အင်ဒိုနီးရှားနိုင်ငံ အလယ်ဂျာဗားပြည်နယ် Banjarnegara ခရိုင်၌ ဩဂုတ် ၂၈ ရက်မှ ၃၀ ရက်အထိကျင်းပခဲ့သည့် Dieng ကော်ဖီပွဲတော်တွင် အရောင်းအဝယ်တန်ဖိုး ရူပီး ၁၅ ဘီလီယံခန့် ရှိခဲ့ပြီး အမေရိကန်ဒေါ်လာ ၈၄၆,၀၀၀ ခန့်နှင့်ညီမျှကြောင်း သိရပါသည်။ အဆိုပါကော်ဖီပွဲတော် သည် ၁၆ ကြိမ်မြောက် Dieng ယဉ်ကျေးမှုပွဲတော် (DCF) ၏ အစီအစဉ်တစ်ရပ်အဖြစ် ကျင်းပ ခဲ့ခြင်းဖြစ်ကြောင်း သိရပါသည်။ Banjarnegara ခရိုင် ခရီးသွားလုပ်ငန်းနှင့် ယဉ်ကျေးမှုရုံး အကြီးအကဲ Tursiman က ဩဂုတ် ၃၀ ရက်တွင် Dieng Kulon ကျေးရွာ၌ ပြောကြားရာတွင် အဆိုပါအရောင်းအဝယ်တန်ဖိုးသည် ဒေသတွင်းစီးပွားရေး ဖွံ့ဖြိုးတိုးတက်ရေးအတွက် ပွဲတော်၏ ကြီးမားသည့် အလားအလာကိုဖော်ပြနေကြောင်း ပြောကြားခဲ့ပါသည်။ ထိုပမာဏသည် အလွန် ထူးခြားသည့်ပမာဏဖြစ်ပြီး ကော်ဖီပွဲတော်တစ်ခုတည်းမှရရှိခဲ့ခြင်းဖြစ်ကြောင်း ၎င်းကပြောကြား ပြီး DCF ပွဲတော်၏ အခြားအစီအစဉ်များမှ အရောင်းအဝယ်တန်ဖိုးများကိုမူ လက်ရှိတွင် စုစုပေါင်း တွက်ချက်ခြင်းမပြုရသေးကြောင်း ဆိုပါသည်။ Dieng ကော်ဖီပွဲတော်တွင် ဥပဒေရေးရာဝန်ကြီး ဌာန၏ ဉာဏပစ္စည်းမူပိုင်ခွင့်အထွေထွေညွှန်ကြားရေးမှူးရုံး၏ ပံ့ပိုးကူညီမှုဖြင့် ဒေသခံကော်ဖီ စိုက်ပျိုးထုတ်လုပ်သူ ၁၄ ဦးက ထုတ်လုပ်သည့်ကော်ဖီများအပြင် Banjarnegara ခရိုင်ရှိ မြို့နယ်ခွဲ အများအပြားမှထွက်ရှိသည့် ဒေသထွက်ကုန်ပစ္စည်း ၃၅ မျိုးကိုလည်း ခင်းကျင်းပြသခဲ့ကြောင်း သိရပါသည်။ ကော်ဖီသည် တန်ဖိုးမြင့်ကုန်စည်တစ်ရပ်ဖြစ်ပြီး ဒေသတွင်းစီးပွားရေး ဖွံ့ဖြိုး တိုးတက်မှုကို အထောက်အကူပြုနိုင်သည့် ကုန်စည်တစ်မျိုးဖြစ်ကြောင်း အဆိုပါ အရောင်းအဝယ် တန်ဖိုးကသက်သေပြနေသည်ဟု Tursiman က ပြောကြားခဲ့ပါသည်။ Banjarnegara ခရိုင်အနေဖြင့် ဒေသစီးပွားရေးတိုးတက်ရေးအတွက် ကော်ဖီကဏ္ဍကို အမြင့်ဆုံးအလားအလာရရှိ စေရန်နှင့် ဖွံ့ဖြိုးတိုးတက်စေရန် အပြည့်အဝအားထုတ်ဆောင်ရွက်သွားမည်ဖြစ်ကြောင်း ၎င်းက အလေးပေးပြောကြားခဲ့ပါသည်။ ထို့ပြင် ယင်းပွဲတော်မှတစ်ဆင့် ဒေသထွက်ကော်ဖီများ၏ ဈေးကွက်တန်ဖိုး ပိုမိုမြင့်တက်လာမည်ဟု မျှော်လင့်ကြောင်းလည်း ၎င်းကဆိုပါသည်။
Banjarnegara ခရိုင်အစိုးရအဖွဲ့သည် အင်ဒိုနီးရှားဗဟိုဘဏ်နှင့် ပူးပေါင်း၍ ၂၀၂၆ ခုနှစ် Dieng ယဉ်ကျေးမှုပွဲတော်၏အစီအစဉ်အားလုံးမှရရှိသည့် စုစုပေါင်းအရောင်းအဝယ်တန်ဖိုးကို တွက်ချက် သွားမည်ဖြစ်ကြောင်း သိရပါသည်။ Dieng ကော်ဖီပွဲတော် ကျင်းပရေးကော်မတီဥက္ကဋ္ဌ Alif Zain Fahmi က အဆိုပါပွဲတော်ကို အင်ဒိုနီးရှားဗဟိုဘဏ်နှင့် ပူးပေါင်းကျင်းပခြင်းဖြစ်ကြောင်း ဩဂုတ် ၂၈ ရက် ပွဲတော်ဖွင့်ပွဲတွင် ပြောကြားခဲ့ပါသည်။ အင်ဒိုနီးရှားဗဟိုဘဏ်သည် Banjarnegara ၏ ကော်ဖီလုပ်ငန်း ဖွံ့ဖြိုးတိုးတက်ရေးအတွက် ကော်ဖီစိုက်ပျိုးထုတ်လုပ်မှုမှသည် ထုတ်ကုန်ပြုပြင် ထုတ်လုပ်ခြင်းနှင့် ဈေးကွက်တင်ရောင်းချခြင်းအထိတစ်လျှောက်လုံး ဖွံ့ဖြိုးတိုးတက်လာစေရန် ရည်ရွယ်သည့်အစီအစဉ်အမျိုးမျိုးဖြင့် အစဉ်တစိုက်ပံ့ပိုးပေးလျက်ရှိကြောင်း Fahmi က ပြောကြားခဲ့ပါသည်။ Dieng ကော်ဖီပွဲတော်အပြင် ၁၆ ကြိမ်မြောက် Dieng ယဉ်ကျေးမှုပွဲတော်တွင် ဒေသတွင်းစီးပွားရေးလုပ်ငန်းများ တိုးတက်လာစေရန်ရည်ရွယ်သည့် ယဉ်ကျေးမှု၊ ခရီးသွားလုပ်ငန်းနှင့် ဖန်တီးမှုစီးပွားရေးဆိုင်ရာ အစီအစဉ်များကိုလည်း ထည့်သွင်းကျင်းပခဲ့ကြောင်း သိရ ပါသည်။
DOCA (ရန်ကုန်)