အင်ဒိုနီးရှားနိုင်ငံ၏ သကြားထုတ်လုပ်မှုသည် ၂၀၂၆ ခုနှစ်တွင် တန်ချိန် သုံးသန်းအထိ ရောက်ရှိလာမည်ဟုမျှော်မှန်းထားပြီး ပြည်တွင်းသကြားဖြူလိုအပ်ချက်ကို သွင်းကုန်များအပေါ် မှီခိုခြင်းမရှိဘဲ အပြည့်အဝဖြည့်ဆည်းပေးနိုင်မည်ဟု အင်ဒိုနီးရှားစိုက်ပျိုးရေးဝန်ကြီး Andi Amran Sulaiman က ပြောကြားခဲ့ပါသည်။ နိုင်ငံတော်၏သကြားထုတ်လုပ်မှုအတွက် ၎င်းတို့၏ရည်မှန်း ချက်မှာ သကြားဖြူတင်သွင်းမှုကိုအဆုံးသတ်ရေးဖြစ်ကြောင်း Sulaiman က ဩဂုတ် ၂၈ ရက် တွင် Lampung ပြည်နယ် Bandarlampung မြို့၌ ပြောကြားခဲ့ပါသည်။ အစိုးရအနေဖြင့် နိုင်ငံ၏ ကြံနှင့် သကြားထုတ်လုပ်မှုမြှင့်တင်ရန်အတွက် အသုံးချမှုနည်းပါးနေသည့် လယ်သမားပိုင် ကြံစိုက်ခင်းများကို အကောင်းဆုံးအသုံးချနိုင်ရေးအပါအဝင် ဆောင်ရွက်ချက်များစွာကို အကောင် အထည်ဖော်လျက်ရှိကြောင်း သိရပါသည်။ လက်ရှိတွင် လယ်သမားပိုင်ကြံစိုက်ခင်းမြေဧရိယာ၏ ၈၆ ရာခိုင်နှုန်းခန့်မှာ အခြေအနေမကောင်းသဖြင့် ထုတ်လုပ်မှုစွမ်းအားမြှင့်တင်နိုင်ရန် ပြန်လည် ပြုပြင်ထိန်းသိမ်းရန်လိုအပ်နေကြောင်း သိရပါသည်။ ၎င်းတို့၏မဟာဗျူဟာမှာ စုစုပေါင်းဧရိယာ ၏ ၈၆ ရာခိုင်နှုန်းရှိသည့် လယ်သမားပိုင်ကြံစိုက်ခင်းများကို ပြန်လည်ပြုပြင်ရန်ဖြစ်ကြောင်း ၎င်းကရှင်းလင်းပြောကြားခဲ့ပါသည်။ ထို့ပြင် သမ္မတ Prabowo Subianto ကလည်း အသုံးမချဘဲ ပစ်ထားသည့် လယ်သမားပိုင်ကြံစိုက်ခင်းမြေများကို ပြန်လည်ဖွံ့ဖြိုးတိုးတက်စေရန် စိုက်ပျိုးရေး ဝန်ကြီးဌာနအားညွှန်ကြားထားကြောင်း သိရပါသည်။ ယင်းအစီအစဉ်ကိုအထောက်အကူပြုရန် အစိုးရက နိုင်ငံတစ်ဝန်းရှိကြံစိုက်ခင်းမြေများကို ရှင်းလင်းခြင်းနှင့် ပြန်လည်စိုက်ပျိုးခြင်းလုပ်ငန်း များအတွက် ရူပီး ၁.၇ ထရီလီယံ (အမေရိကန်ဒေါ်လာ ၉၅.၉ သန်းခန့်) ခွဲဝေချထားပေးထား ကြောင်း သိရပါသည်။ ထို့ပြင် သတ်မှတ်ထားသည့်ရည်မှန်းချက်အောင်မြင်စေရန် နိုင်ငံအတွင်းရှိ သကြားထုတ်လုပ်ရေးကုမ္ပဏီများအားလုံးကိုလည်း ထုတ်လုပ်မှုမြှင့်တင်ရန် အစိုးရက တိုက်တွန်း လျက်ရှိကြောင်း သိရပါသည်။ တစ်ဖက်တွင် စိုက်ပျိုးရေးဝန်ကြီးဌာန၏ စိုက်ခင်းလုပ်ငန်း ယာယီ ညွှန်ကြားရေးမှူးချုပ် Heru Tri Widarto က Lampung ပြည်နယ်ရှိ ကြံစိုက်ပျိုးဧရိယာကို ၂၀၂၇ ခုနှစ်တွင် ဟက်တာ ၉၇,၉၇၀ အထိ ရောက်ရှိစေရန် ရည်မှန်းထားကြောင်း ပြောကြားခဲ့ပါသည်။ ယင်းရည်မှန်းချက်အတိုင်းအကောင်အထည်ဖော်နိုင်ပါက Lampung ပြည်နယ်၏ သကြား ထုတ်လုပ်မှုမှာ တန်ချိန် ၄၈၀,၀၅၃ အထိ ရောက်ရှိလာမည်ဟု ခန့်မှန်းထားကြောင်း သိရပါသည်။ ခန့်မှန်းထုတ်လုပ်မှုရည်မှန်းချက်မှာ သကြားတန်ချိန် ၄၈၀,၀၅၃ ဖြစ်ပြီး ယခုနှစ်အတွက် တန်ချိန် ၂၅၀,၀၀၀ အထိ ရောက်ရှိရန်မျှော်မှန်းထားကြောင်း ၎င်းကပြောကြားခဲ့ပါသည်။ အစိုးရအနေဖြင့် ကြံစိုက်ခင်းမြေများ၏ ထုတ်လုပ်မှုစွမ်းအားမြှင့်တင်ခြင်းနှင့် စိုက်ပျိုးဧရိယာ တိုးချဲ့ခြင်းတို့မှ တစ်ဆင့် နိုင်ငံ၏သကြားထုတ်လုပ်မှုကိုမြှင့်တင်ကာ သကြားဖြူတင်သွင်းမှုအပေါ် မှီခိုနေရမှုကို လျှော့ချသွားရန် မျှော်မှန်းထားကြောင်း သိရပါသည်။
DOCA (ရန်ကုန်)