မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ ကုန်စိမ်းသီးနှံဈေးကွက်သို့ ရှမ်းပြည်နယ် အောင်ပန်းနှင့် ပေါက်ဒေသထွက် အာလူးများ ဝင်ရောက်အရောင်းအဝယ် ဖြစ်လျက်ရှိပါသည်။ အာလူးသီးနှံသည် ပြည်သူအများ စားသုံးမှုမြင့်မားလျက်ရှိပြီး စားဖိုဆောင်သီးနှံအဖြစ် စားသုံးမှု အပြင် ဒေသတွင်း ကုန်ကြမ်းအာလူးသီးနှံမှတစ်ဆင့် တန်ဖိုးမြှင့်ထုတ်ကုန်အဖြစ် အာလူးကြော်ထုတ်လုပ်မှု လုပ်ငန်းများလည်း တွင်ကျယ်စွာ ဆောင်ရွက်လျက်ရှိ၍ အာလူးသီးနှံမှာ ဒေသတွင်း သုံးစွဲမှုများ၍ အရောင်းအဝယ်သွက်လျက်ရှိကြောင်း ဈေးကွက်မှ သိရသည်။
၂၀၂၆ ခုနှစ်၊ ဇူလိုင်လ(တတိယပတ်)တွင် အာလူးအလုံးအရွယ်အစားနှင့် အရည်အသွေးလိုက်၍ အာလူး(အလုံးကြီး)ရှယ် တစ်ပိဿာလျှင် ကျပ်(၅၅၀၀)၊ အာလူး(အလုံးလတ်) တစ်ပိဿာ လျှင် ကျပ်(၄၀၀၀)၊ အာလူး(အလုံးသေး) တစ်ပိဿာလျှင် ကျပ်(၃၅၀၀)ဈေးဖြင့် အရောင်းအဝယ် ဖြစ်လျက်ရှိပြီး ယခင်တစ်ပတ်နှင့်ဈေးနှုန်းနှိုင်းယှဉ်ပါက အာလူး(အလုံးကြီး)ရှယ် တစ်ပိဿာလျှင် ကျပ်(၁၀၀၀)ခန့်ဈေးနှုန်းမြင့်တက်ပြီး အာလူး(အလုံးလတ်)နှင့် အာလူး(အလုံးသေး)မှာ ဈေးနှုန်းပြောင်းလဲမှုမရှိဘဲ တည်ငြိမ်နေကြောင်း သိရှိရပါသည်။
ဈေးနှုန်းသုံးသပ်ချက်မှာ အာလူးသည် မိုးရာသီကာလဖြစ်သော်လည်း ကုန်အဝင်ပုံမှန် ရှိနေသဖြင့် ဈေးနှုန်းအနည်းငယ် အပြောင်းအလဲရှိနိုင်သော်လည်း လက်ရှိတွင် ပခုက္ကူအာလူးသီး ဈေးကွက်မှာ အရောင်းအဝယ်ပုံမှန်ရှိပြီး ဈေးနှုန်းတည်ငြိမ်လျက်ရှိကြောင်း မြို့မဈေးအာလူးပွဲရုံများထံမှ သိရှိရပါသည်။
DOCA(မကွေး)