထုပ် ၁ သိန်းအထိ ရောက်ရှိလာကြောင်း၊ MCX အိတ်ချိန်းဈေးကွက်၌ ဇွန်လအတွက် ချုပ်ဆိုသော ဝါဂွမ်းစာချုပ်များသည် မေလ ၂၂ ရက်နေ့တွင် ဈေးနှုန်း ၃.ဝ၅% ကျဆင်းခဲ့ကြောင်း၊ လက်ငင်း ကုန်သွယ်သောဈေးနှုန်းများမှာ မဟာရဋ္ဌပြည်နယ်တွင် ၃၅၆ ကီလို ဂရမ်ဝင် တစ်ကန်ဒီလျှင် ရူပီး ၆၂ဝဝဝ မှ ရူပီး ၅၇ဝဝဝ သို့ကျဆင်းခဲ့ကြောင်းနှင့် လယ်သမားများမှ ဝါးဂွမ်းအစေ့ထုတ် စက်ရုံများသို့ ရောင်းချသော အစေ့ပါဝါဂွမ်းကုန်ကြမ်းဈေးနှုန်းမှာ တစ်ကွင် တယ်လျှင် ရူပီး ၈ဝဝဝ မှ ရူပီး ၇ဝဝဝ - ၇၂ဝဝ သို့ကျဆင်းခဲ့ကြောင်း သိရှိရပါသည်။ 

Source: Economic Times, 23 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)

အစားအသောက် ဘေးကင်းလုံခြုံ စိတ်ချရမှုရှိစေရေးနှင့် အထူးသဖြင့် အမျိုးသမီးများ ပါဝင်လုပ်ကိုင်လျက်ရှိသော လုပ်ကွက်ငယ်လယ်သမားပေါင်း ၁၂၃၀၀၀ ကျော်၏ ဝင်ငွေတိုးတက်ရရှိစေရေးအတွက် ဘင်္ဂလားဒေ့ရှ်နိုင်ငံ၌ ပြောင်းလဲမှုများကို ခံနိုင်ရည်ရှိသော ဆန်စပါးဈေးကွက်အဖြစ် မြှင့်တင်နိုင်ရန် နိုင်ငံတကာငွေကြေးကော်ပိုရေးရှင်း (IFC) သည် Meghna Group of Industries (MGI) ၏ လက်အောက်ခံ ကုမ္ပဏီဖြစ်သော Tanveer Food Limited (TFL) သို့ ဒေါ်လာ ၃၅ သန်း ထည့်ဝင်ရင်းနှီးမြှုပ်နှံမည်ဖြစ်ကြောင်း သိရှိရပါသည်။

အဆိုပါ ရင်းနှီးမြှုပ်နှံမှုသည် ကမ္ဘာ့စားနပ်ရိက္ခာ အကျပ်အတည်းကို တုံ့ပြန်နိုင်ရန်နှင့် ကုန်ထုတ်လုပ်မှု တိုးတက်စေရေး ပိုမိုခံနိုင်ရည်ရှိသော ကမ္ဘာလုံးဆိုင်ရာ စားနပ်ရိက္ခာစနစ်ကို   တည်ဆောက်နိုင်ရန်အတွက် ဘဏ္ဍာရေးအထောက်အပံ့အဖြစ် ဒေါ်လာ ၆ ဘီလီယံ မတည်ပေးမည့် IFC  ၏ ကမ္ဘာလုံးဆိုင်ရာ စားနပ်ရိက္ခာဖူလုံရေးစင်္ကြန် (GFSP) အောက်၌ ပထမဆုံးအကြိမ် ဆောင်ရွက်မှု ဖြစ်ပါသည်။

ထိုသို့ ရင်းနှီးမြှုပ်နှံရာတွင် IFC ၏ ကိုယ်ပိုင်ငွေစာရင်းမှ ဒေါ်လာ ၂၁ သန်းနှင့် ကမ္ဘာလုံးဆိုင်ရာ စိုက်ပျိုးရေးနှင့် စားနပ်ရိက္ခာဖူလုံရေးအစီအစဉ် (GAFSP) ၌  ပုဂ္ဂလိကကဏ္ဍ၏ထည့်ဝင်‌မှု မှ ဒေါ်လာ ၁၄ သန်းအထိ လက်အောက်ခံချေးငွေများ ပါဝင်သည်။ အဆိုပါ ရန်ပုံငွေဖြင့် TFL သည် Bogura ဒေသတွင် ခေတ်မီဆန်းသစ်သော အလိုအလျောက် လည်ပတ်နိုင်သည့် ဆန်စက်ကို တည်ဆောက်မည်ဖြစ်ပြီး  ကြိတ်ခွဲအား တစ်ရက်လျှင် မက်ထရစ်တန်ချိန် ၁၀၀၀ ရှိပြီး ၂၀၂၇ ခုနှစ်တွင် အရည်အသွေးမီ ဆန်တန်ချိန် ၁၇၀၀၀၀ ကျော် ထုတ်လုပ်နိုင်မည်ဖြစ်သည်။ ထို့အပြင် ကြိတ်ခွဲအား တစ်ရက်လျှင် မက်ထရစ်တန်ချိန် ၈၀ ရှိသော ဖွဲနုဆီစက်ရုံနှင့် ကုန်ထုတ်လုပ်သည့်ကာလအတွင်း ရာသီဥတုဖောက်ပြန်မှုများကို ကုစားနိုင်ရန်နှင့် စွမ်းအင်ကုန်ကျစရိတ်များကို ခံနိုင်ရည်ရှိစေရန် ပံ့ပိုးပေးမည့် စပါးခွံအခြေခံ လျှပ်စစ်ဓာတ်အားပေးစက်ရုံတို့ကိုလည်း တည်ဆောက်မည်ဖြစ်သည်။

