(၇-၈-၂၀၂၆) ရက်နေ့တွင် ညောင်တုန်းမြို့နယ်အတွင်းရှိ စက်သုံးဆီအရောင်းဆိုင်များအား စက်သုံးဆီများ လုံလောက်စွာရရှိရေး၊ သတ်မှတ်စည်းမျဉ်းစည်းကမ်းများနှင့် အညီ ရောင်းချလျက်ရှိမှု ရှိ/ မရှိ စိစစ်နိုင်ရေးအတွက် မြို့နယ်စားသုံးသူရေးရာ ဦးစီးဌာနနှင့် မိတ်ဖက်ဌာနများ ပူးပေါင်း၍ ကွင်းဆင်းစစ်ဆေးခဲ့ကြောင်း သိရသည်။
ကွင်းဆင်းစစ်ဆေးရာတွင် စက်သုံးဆီလက်ကျန်ပမာဏ၊ ဆီရရှိမှုနှင့် ဖြန့်ဖြူးရောင်းချမှုအခြေအနေများ၊ နေ့စဉ်အရောင်းစာရင်းများ၊ ဈေးနှုန်းများကို သတ်မှတ်ချက်နှင့်အညီ ဖော်ပြရောင်းချထားမှု ရှိ/ မရှိ၊ တိုင်းတာရောင်းချသည့် စက်ကိရိယာများ မှန်ကန်မှုနှင့် စားသုံးသူများအပေါ် ပွင့်လင်းမြင်သာစွာ ဝန်ဆောင်မှုပေးလျက်ရှိမှုတို့ကို စိစစ်စစ်ဆေးခဲ့ကြောင်း သိရသည်။
ထို့ပြင် အရောင်းဆိုင်တာဝန်ရှိသူများအား သတ်မှတ်ရည်ညွှန်းဈေးနှုန်းနှင့် အညီရောင်းချရေး၊ စက်သုံးဆီများကို လုံလောက်စွာ သိုလှောင်ထားရှိရေး၊ အရောင်းမှတ်တမ်းများကို စနစ်တကျပြုစုထားရှိရေးနှင့် စားသုံးသူများအတွက် အဆင်ပြေချောမွေ့စွာ ဝန်ဆောင်မှုပေးနိုင်ရေးတို့ကို လမ်းညွှန်မှာကြားခဲ့ကြောင်း သိရသည်။
စစ်ဆေးမှုအရ လက်ရှိတွင် ညောင်တုန်းမြို့နယ်ရှိ စက်သုံးဆီအရောင်းဆိုင်များ၌ စက်သုံးဆီများ ပုံမှန်ရရှိလျက်ရှိပြီး ဈေးနှုန်းများကို သတ်မှတ်ချက်နှင့်အညီ ရောင်းချလျက်ရှိကြောင်း သိရသည်။ မြို့နယ် စားသုံးသူရေးရာဦးစီးဌာနအနေဖြင့် စက်သုံးဆီဈေးကွက် တည်ငြိမ်ရေးနှင့် စားသုံးသူများ အဆင်ပြေစွာဝယ်ယူနိုင်ရေးအတွက် မိတ်ဖက်ဌာနများနှင့် ပူးပေါင်း၍ စဉ်ဆက်မပြတ် ကွင်းဆင်းစစ်ဆေး ကြပ်မတ် ဆောင်ရွက်လျက်ရှိကြောင်း သိရှိရပါသည်။
DOCA(ဧရာဝတီ)