အင်ဒိုနီးရှားနိုင်ငံသည် ရေရှည်တည်တံ့သော ကိုကိုးနှင့် ဆီအုန်းထုတ်ကုန် တန်ဖိုး ကွင်းဆက်ဖွံ့ဖြိုးတိုးတက်ရေးအတွက် မလေးရှားနှင့် ပါပူအာနယူးဂီနီနိုင်ငံတို့နှင့် ပူးပေါင်းဆောင်ရွက်နိုင်မည့်အလားအလာအသစ်များကို ရှာဖွေလျက်ရှိကြောင်း သိရပါသည်။ အင်ဒိုနီးရှား အစားအသောက်ရေးရာပေါင်းစပ်ညှိနှိုင်းရေးဝန်ကြီးဌာနမှ အရာရှိ Nani Hendiarti ၏ ပြောကြား ချက်အရ ဩဂုတ် ၂၇ ရက်မှ ၂၈ ရက်အထိကျင်းပသည့် ရေရှည်တည်တံ့သော ကုန်စည်များ ဆိုင်ရာ ဒေသတွင်းလေ့လာရေးဖိုရမ် (Regional Learning Forum on Sustainable Commodities) သည် အကောင်းဆုံးလက်တွေ့ဆောင်ရွက်မှုများကိုဖော်ထုတ်၍ သုံးနိုင်ငံအကြား ပူးပေါင်းဖော်ဆောင်နိုင်ရန်ရည်ရွယ်သည့် ဆွေးနွေးပွဲတစ်ရပ်ဖြစ်ကြောင်း သိရပါသည်။ ထိုနှစ်ရက် တာဆွေးနွေးမှုအတွင်း နောက်ဆက်တွဲပူးပေါင်းဆောင်ရွက်ရေး အဆိုပြုချက်အသစ်များ ပေါ်ပေါက်လာနိုင်ကြောင်း အဆိုပါဝန်ကြီးဌာန၏ အစားအသောက်ရရှိနိုင်မှုနှင့် လုံခြုံရေးဆိုင်ရာ ပေါင်းစပ်ညှိနှိုင်းရေး ဒုတိယအကြီးအကဲ Nani Hendiarti က ဩဂုတ် ၂၇ ရက်တွင် ပြောကြား ခဲ့ပါသည်။ ဆီအုန်းနှင့် ကိုကိုးကဏ္ဍဖွံ့ဖြိုးတိုးတက်ရေးတွင်ရင်ဆိုင်နေရသည့် ရာသီဥတုပြောင်းလဲ မှု၊ ဇီဝမျိုးစုံမျိုးကွဲများဆုံးရှုံးမှုနှင့် ဈေးကွက်နှင့် တန်ဖိုးပြောင်းလဲမှုဆိုင်ရာ စိန်ခေါ်မှုများသည် နယ်စပ်ဖြတ်ကျော်သက်ရောက်မှုရှိသည့်ပြဿနာများဖြစ်သောကြောင့် စုပေါင်းဖြေရှင်းရန် လိုအပ် ကြောင်း ၎င်းကရှင်းလင်းပြောကြားခဲ့ပါသည်။ ထို့ပြင် အဆိုပါကုန်စည်နှစ်မျိုးကို အဓိကထုတ်လုပ် ပေးနေသည့် အသေးစားတောင်သူများပါဝင်ဆောင်ရွက်မှုသည် အရေးကြီးကြောင်း၊ ရေရှည် တည်တံ့သောတန်ဖိုးကွင်းဆက်ဖွံ့ဖြိုးတိုးတက်မှုမှ တောင်သူများနှင့် ဒေသခံလူထုအပါအဝင် သက်ဆိုင်သူများ အကျိုးခံစားခွင့်ရရှိစေရန်လိုအပ်ကြောင်း ၎င်းကဆိုပါသည်။ ပူးပေါင်းဆောင်ရွက် ရေးအဆိုပြုချက်များကို အစိုးရ၊ ပုဂ္ဂလိကလုပ်ငန်းများနှင့် အသေးစားတောင်သူများအပါအဝင် သက်ဆိုင်သူအားလုံးပါဝင်၍ လက်တွေ့အကောင်အထည်ဖော်နိုင်သည့်မူဝါဒများအဖြစ် ဆက်လက် ဖော်ဆောင်သွားမည်ဖြစ်ကြောင်း သိရပါသည်။ အင်ဒိုနီးရှား၏ စားနပ်ရိက္ခာစနစ်၊ မြေအသုံးချမှု နှင့် ပြန်လည်ထူထောင်ရေး (FOLUR) စီမံကိန်းအရ ဆီအုန်း၊ ကိုကိုး၊ ကော်ဖီနှင့် ဆန် စသည့် ကုန်စည်လေးမျိုး၏ ရေရှည်တည်တံ့သောတန်ဖိုးကွင်းဆက် ဖွံ့ဖြိုးတိုးတက်ရေးကို ဆောင်ရွက် ရန်သတ်မှတ်ထားကြောင်း Hendiarti က ပြောကြားခဲ့ပါသည်။ အဆိုပါအမျိုးသားစီမံကိန်းကို ဘက်စုံပတ်ဝန်းကျင်ရန်ပုံငွေဖြစ်သည့် Global Environment Facility (GEF) ကလည်း ထောက်ပံ့ပေးထားကြောင်း ၎င်းကဆက်လက်ပြောကြားခဲ့ပါသည်။ အလားတူ အင်ဒိုနီးရှားနိုင်ငံရှိ ကုလသမဂ္ဂ ဖွံ့ဖြိုးမှုအစီအစဉ် (UNDP) ၏ ဌာနေကိုယ်စားလှယ် Sara Ferrer Olivella က အင်ဒိုနီးရှား၊ မလေးရှားနှင့် ပါပူအာနယူးဂီနီတို့သည် အလားတူစိန်ခေါ်မှုများကို ရင်ဆိုင်နေရ သော်လည်း နိုင်ငံတစ်နိုင်ငံချင်းစီအတွက် သင့်လျော်သည့်ဖြေရှင်းနည်းများမှာ မတူညီနိုင်ကြောင်း ပြောကြားခဲ့ပါသည်။ တန်ဖိုးကွင်းဆက် ပြောင်းလဲဖော်ဆောင်ရေးအတွက် ပုဂ္ဂလိကကဏ္ဍသို့ ရန်ပုံငွေထောက်ပံ့မှုလိုအပ်သော်လည်း ရေရှည်တည်တံ့မှုနှင့် အသေးစားတောင်သူများ၏ အကျိုး စီးပွားများကိုလည်း လျစ်လျူရှုမထားသင့်ကြောင်း ၎င်းကဆိုပါသည်။ ဒေသတွင်းလေ့လာရေး ဖိုရမ်တွင် FOLUR စီမံကိန်း အကောင်အထည်ဖော်မှု၊ ရေရှည်တည်တံ့သော မြေယာရှုခင်း စီမံခန့်ခွဲမှု၊ ရေရှည်တည်တံ့မှုဆိုင်ရာ အသိအမှတ်ပြုလက်မှတ်များ၊ အသေးစားတောင်သူများ၏ စွမ်းဆောင်ရည်မြှင့်တင်ရေးနှင့် အခြားဆက်စပ်အစီအစဉ်များနှင့်ပတ်သက်၍ အတွေ့အကြုံများ နှင့် အကောင်းဆုံးလက်တွေ့ဆောင်ရွက်မှုများကို ဖလှယ်ခဲ့ကြကြောင်း သိရပါသည်။ ဖိုရမ်အတွင်း ကျင်းပသည့် စီးပွားရေးမိတ်ဖက်ချိတ်ဆက်ပွဲ၌ အင်ဒိုနီးရှား၊ မလေးရှားနှင့် ပါပူအာနယူးဂီနီနိုင်ငံ တို့၏ ဆီအုန်းကဏ္ဍမှ ရေရှည်တည်တံ့သော ဖွံ့ဖြိုးရေးအစီအစဉ်များကို အလားအလာရှိသော ရင်းနှီးမြှုပ်နှံသူများနှင့် ဝယ်ယူသူများထံမိတ်ဆက်ခဲ့ကြောင်း သိရပါသည်။ ထို့ပြင် အင်ဒိုနီးရှားနှင့် ပါပူအာနယူးဂီနီတို့တွင် ကိုကိုးကဏ္ဍအတွက် ထုတ်လုပ်မှုနှင့် ပြုပြင်ထုတ်လုပ်ရေး အခြေခံ အဆောက်အအုံများတည်ဆောက်ခြင်း၊ တောင်သူများ၏ စွမ်းဆောင်ရည်မြှင့်တင်ခြင်းတို့အပါ အဝင် ရင်းနှီးမြှုပ်နှံနိုင်သည့်အလားအလာများရှိနေကြောင်း သိရပါသည်။ အင်ဒိုနီးရှား စိုက်ပျိုးရေး ဝန်ကြီးဌာန၏ အချက်အလက်များအရ ၂၀၂၅ ခုနှစ်အထိ နိုင်ငံအတွင်း ဆီအုန်းစိုက်ခင်းဧရိယာမှာ ပြည်နယ် ၂၈ ခု၌ စုစုပေါင်း ဟက်တာ ၁၆.၈၃ သန်း ရှိကြောင်း သိရပါသည်။ ယင်းအနက် ၆.၉၃ သန်းဟက်တာကို အသေးစားတောင်သူများက စီမံခန့်ခွဲလုပ်ကိုင်လျက်ရှိပြီး တောင်သူဦးရေ ၃.၀၄ သန်း ပါဝင်သည်။ ၂၀၂၅ ခုနှစ်အတွင်း အင်ဒိုနီးရှားနိုင်ငံ၏ ဆီအုန်းစိမ်း (CPO) ထုတ်လုပ်မှုမှာ တန်ချိန် ၅၁.၆ သန်းရှိခဲ့ပြီး ၂၀၂၄ ခုနှစ်ထက် ၇.၅ ရာခိုင်နှုန်း တိုးတက်ခဲ့ကြောင်း သိရပါသည်။ တစ်ချိန်တည်းတွင် အင်ဒိုနီးရှားနိုင်ငံ၏ ကိုကိုးထုတ်လုပ်မှုမှာ ၂၀၂၅ ခုနှစ်တွင် တန်ချိန် ၆၁၆,၁၀၃ တန်ရှိခဲ့ပြီး ပျမ်းမျှမြေတစ်ဟက်တာလျှင်ထုတ်လုပ်မှုမှာ ၇၁၄ ကီလိုဂရမ်ရှိကြောင်း သိရပါသည်။
DOCA (ရန်ကုန်)