ယခုကဲ့သို့ ရင်းနှီးမြုပ်နှံမှုသည် ဘင်္လားဒေ့ရှ်နိုင်ငံ မြောက်ပိုင်းရှိ ၎င်းတို့၏ ကြိတ်ခွဲထုတ် လုပ်မှုလုပ်ငန်းများ၊  ဆန်ထွက်ကုန်များ ဖြန့်ဖြူးမှုများကို တိုးချဲ့လုပ်ကိုင်နိုင်မည်ဖြစ်ကြောင်း၊ ဝင်ငွေတိုးတက်မှုနှင့်အတူ စားသုံးသူ၏ ရွေးချယ်စားသုံးမှုအလေ့အထများ ပြောင်းလဲပြီး ထုပ်ပိုးထားသော ဆန်များအပေါ် ဝယ်လိုအားကောင်းလာသည့်အတွက် ဘင်္ဂလားဒေ့ရှ်နိုင်ငံ၏ဆန်စပါးကြိတ်ခွဲကဏ္ဍကို ခေတ်မီအောင် သမားရိုးကျဆန်စက်များမှ အလိုအလျောက် လည်ပတ်နိုင်သည့် ခေတ်မီဆန်စက်များဆီသို့ ပြောင်းလဲလုပ်ဆောင်သွားမည်ဖြစ်ကြောင်း၊ ဤကဲ့သို့ ဆောင်ရွက်ခြင်းဖြင့် ဆန်အရည်အသွေး ကောင်းမွန်စေပြီး ထုပ်ပိုးထားသောဆန်များ၏ သက်တမ်းကို တိုးတက်စေမည်ဖြစ်ကြောင်း MGI မှ ဒါရိုက်တာ Ms. Tahmina Binthe Mostafa က ပြောကြားခဲ့ပါသည်။

ကမ္ဘာ့တတိယမြောက် ဆန်အများဆုံးထုတ်လုပ်သည့်နိုင်ငံဖြစ်ပြီး ဆန်အားကယ်လိုရီအတွက် အဓိကအရေးပါသော အရင်းအမြစ်တစ်ခုအဖြစ် စားသုံးသည့် ဘင်္ဂလားဒေ့ရှ်နိုင်ငံသည်  ရုရှား - ယူကရိန်း ပဋိပက္ခကြောင့် စားနပ်ရိက္ခာနှင့် စွမ်းအင်ဈေးနှုန်းများ တစ်ဟုန်ထိုးမြှင့်တက်မှုနှင့် ကြီးမားသော စားနပ်ရိက္ခာဖူလုံမှုဆိုင်ရာ အန္တရာယ်တို့နှင့် ရင်ဆိုင်နေရပါသည်။

IFC ၏ အာရှနှင့်ပစိဖိတ်ဒေသဆိုင်ရာ ဒုတိယဥက္ကဌ Mr. Riccardo Puliti က ဘင်္ဂလားဒေ့ရှ်ကဲ့သို့သော နိုင်ငံမျိုးတွင် စားနပ်ရိက္ခာဖူလုံမှုသည်  ဆန်ဖူလုံမှုရှိရေးကို ဆိုလိုကြောင်း၊ ခေတ်မီ ဆန်စက်များ တည်ဆောက်ခြင်းအားဖြင့် အလုပ်အကိုင်များ ရာဂဏန်းအထိ ပေးစွမ်းနိုင်မည်ဖြစ်ကြောင်း၊ ယခုဆန်စီမံကိန်းသည် ကမ္ဘာ့စားနပ်ရိက္ခာဈေးကွက်၏ စျေးနှုန်းနှင့် ထောက်ပံ့ရေးဆိုင်ရာ ခြိမ်းခြောက်မှုများကို ခံနိုင်ရည်ရှိစေမည်ဖြစ်ပြီး စားသုံးသူများနှင့် တောင်သူလယ်သမားများ၏ အကျိုးစီးပွားအတွက် ပိုမိုခံနိုင်ရည်ရှိသော အနာဂတ်ကို တည်ဆောက်နိုင်မည်ဖြစ်ကြောင်း ပြောဆိုပါသည်။

IFC ၏ ရင်းနှီးမြှုပ်နှံမှုသည် ဘင်္ဂလား‌ဒေ့ရှ် လယ်သမားငယ်များ၏ ဆန်စပါးထုတ်လုပ်မှုမှ စျေးကွက်အတွင်းသို့ ဝင်ရောက်မှု၊ လက်ငင်းငွေပေးချေမှု၊ ဆန်သိုလှောင်ကာလ တိုတောင်းမှု၊ အလေအလွင့်လျော့ချမှုနှင့် စပါးအရည်အသွေးကို တိုးတက်ကောင်းမွန်မှုတို့ကို မြှင့်တင်ပေးမည်ဖြစ်ကြောင်း၊ IFC သည် လယ်သမားများ၏ လေ့ကျင့်သင်တန်းပို့ချမှု အစီအစဉ် အပါအဝင် လုပ်ငန်းဆိုင်ရာ အကောင်းဆုံးအလေ့အထများကို ဆောင်ရွက်ပေးမည်ဖြစ်ကြောင်း သိရှိရသည်။

Source: International Finance Corporation, 22 May 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)