(၁၅.၇.၂၀၂၆) ရက်နေ့တွင် ဓနုဖြူမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ Community Centre (လူထုအခြေပြုဗဟိုဌာန) ၌ "အွန်လိုင်းရောင်းချမှုနှင့်စပ်လျဉ်း၍ မှတ်ပုံတင်ဆောင်ရွက်နိုင်ရေး" ခေါင်းစဉ်ဖြင့် Talk Show အစီအစဉ်ကို ကျင်းပပြုလုပ်ခဲ့ကြောင်း သိရသည်။
Talk Show တွင် မြို့နယ်စားသုံးသူရေးရာဦးစီးဌာန၊ တာဝန်ရှိသူ ဦးခိုင်လွမ်းမိုးမှ အွန်လိုင်းစနစ်ဖြင့် ကုန်စည်နှင့်ဝန်ဆောင်မှုများ ရောင်းချနေသူများအနေဖြင့် သက်ဆိုင်ရာဥပဒေ၊ လုပ်ထုံးလုပ်နည်းများနှင့် အညီ မှတ်ပုံတင်ဆောင်ရွက်ရန်လိုအပ်ချက်၊ မှတ်ပုံတင်ခြင်း၏ အကျိုးကျေးဇူးများ၊ လျှောက်ထားရာတွင် လိုအပ်သည့် အချက်အလက်များနှင့် လိုက်နာရမည့် စည်းကမ်းချက်များကို အသေးစိတ်ရှင်းလင်းဆွေးနွေးခဲ့ကြောင်း သိရသည်။
ထို့ပြင် အွန်လိုင်းရောင်းချသူများအနေဖြင့် ကုန်စည်နှင့်ဝန်ဆောင်မှုဆိုင်ရာ အချက်အလက်များကို မှန်ကန်ပြည့်စုံစွာ ဖော်ပြရန်၊ စားသုံးသူများအား လှည့်ဖြားကြော်ငြာခြင်းနှင့် မမှန်ကန်သော သတင်းအချက်အလက်များဖြင့် ရောင်းချခြင်းတို့ကို ရှောင်ကြဉ်ရန်၊ စားသုံးသူအခွင့်အရေးများကို လေးစားလိုက်နာ၍ ယုံကြည်စိတ်ချရသော အွန်လိုင်းဈေးကွက်ပတ်ဝန်းကျင် ဖော်ဆောင်နိုင်ရေးကိုလည်း အသိပညာပေးဆွေးနွေးခဲ့ကြောင်း သိရသည်။
အဆိုပါ Talk Show အစီအစဉ်မှတစ်ဆင့် အွန်လိုင်းရောင်းချသူများနှင့် ပြည်သူများအနေဖြင့် အွန်လိုင်းရောင်းချမှုဆိုင်ရာမှတ်ပုံတင်လုပ်ငန်းစဉ်များကို ပိုမိုနားလည်သဘောပေါက်စေပြီး ဥပဒေနှင့် အညီ စနစ်တကျဆောင်ရွက်နိုင်စေရန် ရည်ရွယ်ကျင်းပခဲ့ကြောင်း သိရှိရပါသည်။
DOCA(ဧရာဝတီ)