မကွေးတိုင်းဒေသကြီး၊ ပခုက္ကူခရိုင်၊ ပခုက္ကူကုန်စည်ဒိုင်သည် အညာဒေသ၏ စီးပွားရေး အချက်အချာကျသောနေရာဖြစ်သည့်အတွက် ပတ်ဝန်းကျင်မြို့နယ်များမှ ပဲယင်းသီးနှံများ အဓိက ဝင်ရောက်လျက်ရှိပါသည်။ စိုက်ပျိုးသည့်ဒေသများမှာ ပခုက္ကူမြို့နယ်ရှိ မြစ်ခြေဒေသနှင့် ကျေးရွာများ၊ ရေစကြိုမြို့နယ်၊ ဆိပ်ဖြူမြို့နယ်နှင့် ဂန့်ဂေါခရိုင် တို့ဖြစ်ပြီး ထိုသို့ ဒေသအနှံ့အပြားမှ ထွက်ရှိလာသော ပဲယင်း (နီ/ဝါ)များကို ပခုက္ကူကုန်စည်ဒိုင်တွင် စုစည်း၍ ရန်ကုန်၊ မန္တလေးဒေသများသို့ ဆက်လက်တင်ပို့ ရောင်းချကြကြောင်း သိရသည်။
၂၀၂၆ ခုနှစ်၊ ဖေဖော်ဝါရီလဆန်းတွင် ပဲယင်းနီ တစ်တင်းလျှင် ကျပ် (၆၉၀၀၀)ဈေးဖြင့် စတင်ဝင်ရောက်ခဲ့ပြီး ဖေဖော်ဝါရီ (တတိယပတ်)တွင် ကျပ် (၇၀၅၀၀) ထိ ဈေးမြင့်တက်ခဲ့ပါသည်။ လက်ရှိ ဩဂုတ်လဆန်းပိုင်းတွင် နယ်စပ်နှင့် ပြည်တွင်းဝယ်လိုအားကြောင့် ပဲယင်းနီ တစ်တင်းလျှင် ကျပ် (၈၄၀၀၀) အထိ ဈေးမြင့်တက်နေပါသည်။
ပဲယင်းသီးနှံသည် ပြည်တွင်းစားသုံးမှုအပြင် ပြည်ပပို့ကုန် (တရုတ်)နိုင်ငံနှင့် ရန်ကုန်ဝယ်လက် များက အဓိက ဝယ်ယူနေသောကြောင့် ဈေးကွက် ပုံမှန်ရှိပါသည်။ ပဲသစ်ပေါ်ချိန် ဖေဖော်ဝါရီလတွင် တစ်တင်းလျှင် ကျပ်(၆၉၀၀၀) ဝန်းကျင်သာရှိပြီး နောက်ပိုင်းတွင် တစ်တင်းလျှင် ကျပ် (၈၄၀၀၀) ဝန်းကျင်အထိ မြင့်တက်လာခြင်းမှာ လက်ကျန်နည်းချိန်တွင် ဝယ်လိုအားကောင်းသောကြောင့် ဖြစ်သည်။ ပဲယင်းဈေးကွက်တွင် ပဲယင်း (အကြီး/အသေး)နှင့် ပဲယင်း (နီ)ဟူ၍ အမျိုးအစားအလိုက် အရောင်းအဝယ်ဖြစ်ပြီး အရည်အသွေးအပေါ်မူတည်၍ ဈေးနှုန်းကွာဟမှုရှိကြောင်း သိရသည်။
ယခုကာလသည် ပဲလက်ကျန်နည်းလာချိန်ဖြစ်၍ လာမည့်စိုက်ပျိုးရာသီအသစ် (အောက်တို ဘာ/နိုဝင်ဘာလ) မတိုင်မီအထိ ဈေးနှုန်းမှာ ကျဆင်းရန်မရှိဘဲ လက်ရှိဈေးတန်းတွင် ဆက်လက် တည်ငြိမ်နိုင်ပါသည်။ ယခုနှစ်တွင် တောင်သူများမှာ ပဲယင်းသီးနှံကို စျေးကောင်းရရှိသဖြင့် လာမည့်စိုက်ပျိုးရာသီတွင် ပဲယင်းကို ပိုမိုစိုက်ပျိုးလာနိုင်ပါသည်။ ပြည်ပ(တရုတ်)နိုင်ငံ၏ ဝယ်လိုအားအပြောင်းအလဲနှင့် ကုန်သွယ်ရေးအခြေအနေများပေါ်တွင် မူတည်၍ ဈေးနှုန်းအပြောင်းအလဲရှိနိုင်သည်ဟု ကုန်သည်များထံမှ သိရှိရပါသည်။
DOCA(မကွေး)